Agjenti 007 duel pokeri me një shqiptar

[Asriana]

Agjenti 007 duel pokeri me një shqiptar


Alma Mile
13-12-2006



T ligjtë apo “negativët” tani nuk janë domosdoshmërisht “padrino” italianë, agjentë të KGB-së ruse, apo kamikazë arabë. Së fundmi historikut të kinemasë së aksionit dhe të thrillerit i është shtuar edhe elementi shqiptar. Në filmat italianë i gjen rëndom si kapobanda kriminelësh apo të prostitutave të lodhura. Ndërsa regjisori Martin Campbell e ka ngritur në rangun e një bankieri. Sigurisht kriminel, por pozicioni që ka është gjithsesi i “nderuar”. Ndeshet as më shumë e as më pak, por me vetë agjentin “007”. Nuk bëhet fjalë për armë zjarri, apo një dyluftim force, por inteligjence. Prej kësaj loje varet shkatërrimi ose jo i një organizate të tërë kriminale. Ky është varianti 2006 i 007-ës, “Casino Royale”, që prej datës 11 dhjetor po shfaqet në Kinema “Millenium”. Akoma pa filluar ka qenë një nga variantet më të përfolura gjatë gjithë rrugëtimit të agjentit anglez. Kjo për një arsye fare të thjeshtë, Bondi nuk ishte zeshkan dhe as ndonjë shtathedhur që bie në sy. Vetëm ta mendoje ishte “blasfemi”. Transformimi i agjentit mitik nga një zeshkan me një nënqeshje të hidhur në një biond me sy bojëqielli, mund të ngjallte veçse dyshime. Aktori anglez Daniel Craig nuk ka hijeshinë e Sean Connery-t dhe as të Pierce Brosnan-it. Gjithsesi ai është Bond, James Bond. Në të vërtetë Bondi i Craig-ut duket një karakter më i natyrshëm, më më njerëzor nga gjithë Bondët e tjerë. Ka edhe ai “armët” e veta të joshjes. Vështrim ngulmues bojëqielli, që herë – herë ashtu i gjakosur të shëmbëllen me një ujk, dialog i mprehtë dhe tek-tuk edhe një ecje prej modeli. Kuptohet si edhe në realizimet e tjera Bond-i është në vijën e parë të frontit.

Pjesa e parë e filmit që e gjen agjentin britanik në Madakaskar është aksion i pastër. Nuk mungojnë as ato skenat tipike për filma të tillë ku kundërshtarit i mungojnë gjithnjë fishekët në pistoletë përballë heroit tonë të paarmatosur. Për të mos folur më tej për akrobacirat, për shenjat e përleshjeve në fytyrë që zhduken si me magji sa hap e mbyll sytë. Por ngjarja që i jep edhe titullin filmit ndodh në Mal të Zi, në Shën Stefan në “Casino Royale”. Rrugës për atje hyn ajo, Vesper Lynd, një agjente e thesarit, që do të përshkojë peripecira bashkë me Bondin në Mal të Zi. Kjo është edhe dashuria e madhe e Bondit, e cila ka një fund tragjik. Pikërisht në fqinjin tonë veriperëndimor, në Mal të Zi, Bondi takon edhe bankierin shqiptar, interpretuar nga aktori danez Mads Mikkelsen. I gjatë, i veshur mirë, me lëkurë të zbehtë, me flokë të zinj të lyer me “brilantinë” dhe tmerrësisht i frikshëm. Në syrin e majtë dallohet qartazi një shenjë, pasojë e ndonjë përleshjeje të mundshme. Kjo i ka shkaktuar edhe dëmtimin e kanalit të lotit, nga i cili pikon gjak në momente nervozizmi. Ai është “Le chiffre”, “Shifra”, ose “Numri”, një bankier që “ushqen” organizatat terroriste. Një gjeni në matematikë dhe i paarritshëm në lojën e shahut. Sipas “Casino Royale”, variantit të përpunuar të veprës së shkruar nga Ian Fleming, “Lë Shifrë” ka lindur në Shqipëri. Nuk e ka pasur keq grupi i skenaristëve që i ka veshur kombësinë shqiptare një gjeniu në matematikë, apo në shah. Të tillë Shqipëria ka nxjerrë. Thuhet madje që në vitet ‘89-‘90 Banka Shtetërore e Shqipërisë spekulonte rrezikshëm me paratë në bursën botërore. Dhe “Lë shifrë” mund të jetë një prej këtyre mendjeve “gjeniale” që kryente transaksione, por nga pamja nuk lë përshtypje të tillë. Nëse nuk do të ishte përmendur që “Lë shifrë” është shqiptar, zor se do të shkonte ndër mend. Më shumë se një shqiptar, aktori Mikkelsen në këtë rol përngjason me një rus me një anglishte me aksent të rrëmbyer. Megjithatë, pavarësisht origjinës, ai mundet në poker nga Bond, duke humbur paratë e organizatës terroriste, ashtu siç thuhet në fillimedekadën e fundit të shek. XX, iu ndodhi bankierëve shqiptarë.



Histori agjentësh

Agjenti 007, James Bond është një krijesë e shkrimtarit Ian Fleming në vitin 1952. deri sa vdiq Fleming shkroi novela e tregime ku në qendër është agjenti britanik. Një temë kjo që u rimor nga të tjerë shkrimtarë e skenaristë. Për herë të parë 007 u shfaq në kinema në vitin 1962 nga regjisori Terence Young dhe James Bond u interpretua nga aktori i njohur Sean Connery i cili interpretoi këtë rol edhe në disa pjesë të tjera deri në vitin 1971. Përveç Connery-t roli i Bond-it është interpretuar edhe nga aktorët George Lazenby, Roger Moore, Timothy Dalton, Pierce Brosnan e së fundmi nga britaniku Daniel Caig. Bilancet tregojnë se gjashtë pjesët e interpretuara nga Connery kanë sjellë fitime të larta, më së shumti “Thunderball” me 166 milionë dollarë. Të ardhurat u ulën ndjeshëm gjatë Bondëve të tjerë, por më së shumti në pjesët e interpretuara nga Timothy Dalton kur zbritën në 39,1 milionë dollarë. Brosnan arriti të ngrinte disi shifrat, por ende nuk dihet si do të jetë bilanci në fund të rrugëtimit të “Casino Royal” ku luan bjondi Daniel Craig.


Marre nga gazeta ''SHEKULLI''

[Bond007]

Sa i perket keti filmi nuk eshte luejt ne MZ ! por ne Bahamas-Ceki-Veneci !
Film i mir ka qen (eshte) por aktori bjond pak e cuditshme !!!