Hiqet nga Rendi i Dites Projektligji per Memorialin e Presidentit Rugova

[Arb]

Kritika të ashpra për heqjen nga rendi i ditës së projektligjit për Memorialin e Presidentit Rugova

Prishtinë, 11 janar– Kryekuvendari Kolë Berisha, në seancën e parë të Kuvendit iu bëri thirrje deputetëve dhe partive politike që të harrojnë të gjitha ndasitë dhe të jenë unik deri në përcaktimin e statusit dhe krijimit të qeverisë së parë në Kosovën e pavarur.

"U bëj thirrje që derisa të përfundojë procesi i definimit të statusit të Kosovës, derisa të bëhet Kushtetuta, të mbahen zgjedhjet e para nacionale dhe lokale, të formojmë qeverinë e parë të Kosovës së pavarur, që t'i lëmë në një anë kundërthëniet, interesat e ngushta partiake, klanore e ideologjike,etj, dhe të bashkohemi vetëm për një qëllim në bërjen e shtetit ët Kosovës", tha Berisha.

Ndërsa pas këtij fjalimi seanca ka vazhduar me diskutimin për rendin e ditës. Mospajtimet janë shprehur nga deputetët e LDK-së, të cilët kanë kundërshtuar fuqishëm heqjen nga rendi i ditës për herë të dytë të Projektligjit për Memorialin e Presidentit të Kosovës Ibrahim Rugova.

E para që ka kundërshtuar ishte deputetja Besa Gaxheri. "A nuk u vjen turp që tani të bëhet një vit dhe asnjë hap në shenjë nderimi nuk kanë bërë këto institucione për Presidentin Rugova.

Ju nuk jeni në gjendje që një ligj për Rugovën ta miratoni në Kuvend, kur çdo delegacion kombëtar e ndërkombëtar, kur vjen në Kosovë shkon e përulet para varrit të tij, dhe ju nuk skuqeni, as nuk turpëroheni se nuk keni bërë që një vit asnjë investim në atë vend", tha Gaxheri.

Ajo më pas ka kritikuar institucionet e Kosovës, që sipas saj e kanë dëmtuar krejt atë që ka krijuar Rugova. "Por, gaboheni shumë, sepse kjo nuk do t'ju lejohet nga vetë qytetarët e Kosovës", tha ajo.

Gaxherri i kërkoi kryekuvendarit Berisha që të kursente përgjigjet, e paraqitura edhe në opinion se për shkak të implikimeve buxhetore të paanalizuara mirë është tërhequr Projektligji për Memorialin e Presidentit Ibrahim Rugovës, sepse sipas saj, është e papranueshme për LDK-në që të lejohet që të bëhet lojë për këtë Projektligj.

Ajo duke argumentuar reagimin e saj, ua kujtoi deputetëve dhe opnionionit vetëm një fakt. "Fëmijët e Rugovës janë rritur pa fëmijëri, ata 16 vite të rinisë së tyre kaluan brenda mureve të Rezidencës, andaj ata meritojnë respektin e institucioneve të Kosovës, ose së paku të LDK-së", ka thënë Gaxheri.

Por, sipas kryekuvendarit Berisha, Projektligji për Memorialin e Presidentit Rugova është tërhequr përkohësisht dhe shumë shpejt do të jetë në rend të ditës.

Kuvendi më pas vazhdoi punimet duke miratuar në seancën e paradites projektligjin për kimikalet, për numrin personal si dhe atë për emrin personal, duke kompletuar një pjesë të legjislacionit për çështje civile. Por, me kërkesë të Grupit Parlamentar të PDK-së është hequr nga rendi i ditës Raporti i Komisionit Evropian për progresin në Kosovë, ndërsa me kërkesë të Grupit Parlamentar LDK-së është hequr nga rendi i ditës edhe Projektligji për shndërrimin e poseduesve të paluajtshmërive private në pronar, si dhe rekomandimet e Komisionit për Buxhet dhe Financa për aprovimin e transferim të mjeteve të Ministrisë së Bujqësisë, Pylltarisë dhe Zhvillimit Rural. Kuvendi vazhdon punimet në orët e pasdites me shqyrtimin e projektligjeve tjera.

QIK-u

[Arb]

Berisha bëri thirrje për unitet në vendimmarrje deri sa të përfundojë definimi i statusit të Kosovës

Prishtinë, 11 janar - Kryetari i Kuvendit të Kosovë Kolë Berisha, duke folur sot para deputetëve në mbledhjen plenare, përkujtoi se viti 2007 është vit vendimtar dhe historik për Kosovën dhe për popullin e saj.

Duke marrë parasysh peshën e çështjes me të cilën do të përballen institucionet dhe rolin historik ndaj të sotmes dhe të nesërmes, tha ai, "atëherë lind nevoja për një mobilizim më të madh të të gjithë neve së bashku, në mënyrë që t'i përmbushim premtimet që ia kemi dhënë elektoratit, ta përmbushim porosinë e atyre që u flijuan për një të vetmin qëllim - realizimin e asaj që është qëllim i të gjithë neve që jemi këtu", theksoi Berisha.

"Ajo që kërkohet prej nesh është punë me përgjegjësi, ndërgjegjësimi dhe koshienca jonë për proceset. Nëse të tjerët flenë edhe ditën, ne nuk do të duhej të flemë as natën", the kreu i Kuvendit të Kosovës, duke shtuar se "çështja sa është motivuese e emocionuese, është po aq edhe serioze".

Gjatë muajve në vijim, tha më tej Berisha, "Kuvendi do të përballet me sfida ndër më ndryshmet dhe ndër më të rëndat", sepse siç u shpreh, "do të marrë vendime, ndoshta shumë të vështira, vendime që do ta përcaktojnë dhe do ta definojnë qartë fatin e Kosovës, fatin e fëmijëve tanë dhe të fëmijëve të fëmijëve tanë".

Kryeparlamentari Berisha paralajmëroi se Kuvendi i Kosovës shumë shpejt, pas konsultimeve dhe harmonizimit të qëndrimeve, "do t'i përcaktojë kriteret dhe do të marrë vendim për miratimin e Këshillit Kushtetues, i cili do ta hartojë Kushtetutën e re, Kushtetutën e parë të Kosovës së pavarur".

Po ashtu ai bëri të ditur se Kuvendi shumë shpejt do të vërë në rend dite edhe çështjen e simboleve: Flamurin, Himnin dhe simbolet e tjera të shtetit të ardhshëm të Kosovës.

Gjithashtu Berisha paralajmëroi deputetët se së shpejti do ta kenë para vetes për shqyrtim, "paketën e Marti Ahtisarit" dhe se duhet të japin "përgjigjen e duhur".

Njëkohësisht ai tha se Kuvendi shumë shpejt do të ketë para vetes për "shqyrtim dhe miratim një numër të madh projektligjesh dhe aktesh të tjera nënligjore, me të cilat, do të rregullohen fusha të ndryshme të jetës, tani, në rrethana të reja, në një Kosovë të pavarur dhe sovrane", duke kërkuar që komisionet përkatëse të jenë shumë më azhure.

Të gjitha këto detyra të rënda, tha Berisha, do të përmbushen "me lehtësi nëse vërtet jemi unikë, nëse vërtet jemi të përgjegjshëm, nëse vërtet e duam këtë vend, e duam këtë tokë, siç po deklarohemi çdo ditë".

Prandaj kryeparlamentari Berisha u bëri thirrje të gjithë deputetëve dhe qeveritarëve që deri sa të përfundojë procesi i definimit të statusit të Kosovës të jenë unikë në vendimmarrje.

"Derisa ta bëjmë Kushtetutën tonë, derisa duhet t'i mbajmë zgjedhjet e para lokale dhe nacionale, dhe ta formojmë qeverinë e parë në Kosovën e pavarur, t'i lëmë me një anë kundërthëniet e çastit, t'i lëmë me një anë interesat e ngushta partiake, klanore, ideologjike, farefisnore, etj., (të cilat, në të tjera rrethana, do të ishin krejt normale)".

Pasi citoi fjalën e urtë: "Nëse nuk jemi bashkë në të njëjtin front, do të jemi bashkë në të njëjtin litar", Berisha ftoi që të gjithë së bashku, pozitë dhe opozitë, shumicë dhe pakicë, të jenë në nivel të përgjegjësive që kanë dhe unikë në vendimmarrje, si dhe të përgjegjshëm për rolin historik që kanë.

QIK-u