Troja

[Dar_di]

“Troja” mbron këngët nga politika

Prishtinë, 9 dhjetor – Rock-grupit kosovar “Troja” po i pengon fakti që këngët e tij po dëgjohen në fushata elektorale të partive politike, që garojnë në zgjedhjet të cilat në vend do të mbahen këtë të diel. Kritikat që përmbajnë tekstet e këngëve të këtij grupi duket se po u përshtaten më së miri opozitarëve që të kritikojnë partinë në pushtet. Frontmeni i këtij grupi, Bujar Berisha, ka reaguar për këtë, duke dashur t’ia bëjë me dije publikut të tij se katërshja trojane nuk ka asnjë parti.

“Ne nuk e kemi nisur këtë punë për të hyrë në politikë”, ka thënë Berisha. Transmetimit të këngëve të tyre në fushata i jep një epitet. “Është uzurpim i pronës private”, thotë ai.
Mega-hiti i këtij grupi, “Amaneti i Clownit”, është dëgjuar së fundi në Skënderaj, në tubimin publik elektoral të organizuar nga Lidhja Demokratike e Dardanisë (LDD). Në zgjedhjet e kaluara kishte qenë Aleanca për Ardhmërinë e Kosovës (AAK) ajo që fushatat e veta i shoqëronte me tingujt e këngëve të “Trojës”. Për Berishën e “Trojës” nuk është aspak i rëndësishëm fakti se cila parti i lëshon në tubimet e veta këngët e grupit të tij.
“Për ne të gjitha partitë janë njësoj, kushdo që e ka përdorur nuk na ka pyetur se a mund ta përdorë ose jo”, ka thënë Berisha. “Nuk e kemi shitur e as nuk po e përkrahim asnjë parti. E as nuk po duam të na e keqpërdorin emrin tonë në fushata të veta, sepse kjo nuk është aspak fer”, ka shtuar ai.

Por Gani Geci, nënkryetar i LDD-së, ka një “arsye” që fushatën e ka shoqëruar me tingujt e trojaneve: “Amenetin e Clownit” thotë se e ka për zemër.
“Ajo fraza ‘kush janë ata që nuk kanë msu që njeri nuk ban shpin e vet me vjedh’ është madhështore”, ka thënë Geci, teksa ka shtuar se nuk e di nëse duhet pyetur dikë për të lëshuar një DVD.

“Njeriu e lëshon një këngë të cilën e ka për zemër. Ajo këngë më pëlqen shumë. Jam shumë merakli i asaj kënge, e dëgjoj me endje”, ka shtuar Geci. Geci nuk mendon se me “trojanët” po hyn në gjynah. “A e kanë me e shit ata CD-në? Ne veç po e dëgjojmë këngën që po na pëlqen”, është shprehur ai.

“Nuk e di qysh është e rregulluar me ligj e drejta e autorit, mirëpo ne nuk po e përdorim atë si slogan tonin. Kemi mundur ta lëshojmë edhe Michael Jacksonin”, ka shtuar ai.
Por Ligji për të drejtat e autorit dhe të drejtat e përafërta - i miratuar në Kuvendin e Kosovës në qershor të vitit 2006 – e ndalon një gjë të tillë, ani pse ky ligj nuk është funksional në Kosovë as për së afërmi.

Në nenin 29 të tij përcaktohen të drejtat e paraqitjes publike të një vepre artistike.
“E drejta e paraqitjes publike është e drejtë ekskluzive e autorit të lejojë a ndalojë që me mjete teknike t’i komunikohet publikut vepra e tij audiovizuele, vepra fotografike, vepra figurative, vepra e arteve aplikative dhe e dizajnit industrial, vepra koreografike dhe prezantimet e natyrës shkencore apo teknike”, shkruan në këtë nen.

Vokalisti i “Trojës” thotë se nuk e kanë ndërmend që të ngrenë padi ndaj atyre që po përdorin këngët e tyre pa i pyetur ata, për çka jep edhe arsyen e tij.
“Nuk ka ende gjykata dhe ligj të fortë, kështu që nuk ia vlen me paditë, por nuk është mirë me e keqpërdorur punën e tjetërkujt”, ka thënë Berisha, i cili pranon se kjo nuk është aspak ndjenjë e mirë për ta.

“Nuk është ndjenjë e mirë kur e dëgjon këngën tënde duke u keqpërdorur. Kjo na ka qitur në pozitë shumë të keqe. Bërllokun me ta vjedhur dikush të vjen inati, e lëre më veprën”, ka thënë ai. Berisha kërkon një gjë nga politika. “Na lini rehat”, thotë ai. “Nuk është fer me uzurpu pronën e huaj”, ka thënë Berisha.

Në anën tjetër, Skënder Boshtrakaj, ushtrues i detyre i shefit të Zyrës për të drejtat autorit dhe të drejtave të përafërta në Ministrinë e Kulturës, Rinisë dhe Sporteve, thotë se këngëtarët duhet të organizohen vet më tepër për mbrojtjen e të drejtave të tyre.
“Ata duhet ta dëgjojnë ligjin, sepse ai u mundëson të organizohen ashtu si edhe autorët, interpretuesit, producentët. Ne jemi këtu për t’iu lehtësuar punën atyre”, ka thënë Boshtrakaj. Me rastin e “Trojës”, Boshtrakaj tërthorazi shprehet se është shkelje ligji.
“Çdo përdorim i punës së dikujt, pa marrë leje paraprakisht është i jashtë ligjshëm”, ka përfunduar ai.

Por edhe vetë zëri i “Trojës”, në koncertin e fundit të grupit të mbajtur më 6 nëntor, në Prishtinë, që për qëllimin kishte protestën ndaj mospërfshirjes së Kosovës në procesin e liberalizimit të vizave, ishte dëgjuar të thotë “po marr frymë”. Kjo frazë është e përafërt me sloganin e partisë FER, por Barisha amnistohet. “Ajo nuk ka pasur lidhje me FER-in, por ka pasur të bëjë me koncertin që kemi mbajtur për lirinë e lëvizjes”, thotë ai teksa arsyeton edhe ngjashmërinë e thirrjes së tij me moton e një partie. “Por prapë ata (FER v.j.) janë diçka tjetër; nuk kanë qenë asnjëherë në pushtet, nuk është parti e përlyer dhe jam i sigurt se ata nuk do ta bënin një gjë të tillë, sepse e di që ia dinë rëndësinë pronës së dikujt”, ka thënë Berisha. ("Koha ditore")

[Mon.Alisa]

Foto e nxjerrur nga une nga koncerti i mehershem i Troja ne Germi, Prishtine.

Jom kon
Super u kon,sidomos me shiunnn .....

P.S.Grupi Troja jon nder me te miret ne Kosove,perveq se vocalisti i tyre nuk me pelqen shume....

[{A_N_G_E_L_69}]

Troja jo vetem ne Kosove eshte grupi me i mire Rock per momentin por ne te gjitha trevat Shqiptare jan NR 1.

[Dar_di]

Politikanët luajtën me “Amanetin…”

Intervistoi: Ardianë Pajaziti | 21-07-2012

Grupi “Troja”, sonte, nëpërmjet koncertit live, do të përmbyllë performancën dyvjeçare me albumin “Amaneti i Clownit”. Bujar Berisha ka treguar për “Zërin”, për qëndrushmërinë e kësaj kënge në kohë, por edhe për stopimin e fondeve për këtë grup nga fondacionet e shtetit pas lansimit të saj.

I revoltuar me gjendjen aktuale politike, ekonomike e kulturore, vokalisti i bendit “Troja”, ka kujtuar kohën e viteve të 90-ta kur ka filluar me performancë ky grup dhe qysh atëherë i ka kënduar të drejtave të njeriut. Dhe tash, pas kaq shumë vitesh, ai thotë se gjendja është e njëjtë, vetëm se kanë ndërruar personazhet dhe karakteret e kohës

Zëri: Kënga “Amaneti i Clownit”, po i rri shumë mirë edhe më tutje aktualitetit të Kosovës, ju e keni bërë një këngë që deri më tash ka qëndruar, po si e shihni aktualitetin?

Bujar Berisha: Si grup nuk jemi të lumtur që ajo këngë edhe më tutje është hit. Ne kemi menduar që do të jetë hit për atë kohë. Nuk është kënga që po e bën të veten, por rrethanat ekonomike po e bëjnë të veten dhe kjo këngë siç po shihet do të mbetet hit edhe për një kohë të gjatë. Do të doja që kjo këngë tashmë të mbetet vetëm si kujtim, por nuk po shoh vullnet apo forcë politike për ndryshimin e gjërave.

Zëri: “Amaneti …”, një tekst dhe jo i lehtë për ta përballuar ata që ndihen në faj, ia keni parë sherrin kësaj kënge?

Bujar Berisha: Në aspektin e karrierës kjo këngë është mjaft pozitive sepse një pjesë bukur e madhe i është bashkangjitur grupit “Troja”, pas promovimit të kësaj kënge. Por në anën tjetër qasja në fondet e institucioneve shtetërore për grupin “Troja”, pas lansimit të kësaj kënge është e pamundshme.

Është dashur ta harrojmë këtë mundësi që mundemi të ndihmohemi nga institucionet. Por, se kemi pasur kërcënime për këtë këngë nuk mund të themi, sepse politikanët kanë luajtur një lojë nëpërmjet kësaj kënge, duke u arsyetuar pozita se i është kushtuar opozitës, e opozita se i është kushtuar pozitës, duke harruar faktin se të gjithë kanë qenë në Qeveri në periudha të caktuara.

Ka qenë i pashmangshëm moslasnimi i një kënge të tillë kur kemi parasysh se si njerëz të pandërgjegjshëm janë në vendet kyçe duke sjellë kolaps në ekonomi dhe ardhmëri të mjegulluar. Për këtë fakt, fatkeqësisht, këngët e “Trojës” i qëndrojnë kohës, sepse të gjitha këngët e kanë një shpirt që e tregojnë realitetin.

Nuk mund të paragjykoj, por ne si grup e kemi vërejtur rënien e këngëve tona nëpër medie të ndryshme, nuk di a po tenton dikush të pengojë në performancën tonë, apo ndoshta thjesht këngët nuk po na lëshohen. Edhe pse jam falënderues se pikërisht këto medie e kanë ngritur këngën “Amaneti...”. Por nëse do të vazhdon i njëjti avaz edhe me albumin e radhës që do ta nxjerrim atëherë do të kërkojmë përgjigje nga mediet se pse po ndodh kjo ngulfatje.

Zëri: Mbase po gabohem po ju nuk arritët ta kapërceni këtë këngë që ju bëri kaq të dashur për publikun?

Bujar Berisha: Nuk mund ta përsëritësh kurrë një sukses. Edhe grupet e huaja kanë nga një hit që nuk kanë mundur ta kapërcejnë. Por duhet të krijohen këngë të tjera. Ne kemi këngën “Mbretëresha kohë”, që është përgjigje e këngës “Amaneti...”, këngë që i është kushtuar popullit për qëndrimin e tyre në vend. Ne këngëtarët jemi prodhues, sikurse prindërit që bëjnë fëmijët e tyre por që nuk mund t’i dallojnë por i trajtojnë njësoj.

Ndërkohë, kur e dëgjon albumin “Amaneti…”, krejt albumi është me një shpirt. Megjithatë, edhe ne si grup këngën “Amaneti…”, e konsiderojmë si një ndër këngët më të suksesshme, pasi që është këngë që i ka thyer tabutë e pasluftës. Sepse që nga ajo periudhë njerëzit në Kosovë nuk guxonin as të flisnin. Prandaj kjo këngë ka porosinë që të pastrojmë baltën sepse është e jona dhe se tashti nuk mund ta thërrasim NATO-n të na rregullojë punët tona.

Zëri: Jeni në përmbyllje të koncertit dyvjeçar, e konsumuat mirë këtë album?

Bujar Berisha: E kemi konsumuar mirë edhe pse prapë konsiderojmë se nuk është mjaftueshëm. I kemi mbetur Preshevës borxh me një koncert pasi që nuk u gjet ndonjë organizator, sikurse që i kemi mbetur borxh edhe disa vendeve të tjera. Por pjesa dërrmuese e qyteteve të Kosovës është mbuluar. Megjithatë, të interesuairit për muzikën tonë kanë ardhur edhe në Prishtinë për të na dëgjuar. Kurse diaspora na ka mbetur pa u mbuluar fare sepse nuk kemi gjetur asnjë variant.

Ne nuk jemi grup që performojmë nëpër diskoteka dhe për një hapësirë më të madhe nuk kemi gjetur ndonjë organizator më serioz. Ne nuk performojmë ‘play back’ dhe si të përmendet fjala ‘live’ menjëherë nënkupton për kërkesa të tjera. Janë kushte elementare për një performancë serioze. Nuk bëhet muzika rok me ‘play back’, pasi që lezeti i koncertit nuk është bendi por publiku.

Zëri: Jeni në përgatitje të albumit të ri, pritet diçka që “therr” nga ky album?

Bujar Berisha: Grupit i takon të punojë këngë, jo hite. Publiku i krijon hitet. Parim i yni prej viteve të 90-ta është krijimi i këngëve të sinqerta dhe nuk kemi ikur nga kjo ideologji. Edhe albumi i radhës do të ketë këngë thumbuese sepse gjërat fatkeqësisht po shkojnë duke u përkeqësuar. Në vitet e 90-ta ne kemi nisur si grup dhe qysh atëherë jemi nisur për muzikë rok.

E të bësh muzikë rok patjetër që duhet të promovosh njerëzimin, dashurinë dhe të mirat e saj. Rokerët e kanë mision që të kritikojnë të keqen për të shtyrë të mirën përpara. Ne qysh atëherë patëm kënduar për të drejtat e njeriut, sepse njeriu këndon për atë çfarë i mungon.

Mirëpo, ne nuk e kemi menduar se kaq gjatë do të këndojmë me kritika. Por po na duhet të vazhdojmë në këtë mënyrë, sepse gjendja është e njëjtë sikurse në vitet e 90-ta, vetëm tash kemi aktorë dhe karaktere të tjera.

Zëri: Kur do të dalë grupi “Troja” me albumin e ri dhe si do të promovohet?

Bujar Berisha: Nuk mund të them saktë se kur, sepse edhe me albumin paraprak kemi vepruar njësoj. Mbase në fund të këtij viti, por nuk është e sigurt. Promovimi do të bëhet nëpërmjet koncerteve sikurse që kemi vepruar me albumin “Amaneti…”. Edhe pse ne jemi ndër grupet e pakta që bëjnë albume sepse po piratizohen menjëherë e shteti nuk është i interesuar të na mbrojë, ndërkaq kur janë në pyetje taksat, aty janë shumë të shpejtë.

Zëri: Synimet e bendit deri ku shkojnë, sa e largët është arena ndërkombëtare?

Bujar Berisha: Është e vështirë t’i qasesh tregut ndërkombëtar sepse ne jemi në fund të pusit. Edhe pse tregu i huaj, sidomos në Amerikë duket të jetë i sofistikuar, ata nuk i japin rëndësi të huajve. E në Kosovë është ndryshe, çmohet kushdo i huaji më shumë se sa vendorët.

Ne veprojmë kështu sepse nuk e mendojmë kulturën si të shenjtë, ndërkaq vendet e tjera e trajtojnë kulturën si të shenjtë. Ne në të gjitha koncertet e tona kemi pasur slloganin “The Young Ghetopeans” ose “Të rinjtë e Getos”, dhe këtë sllogan do ta mbajmë deri sa Kosova do t’i bashkohet lëvizjes së lirë.

Po nuk mund të kemi integrime evropiane duke pritur nga të tjerët. Luftën e fitoi NATO, votat i vodhën kurse shkollën e kanë kryer me lidhje, ata po presin që edhe integrimet të na kryejnë të tjerët.

Zëri: Dhe për fund, si e shihni shpëtimin nga ky kaos muzikor?

Bujar Berisha: Gjithçka këtu është e vështirë. Prej mengjesit e deri në mbrëmje ka vështirësi, edhe atë për probleme banale që njerëzit nuk i kanë kryer punët e tyre si duhet. Është e vështirë të bëhet muzikë rok në një vend ku tallava fishkëllon në të gjitha anët. Në Kosovë gjithçka është e vështirë, e vështirë është të jesh edhe këmbësor.

Shiheni se çfarë i bën kulturës në mungesë të ligjit për sponsor, sepse këtu më shumë janë të interesuar të marrin “duqin” e parave se sa të punohet si duhet. Dhe një gjë është e qartë, piloti i mirë është i mirë dhe piloti i keq është i keq.

Zëri

[JacobGold]

[Aerial]

Prishtinë, 23 korrik – Shumëçka ngjasonte me mbrëmjen kur ata nisën të shpërndanin “Amanetin e Clownit”. Por ndryshe nga dy vjet më parë, fansave të rock bendit ndër më të popullarizuar në Kosovë nuk iu desh të sfidonin shiun. Koncerti përmbyllës i turneut me të cilin “Troja” kishte nisur promovimin e albumit të fundit mblodhi rreth dy mijë njerëz. Por ata që të shtunën mbrëma u stacionuan në amfiteatrin e Pishinës së Gërmisë nuk “kursyen” veten. Për afro dy orë fansat iu bindën dëshirave të vokalistit trojan, i cili i ftoi të interpretonin bashkë me të. Fiks në orën 22:30, katërshja u ngjit në skenë, pas performancës së parabendit mysafir nga Gjilani “Lucky Shot”. Një përshëndetje për të pranishmit i parapriu këngës së parë, “Gënjeshtra”. Pas saj pasuan edhe dhjetë hite që “Troja” i ka realizuar ndër vite, duke përfshirë “Ekzistenca”, “Jena na”, “Krejt një ditë kena me dek”, “Heroi i qytetit pa lumë”, “Mbretëresha kohë”, e të tjera. Por “kapaku” u vu me kryehitin e rock muzikës kosovare të viteve të fundit. Ju mjaftuan disa nota të “Amanetit të Clownit” për t’u entuziazmuar në maksimum. Fansat besnikë të “Trojës” qenë dëshmitarë të mbrëmjes, me të cilën bendi përmbylli rrugëtimin dyvjeçar me repertorin e vjetër, për t’u lënë vend hiteve të ardhshme. Mes tyre, bendi ka performuar për herë të parë një melodi të parodizuar të grupit ‘Rammstein’, e cila ironizon me fatin e një kurbetçiu që ka dërguar të gjitha paratë në Kosovë.

Por “Troja” pati pak telashe kur deshi të realizonte “ritualin” e zakonshëm, kur e ftoi publikun të ulej në tokë për disa minuta për t’u ngritur pas “urdhrit” të vokalistit. Ata që nuk u bindën, u përballën me forcat e sigurimit. Pak përplasje të vogla fjalësh “ulën gjakrat”.

Dion Zeqiri, i cili të shtunën mbrëma e ka rezervuar biletën për koncertin e “Trojës”, ka pasur kritika.

“Sa i përket koncertit të rock grupit ‘Troja’ kam një kritikë. Në rastin kur vokalisti dha urdhër të ulemi, njëri nga publiku nuk deshi dhe ai i dha urdhër sigurimit ta qesin jashtë. Koncerti me këngët në vazhdim nuk ka qenë i njëjti sa u përket lëvizjeve të publikut”, ka thënë Zeqiri.

Megjithatë, ai është ndarë i kënaqur me performancën e bendit.

“Sa për këndim dhe gjëra të tjera kanë qenë në nivel të konsiderueshëm”, ka thënë ai.

Sezgin Curi, tjetër fans i “Trojës”, është ndalur te anët pozitive të koncertit.

“Koncerti dhe organizimi ishin shumë mirë. ‘Troja’ dhe ekipi i tyre kanë organizuar koncerte që mbesin në mendje të njerëzve”, ka thënë Curi. “Unë për vete jam kënaq. Presim albumin e ri”, ka shtuar ai.

Bujar Berisha, vokalist i “Trojës”, e ka cilësuar koncertin e suksesshëm për faktin se nuk është shoqëruar me incidente.

“Çdo koncert që kalon pa incidente, për ne është i suksesshëm, duke marrë parasysh se në çfarë vendi jetojmë. Ishte shumë mirë dhe në krahasim me koncertin e para dy vjetëve që kemi pasur në Gërmi, ishte mirë që nuk pati shi”, ka thënë Berisha.

Duke folur në emër të bendit, frontmeni i “Trojës” ka thënë se katërshja e ka përmbushur misionin me promovimin e “Amanetit të Clownit”.

“Ma merr mendja që një masë e madhe e kanë marrë mesazhin. Shumica që kanë qenë prezentë në koncerte e kanë pëlqyer albumin. Jam i kënaqur, sepse ne nuk mund të krahasohemi me ‘Metallican’”, ka thënë Berisha. “Ky është tregu ynë”, ka shtuar ai.

Koncerti i së shtunës mbrëma është realizuar për t’u përshëndetur me fansat që e ndoqën “Trojën” në turneun dyvjeçar. Por hovi i katërshes nuk ndalet me kaq. Ata do të mbyllin një kapitull për t’u rikthyer në shtator. Një singël do t’i paraprijë albumit të ri të “Trojës”.

“Troja” është themeluar në vitin 1990. Grupi, në përbërje të vokalistit Bujar Berisha, kitaristit Florent Bajrami, bas-kitaristit Agron Ejupi dhe bateristit Violnat Shabani, deri më tani ka realizuar dy albume dhe disa single, ndër të cilat hitet “Ekzistenca”, “Jena na”, “People”, “Amaneti i Clownit” e “Mbretëresha kohë”.

Burimi i lajmit: www.koha.net

[Aerial]

Sa per dijeni, per kedo qe e lexon artikullin, nuk ishte kengetari ai qe urdheroi sigurimin me largu askend. Ishin publiku qe reaguan te gjithe njezeri duke bere thirrje qe te gjithe te ulen, si dhe pati reagime edhe me te ashpra.

Perndryshe, Troja vazhdon te jete grupi me legjendar i te gjitha koherave te Rockut dhe Heavy Metallit ne te gjitha trojet shqiptare. Te shpresojme qe albumi i ri do te jete ne te njejten fryme.

[DamianDelia]

Biografia, tekstet e albumet e grupit Troja mund t'i gjeni ketu: www.rockshqip.com/troja

[sirena_adria]

[sirena_adria]