E rrallë/ Gjyqtarët kryeqytetas kanë në duar paditë. Njëri prej viktimave kërkon 100 mijë lekë dëmshpërblim
Burrat në gjyq: Si na rrahin gratë
Ankohen për dhunën që ushtrojnë bashkëshortet e tyre në shtëpi
Gratë rrahin burrat dhe përfundojnë në gjykatë. Janë dy raste të tilla që ndodhen në duart e gjyqtarëve kryeqytetas, ku burrat të dhunuar nga bashkëshortet e tyre kanë parë si zgjidhje vetëm përballjen me to përpara togave të zeza. Rasti i parë i përket dy bashkëshortëve B.S. dhe F.S., 40 dhe 38 vjeç, banorë në Allias. Para gjyqtarit të çështjes, 40-vjeçari ka pohuar se bashkëshortja e tij ushtronte dhunë në mënyrë sistematike ndaj tij që nga koha e martesës, rreth 15 vjet më parë. Por, për hir të dy fëmijëve të tyre, ai ishte përpjekur të rregullonte marrëdhëniet me të. Megjithatë, asgjë nuk kishte funksionuar mirë, derisa në muajin gusht të këtij viti, bashkëshortja e kishte qëlluar disa herë atë përpara fëmijëve dhe nënës së tij. I ndodhur në një pozitë të tillë, ai e ka denoncuar në polici, por aty nuk i kanë pranuar denoncimin duke e drejtuar në prokurori. Prokurorët e kryeqytetit e kanë klasifikuar dhunën ndaj 40-vjeçarit si kundërvajtje penale dhe pasi i kanë dokumentuar gjithë ngjarjen e kanë dërguar atë në gjykatë për ta vazhduar çështjen me të dëmtuar-akuzues.
Tri ditë më parë, para gjyqtarit të çështjes, 40-vjeçari i shoqëruar nga avokati i tij e tregoi sërish historinë, madje duke treguar edhe shenjat e dhunës në trup. Përballë dëshmisë së bashkëshortit, 38-vjeçarja u shpreh se asgjë nuk ishte e vërtetë dhe se ai e kishte nisur procesin penal, në mënyrë që të zhvillonte një proces divorci më pas. Seanca e parë e këtij procesi ishte caktuar të zhvillohej dy javë më parë, por mungesa e avokatit mbrojtës të 40-vjeçarit bëri që të shtyhej. Në seancën e tri ditëve më parë, ai pohoi se nuk do paraqitej pa avokat, pasi kishte frikë.
Rasti i dytë i dhunës ndaj bashkëshortit, ka nisur të shqyrtohet në gjykatën e kryeqytetit, rreth dy muaj më parë. Dy palët ndërgjyqëse janë banorë të Saukut. Inicialet e të dyve janë M.L. dhe M.L. dhe kanë gati 6 vjet martesë. I dëmtuari akuzues veç, deklarimit fajtor të bashkëshortes së tij, kërkon nga ajo edhe 100 mijë lekë të reja dëmshpërblim moral për fyerjet dhe sharjet që ka përdorur ndaj tij. Sipas tij, rasti i fundit kur bashkëshortja ka ushtruar dhunë ndaj tij ka ndodhur në verë pranë qendrës së lagjes. Pasi ishin kthyer nga Tirana dhe po ecnin drejt shtëpisë, ata kanë shkëmbyer disa sharje, derisa bashkëshortja e ka qëlluar me shpulla. Grindjen e kanë parë disa prej fqinjëve të tyre, të cilët kanë ndërhyrë për t‘i ndarë. Pas kësaj, ata i janë drejtuar gjykatës për divorc, ndërkohë, bashkëshorti e ka paditur edhe penalisht bashkëshorten e tij.
Ligji
Rrahjet ndiqen vetëm në gjyqe me të dëmtuar-akuzues
Sipas ligjeve në fuqi, rrahjet në familje klasifikohen si kundërvajtje penale. Duke qenë të tilla, rolet e policisë dhe prokurorisë janë gjithmonë pasive, për vetë faktin se këto çështje mund të ndiqen vetëm me të dëmtuar-akuzues në gjykatë. ligjet parashikojnë se në raste të tilla kur paditës heq dorë ose nuk paraqitet në seancë gjyqësore në kohën e caktuar më parë nga gjykata padia pushohet. Proceset e tilla, zakonisht zgjasin shumë, pasi njoftimi i palës së paditur kërkon kohë të gjatë. Disa seanca të tjera duhen për të shqyrtuar provat e dy palëve, ndërkohë, në proces asiston edhe një përfaqësues i prokurorisë, i cili ka rol dytësor në të. Në të vetmet momente kur shprehet prokurori është fundi i procesit, ku ai i kërkon gjykatës vetëm deklarimin ose jo fajtor dhe masën e dënimit për të paditurin. Ndërsa gjykata në raste të tilla jep zakonisht dënime me kusht ose me gjobë. Në të dyja rastet konkrete, bashkëshortet që kanë rrahur burrat e tyre ka gjasa të amnistohen nga ligji i fundit që do nxjerrë Kuvendi.
Gazeta Shqip
Përgjigju Duke Cituar
Postuar më parë nga pllugu
.
Krijoni Kontakt