Postuar më parë nga
Humdinger
FBI hetim për lëndë radioaktive në Shqipëri
Prokuroria shoqëron 5 persona. Dyshime për trafik
FBI-ja dhe Prokuroria e Krimeve të Rënda kanë zbarkuar këto ditë në qytetin e Shkodrës, pasi janë në ndjekje të një grupi trafikantësh të lëndëve radioaktive. Dyshohet se lënda e rrezikshme që përdoret për prodhimin e armëve të shfarosjes në masë mund të jetë futur në Shqipëri nga grupe terroriste dhe ka si destinacion Evropën perëndimore. Me gjithë shoqërimet e fundit nga Prokuroria e Krimeve të Rënda, ende nuk është arritur të bihet në gjurmët e trafikantëve, duke iu shmangur edhe hetimit të specialistëve të FBI-së. Disa ditë më parë policia shqiptare shoqëron dy persona të dyshuar që merreshin me këtë trafik, por u lanë sërish të lirë. E njëjta gjë ndodhi edhe me tre policët e disa komunave në qytetin e Shkodrës, të cilët dhanë shpjegimet e tyre.
Burime konfidenciale pranë policisë së Shkodrës bëjnë të ditur se rrjeti i trafikantëve të lëndëve radioaktive është mjaft profesionist. Një ndër arsyet që policët ranë në dorë të FBI-së është se, trafikantët, për të humbur gjurmë, duke ditur se mund të kenë telefonat në përgjim, kanë përdorur identitete të rreme apo emra policësh gjatë komunikimit që kanë bërë dhe duket se ia kanë arritur qëllimit.
Prej disa kohësh në Shkodër agjentët e FBI-së dhe Prokuroria e Krimeve të Rënda ishin vënë në ndjekje të një grupi mjaft të rrezikshëm trafikantësh shkodranë, të cilët dyshoheshin se kishin futur në Shqipëri pikërisht në Shkodër 170 kilogramë lëndë radioaktive, një lëndë mjaft e rrezikshme që përdoret për armët e shfarosjes në masë deri në krijimin e bombës atomike.
Burime nga organi i hetimit bëjnë të ditur se lënda radioaktive 170 kg është mjaft e rrezikshme dhe dyshohet se është porositur për në perëndim nga rrjete apo grupe mjaft të fuqishme terroriste dhe në këtë rrjet trafikimi të kësaj lëndë janë të përfshirë trafikantë profesionistë nga disa shtete.
Në një intervistë për gazetën, njëri nga të ndaluarit, polici i Komunës Pult, Mirash Kroni, rrëfen momentin e ndalimit dhe arsyet.
Kur iu kanë ndaluar?
Ishte ora 05:00 e mëngjesit të së shtunës, kur forca të shumta policie rrethuan banesën dhe hynë në shtëpi. Ishim në gjumë, u habitëm, pasi nuk kemi probleme. Në fakt u sollën mirë, pavarësisht se fëmijët e gruaja u trembën shumë. Fëmijët filluan të qanin.
A ju thanë se përse do t‘ju shoqëronin dhe a ushtruan kontroll në shtëpinë tuaj?
Më bënë kontroll, por nuk gjetën asgjë. Pas pak erdhën disa persona të tjerë që flisnin anglisht. Përkthyesi tha se janë të FBI-së. Ata kishin disa mjete e aparatura speciale që kontrollonin në mure dhe gjithkund. Më thanë se kishin informacion që kisha fshehur një lëndë radioaktive prej 170 kg, e cila është shumë e rrezikshme.
Po më pas çfarë ndodhi?
Pasi kontrolluan dhe nuk gjetën asgjë, më morën për në Tiranë dhe atje më morën në pyetje. Më pyesnin "me se merresh", "a i njeh këta persona që të përmendëm" dhe nuk i njihja. Pas 5 orësh më lanë të lirë dhe më kërkuan falje.
Përse mendoni se ju kanë shoqëruar?
Mendoj se kjo nuk ka asnjë lidhje me punën time. Kam bërë dy orë për t‘i mësuar emrin e lëndës se nuk dija t‘ia thosha emrin, radioaktive. Mendoj se mos është politike tani në prag fushate, pasi Komuna Pult është socialiste.
Përgjimi
Një ndër arsyet që policët ranë në dorë të FBI-së dhe të Prokurorisë së Krimeve të Rënda, është se trafikantët për të humbur gjurmët, duke ditur se mund të kenë telefonat në përgjim, kanë përdorur identitete të rreme
Shoqërimi
Të premten u shoqëruan dy të dyshuar
Të premten dy persona nga fshatrat e Shkodrës janë marrë në pyetje nga Prokuroria e Krimeve të Rënda. Edhe pse identiteti i tyre nuk u bë i ditur, dy personat u ndaluan në aksin rrugor Shkodër-Lezhë, teksa ata kanë qenë duke udhëtuar. Menjëherë janë sjellë në drejtim të kryeqytetit. Pas shoqërimit për disa orë me radhë ata kanë dhënë shpjegimet e tyre lidhur me dyshimet që kanë hedhur hetuesit. Megjithatë, nga hetimet paraprake ata nuk kanë rezultuar si të implikuar në rrjetin e trafikut të lëndëve radioaktive me destinacion Evropën perëndimore.
Policët
Pas shoqërimit iu kërkohet falje
Në lidhje me këtë rrjet trafikantësh, Prokuroria e Krimeve të Rënda ndaloi tre policë në Velipojë, Bërdicë dhe tjetri ishte polic i Komunës Pult. Policët, pasi janë marrë në pyetje, janë liruar dhe u është kërkuar falje. Në fakt, shoqërimi i tyre erdhi pasi gjatë përgjimeve të të dyshuarve për rrjetin e trafikut të lëndëve radioaktive ata përmendnin gjatë bisedave telefonik edhe emrat e punonjësve të policisë, një mënyrë kjo për të humbur gjurmët, gjë të cilën deri tani e kanë bërë më së miri. Megjithatë, policët janë shoqëruar dhe më pas janë lënë të lirë.
Përgjigju Duke Cituar
Krijoni Kontakt