Porosia e Krishtlindjes 2006

[NoName]

POROSIA E KRISHTLINDJES 2006

Thuajini bijës së Sionit: Ja, po vjen Shpëtimtari yt (Is 62, 11).

Të dashur vëllezër e motra e të gjithë ju njerëz të vullnetit të mirë,

të frymëzuar me fjalët e profetit Isaia shpalli jo vetëm bijës së Sionit, por mbarë botës: “Ja, po vjen Shpëtimtari yt” (Iz 62, 11). Ja, sot, në këtë natë të madhe e në këtë vend të shenjtë, Zoti Hyj vjen për të na shpëtuar, duke u bërë njëri prej nesh, duke u bërë Hyji-me-ne, pra Emanuel (krah. Iz 7, 14). Porosia e Krishtlindjes na flet se Zoti është me ne. Krishtlindja është festë shkëmbimi dhuratash: Zoti merr natyrën tonë njerëzore, për të na dhuruar jetën e tij hyjnore.

Ky është lajmi i gëzueshëm që e shpalli engjëlli: Mos kini frikë! Ja, unë po ju sjellë një Lajmë të mirë: gëzim të madh për mbarë popullin! Sot, në qytetin e Davidit ju lindi Shëlbuesi - Krishti Zot! (Lk 2, 10-11). Kisha vazhdon të shpallë e të dëshmojë pandërprerë deri në Ardhjen e Tij të lavdishme.

Kanë kaluar më shumë se dymijë vjet që kur ky zë është dëgjuar në Betlehem: koha nuk ka mundur ta përmbys Fjalën, sepse Fjala e Zotit është e njëjtë dje, sot dhe nesër. Edhe sot kjo Fjalë u drejtohet mbarë njerëzimit, por mbi të gjitha njerëzve të përvuajtur, të varfërve, atyre që në vogëlsinë e tyre janë të gatshëm të pranojnë zbulimin e Hyjit që bëhet fëmijë, i një Hyji që komunikon me ne njerëzit, në të njëjtin nivel njerëzor.

Këtë mësim të çmueshëm të përvujtërisë na kumton Hyji ynë, që është i vlefshëm akoma sot për mbarë botën dhe për mbarë njerëzimin. Ai na mëson të flasim, të komunikojmë, t’i drejtohemi të afërmit me ngrohtësi, me përvujtëri, thjeshtësi, sinqeritet, t’i dhurohemi tjetrit plotësisht. Hyji herë pas here dhe në mënyra të ndryshme, në të kaluarën, u ka folur etërve me anë të profetëve, së fundi, në këto ditë, na foli edhe ne me anë të Birit (Heb 1, 1-2).

Për këtë arsye festa e Krishtlindjes është një ftesë për të verifikuar se si jetojmë tani këtu, në territorin tonë, në këtë çast të veçant historik: është ajo festë paqeje që Jezusi ka ardhur për të sjellë dhe Engjëjt kanë kënduar mbi shpellën e Betlehemit? Ka dashuri e solidaritet që Zoti ka vendosur si themel të të gjitha urdhërimeve? Ka respekt ndaj njerëzve, ndaj ideve të tjerëve, të vlerave të mëdha si jeta, familja, drejtësia, siguria e punës, shëndeti, ambienti? Ka kujdes ndaj atyre që ndodhen në vështirësi, në vetmi, në braktisje, sepse është i varfër, i sëmurë apo i moshuar?

Në këto ditë të festës së Krishtlindjes uroj që ta njohim Zotin - Njeri dhe ta adhurojmë Atë. Ta njohim në jetën tonë të përditshme, në të afërmin, në atë që vuan, në skamnorin, në të përbuzurin e në të braktisurin. Uroj që në saje të këtij misteri të Krishtlindjes çdo njeri ta pranojë njeriun si vëlla, ashtu siç na pranoi ne Jezu Krishti. Ky Princ i Paqes le të sjellë paqe në zemër të çdo njeriut.

Drita e Betlehemit le t’i ndriçojë dhe le t’i ngrohë zemrat tona, që të njohim praninë e Krishtit në ata që na rrethojnë.

Me këto mendime, lutje e dëshira iu uroj, të gjithë besimtarëve kudo që ndodheni, festat e hareshme të Krishtlindjes dhe Vitin e Ri 2007!



+ Imzot Zef Gashi
Arqipeshkëv i Tivarit
e Administrator Apostolik i Prizrenit 'ad interim'