ARMO, rezervat e naftës drejt tharjes

[Cimo]

Kreret e kompanise kundershtojne Berishen:Nderprerja e prodhimit,jo per shkak te ndotjes.Mbeten vetem 3 mije tone karburant

Kryeministri shqiptar, Sali Berisha, që prej dy ditësh ka bërë publike recetat e tij për uljen e ndotjes së mjedisit në vend, duke përmendur si më emergjente ndërprerjen e tregtimit të naftës së prodhuar në Ballsh. Shefi i qeverisë e ka bërë këtë deklaratë një muaj pasi shoqëria ARMO ka bllokuar furnizimin e pikave të karburantit me naftë vendase. Edhe pse 30 ditë me vonesë, Berisha ka vërtetuar se deklaratat e Kryeministrit nuk duhen marrë gjithmonë seriozisht, sidomos kur janë në prag të festave popullore ose në kohë fushatash elektorale. Këtë fakt e përforcojnë edhe më shumë sqarimet e dhëna nga vetë drejtuesit e shoqërisë ARMO, të cilët kanë pohuar për "Shqip" se aktualisht nuk ka asnjë urdhër nga lart për ndërprerjen e shpërndarjes së naftës për shkaqe mjedisore. Drejtori i Përgjithshëm i Shoqërisë, Halim Dariu, është shprehur për gazetën se "nuk ka një urdhër të tillë, që ne ta bllokojmë naftën për shkaqe mjedisore, por thjesht i kemi marrë këto masa për arsye se rezervat e naftës nuk mjaftojnë që ne të shpërndajmë prodhim me shumicë për të tretët". Siç pohon drejtori i ARMO-s, problemi është më i thellë sesa ndotja e mjedisit e konstatuar së fundmi nga kreu i qeverisë. Në prag të privatizimit të saj, ARMO ka ndërprerë për të disatën herë prodhimin e naftës për tregun vendas, duke favorizuar ndjeshëm importuesit e karburanteve. Karburantet e hyra në Shqipëri deri në shtator të këtij viti janë rreth 22 mijë tonë më tepër sesa vitin e kaluar, ndërkohë që pritet të jenë rritur akoma më shumë në tre muajt e fundit të vitit, kohë në të cilën ARMO ka prodhuar sasi minimale për të mos thënë zero litra naftë. Sipas drejtorit të shoqërisë, Halim Dariu, aktualisht ARMO ka një sasi rezervash prej 8 mijë tonësh naftë prej të cilave 5 mijë tonë janë të "ngurtësuara" ose rezervave shtetërore strategjike që preken në raste emergjencash, ndërkohë që vetëm 3 mijë tonë janë të shijshme. Por edhe sasia e disponueshme për shitje do të shkojë minimalisht për peshkatarët dhe bujqësinë në bazë të kontratës për shpërndarjen e naftës pa akcizë, ndërsa pjesa më e madhe do të furnizojë institucionet shtetërore. "Nga sasia e naftës bruto që kemi kontraktuar, ne kemi vetëm 10 ditë punë për uzinën që të përpunojë atë naftë, pasi jemi në fund të vitit dhe në përfundim të sasisë së kontraktuar nga Albpetroli", është shprehur Dariu.


Defektet e përsëritura


Ndërprerja e prodhimit nga shoqëria ARMO, është një refren i përsëritur që ndodh disa herë brenda një viti, duke minimizuar furnizimin me naftë vendi të tregut të brendshëm të karburanteve. Arsyet e drejtuesve të shoqërisë janë të njëjta dhe kanë të bëjnë, sipas tyre, me defektet që shkaktohen si pasojë e avarive elektrike nga furnizimi me energji. Lidhur me këtë fakt, drejtori i ARMO-s sqaron se "Situata është e tillë, ku uzina e ARMO-s në Ballsh ka qenë e bllokuar për shkak të dy defekteve që kanë ndodhur si pasojë e avarive elektrike. Uzina nuk ka punuar për shumë kohë dhe kjo sasi nafte që ne kemi në dispozicion është shumë e vogël. Kjo naftë i është shpërndarë bujqësisë dhe peshkimit dhe një pjesë disa institucioneve shtetërore që ne kemi lidhur kontratë me to. Ne kemi aq naftë sa nuk mund të shesim me shumicë për të tretët, pasi kemi mbi një muaj që e kemi bllokuar shpërndarjen". Parashikohet që viti i ardhshëm të jetë i fundit që ARMO do të ketë mbikëqyrje shtetërore, me shansin e vetëm për ta kaluar "pacientin" në duart e një shoqërie të huaj.


Burimi