Ipeshkev i Sapes Imzot Lucjan Augustini

[NoName]

Ati i Shenjtë emëroi Ipeshkëv të Sapës (Shqipëri) mons. Lucjan Augustinin,
deri sot Vikar i Përgjithshëm i kryedioqezit metropolitan të Shkodër-Pultit

(12.12.2006)

Ati i Shenjtë Benedikti XVI emëroi Ipeshkëv të Sapës në Shqipëri, Monsinjor Lucjan Augustinin, deri tani Vikar i Përgjithshëm i kryedioqezës metropolitane të Shkodër-Pultit (Shqipëri).

Monsinjor Lucjan Augustini ka lindur në Ferizaj të Kosovës më 23 gusht 1963. Pas Seminarit të vogël të Suboticës dhe atij të madh në Zagreb më 15 gusht 1989 u shugurua meshtar për dioqezën Shkup-Prizren.

Filloi shërbimin në këtë dioqezë si Sekretar i ipeshkvit-ndihmës, Shkelqësisë së Tij Imzot Nikë Prelës. Që nga viti 1992 kreu njëkohësisht shërbimin e famullitarit të famullisë së Engjëjve të Rojës në Ferizaj dhe atë të përgjegjësit të Karitasit të Kosovës.

Në vitin 1994 u transferua si meshtar fidei donum në kryedioqezën metropolitane të Shkodrës (Shqipëri); pas inkardinimit në këtë dioqezë, më 1996 u emërua famullitar i Katedrales, ndërsa në vitin 1998, Vikar i Përgjithshëm, duke dhënë njëkohësisht mësimim e Shkrimit Shenjt pranë Institutit Katekistik Kombëtar.

Përveç gjuhës shqipe, flet edhe serbishten, kroatishten, gjermanishten e italishten.

[Labeati]

Po me vjen shume mire per mons. Luçianin, ne kohen kur banoja ne Shqipeni ka kenë ne fillim famullitar (famullia e Kishes se Madhe) mandej u ba monsinjor. Prej tij i kam marre sakramentin e marteses dhe pagezimin e femijve.

Kurre nuk u largue prej detyres, dhe ne 1997 ne kohen e rremujave edhe ne 1999 ne kohen e luftes ne Kosove ku kishte pjestare te familjes, gjithnji aktiv ne ndihme te popullit te Shkodres. Kurre nuk pat frige me fole hapun e me kritikue per cdo problem si veset e popullit edhe te pushtetit.

Me vjen mire qe ky brez i ri e i pregatitun po merr pergjegjesi ne drejtimin kishes katolike ne Shqipni.

[NoName]

Po me vjen shume mire per mons. Luçianin, ne kohen kur banoja ne Shqipeni ka kenë ne fillim famullitar (famullia e Kishes se Madhe) mandej u ba monsinjor. Prej tij i kam marre sakramentin e marteses dhe pagezimin e femijve.

Me vjen mire qe ke patur kete fat!
Tani femijet e tu mund te marrin sakramentin e krezmimit tek mons. Luçiani.





Curriculum vitae


Biografia e Imzot Lucjan Avgustini


Lindi me 23 gusht të vitit 1963 prej prindërve Gjin dhe Roza e lind. Gjergji, të cilët kanë sjellë në jetë edhe 10 fëmijë. U pagëzua ë Famullinë e "Engjullit Rojës" në Ferizaj me 05 shtator 1963 prej ipeshkvit Mons. Franjo Smiljan Çekada.

Shkollën fillore e ka kryer në Ferizaj, ndërsa ate të mesmën në Gjimnazin klasik "Paulinum" në Suboticë. Fakultetin teologjik e ka përfunduar në Zagreb, ku edhe ka diplomuar ne Teologji morale.

Me 15 gusht të vitit 1989 është shuguruar meshtar në Zym të Hasit, prej Mons. Nikë Prela.

Me 10 shtator 1989 emërohet nga Ordinari, Mons. Joakim Herbut për botime liturgjike në gjuhën shqipe njikohsisht edhe ushtron detyrën e sekretarit të Mons. Nikë Prelës.

Në vitin 1992 emërohet drejtor i Caritasit të Kosovës të posa formuar.

Ndërsa me 15. 04. 1993 emërohet për famullitar në Famullinë e "Engjullit Rojës" në Ferizaj.

Deri në fillim të nëntorit të vitit 1994 udhëheq Caritasin e Kosovës dhe kryen detyrën e famullitarit në Ferizaj.

Me 27. 10. 1994 me dekretin Nr. 501/94 lirohet nga detyrat në Dioqezin e Kosovës dhe i ipet leja për punë baritore " Fidei donum" në Arqipeshkvinë e Shkodrës. Në fillim ka ushtruar detyrën e ndihmës famullitarit në Katedralën e Shkodrës dhe me 14 korrik 1995 është emruar për famullitar në famullinë e "Shën Shtjefnit", Katedralën e Shkodrës.

Në vitin 1997, me 24 maj, emërohet prej Atit të shenjtë Gjon Pali II, Kapelan i tij dhe iu është dhënë titulli Monsinjor.

Në vitin 1998 nga arqipeshkvi i Shkodrës Mons. Angelo Massafra emrërohet për vikarin e përgjithshëm të Dioqezit, detyrë të cilën e ka kryer deri sot.



Nga veprimtaritë dhe angazhimet tjera përveç detyrave baritore si famulliatrë në Katedralë dhe Vikar i përgjithsshëm i dioqezit duhet përmendur edhe:

• Udhëhoqi punimet në shenjtëroren e Zojës "Nëna e Këshillit të Mirë" dhe nga viti 1998 ishte pwrgjegjws i të njëjtës shenjtërore;
  
  
• Udhëhoqi punimet dhe e përfundoi kambanaren e katedrales së Shkodrës, si dhe të kishës së re në Hot të Ri (punimet janë në vazhdim);
  
  
• Nga viti 1994 ishte profesor i Shkrimit Shenjt në Institutin Katekistik në Shkodër;
  
  
• Në vitin 1997, së bashku me përfaqësuesit e dy komuniteteve tjera në Shkodër, kontribuuan shumë për paqen dhe përmirësimin e gjendjes tejet të vështirë pas trazirave të marsit të njëjtit vit. Për këtë kontribut, Këshilli i Bashkisë Shkodër e nderon me titullin "Qytetar nderi" i qytetit të Shkodrës;
  
  
• Në vitin 1998 – 1999 angazhohet për kujdesin e të larguarve me dhunë nga Kosova. Ku nën kujdesin e Caritasit të Shkodrës ishin rreth 8000 refugjatë;
  
  
• Anëtarë i "Lëvizjes për jetën" ku iu është kushtuar kujdes jetës dhe është ngritur zëri në mbrojtjen e saj prej ngjizjes e deri në vdekje;
  
  
• Ka mbajtur ligjerata dhe Konferenca të ndryshme me tema fetare dhe sociale etj.

[NoName]

Nesër, 5 dhjetor, mons. Lucian Agustini bëhet ipeshkvi i ri i Sapës


Nesër Kisha shqiptare gëzon në festë!

Në katedralen e re të Sapës në Vaun e Dejës, e cila i kushtohet së Lumes Nënë Terezë, imzot Zef Gashi, kryeipeshkëv metropolit i Tivarit shuguron për ipeshkëv të Sapës, mons. Lucian Agustinin.


Urime, urime!

[NoName]

Sapa ka ipeshkvin e vet të ri, imzot Lucian Agustinin



“Zoti është fuqia dhe ndihma ime”: janë fjalët e ipeshkvit të ri të Sapës në Shqipëri, imzot Lucian Agustinit, i cili sot u shugurua nga duart e imzot Angelo Massafrës, kryeipeshkëv metropolit i Shkodrës dhe mori në dorëzim detyrën.

[NoName]

Fjala me rastin e shugurimit ipeshkvnor të Imzot Lucjan Avgustini

Laç - Vau Dejës 5 janar 2007







Shkelqësi shumë të nderuar,

Të dashur vëllezër në Episkopat dhe në meshtari, të dashur rregulltar dhe rregulltare, përfaqësues të komuniteteve fetare, autoritete shtetërore, të nderuar miq dhe dashamir, vëllezër e motra në Krishtin.



Kur zemra gëzon, fjalët janë të zbehta dhe të pakta, megjithatë, Zoti është fuqia dhe ndihma ime për çka edhe dëshiroi që së bashku me ju ta falënderoj, për thirrjen që ma drejtoi dhe më zgjodhi për Bari të Kishës, që të mund të realizohet kështu, misioni i marrë prej Jezu Krishtit: “Shkoni në mbarë botën e predikoni Ungjillin”.

Me njoftimin e parë se Ati i Shenjtë Benedikti XVI më ka zgjedhur që të jem ipeshkëv, më ra ndër mend thirrja e Jeremisë profet dhe përgjigja e tij se është fëmijë dhe se nuk din të flet, e Zoti u përgjigj: “Mos thuaj jam fëmijë. Por shko te të gjithë ata që të dërgoj… mos ki kurrfarë frike, sepse unë jam me Ty… “

Që nga ai moment edhe tani vazhdoj së luturi Shpirtin Shenjt që të më ndriçojë, se çfarë Ai pret prej meje, dhe të më dhuron fuqinë dhe urtinë Hyjnore që të më aftëson që ti marr përsipër dhe të zbatoj besnikërisht detyrat që burojnë nga urdhri i shenjtë që sapo e morra. Ndihem i priveligjuar që Zoti ma bëri këtë nder, që me punën dhe angazhimin tim të jem pjesëtar i ringjalljes dhe forcimit të besimit dhe vlerave morale e njerëzore, të rrënuara prej një sistemi të egër komunist ateist.

Zgjedhja në detyrën e ipeshkvit për mua është një mundësi e re për t’i shërbyer më mirë Zotit dhe popullit sipas shembullit të Jezu Krishtit i cili erdhi në botë “për t’ju shërbyer të tjerëve e jo për të qenë i shërbyer”. Do të mundohem që të jem edhe më shumë në shërbim Zotit dhe kishës.

Të jesh ipeshkëv do të thotë thirrje për të dëftuar Jezu Krishtin dhe për ta shpallur mësimin e tij. Kjo thirrje nuk më largon nga populli, por përkundrazi më mundëson dhe kërkon nga unë që të jem në mes të popullit, për ta mësuar me mësimin e Ungjillit, për të jetuar në dashuri dhe falje, për ta ushqyer me Korpin e Gjakun e Tij, për t’i qëndruar besnik Krishtit dhe zëvendësit të tij në tokë, Shën Pjetrit dhe pasardhësve të tij, sipas shembullit të parëve dhe martirëve tanë, të cilët edhe para pushkatimit kanë brohorit me zë: Rroftë Krishti Mbret, rroftë Papa, rroftë Shqipëria, i fali ata që më pushkatojnë.

Dëshiroj në këtë moment të them së bashku me Shën Augustinin cili tha: “Që kur më është vënë kjo peshë mbi shpinë, për të cilën do t’i jap Zotit një llogari jo të lehtë, jam gjithmonë i trazuar nga shqetësimi për dinjitetin tim. Gjëja më e vështirë në kryerjen e kësaj detyre është rreziku i parapëlqimit të lavdisë personale më shumë se sa shpëtimi i të tjerëve. Por, nëse nga njëra anë më shqetëson ajo që unë jam për ju, nga ana tjetër më ngushëllon fakti se jam me ju. Për ju unë jam ipeshkëv, me ju jam i krishterë. I pari është emri i detyrës që më është dhënë, ndërsa i dyti është emri i hirit”.

• Populli i jem i dashur i Sapës së bashku me Shën Palin po them: “mos e lini pa fryt hirin që e morët prej Hyjit” bëjeni të frytshme shërbesën time. Ju jeni ara e Zotit, nga jashtë pranoni atë që mbjell dhe e ujit, ndërsa nga brenda atë që bën që të rritet. Më ndihmoni me lutjet tuaja dhe me dëgjesën tuaj, sepse aty e gjej gëzimin tim, jo në të qenunit udhëheqës i juaj, por shërbëtorë i juaj i vlefshëm. Dëshiroj të ju shpall fjalën e Zotit, t’i kremtoj për ju sakramentet e Krishtit, të ju drejtoj në rrugën e dashurisë, mirëkuptimit dhe paqes, por edhe të mësoj prej jush e kështu së bashku të ecim udhës së Zotit.
  
  
• Ju të dashur meshtarë, rregulltarë dhe rregulltare ju premtoj se do të mundohem të jem në gjithçka para jush, të ju prij i pari për të mirën e grigjës që na është besuar.
  
  
  
• Zoti më dhashtë forcë, për të qenë sipas shembullit të Krishtit, Bariut të Mirë, gjithmonë i gatshëm ta dhuroj jetën time për grigjen që Ai mi ka besuar.
  
  
  
• Më lejoni që në fund të shprehi mirënjohjen time të thellë para Zotit i cili më zgjodhi mua, shërbëtorë të padenjë dhe më mbushi me aq shumë hire dhe bekime, dhe të shprehi falënderimet e mia:
  
  
  
• Prindërve të mi, nënës këtu të pranishme dhe babës në jetë të pasosur që më lindën, rritën dhe edukuan dhe më lejuan që t’i shërbej kishës dhe popullit tonë martir në Kosovë e pastaj edhe në Shqipëri e nesër ku të më thirr Zoti;
  
  
  
• Falënderoj vëllezërit dhe motrat e mija që i kam patur gjithmonë afër me lutje dhe mbështetje në nevojat e mia; Axhën Pjetër e posaçërisht dëshiroj të falënderoj vajzën e axhës m. Klementina dhe kushëriren time m. Teuta, murgesha të cilët më kanë përcjellë me lutje dhe sakrificë;
  
  
  
• Një falënderim i posaçëm dhe lutje i takon, dritë paçin: Dom Gaspër Gjinit nëpërmjet të cilit Zoti më thirri në meshtari. Ai më ushqeu zemrën dhe mendjen për dashuri ndaj Shqipërisë, atëherë kur këtu gjithçka ishte e ndaluar, më thoshte “kumar Shqipëria na pret. Aty është derdhë gjaku i martirit tonë Dom Shtjefën Kurti-t”. Me të njëjtin mall dhe respekt kujtoj edhe Imzot Nikë Prelën dhe Imzot Mark Sopin të cilët më mësuan shumë, e mua më mbetet që të lutem për ta;
  
  
  
• Dëshiroj të falënderoj të gjithë të afërmit e mi dhe besimtarët e Ferizajt ku linda dhe u rrita e posaçërisht dëshiroj të falënderoj besimtarët e Shkodrës ku unë shërbeva për plot 12 vite. Me plot zemër them se të mirat dhe të vështirat që i kemi kaluar së bashkë gjatë kësaj kohe, mua më kanë burrëruar në meshtarinë time. Më keni përcjellë me lutje dhe ju lutem që të vazhdoni të më përcjellni që të mundem të jem shërbëtorë i denjë i grigjës së re që më është besuar.
  
  
  
• Dëshiroj të ju shprehi mirënjohjen time autoriteteve kishtare këtu të pranishme, Ju të dashur vëllezër në episkopat, shuguruesin tim Imzot Angelo Massafra, arqipeshkëv i Shkodër-Pulit, me të cilin edhe kam bashkëpunuar me vite si meshtar dhe Vikar gjeneral i dioqezës, dy bashkëshuguruesit Imzot Zef Gashi, arqipeshkëv i Tivarit, Imzot Rrok Mirdita, arqipeshkëv i Tiranë – Durrës, Imzot Dodë Gjergjin ipeshkëv në Kosovë, shokun tim të pandashëm që nga fëmijëria. Falënderoj të gjithë meshtarët, rregulltarët dhe rregulltarët këtu të pranishëm, kisha dashtë që secilin të përmendi me emër dhe të falënderoj për praninë tuaj, mbështetjet me lutje dhe bashkëpunimin në punën baritore. Të gjithëve përzemërsisht iu falënderoj.
  
  
  
• Falënderoj autoritetet fetare (të kishës ortodokse dhe të komunitetit mysliman) dhe civile të cilët na nderojnë me praninë e tyre në këtë kremtim të gëzueshëm me të cilën vetëm Hyji di të na gëzojë.
  
  
  
• Së fundi ju falënderoj të gjithëve Ju vëllezër dhe motra në Krishtin.
  
  
  
  
• Të falënderoj o Zot për nderin që ma bëre dhe më jep fuqinë dhe urtinë të mundem të punoj në këtë tokë martire, këtë dioqezë që ma besove, po me të njëjtën dashuri dhe flijim sipas shembullit të paraardhësve të mi Budit, Bardhit, Mjedës, Serreqit, Kolecit, Thaqit, Prennushit, Volaj dhe së fundmi Imzot Dodë Gjergjit të cilin posaçërisht e falënderoj për punën e bërë deri sot, për çdo djersë të ballit të derdhur, për çdo mësim këshillë dhe fjalë që ia ka dhuruar kësaj dioqeze për rimëkëmbjen e saj.
  
  
  
• Faleminderit të gjithëve të pranishmëve në këtë Kishë dhe jo të pranishmëve që në çfarë do lloj mënyre më përcollët dhe me ndihmuat, me lutje, mësime, këshilla, gëzime dhe vështirësi.

Faleminderit!