Qeveria mbështet për herë të parë financiarisht Shoqërinë Civile
- Akordohet në buxhetin e vitit 2008 një fond prej 150 milion lekë për Shoqërinë Civile
Kryeministri Berisha, tha sot, gjatë mbledhjes së Këshillit të Ministrave, se për herë të parë qeveria përcakton në buxhetin e shtetit një fond të veçantë prej 150 milionë lekë për Shoqërinë Civile.
“Shoqëria civile është një nga realitetet më pozitive të këtij vendi, është një kontribuuese madhore në proceset demokratike. Ajo deri më sot ka funksionuar duke mos pasur mbështetjen e taksapaguesve të këtij vendi, ndonëse ajo është një pjesë shumë e rëndësishme, një realitet shumë i rëndësishëm, me kontribute reale”, u shpreh Kryeministri.
Krahas qarqeve Akademike, vijoi Kryeministri, të cilat e kanë fondin e tyre sepse ata janë buxhetorë, “kemi përcaktuar një fond prej 150 milionë lekë për Organizatat e Shoqërisë Civile, në mënyrë që ato ta ndjejnë dhe ta dinë që qeveria është e vetëdijshme, si për kontributin e tyre, ashtu edhe për rolin që ato duhet të luajnë në jetën e vendit”.
“Organizatat e Shoqërisë Civile i kanë quajtur me të drejtë si kanalet mushkërore të demokracisë”, vijoi Kryeministri.
Kryeministri theksoi se tashmë në këtë drejtim mbetet për t’u zgjidhur vetëm çështja e shpërndarjes së këtij fondi. Për këtë, autoritetet përkatëse do të nisin një dialog dhe do të jenë ata që do të përcaktojnë rregullat e përdorimit të këtij fondi.
24/10/2007
Zyra e Kryeministrit
Përgjigju Duke Cituar
Krijoni Kontakt