Një muze për Nënë Terezën, brenda Muzeut Historik Kombëtar. Dje në ambientet e MHK-së u zhvillua një takim me përfaqësues të qeverisë, komuniteteve fetare, komunitetit të biznesit dhe përfaqësive ndërkombëtare, për ngritjen e një muzeu kushtuar një prej figurave më të shquara të kombit shqiptar, Agnese Gonxhe Bojaxhiut - Nënë Terezës. Takimi i djeshëm, ku merrte pjesë edhe kryeministri i vendit, Sali Berisha, do të shërbejë për thithjen e fondeve, por edhe për lidhjen e një marrëveshjeve konsensuale, pasi bëhet fjalë për një muze, i cili do ketë karakter ndërkombëtar. Gjithashtu, duke pasur parasysh faktin që Nënë Tereza, edhe pse është shpallur “Nderi i Kombit” i përkiste fesë katolike, dhe për të shmangur çdo keqkuptim, u pa e udhës që të gjendej mirëkuptimi nga të gjitha komunitetet fetare. “Muzeu është ideuar të ndërtohet me një bashkëpunim ndërkombëtar, duke respektuar misionin universal human të Nënë Terezës, e cila gjithashtu ishte me të vërtetë një shenjtore e dialogut njerëzor”, - u shpreh drejtori i MHK-së, Beqir Meta.
Ndërsa për ministrin e Turizmit, Kulturës, Rinisë dhe Sporteve, Bujar Leskaj, “nisma për të ngritur Pavionin muzeal të Nënë Terezës brenda Muzeut Kombetar është një ngjarje me simbolikë të veçantë. Është fillimi i rikthimit të saj të plotë në tokën amtare dhe shenjë e qartë e njejësimit të kombit tonë më të. Një falenderim të veçantë meritojnë Rajoni i Puljas, Ambasada Italiane në Tiranë, si dhe shoqata “Maratona e popujve” për mbështetjen që premtojnë t’i bëjnë këtij projekti ambicioz”. Drejtori i Muzeut, i cili ka hedhur idenë e ngritjes së një pavijoni të veçantë për Nënë Terezën, që në fillim të ardhjes së tij në krye të MHK-së, thotë se pas arritjes së marrëveshjes konsensuale, do vijojë puna për hartimin e projektidesë dhe ngritjes së grupit të punës, që do të përbëhet kryesisht nga specialistë shqiptarë e italianë, por edhe zviceranë e gjermanë.
Më tej do vijojë faza e mbledhjeve të objekteve që do ekspozohen në muze, si sende personale të Nënë Terezës, fotografi, CD, dokumente, etj. “Duhet të shohim se sa e suksesshme do të jetë kjo ekspeditë, për të folur më tej për fondin që do kërkojë ngritja e muzeut”, - thotë Meta. Sipas tij, kjo ekspeditë do shtrihet jo vetëm në Shqipëri, por edhe në Vatikan, në Misionin e Shenjtë të Motrave të Nënë Terezës në Kalkutë të Indisë, si edhe në Amerikë e Londër, ku janë vendosur kontakte e ka sinjale për ekzistencën e dokumenteve e të dhënave të tjera. Meta thotë se mendohet që muzeu të shtrihet në një hapësirë prej 200-300 metra katrorë, e cila do të ndahet në disa minipavijone. Një syresh do të ketë relike dhe fotografi, një tjetër do të jetë një sallë videoprojeksioni, ku të shfaqen materiale filmike nga jeta e Nënë Terezës.
Gjithashtu një kënd i veçantë do t’i kushtohet veprave të artit për Nënë Terezën. Do jenë jo vetëm punime të artistëve tanë, por edhe të huaj, që u frymëzuan nga humanistja shqiptare. “Ne jemi të ndërgjegjshëm se realizimi i kësaj nisme është sa i rëndësishëm aq edhe i vështirë. Por, ne ju garantojmë, se do të punojmë me përkushtim për realizimin e këtij muzeu dhe kemi bindjen, se pas dy vjetësh do të mblidhemi sërish këtu, për ta përuruar atë”, - premtoi Meta gjatë takimit të djeshëm. Ndërsa kryeministri Berisha, pasi falenderoi për nismën tha se “duhet të bëj përkujdesje që ky pavion të ndërtohet me një mjeshtëri të madhe. Duhet të jeni të sigurtë se ajo nuk do të na jepte leje po të ishte gjallë. Ndaj dhe duke patur parasysh këtë moment, le të ndërtohet diçka e cila të reflektojë madhështinë e saj shpirtërore, që qëndronte në tolerancën, në dashurinë”.
Kthimi nga Kalkuta
Ngritja e pavijonit është vetëm një nga përpjekjet për të nderuar emrin e Nënë terezës. Dje kryeministri Sali Berisha tha se do të bëhen përpjekje edhe për sjelljen e eshtrave të saj në Tiranë. “Nisma për ngritjen e muzeut është shumë e rëndësishme. Po kaq të rëndësishme duhet të jenë përpjekjet tona për të bërë që trupi i saj, shpirti i saj, të prehet pranë nënës që e lindi, që e rriti, që e mbrujti me ato virtyte të mëdha që u shndërruan në forcën e jashtëzakonshme të shpirtit të saj të madh”, - tha Berisha. Nënë Tereza u nda nga jeta në 5 shtator të vitit 1997. Qeveria indiane e nderoi me funeralin e Shtetit dhe trupi i saj u varros në Shtëpinë-Nënë të Misionareve të Bamirësisë. Shumë shpejt varri i saj u bë vend shtegtimi e lutjeje për njerëz të besimeve të ndryshme, për të varfër e për të pasur, pa kurrfarë dallimi. Ndërsa eshtrat e nënës dhe motrës së saj prehen në Tiranë.
Alma Mile
Përgjigju Duke Cituar
Postuar më parë nga Ballisti_Tetove
Krijoni Kontakt