KF Elbasani, "TIGRAT VERDH E BLU"

[ClaY_MorE]

Klevis Dalipi: Elbasani, i dënuar të fitojë në Korçë


Elbasanit do të zhvillojë një lojë tepër pozitive, pavarësisht se tashmë të gjithë e njohim ekipin korçar, sidomos në fushën e vet. Elbasani, në çdo fushë të Shqipërisë, luan për tri pikë, pasi është skuadër që gjithmonë kur futet në fushë objektiv ka tri pikët dhe jo më kot është edhe kryesues i këtij kampionati. Pra, jemi të dënuar të fitojmë në Korçë, pasi çdo rezultat tjetër do të na i komplikonte gjërat për sa i përket kampionatit," - shprehet Klevis Dalipi. Ndërkohë, sulmuesi që shpesh gjatë këtij sezoni ka qenë edhe zëvendësues në radhët e ekipit të tij të lindjes, shton se Elbasani nuk do ta lëshojë vendin e parë, madje gabimi i bërë me Dinamon do të korrigjohet shumë shpejt. "Unë nuk kam dëshirë të flas për kundërshtarët, por të gjithë janë kundër nesh, sidomos rivalët tanë, Tirana dhe Partizani, të cilët kanë kohë që kanë nisur luftën e hapur mediatike ndaj ekipit të Elbasanit. Ne kemi futbollistë që në fushë bëjnë diferencën, po kështu kam besim se skuadra e Elbasanit do të dalë e fituar nga përballja e sotme me Skënderbeun. Ekipi është në trysni, por kam besim se kolegët do ta kalojnë këtë moment. Në fakt, edhe trajneri ka punuar shumë nga ana psikologjike, duke na përmendur shpesh faktin që të shohim punën tonë," - shton Klevis Dalipi, i cili është aktivizuar më parë edhe në kampionatin portugez. Ndërkohë, "bomberi" i verdhebluve thekson se Elbasani do ta përfundojë sezonin në vendin e parë. "Jo vetëm që do të luftojmë që në të gjitha takimet e mbetura të marrim tri pikët, por mund t'ju them se mezi po pres të përballem me Partizanin dhe Tiranën, ku me asnjë mëdyshje mund të shtoj se Elbasani do t'ua tregojë vendin në takimet e drejtpërdrejta këtyre dy skuadrave. Objektivi i Elbasanit është edhe fitimi i Kupës së Shqipërisë. Vllaznia është një skuadër shumë e fortë. Do të më pëlqente Tirana apo Dinamo, pasi janë edhe rivalët tanë në kampionat, por të përballesh me Vllazninë është gjithmonë një kënaqësi, pasi futbolli shkodran është tepër i bukur. Po kështu, edhe publiku është i veçantë. Besoj se do ta kënaqim Shkodrën me futbollin tonë," - përfundon sulmuesi i Elbasanit, Klevis Dalipi.


Verdheblutë, qysh dje në qytetin e Korçës

Ekipi i Elbasanit, pasi ka zhvilluar stërvitjen e fundit ditën e djeshme, rreth orës 15:00 është nisur menjëherë në drejtim të qytetit juglindor të Korçës, ku është akomoduar që në mbrëmjen e djeshme. Sot skuadra do të të jetë plotësisht e gatshme, pasi nuk ka asnjë të dëmtuar, apo të skualifikuar. Kujtojmë që ndeshja e fazës së dytë në Korçë ka përfunduar me fitoren e vendësve.

[ClaY_MorE]

Elbasani nën presion, Tirana në sulm

Skënderbeu Elbasani 0-0

Skënderbeu: Mustafa, Mërtiri, Lako, Rustemi (Ballço 12', Ngjela 63'), Çajku, Agolli, Aniuita, Devolli (Hasalla 88'), Roxher, Osui, Arbri. Trajner: A.Canaj.

Elbasani: Kotorri, Brahja, Dede, Vrapi, Abraham, Nora (Kaçi 60'), Çapja, Osja, Qorri, Bejzade (Stojku 69'), K.Dalipi. Trajner: I.Daja.

Gjyqtarë: S.Çekaj (Laç), A.Lamçe (Patos), E.Biçaku (Librazhd)

Kartonë të verdhë: Devolli, Agolli, Lako
Karton i kuq: Rustemi (në stol)

"Radiografia"

13' Rasti i parë u përket korçarëve. Roxher, pas një pasimi nga mesfusha korçare, gjuan në hyrje të zonës, por topi përfundon mbi traun e portës.
14' 22' Asnjë rast për t'u shënuar gjatë këtyre minutave, pasi të dy skuadrat më shumë kanë qarkulluar topin në mesin e fushës.
23' Qorri për miqtë zgjon Mustafën, teksa gjuan, por topi përfundon mbi tra.
25' Roxher kërkon të rrezikojë, por topi i gjuajtur nga 20 metra përfundon jashtë.
27' Agolli provon nga larg, por përsëri jashtë kuadratit.
32' Moment i rrezikshëm në portën korçare. Mes Qorrit dhe Bejzades brenda zonës korçare tregohet më i shpejtë Mustafa, që largon rrezikun.
35' Arbri shërben nga e djathta e sulmit korçar për tek Aniuita, që gjuan me kokë, por pret Kotorri.
37' Rast ideal për Elbasanin. Qorri kroson nga një këndore, ku Bejzade kërcen mbi të gjithë mbrojtësit vendës, por topi përfundon jashtë kuadratit.
45' Arbri nxjerr të lirë Devollin përpara portës mike, ku gjuan, por grushton në mënyrë të shkëlqyer portieri Kotorri, që shmang një gol më se të sigurt.
51' Pas një kundërzbritjeje të shpejtë të korçarëve, Devolli gjuan nga larg dhe topi përplaset aty ku bashkohen dy shtyllat pingule në krahun e djathtë të Kotorrit.
62' Elbasanasit trondisin vendësit. Dalipi pason për te Bejzade, që me të djathtën e tij gjuan dhe vetëm shtylla e majtë e Mustafës shpëton Skënderbeun.
72' Dalipi i vetëm kalon gjithë mbrojtjen korçare dhe i vetëm përballë Mustafës gjuan dhe fati është me Skënderbeun, pasi topi prek shtyllën e majtë.
81' Gabim i mbrojtjes elbasanase. Aniuita del i vetëm përballë Kotorrit dhe vetëm këmbët e portierit elbasanas shpëtojnë një gol të sigurt.
82' Kundërpërgjigje e menjëhershme e miqve. Dede gjuan me kokë dhe pret portieri i Skënderbeut.
83' Përsëri janë miqtë, ku Kaçi me gjuajtjen e tij kalon edhe Mustafën, por mbrojtësi i fundit Mërtiri largon rrezikun.
86' Dede gjuan me roveshatë mbi traun e portës korçare.
90' Rasti i fundit i takimit u takon përsëri miqve, që ushtrojnë presion në portën korçare. Qorri gjuan i vetëm dhe pret në mënyrë të shkëlqyer Mustafa.

Komenti

Pas vërshëllimës së fundit dje në Korçë nga gjyqtari Sokol Çekaj, barazimi i takimit ka bërë që të buzëqeshin vendësit dhe të "qajnë" miqtë nga Elbasani, që edhe pse vazhdojnë të kryesojnë, tani e ndiejnë më shumë se asnjëherë tjetër afrimin e Tiranës, që fitoi në Lushnjë ndaj Besës. Në fakt, kur Tirana po shënonte në "Roza Haxhiu", i gjithë stoli e miqve në Korçë është ngritur në këmbë, duke u bërë thirrje futbollistëve që të hidhen në sulm, por futbollistët në fushën e blertë nuk kishin se çfarë të bënin më shumë, pasi korçarët kanë zhvilluar një tjetër ndeshje të mirë në fushën e tyre. Tri shtylla (dy për miqtë dhe një për korçarët), shumë raste për shënim dhe një lojë me ritëm nga të dy skuadrat kanë qenë momentet më të bukura të 90-minutëshit të luajtur dje në Korçë. Ndeshja do të fillonte e qetë dhe të dy skuadrat, për minuta të tëra, do të luanin më shumë në mesin e fushës, pasi një gabim do t'i kushtonte shtrenjtë si Skënderbeut, ashtu edhe Elbasanit, që kishte mbërritur me synimin e vetëm, tri pikët. Në këtë 45-minutësh të parë, më shumë herë do të rrezikonin portën vendësit, që me anë të Roxherit, Agollit, Arbrit dhe Devollit, për pak sa nuk e kaluan ekipin e tyre në avantazh. Nga ana e miqve, vetëm Bejzade dhe Qorri kanë qenë të vetmit iniciatorë të sulmit elbasanas. Pjesa e dytë do të ishte edhe më e bukur dhe dhuroi më shumë ritëm nga të dy skuadrat. Që në fillim Skënderbeu ka tronditur traversën me anë të Devollit, ndërkohë që për miqtë Bejzade dhe Devolli do të bënin të njëjtën gjë, duke treguar se të dy ekipet ishin të destinuara të ndanin nga një pikë. Edhe pse Canaj dhe Daja kanë bërë disa herë lëvizjet e tyre taktike në fushë, asgjë më shumë se nga një pikë. Madje në 10 minutat e fundit Elbasani kaloi në sulm edhe Deden, që së bashku me Stojkun dhe Dalipin nuk arritën të "përshëndesnin" qoftë edhe një herë rrjetën e Mustafës, që vazhdon të jetë në një formë të mirë sportive. Sidoqoftë, pas vërshëllimës së fundit të Çekajt, gjithçka e bardhë në Korçë dhe pasi kryesuesit kanë mësuar se Tirana ka fituar, kjo i ka hidhëruar së tepërmi. "Hija" Tiranë tani i është i shfaqur më shumë se kurrë pranë këtij Elbasani, që kryesonte me shumë pikë për javë me radhë, por tani ndodhet vetëm tri pikë larg kryeqytetasve. Nga ana tjetër, duhet të flasim edhe për meritat që ka skuadra korçare, e cila në fushën e vet duket se do të ngelet deri në fund e pathyeshme. Kur duhen edhe 540 minuta deri në fund të kësaj superlige, çdo gjë tani është vënë në diskutim për titullin kampion. Elbasani vërtet e ka "qarë" atë barazim të djeshëm në Korçë, por duhet thënë se në fazën e dytë mbështetej më shumë nga sportdashësit, ndërkohë që dje numri i tyre në Korçë nuk i kalonte shifrën 200. Ndërkohë, Skënderbeu me këtë pikë të marrë është ngjitur në kuotën e 36 pikëve, duke barazuar Vllazninë dhe vazhdon t'i largohet edhe më shumë rrezikut të fundit të tabelës. Këtë të shtunë, Skënderbeu do të luajë një ndeshje tjetër të vështirë, pasi do të udhëtojë të përballet me Partizanin, por duhet përmendur se pas dy javësh do të udhëtojë edhe Tirana drejt Korçës, aty ku të gjitha ekipeve të kësaj superlige "parajsa" u është dukur vërtet "ferr".

Deklarojnë:

Agim Canaj, trajner i Skënderbeut:

"Barazimi ishte rezultati më i drejtë i 90 minutave të takimit të sotëm (dje). Të dy skuadrat, si Elbasani, ashtu edhe ne, e kërkuan fitoren, por gjithçka u mbyll e bardhë. Ishte një ndeshje me shumë raste nga të dy skuadrat dhe për ne në fund të fundit ishte një barazim me shumë vlera. Të dy ekipet do ta dëshironin shumë fitoren, por ja që ndodh që një ndeshje e tillë të dalë edhe barazim. Tani duhet të shikojmë përpara, pasi kemi edhe gjashtë ndeshje të tjera për të luajtur dhe vetëm pas disa ditësh duhet të luajmë në Tiranë me Partizanin, një ndeshje tjetër e vështirë."

Ilir Daja, trajner i Skënderbeut:

"Në radhë të parë, do të thoja që jam shumë i kënaqur nga loja e ekipit tim. Fati nuk ishte me ne sot (dje). Si në mbrojtje, ashtu edhe në sulm, luajtëm shumë mirë dhe vetëm goli na mungoi në finalizimin e aksioneve të shumta që bëmë në portën korçare. Kemi ndeshje të tjera të vështira përpara, ashtu si edhe rivalët, prandaj them se do ta ruajmë diferencën deri në fund dhe pa diskutim që Elbasani do të kërkojë vetëm titullin. Më vjen keq që nga Korça dolëm pa tri pikë."


Të veçanta:

Ish futbollisti i Elbasanit, në dy fazat e para të superligës, Bledar Devolli, dje për herë të parë ka mbajtur shiritin e kapitenit të Skënderbeut.

Në minutën e 11-të, menjëherë pas dëmtimit, Rustemi është dërguar me ambulancë në spital, teksa ka hedhur në allçi krahun e majtë. Por në fund të ndeshjes ai është kthyer dhe është ndëshkuar me kartonin e kuq, edhe pse ishte në stol.

Vetëm 200 sportdashës nga Elbasani në takimin e djeshëm, ndërkohë që numri i të pranishëmve në stadium e kalonte shifrën 6 mijë.
Canaj dhe Daja e kanë ndjekur gjithë 90-minutëshin në këmbë, por trajneri i Skënderbeut nuk e ka respektuar shumë herë vijën e lejuar, ashtu siç nuk e ka respektuar disa herë edhe Daja.

[ClaY_MorE]

Kaçi: Mbaruan ditët e zeza për Elbasanin

"Elbasani nuk është në krizë, por thjesht i ka munguar fati, asgjë më tepër se kaq." Këto janë fjalët e sulmuesit shkodran të verdhebluve, Albert Kaçi, i cili në një prononcim për "Sportin shqiptar", është shprehur se Elbasani meritonte më shumë se një pikë në takimin e zhvilluar me Skënderbeun. "Mendoj se ky është thjesht një moment i vështirë psikologjik, i cili do të kalojë shumë shpejt," - shprehet Kaçi. Shkodrani, që ka ardhur në merkaton e janarit në radhët e ekipit të verdhebluve, thotë se Elbasani është sërish i pari dhe kjo mjafton për momentin. "Jemi në vendin e parë dhe sigurisht që skuadra jonë do të reagojë, duke filluar nga kjo javë me Teutën. Ndërkohë, në kampin e verdhebluve ende nuk është kapërdirë pika e marrë në Korçë, duke parë që distanca me Tiranën tashmë është ngushtuar vetëm në tri pikë, por tani besoj se përfunduan ditët e zeza të ekipit tonë," - shton Albert Kaçi, duke theksuar se fitoret do të jenë rresht deri në fund. "Kemi zhvilluar një lojë shumë të mirë me Skënderbeun, ku goditëm tri shtylla. Ndonjëherë në futboll nuk është e thënë të luash mirë dhe të fitosh, pasi fati të vihet kundër dhe nuk ke çfarë bën. Reagimi i Elbasanit do të vijë që në takimin kundër Teutës. Thjesht ne duhet të përqendrohemi dhe mos e marrim si tragjedi. E thashë, jemi në vendin e parë dhe duhet ta shfrytëzojmë këtë epërsi të lehtë. E di që faktori psikologjik nuk është ai më i miri, por me një fitore me durrsakët, jam i bindur që ekipi do të çlirohet sërish dhe do të jenë rivalët pastaj që do të bllokohen," - analizon Kaçi gjendjen e verdhebluve. Por shtatshkurtri shkodran nuk harron të komentojë edhe gjashtë takimet e mbetura, ku pa dyshim të gjitha kanë vlerë. "Na duhet të punojmë shumë për të marrë maksimumin e mundshëm në të gjitha ndeshjet e mbetura. Jam i bindur se skuadra jonë do t'i fitojë të gjitha ndeshjet dhe këtë keni për ta parë të gjithë. Sa për rivalen më të afërt, Tiranën, mund të them se Elbasani nuk e ka mendjen te Tirana, pasi ne shohim punën tonë. Nëse i fitojmë të gjitha ndeshjet e mbetura, do të mendojmë me Tiranën në ndeshjen direkte, por kampionët e dinë shumë se çfarë u kemi bërë këta dy vjet. Unë e shoh Elbasanin kampion jo vetëm pse kemi kryesuar që nga fillimi i sezonit, por futbollistët janë tepër të fortë dhe pa dyshim që kemi një skuadër që gjatë këtyre javëve nuk ka reshtur drejt vendit të parë. Elbasani nuk duhet të gabojë më, por të kthehet te fitorja, duke filluar nga kjo javë me Teutën dhe më pas të mendojë për dy ndeshjet e ardhshme, me Lushnjën dhe Vllazninë në transfertë," - përfundon Albert Kaçi, sulmuesi i Elbasanit, që aktivizohet për të dytin sezon rresht te verdheblutë.


Tifozët: Verdheblu, nuk ju braktisim!

Shoqata e tifozëve të Elbasanit, edhe pse ekipi i tyre në dy ndeshjet e fundit nuk është paraqitur ashtu siç duhet, ka dalë me një deklaratë, ku thuhet se futbollistët verdheblu do të mbështeten maksimalisht për ndeshjet e mbetura, si brenda, ashtu edhe jashtë. Kjo përkrahje vjen pikërisht në momentin e duhur për ekipin e Elbasanit, pasi morali ka rënë disi te lojtarët.

[ClaY_MorE]

Elbasani rigjen fitoren, fundos Teutën

Elbasani - Teuta 2-0
Shënues: Çapja 45', Kotorri 81' (11-m)

Elbasani: Kotorri, Dede, Brahja, Vrapi, Abraham, Nora (Kaçi 30'), Çapja, Osja, Qorri, Bejzade (Stojku 60'), K.Dalipi (Rizvanolli 69'). Trajner: I.Daja.

Teuta: Kapllani, Zëre, Duro, Kapaj, Pashaj, Buna, Babamusta (Jakupi 51'), Buna, Mancaku, Zëre, Gjondeda (Hodo 55'), Xhihani, Kovaç (Ziambo 65').

Gjyqtarë: T.Latifi (Gjirokastër), A.Molla, E.Doda (Laç)

Kartonë të verdhë: Buna, Mancaku, Abraham

"Radiografia"

2'- Bejzade tenton portën, duke goditur fuqishëm, por pret portieri Kapllani.
7'- Kundërsulm i shpejtë për Elbasanin me anë të Qorrit, por pret me mjeshtëri Kapllani, pas një goditjeje të Norës.
21'- Mancaku gjuan jashtë zone, por Kotorri në pozicion të vështirë pret.
28'- Godet Vrapi me të djathtën, por jashtë.
34'- Kaçi i sapofutur tenton portën, por Kapllani është në pozicion.
45'- Kaçi pason në zonë për mesfushorin Çapja, i cili godet fuqishëm, duke shënuar. 1 0 për Elbasanin.
59'- Bejzade kalon dy kundërshtarë, gjuan tokazi, por topi kalon ngjitur me shtyllën pingule.
62'- Qorri, pasi manovron në zonë me të majtën, godet portën, por Kapllani bën mrekullinë, duke e devijuar topin në goditje këndi.
72'- Kaçi godet jashtë zone, por topi kalon mbi traun e portës së mbrojtur nga portieri mik.
80'- Stojku gjuan brenda zonës, topi ndalet me dorë nga Zëre dhe 11-metërsh për Elbasanin. Gjuan portieri Kotorri dhe shënon. 2-0 për Elbasanin.
84'- Këtë herë tenton portën Rizvanolli, por goditja e tij ndalet nga një mbrojtës.
88'- Stojku gjuan fuqishëm, por Kapllani shpëton portën e tij nga një gol më se i sigurt.

Komenti

Elbasani ka fituar duke marë kështu tri pikë tepër të rëndësishme përballë një Teute, e cila vinte me pretendime në fushën e verdhebluve. Por duhet theksuar se për Teutën resistenca ka qenë tepër e madhe deri në fundin e pjesës së parë, por ajo që skuadrës së Ferkos i mungoi ishte se futbollistët miq nuk tentuan në asnjë rast portën e mbrojtur nga Kotorri. Elbasani ka luajtur deri diku një ndeshje jo shumë pozitive, pasi në fushë verdheblutë nuk është se kanë dhënë maksimumin e mundshëm, ku duhet theksuar se skuadra mike e Teutës kishte një vendosje tepër të mirë në prapavijë. Megjithatë, për ekipin e drejtuar nga Daja sulmet në drejtim të portës mike do të ishin të shumta. Nora, Bejzade dhe Qorri u shfaqën disa herë rrezikshëm në portën e Kapllanit, i cili duhet theksuar se ka qenë vendimtar në sfidën e sotme ndaj Elbasanit në shumë raste, ku rezultati mund të kishte qenë edhe më i thellë. Por minutat e pjesës së parë nuk ishin shumë të mira për verdheblutë, të cilët edhe pse krijuan volum loje, nuk po shënonin. Do të vinte minuta e fundit e pjesës së parë, kur mesfushori energjik Çapja do të shënonte në portën e paprekur deri në këto minuta të kapitenit të Teutës, Xhevahir Kapllani. Pas një topi të dhënë në zonë nga Abraham, Çapja ka përshëndetur rrjetën në fundin e pjesës së parë. Pjesa e dytë do të niste përsëri me vrull për Elbasanin, por edhe pse rastet nuk do të mungonin përpara portës së Kapllanit, futbollistët verdheblu nuk arrinin të shënonin. Minutat lëviznin dhe Elbasani shpesh kërkonte të dyfishonte rezultatin, ndonëse skuadra mike e Teutës mbrohej mirë. Por kjo nuk mjaftoi, pasi në minutën e 81-të të takimit ekipi i Dajës fitoi një penallti, pas një prekjeje të topit me dorë brenda zonës. Nga pika e bardhë e penalltisë vrapon Kotorri, i cili nuk gabon, duke shënuar golin e dytë. Duhet theksuar se goli i Kotorrit është i pari në karrierën e tij si futbollist, edhe pse nga pika e bardhë e penalltisë. Minutat e mbetura do të flisnin totalisht për ekipin e Elbasanit, ku loja tashmë ishte përqendruar në zonën e Teutës. Në fund Elbasani ruan distancën me Tiranën dhe javën e ardhshme do të ketë një transfertë përballë Lushnjës. Teorikisht duket një ndeshje e lehtë për kryesuesit, por loja e mirë e lushnjarëve nga java në javë të bën të mendosh ndryshe. Prandaj verdheblutë do ta vlerësojnë shumë këtë takim. Por Elbasani, para se të shkojë në Lushnjë, të mërkurën do të udhëtojë për në Shkodër, pasi do të ndeshet në gjysmëfinale me ekipin e Vllaznisë. Elbasani kërkon ta fitojë edhe këtë trofe, prandaj do të mundohet që në "Loro Boriçi" të marrë një rezultat sa më premtues. Ndërkohë, për ekipin e Teutës tashmë vështirësohet akoma më shumë qëndrimi në superiore. Javën e ardhshme Teuta do të presë Partizanin, një ndeshje tjetër e vështirë, por tashmë është e dënuar të fitojë patjetër.


Deklarojnë:

Ilir Daja, trajner i Elbasanit:

"Mendoj se skuadra zhvilloi një lojë pozitive. Mund të them se ishte një ndeshje e vështirë, pasi edhe Teuta kërkonte tri pikët medoemos. Megjithatë, jam tepër i kënaqur nga loja e ekipit tim. Na duhet të mendojmë dhe të punojmë për takimin e kësaj jave, por pa harruar se do të luajmë edhe në kupë me Vllazninë. Theksoj se do të kemi një transfertë tepër të vështirë në Lushnjë."

Alfred Ferko, trajner i Teutës:

"Skuadra luajti mirë, krijuam disa raste, por na mungoi njeriu-gol. Mund të them se pjesa e parë ishte shumë e mirë për ekipin tonë, deri në çastin e fundit, kur edhe u ndëshkuam nga një pakujdesi e vogël në mbrojtje. Megjithatë, ne shpresojmë dhe do të luftojmë deri në fund. Sa për gjykimin, mund të them që të gjykojnë sërish si sot gjyqtarët tanë."


Të veçanta:

- Dy presidentët Arben Laze dhe Edmond Hasanbelliu e kanë ndjekur së bashku këtë takim. Në përballjen me Teutën duhet theksuar se numri i spektatorëve ka qenë i pakët, rreth 3500, ndërsa në pjesën e dytë shkallët e "Ruzhdi Bizhutës" janë mbushur.

- Ajo që është për t'u theksuar është fakti se në këtë ndeshje ka shënuar gol portieri Kotorri, i cili deri tani ishte i vetmi futbollist i Elbasanit që nuk kishte shënuar në këtë sezon.

[miko]

Ish-kapiteni i verdhebluve, Gentian Stojku, mendon se jo gjithçka varet nga ndeshja direkte


Stojku: Elbasani s'ka frikë asnjë rival



Elbasani tashmë është përqendruar te sifda e parë e gjysmëfinales së kupës me Vllazninë në transfertë. Ndërkohë që pas fitores me Teutën në kampin verdheblu të gjithë janë tepër optimist pas dy barazimeve me Dinamon dhe Skënderbeun. Në një prononcim për "Sportin shqiptar", sulmuesi i njohur elbasanas Gentian Stojku është shprehur tepër optimist për ekipin e tij.

"Mund të them se skuadra tashmë i ka lënë pas rezultatet e fundit jo shumë pozitive, por dua të shtoj se tashmë Elbasani është në rrugën e duhur. Tri pikët e marra me Teutën treguan qartë në fushë një Elbasan dominant, por edhe tepër agresiv, çka do të thotë se për ekipin tonë tashmë është kthyer qetësia dhe fitoret nuk do të mungojnë deri në fund," - shprehet Stojku.

Ndërkohë për ish-kapitenin Stojku, Elbasani duhet të mendojë për të marrë pikët e mundshme në çdo takim deri në fund të sezonit.

"Siç e thashë edhe më lart, skuadra duhet të tregohet e matur. Nuk ka më gabime për ekipin tonë, pasi distanca është vetëm tri pikë. Mund të them se jemi të parët dhe nuk kemi frikë asnjë kundërshtar," - shton Stojku.

Më poshtë Stojku, që shpesh gjatë këtij sezoni ka luajtur edhe në vijën e mbrojtjes, thekson se skuadra e tij do të kërkojë maksimumin edhe në kupë.

"Përderisa jemi në gjysmëfinale, kjo do të thotë se Elbasani i ka të gjitha mundësitë për të shkuar deri në finale. Sigurisht që kemi përballë një Vllazni me ambicie në kupë, por kjo nuk do të thotë se Elbasani do të lëshojë, pasi ne kemi objektivat tona," - analizon Stojku.

Gjithsesi, Gentian Stojku flet më shumë për takimet e mbetura të kampionatit:

"Të gjitha ndeshjet janë të një rëndësie tepër të madhe. Për Elbasanin çdo ndeshje do të ketë vlerësim maksimal. Ajo që mua më ngroh shumë është se skuadra ka një mentalitet fituesi dhe këtë javë me Lushnjën objektivi i vetëm do të jetë marrja e tri pikëve, pasi nuk ka rrugë tjetër. Nuk besoj se titulli do të varet nga ndeshja direkte, pasi ne i kemi të gjitha mundësitë që t'i fitojmë të tëra takimet, duke pritur ndonjë gabim të Tiranës. Jemi në vendin e parë që nga fillimi i sezonit dhe nuk mendoj se Elbasanit i mungon gjë, pasi skuadra është në një top-formë."

Stojku thotë në fund se për ekipin e tij nuk do të ketë më hapa të gabuar.

"Jemi në rrugë të mbarë dhe luftojmë në dy fronte. Mendoj se ky Elbasan është i gatshëm për t'u përballuar me çdo kundërshtar dhe unë i përmbahem asaj që kam thënë edhe më parë, se Elbasanin nuk do ta ndalë askush për të fituar titullin kampion. Këtë sezon jemi shumë pranë dhe për Elbasanin gjithçka do të bëhet edhe më e lehtë nëse arrijmë t'i fitojmë dy ndeshjet në transfertë, me Lushnjën dhe Vllazninë," - përfundon Gentian Stojku, ish-kapiteni i Elbasanit.



Vrapi, mungesa e sigurt ndaj Lushnjës

Mbrojtësi i njohur i verdhebluve, Endri Vrapi, nuk do të luajë në transfertën me Lushnjën. Vrapi në sfidën me Teutën është ndëshkuar me kartonin e tretë të verdhë dhe tashmë do të qëndrojë jashtë formacionit të Dajës, për të qenë i gatshëm për sfidën me Vllazninë po në trasfertë pas dy javësh. Kujtojmë që Vrapi është një nga lojtarët titullarë të ekipit dhe në mbrojtje trajneri Daja nuk është se ka shumë alternativa.


Marrë nga www.sportishqiptar.com.al

[KiNgu_Elb]

nje koment te shkurter per ndeshjen e neserme nuk ka asnje kompromist midis elbasanit edhe vllaznis ashtu si mendojne skuadrat e tjera qe kan dhen nje deklarat per shtyp si kur do ket kompromist midis elbasanit edhe vllaznis gje qe nuk duhet besuar po nejse te tjeret le te flasin nga zilija nga qe elbasani ka dy vjet qe shkelqen mos harrojne se tirana vjet e mori kupen si puna juves me albiter gje qe kete vit se ka arritur dot qe keshtu mos e sgjas shum ja lejm fushes se gjelber i uroj futbollisteve te elbasanit qe te na kanaqin sa do pak du ke bere nje ndeshje te bukur, urime djema edhe me nje rezulatat pozitiv


komente te shkurtera per keto dy skuadra

[kacaku basket]

[kacaku basket]

Ft Lushnja 2 - 4 Elbasani

Ft Skenderbeu 1-0 Tirana

6 pike diferenca

Kampionet Jemi Ne

[kacaku basket]

Elbasani fiton bindshëm në “Roza Haxhiu” me Lushnjën (4-2). Bejzade “hart-trick” në pokerin verdheblu. Në Skënderbeu-Tirana, vendos Liçi në të 57’. Kampionët në fuqi, Tirana, tani janë -6 pikë nga Elbasani kur duhen edhe katër javë.

Lushnja-Elbasani 2-4

Stadiumi “Roza Haxhiu”, Lushnjë

0-1, Qorri 5’; 0-2, Bejzade 15’, 1-2, Kuli 30’; 1-3 Bejzade 68’; 2-3, Çela 83’; 2-4 Bejzade 85’



Nga Franc Hoxha



Elbasani, hodhi sot një hap të madh “gjashtëpikësh” kundrejt Tiranës së vendit të dytë, pas fitores së rendësishme kundër Lushnjës së vendit të fundit. Në një “Roza Haxhiu” të ndjekur prej gati 1 mijë tifozësh verdheblu, formacioni i Dajës shpartalloi 4-2 verdhjeshilët e Banos. Heroi i ndeshjes ishte “Arusha” Skerdi Bejzade, i cili me tri golat e tij hipotekoi fitoren e çmuar të Elbasanit, tri gola që e ngjitën sulmuesin tiranas në kuotën e 11 golave gjatë këtij sezoni.

Për ekipin e Dajës, i pari shënoi Qorri pas pesë minutash lojë (goli i tij i katërt sezonal), dhe pas dhjetë minutash, Bejzade dyfishoi rezultatin. Kavajasi Kuli që luan për Lushnjën shkurtoi diferencën në minutë e 30 duke mbyllur dhe pjesën e parë 2-1 në të mirë të Elbasanit. Kuli arriti në kuotën e katër golave. Në pjesën e dytë, është sërish Bejzade që në minutën e 68 e çon rezultatin në 3-1. Edhe pse Lushnja, reagoi me anë të një eurogoli të Gentian Çelës në minutën e 83 (3-2), goli i dytë i tij në këtë sezon, Skerdi Bejzade, kryegoleadori i Elbasanit në këtë sezon shënoi pas dy minutash golin e katërt në të 85’. Fitorja e Elbasanit e kombinuar edhe me humbjen e Tiranës në Korçë, i jep një siguri më të madhe, se në fund të sezonit, Daja do të çojë pas 21 vjetësh trofeun e dytë në Elbasan.



Statistika “flash”

Lushnja

- Humbja me Elbasanin (2-4) ishte humbja e 19 e Lushnjës në kampionat dhe e 7 në shtëpi.

- Lushnja me 4 golat e pësuar e çoi numrin në 53, ekipi që ka pësuar më shumë gola, ndërsa ata të shënuarit në 20 (-33 gola).

- Kuli me golin e shënuar u ngjit në kuotën e 4 golave.

- Çela me golin e shënuar u ngjit në kuotën e 2 golave.

Elbasani

- Fitorja me Lushnjën (4-2) ishte fitorja e 19 e Elbasanit në kampionat dhe e 9 në transfertë.

- Elbasani me 4 golat e shënuar e çoi numrin në 42, ndërsa ata të pësuarit në 16 (+26 gola).

- Elbasani ishte i vetmi ekip që fitoi jashtë shtëpisë në Javën e 32 të Superligës.

- Bejzade me tri gola e shënuar u ngjit në kuotën e 11 golave. Ky ishte trigolëshi i parë i tij, pas dy golave të shënuar kundër Shkumbinit (2-1). Bejzade ka shënuar vetem një gol me penallti.
- Qorri me golin e shënuar u ngjit në kuotën e 4 golave.

[ClaY_MorE]

go Go Elbasani Forca Cuna Mos U Ndani.