Kosova "rrethohet" nga zgjedhjet ne Serbi e Shqiperi

[Xhuxh Xhumaku]

Presidenti Moisiu ka deklaruar se zgjedhjet vendore mund te mbahen ne javen e dyte ose te trete te janarit 2007.

Duke marre parasysh te djelat si dite votimi, mendohet qe data e zgjedhjeve te jete 14 ose 21 janar.

Lajmi konfirmohet nga burimet zyrtare prane presidentit, te cilat shtuan se keto deklarata kryetari i shtetit e ka bere duke folur per zgjedhjet vendore gjate nje vizite ne Poloni.

Ligjërisht presidenti Moisiu ka tre javë kohë për të dekretuar datën e zgjedhjeve lokale.

Sipas kodit zgjedhor zgjedhjet lokale duhet të mbahen nga 20-dhjetori deri në 20 janar.

Moisiu kishte paralajmëruar se do të priste deri në 15 nëntor ndonjë kompromis të mundshëm të partive për këtë problem dhe në rast se ky mungonte sic edhe po ndodh atëherë do të respektonte detyrimet kushtetuese.

Megjithë paralajmërimet e herëpashershme te presidentit për gjetjen e një kompromisi mes partive, duket se asgjë nuk i ka ndryshuar politikës nga sherret dhe mosmarrëveshjet e zakonshme.

Një dekretimi i datës së zgjedhjeve mund të ndodhë pas kthimit të vizitës zyrtare të kreut te shtetit në Poloni.


/ 16 11 2006/V.H.

[Xhuxh Xhumaku]

Katër kongresmenë amerikanë i kërkojnë presidentit Bush ndërhyrjen e tij për standardin e zgjedhjeve në Shqipëri.

“Pa nismat e duhura dhe përpjekjet monitoruese, ndershmëria dhe rezultati i zgjedhjeve të ardhshme është seriozisht i vënë në rrezik”. Sue Kelly, Vito J. Fossella, Mark S. Kirk dhe Darrell Issa i kërkojnë presidentit amerikan, Xhorxh Bush, të monitorojë me administratën e tij rreptësisht situatën dhe përgatitjet për zgjedhjet për pushtetin vendor në Shqipëri.

“Ne mbështesim fuqimisht administratën për të ndërmarrë çdo hap të mundshëm për të siguruar që vëzhguesit të hetojnë paraprakisht për ndërhyrje të paligjshme në procesin elektoral, të mbajnë parasysh situatën paraelektorale, që në të shkuarën ka vështirësuar proceset demokratike në Shqipëri”, thuhet në letrën e kongresmenëve drejtuar presidentit amerikan.

Duke e cilësuar Shqipërinë si vendin më të madh islamik në Evropë pas Turqisë, por aleate të denjë të SHBA-së në luftën kundër terrorizmit, ku ka marrë hapa aktivë në ngrirjen e pasurive të terroristëve apo largimin e personave të dyshuar dhe mobilizimin e ushtarëve shqiptarë në operacionet amerikane në Afganistan dhe Irak, kongresmenët shprehen se SHBA nuk mund ta lërë vendin tonë larg përparimit. “Shtetet e Bashkuara nuk mund t’i lejojnë vetes të humbasin asnjë mundësi për ta mbështetur përparimin e deritanishëm drejt demokracisë në Shqipërinë tonë mike dhe aleate”, thuhet në letër.

Duke paralajmëruar rrezikun e shmangies së Shqipërisë nga standardet e zgjedhjeve, kongresmenët në letrën e tyre i referohen raporteve të OSBE-së në Tiranë. “Kohët e fundit, misioni i vëzhguesve zgjedhorë në Tiranë i zyrës për Institucionet Demokratike dhe të Drejtat e Njeriut të Organizatës së Sigurisë dhe Bashkëpunimit në Evropë, shprehën disa shqetësime që përfshinin pasaktësitë në listat e votuesve, certifikatat e falsifikuara të zgjedhësve, kanosjet në lidhje me zgjedhjet, blerjen e votave dhe një histori numërimi të pasaktë votash”, shprehen kongresmenët.

Në letrën e tyre katër hartuesit e saj, anëtarë të lobingut shqiptar në Kongresin amerikan, duke motivuar procedurën formale të presidentit për të caktuar datën e zhvillimit të zgjedhjeve për pushtetin vendor, shprehen kundër zhvillimit të tyre në sezonin dimëror. “Për të mirën e demokracisë, gjithmonë më e mira është që të kemi një datë që të ofrojë kushte optimale për votuesit dhe një kohë të mjaftueshme për të ngritur shqetësime në lidhje me zgjedhjet”, thuhet në letrën e tyre.

Kongresmenët e përfundojnë letrën me kërkesën ndaj presidentit Bush për një qëndrim të shprehur të tij për zgjedhje të lira në Shqipëri. Si miq krenarë të Shqipërisë në Dhomën e përfaqësuesve, ne mbetemi të gatshëm të punojmë me Administratën tuaj në këtë përpjekje shumë të rëndësishme. Ne besojmë me vendosmëri që zhvillimi i demokracisë në Shqipëri do të rrisë perspektivën e një Evropë Lindore në paqe, të qëndrueshme dhe të zhvilluar. Ne ju falënderojmë për kohën dhe vëmendjen tuaj për këtë çështje dhe presim t’ju dëgjojmë të shpreheni për zgjedhje të lira dhe të ndershme në Shqipëri”, shprehen kongresmenët.

[Xhuxh Xhumaku]

27/11/2006

Misteri i “pensioneve” greke në Jugun e vendit
• Artan Hoxha

Të përfitosh një pagesë prej 250 eurosh në muaj, e cila herë quhet "pension" dhe herë "asistencë ekonomike", e të vjen nga Greqia pa lëvizur as gishtin e dorës, është një e ardhur e konsiderushme për familjet shqiptare në jug të vendit. Asnjëherë nuk është bërë publik numri i personave që e përfitojnë një trajtim të tillë, madje zor se të tregon kush se çfarë kriteresh ndiqen për ta marrë atë. Në të vërtetë personat që e përfitojnë një pagesë të tillë përpiqen të mos e deklarojnë as sa është vlera reale e tij. Në jug të vendit, sidomos në rrethet që kufizohen me shtetin Grek apo dhe në zonën e njohur si minoritet etnik Helen, personat që e përfitojnë këtë trajtim tashmë janë me mijëra.

Madje ka vite që këtë pagesë "ekstra" e përfitojnë dhe shumë persona me shtetësi e kombësi shqiptare. Nuk dihet se në çfarë mënyrash ia kanë arritur këtij "fati", edhe pse nuk e kanë kapërcyer kurrë kufirin me shtetin fqinj apo të kenë patur ndonjë tjetër lidhje me të. Fillimisht kjo pagesë është shpërndarë për shtetasit shqiptarë me kombësi greke në zonën minoritetit, kryesisht në Sarandë, Delvinë Gjirokastër e Korçë. Më pas gjeografia nisi të zgjerohej dhe tashmë hapësira e atyre që e përfitojnë këtë trajtim është shtrirë dhe në Vlorë, Fier, Himarë, Delvinë, Përmet, Kolonjë e deri në Elbasan e Tiranë. Media dhe politikanë të ndryshëm nuk kanë hezituar gjatë dekadës së fundit ta atakojnë këtë pagesë që vjen nga Greqia për shtetasit shqiptarë. Është aluduar se kjo pagesë bëhet me qëllime të caktuara duke synuar deri dhe helenizimin e jugut të vendit, por ende askush nuk ka marrë përsipër ta sqarojë se si është e vërteta.
Varfëria

"Po të merrja dhe unë 250 euro në muaj pension, siç merr Vasili, sigurisht që do t'i bëja temena nga mëngjesi deri në darkë Greqisë. E pse të mos i bëja, kur detyrohem të mbledh lule të egra në mal për të nxjerrë bukën e gojës, e kur djemtë më janë degdisur rrugëve të botës", na thotë Viktori, një lab i zbritur prej vitesh në Himarë. Kur e pyesim se si e përfiton bashkëqytetari i tij "pagesën" që i vjen nga Greqia, edhe pse ai është ende shumë larg moshës së pensionit, Viktori, mbledh supet dhe na thotë: Hajde e gjeje këtë punë. Kush të tregon sot për punë parash. Unë di që ai s'ka punuar kurrë në Greqi, por nuk e di sesi i ka rregulluar letrat dhe kush ia ka bërë një nder të tillë". Në rrethin e Kolonjës, një zonë që nuk përfshihet në hartën e minoritetit grek mësojmë se ka arritur në 500 numri i personave që marrin "pension" apo "asistencë" nga Greqia. Pjesa dërrmuese e tyre nuk kanë asnjë lidhje me Greqinë, nuk kanë kombësi helene, nuk kanë punuar në vendin fqinjë, madje nuk dinë qoftë dhe një fjalë të vetme nga greqishtja e vjetër apo moderne, por çdo muaj i fusin paret në xhep. Thomai, pronar i një bar-restoranti në të hyrë të Ersekës na thotë se:"Nuk ka ndonjë gjë të keqe që marrin 250 euro në muaj, në fund të fundit ne popull fukara jemi. Me kaq lekë e hedh muajin pa probleme jo vetëm në Ersekë po edhe në ndonjë qytet më të madh". Kur e pyesim se nëse do të merrte një pension të tillë për kë do të votonte në zgjedhje elektorale, ai përgjigjet:"Po dihet ai muhabet. Për atë që të mban me bukë. Nuk bëhet shaka sot. S'luhet me bukën e kalamanjëve".

Dyshimi

"Pse ndodhin rrëmujat në Himarë kur bëhen zgjedhjet? Ja njerëz që paguhen me para në dorë e bëjnë atë punë, se helbete do t'ia bëjnë hysmetin eurove që vijnë nga matanë detit", na thotë një Niko, një piluriot që e takojmë në një lokal në qendër të Himarës. Në prag të zgjedhjeve për pushtetin vendor kontigjenti i këtyre mijëra banorëve në jug të vendit është pothuaj i identifikuar dhe nuk ka mëdyshje se për kë do të votojnë. Adriatiku, kryebashkiaku i Ersekës na thotë se:"Numri i minoritarëve në rrethin tonë sigurisht që është me i vogël se numri i votave që u shkojnë kandidatëve të forcës politike që e përfaqëson këtë komunitet". Përpjekjet për të mësuar numrin zyrtar të personave që trajtohen me "asistencë ekonomike" nga Greqia dhe kriteret që ndiqen për ta përfituar atë rezultuan të kota. "Mos u lodhni shumë, ja zgjedhjet lokale janë afër dhe po të jeni pak të vëmendshëm mund ta mësoni", na thotë pilurioti Niko, ndërsa pi kafe turke në qëndër të Himarës dhe tret vështrimin tej në horizont ku duket ishulli i Korfuzit.