Kush e ka fajin nëse shqiptarët bahen grekë?
Nga:Ardian NDRECA
Kohët e fundit disa zane të preokupueme tej maset u ngritën deri në qiell, kuptohet deri në qiellin e ngushtë të mediave shqiptare, tue akuzue qeverinë greke e cila po u jepka pasaporta atyne që kanë marrë kartën që vërteton se kanë prejardhje greke. E keqja asht se me origjinë greke po na qenkan shumë e kështu që pasaportë greke përfitokan rreth 250 mijë persona (gjithnji simbas shtypit shqiptar!) që klasifikoheshin deri tashti si qytetarë shqiptarë.
Sigurisht “tribunët” tanë ja hedhin menjiherë fajin grekëve dhe lobeve të zakonshme që mezi ç’presin me e damtue vendin tonë, por duket se shpallja e grekëve për ketë konçesion të pazakonshëm në Europë i ka zanë të papërgatitun të gjithë. Por asnji nuk mendon se në ketë mes ndonji faji e ka edhe politika e jashtme e vendit tonë, nësë mund të quhet politikë e jashtme tangoja me 16 figura që kanë luejt diletantat tanë në këto 16 vjet kaos - tue micrrue prej nji kryeqyteti në nji tjetër, tue ba gafa, tue fjetë në kambë, e mbi të gjitha tue damtue vendin tonë dhe prestigjin e Shtetit shqiptar. Ka kalue shumë kohë qysh se Jorgo Zografi nga Qestorati donte t’i aneksonte jugun e Shqipnisë mbretnisë greke dhe sot fatmirsisht nuk kemi mâ në mes tonë Spiro Milot me shokë që në shkurt të vitit 1914 i kallnin flakën vendit me pushkët e grekve... jo, jo, koha e Zografëve dhe e Milove ka perëndue, ashtu siç ka perëndue përgjithmonë andrra e marrë e atyne që dojshin me e nda vendin tonë. Sot anmiqtë mâ të këqij të Shqipnisë janë vetë shqiptarët me marrinat e tyne të gjithënduershme që s’i lejojnë me ec përpara si njerëz.
Sot psh. në Ballkan nuk kemi asnji aleancë të vërtetë: me Serbinë dhe me Greqinë kemi nji ftohje kronike, me Maqedoninë kemi nji fasadë normaliteti i cili dihet se asht i minuem që në rranjë, tash së fundi edhe Mali i Zi e tregoi me qëndrimin ndaj shqiptarëve në atë shtet se edhe pse asht vendi mâ i dobtë në Ballkan nuk ka ndër mend me ba asnji «lëshim» ndaj etnisë shqiptare. Kurse Bullgaria dhe Rumania tashma po ecin drejt Europës... e kështu që na mbetë si ngushëllin vetëm Turqia, vendi me të cilin kemi të përbashkët disa mija fjalë që s’ka gja me i heqë prej përdorimit si edhe pesë shekuj histori të paharrueshme. Akuza ndaj Athinës sot asht se asht tue u dhanë pasaporta greke qytetarëve shqiptarë të cilët deklarojnë se janë grekë, në nji kohë që janë «puro shqiptarë». Në qoftë se asht kështu, pra në qoftë se qeveria greke edhe nji herë po veproka kundër vendit tonë, atëherë këta “puro shqiptarë” që pranokan me u ba grekë dhe në shumë raste me ndërrue edhe fenë e tyne për nji pasaportë e për lehtësinat që ajo jep, qenkan puro renegat, qenkan Zografë dhe Milo të rinj! Nuk kam pa asnji shqiptarë që të kërkojë me marrë pasaportë serbe apo malazeze e me dalë kështu me origjinë prej atyne vendeve, s’kam pa asnji shqiptarë që të poshtnojë flamurin e vet dhe të çojë përpjetë flamurin serb apo malazez – e nënkuptohet se serbët e malazezët që e duen vendin e tyne meritojnë respekt dhe stimë. Nuk meritojnë stimë dhe as respekt ata që tue qenë shqiptarë po na dalin grekë në shpirt! Nuk kuptoj vetëm nji gja: çfarë faji na kanë grekët kur shqiptarët i bijnë mohit kombsisë së vet, origjinës së vet, fesë së vet – cilado qoftë ajo?
Para disa vjetësh më pat takue me ba rolin e përkthyesin për nji shqiptar që donte me emigrue në kontinentin amerikan. M’u paraqit si minoritar dhe un menjiherë fillova tue e pyetë për vendet e bukura të jugut të Shqipnisë, për fshatnat, dialektet, veshjet etj. por e pashë se ai nuk e kishte as mâ të voglën ide se çka ishte jugu i vendit tonë. Kur nxori dokumentet na doli se kishte lindë në nji zonë verilindore ku s’kishe ndie të kishte pasë ndonji grup minoritarësh grekë. Kur nxori çertifikatën familjare pashë se emni i të jatit s’kishte asnji rrokje me origjinë greke. Ai e kuptoi se ç’ka po mendojsha dhe uli kryet i skuqun në fytyrë, aq sa më erdhi shumë keq për të e për poshtnimin që i ndodhi. Më erdhi keq e mendova se qe ku i çon shqiptarët e dobët dhe pa identitet nji politikë e korruptueme si ajo që kemi provue për vite me rradhë, qe sesi shpërbahet kombi shqiptar prej atyne që mendojnë veç me u pasunue në kurriz të emnit të tij. Por fakti që shqiptarët po humbin identitetin e tyne kombtar (pse asht ky identitet që ne na intereson mâ së pari), mvaret edhe prej shkakut se demagogë të paturpshëm dhe cinikë ja kanë zvjerdhë atdheun e tyne e i kanë braktisë në nji nihilizëm që mohon vetë qenjen tonë të veçantë. Prandaj, mos t’u biem në qafë grekëve vend e pa vend, pse ende s’kam pa nji grek që të bahet shqiptar, por po shohim shumë shqiptarë që punojnë kundër vendit të vet, e me punue kundër vendit tand domethanë me vjedhë, me u korruptue dhe me korruptue të tjerët, mos me ba detyrën shtetnore, me përfitue prej posteve institucionale – këto janë ushujzat (tosknisht: shushunjat) që po ja marrin frymën idesë sonë kombtare dhe shqiptarizmës në përgjithsi prej Kosovës deri në Konispol. Prandaj për çdo politikan hajdut dhe të korruptuem kemi nja dhjetë shqiptarë që bahet grekë, zejbekë apo që mbesin si kryma pa identitet dhe pa emën.
http://www.lajmishqip.com/modules.ph...ticle&sid=1438
Përgjigju Duke Cituar
Postuar më parë nga B-16
Krijoni Kontakt