Prokuroria e Sollakut, 4 vjet burg për vrasësin
Një vendim absurd i prokurorit të Librazhdit, i cili ka minimizuar deri në 4.5 vjet heqje lirie për një vrasës, për pak është shndërruar në një konflikt në sallën e gjyqit. Familjarët e viktimës kanë akuzuar vartësin e Sollakut si të korruptuar dhe se dënimin qesharak e ka dhënë pas marrjes së një shumë të madhe të hollash. Por, në një gjest të rrallë, edhe Gjykata e rrethit të Librazhdit ka hedhur poshtë pretencën e prokurorit. Skandalet vazhdojnë të trondisin radhët e Prokurorisë, ndërkohë që ky institucion, ndonëse i përcaktuar në Kushtetutë si i centralizuar, nuk dihet se ku e ka kreun dhe ku fundin. Kjo për faktin se vetë kreu i organit të akuzës, të cilit shprehimisht Kushtetuta i përcakton si detyrë luftën ndaj krimit në emër të shtetit, ka zgjedhur të ndryshojë rolin dhe të bëjë të kundërtën, të ndihmojë krimin kundër shtetit. Rasteve të panumërta të shkeljes së ligjit dhe abuzimit me detyrën në veprimtarinë e institucionit të akuzës, i shtohet edhe një i freskët në qytetin e Librazhdit. Prokurori i këtij rrethi ka kërkuar vetëm 4.5 vjet burg për një të akuzuar për vrasje, qëndrim që do të trondiste çdo njeri normal që do të njihej me një kërkesë të tillë. Dhe kjo kërkesë kaq skandaloze dhe e papërgjegjshme e prokurorit, për pak sa nuk është kthyer në vendim gjykate, që mund t'i jepte lirinë kriminelit vetëm pas një periudhe modeste prej 4.5 vitesh. Ka qenë kundërshtimi i trupit gjykues të Gjykatës së Librazhdit që e ka parandaluar këtë propozim monstruoz të përfaqësuesit të akuzës, për të cilin duket se jeta njerëzore është shumë më pak e shtrenjtë se sa një grusht me para. Tashmë, një praktikë e tillë është bërë e udhës në institucionin e organit të akuzës, kreu i të cilit në vend që të vazhdojë të akuzojë dhe hetojë kriminelët, po përdor postin e tij për të vijuar lidhjet e tij me botën e krimit, dhe për grumbullimin e pasurisë në mënyrë të paligjshme. Me një vendim befasues, Gjykata e Librazhdit u ka dhënë një zhvillim të ri hetimeve mbi vrasjen e një të riu në vitin 2005. Trupi gjykues ka hedhur poshtë provat e Prokurorisë, duke i cilësuar ato të pavërteta. Vendimi i marrë nga kjo gjykatë e rikthen edhe njëherë çështjen për gjykim nga fillimi. Prokuroria është munduar të argumentojë propozimin e saj absurd me faktin se vrasja ka qenë aksidentale, ndërkohë që gjykata e ka klasifikuar atë si vrasje me paramendim, në bazë të nenit 87 të Kodit Penal, ku përfshihet edhe akuza e rrëmbimit të personit dhe torturës. Gëzim Bardhoshi u prangos nga policia në flagrancë, pasi në bagazhin e makinës së tij uniformat blu gjetën të keqtrajtuar të riun që kishte punuar për shumë kohë si kamarier në lokalin e tij. I riu gjeti vdekjen një ditë më pas në Spitalin Ushtarak të Tiranës, për shkak të plagëve të rënda. Procesi gjyqësor, që në fillim, u karakterizua me akuza të familjarëve të viktimës, të cilët akuzuan prokurorin e çështjes për favorizim të të akuzuarit në këmbim të parave. Ky rast, ndonëse shumë i rëndë dhe në shkelje flagrante të ligjit nga ana e Prokurorisë, përbën vetëm gurin e radhës së kilometrazhit të institucionit të akuzës në rrugën e saj të simbiozës me krimin. Pa dyshim që ky nuk përbën rastin më të bujshëm të bashkëpunimit të prokurorëve me krimin, por mbetet shqetësues fakti se një veprim i tillë konfirmon vazhdimin po aq të ngushtë të këtij bashkëpunimi. Në këto rrethana, nuk dihet se me çfarë argumentash do ta mbronin bashkëpunëtorët e botës së krimit kryeprokurorin, i cili përbën rastin më të paprecedent të degradimit të organit të akuzës deri në këtë pikë.
Ylber Drazhi
Përgjigju Duke Cituar
Krijoni Kontakt