ME ÇFARË PASAPORTE UDHËTON AGIM ÇEKU NË RUSI, BANOR I KOSOVËS, SHTETAS I KROACISË DHE I SHQIPËRISË - VALMIR KLAIQI (Gazeta “LAJM”)
ME ÇFARË PASAPORTE UDHËTON AGIM ÇEKU NË RUSI, BANOR I KOSOVËS, SHTETAS I KROACISË DHE I SHQIPËRISË
Ndonëse shkojnë në Rusi si përfaqësues të Kosovës, asnjëri nga anëtarët e delegacionit kosovar nuk mund të udhëtojë me dokumentacionin e Kosovës. Kryeministri Agim Çeku për të shkuar në Rusi ka marrë pasaportë diplomatike të Shqipërisë, ndërsa këshilltari i parë politik i tij, Arben Qirezi, i cili ka vetëm pasaportë të UNMIK-ut, nuk mund të shkojë. Edhe gazetarët që dëshirojnë ta përcjellin këtë vizitë duhet të kenë pasaporta të shteteve që i njeh Rusia
VALMIR KLAIQI Prishtinë, 16 nëntor 2006 (Gazeta “LAJM”)
Kryeministri i vendit, Agim Çeku, si banor i Kosovës dhe me shtetësi kroate, është dashur të bëhet edhe shtetas i Shqipërisë, për të pasur mundësi të lobojë në vendet që nuk e njohin pasaportën e UNMIK-ut. Shefi i kabinetit të Kryeministrit, Ramiz Lladrovci, tha për "Lajmin" se Kryeministri do të udhëtojë për në Rusi më 30 nëntor.
"Rusia nuk i njeh pasaportat e UNMIK-ut, andaj Kryeministri e ka marrë një pasaportë të shtetit shqiptar për ta bërë këtë udhëtim".
Sipas Lladrovcit, në Rusi mund të shkohet edhe me pasaportë tjetër, por jo me të UNMIK-ut. "Edhe mediat që dëshirojnë ta përcjellin këtë ngjarje, duhet t‘i pajisin me dokumentacion të dërguarit e tyre. Këtë vizitë do të mund ta përcjellin vetëm redaktorët, jo gazetarët", ka thënë ai. Për ta shoqëruar kryeministrin Çeku gjatë vizitës në Rusi, për shkak të pasaportës nuk mund të shkojë Arben Qirezi, këshilltari i parë politik i tij.
"Nuk mund të shkoj, sepse kam vetëm pasaportë të UNMIK-ut". Qirezi theksoi se ende nuk dihet se kush do ta shoqërojë Kryeministrin gjatë këtij lobimi në shtetin rus.
"Nuk e kemi krijuar ende ekipin. Duhet të shikojmë se kush ka dokumentacion që e njeh Rusia dhe pastaj të vendosim se kush duhet të shkojë", tha për "Lajmin" Qirezi.
Zëdhënësi i UNMIK-ut, Jeff Bieley, ka thënë për gazetën se është e drejtë e çdo shteti për ta njohur ose jo pasaportën e UNMIK-ut.
"Deri tani këtë pasaportë e njohin mbi 30 shtete të botës. UNMIK-u i inkurajon shtetet që ta njohin por nuk mundet t‘ua obligojë njohjen".
Zyrtari për informim publik në zyrën e Kryeministrit, Sherafedin Omer, ka konfirmuar për gazetën se edhe mediat që dëshirojnë të dërgojnë reporterë në Rusi, për ta përcjellë vizitën e Çeku, duhet të kenë pasaporta të shteteve që i njeh Rusia.
"Përveç kësaj, në këtë takim mediat vetë duhet t‘i heqin harxhimet e gazetarëve, pasi bëhet fjalë për viza dhe ato nuk mund t‘i kryejë Qeveria", tha Omeri. Kryeredaktori i televizionit KTV, Adriatik Kelmendi, theksoi se janë duke e shqyrtuar mundësinë për të shkuar në Rusi.
"Ende nuk kemi vendosur se kush do të shkojë. Ka kohë edhe dy javë dhe do të mësojmë nga zyra për informim e Kryeministrit se me çfarë dokumentacioni mund të shkojmë. E di që me të UNMIK-ut nuk mundemi, por duhet të shikojmë ndonjë mundësi tjetër. Është një ngjarje që ia vlen të përcillet".
Vizitën e Çekut në Moskë e kanë konfirmuar për agjencinë e lajmeve "Reuters" edhe zyrtarë rusë, sipas të cilëve Kryeministri i Kosovës do të takojë përfaqësues të Komitetit për Marrëdhënie me Jashtë të Dumës ruse dhe zëvendësministrin e Jashtëm rus, Vladimir Titov.
Çeku do të qëndrojë në Moskë nga 30 nëntori deri më 2 dhjetor. Kryeministri Agim Çeku është lideri i parë kosovar që do ta vizitojë Rusinë.
Përgjigju Duke Cituar
Postuar më parë nga Llapi
Krijoni Kontakt