Dyfytyresia e PS ndaj prishjes se ndertimeve te paligjshme.

[DYDRINAS]

Ksamil, banorët bllokojnë rrugën, nuk lejojnë prishjen e objekteve nga policia ndërtimore

Ksamil- Kanë vazhduar edhe dje protestat e banoreve të komunës Ksamil, të cilet nuk kanë lejuar policine ndërtimore të vazhdoj aksionin e filluar një ditë me parë për prishjen e objekteve të paligjshme.

Aksioni i policisë ndërtimore filloi pa pritur paraditen e ditës së mërkure duke provokuar papritur revoltën e banoreve, të cilët janë ndeshur me uniformat blu, në përpjekje për të ndaluar prishjen e objekteve. Banorë të irrituar kanë qëlluar me gure e mjete të forta mbi fadromat dhe policët ndërtimor, duke lënduar edhe njërin prej punonjësve (drejtuesin e një mjeti) të policisë ndërtimore. Kundërvënia e banoreve ishte për shkak se asgjë nuk ishte paralajmëruar dhe se shteti, si pas tyre, duhet të ishte kujtuar shpejt për të zgjidhur problemet e Ksamilit. "Shteti, tha një banor i intervistuar nga medjat, ka qenë në gjumë deri tani. Ku ishte shteti, qeveria, e cila vet e ka nxitur këtë, na la të ndërtonim dhe tani erdhi të na marrë shpirtin, duke na shumëzuar me zero gjithçka...".

Dje qysh në orët e para qindra banore dolën në hyrje të komunës, te vendi i quajtur "harta" e Ksamilit dhe në segmentin prej rreth 1 km ngritën postblloqe me shkëmbinj e gure të hedhur nga kodra që ngrihet mbi liqenin e Butrintit. Ishim dje mes banoreve të revoltuar, atje ku njerëzit ishin vendosur në barrikade, në bllokim të trafikut dhe të përpjekjeve të uniformave blu për të bindur njerëzit që të lejonin ndërtimoret për të vazhduar aksionin. Asnjë negociatë nuk do të ketë me keta, tha për gazetën Rushan Kurti, njeri prej banoreve që duket se ishte vënë në krye të protestës së banoreve. Ai tha se nuk lëvizin njerëzit nga rruga, madje do flenë këtu në se nuk tërhiqet policia e ndërtimit. Ndërkaq, Artur Kseno, që është edhe anëtar i këshillit të Komunës, tha se njerëzit janë revoltuar për shkak se prishjet filluan pa paralajmërim. Askush nuk ka njoftuar zyrtarisht komunën, tha ai.

Problemet e Ksamilit nuk mund të zgjidhen me të tilla metoda dhe as me një të tillë aksion, krejtësisht të pa mbështetur në një plan të studiuar. Dhe jo vetëm kaq por dhe tepër, tepër i vonuar. Këmbanat për ndërtimet pa leje në Ksamil kanë rënë prej kohësh por ato, duket se nuk janë dëgjuar ose është bërë sikur nuk janë dëgjuar, nuk kanë përbërë shqetësim për autoritetet. Drejtori i përgjithshem i policisë ndërtimore, në një prononcim për mediat pas situatës së krijuar në konfliktin mes ndërtimoreve dhe banoreve ditën e parë të aksionit, tha se policia kishte në plan të bënte këtë aksion por u la për shkak të mos cënimit të sezonit të plazhit. Në se është vërtet kështu, pse nuk filloi ndërhyrja në fillim të shtatorit, pse kjo polici nuk iu përgjigj thirrjeve dhe kërkesave zyrtare të drejtuesve dhe këshillit të komunës për të mbështetur masat për parandalimin e ndërtimeve pas datës 15 korrik kur filloi nisja e procedurave për legalizimin? Dhe më tej, pse kjo polici nuk ka bashkëpunuar me pushtetin vendor (kjo duket edhe në këtë rast kur vjen dhe nis prishjen pa dijeninë e autoriteteve vendore), por ka vazhduar të prishë ato objekte, të cilat nuk janë objekt i problematikave të krijuara me galopin e ndërtimeve në kuadrin e legalizimit? Banore të revoltuar akuzojnë drejtuesit e ndërtimores se nuk kanë prishur objekte të ndërtuara kohët e fundit, apo ditet e fundit, por objekte të ndërtuara qysh në vitin ’95 apo në vitet e mëvonshme, deri para zyrtarizimit të ligjit për legalizimet.

Ky fakt kompromenton aksionin e policisë ndërtimore, e cila jo vetëm që nuk ka gjetur kohën për prishje, por nuk ka patur në objekt të vetin mbështëtjen e organeve të pushtetit vendor për të bllokuar ndërtimet e mëtejshme. Artur Kseno, në prononcimin e tij për situatën, tha se përgjegjesia duhet kërkuar lart, pasi vet Berisha ka stimuluar ndërtimet pa leje kur tha (me rastin e miratimit të Ligjit në Parlament nga maxhoranca) se gjithçka do legalizohet. Kjo u interpretua si një thirrje për pushtimin e trojeve. Të pakten kështu ndodhi në Ksamil dhe, ndonëse pas 15 korrikut ndërtimet nuk u ndaluan, ato vazhduan edhe më tej te toleruara edhe nga vet shtyrja e afatit të legalizimeve.

Turma në disa qindra vetë e banoreve (madje dhe e nxënësve të shkollës së bashkuar të Ksamilit) e vendosur për të mos lejuar vazhdimin e aksionit të ndërtimoreve, ka apeluar edhe dje, në ditën e dytë të protestës, për reflektim nga ana e autoriteteve. Burra, gra dhe disa dhjetra të rinj në një zë kërkonin që shteti tu grantonte investimin e bërë. Ç’faj kemi ne, thotë për gazetën një grua, kur zëri nuk na është dëgjuar prej vitesh. Duam një copë strehë. Ndërtuam diçka me shpresë se do legalizonim dhe tani vinë për ta prishur. Ku ishin deri sot? Kemi shpenzuar djersën dhe gjakun tonë dhe këta pa pikën e mëshirës vine e thonë do t'ua prishim. Ç’janë këta! Pse qeveri që mendon për popullin është kjo?

E vërteta është vërtet e dhimbshme. Ndër të revoltuarit ka edhe prej tyre që duan të mbrojnë ndërtimin që e kanë bërë jo për nevojë strehimi, por për vilë pushimi në verë. Një i tillë, psh, banor i Sarandës, në revolte e sipër tha se ia kishte dhënë votën PD-së me shpresë se do përfitonte, ndërsa kështu si po veprohet, fshehtazi, na krijohet bindja se këta janë me të këqinj se të paret...Dhe me mendësi të tilla mund të jenë shumë, dhe shumica e tyre jo banore të Ksamilit. Protestuesit në 90 për qind të tyre janë hallexhinj, që kanë ndërtuar për të patur një strehë.

Në fund të fundit, zgjidhja nuk është kjo, prishja e x objekteve sot dhe mbajtja ngritur e tensionit social. Eshtë thënë e stërthënë se Ksamli ka specifikë dhe kërkohet një zgjidhje, e cila nuk mund të vij nga uniformat blu, por nga specialistë dhe nga dëshira e mirë e kësaj qeverie për t’i ndihmuar këta banore dhe jo abuzuar me ta në emër të disa interesave politike.

Banoret janë të vendosur të mos lëvizin dhe të ruajne bllokimin e rruges ne se ndërtimoret nuk do tërhiqen. Prefekti i Vlorës, zoti Alimerko, i ka kërkuar dje në drekë një takim kryetarit të komunës për të gjetur një zgjidhje, por që sipas të gjitha gjasave nuk do të jetë në favor të ndërtimoreve, të cilët ka të ngjarë të kthehen me turp mbrapsht, duke marrë me vete përgjegjesine e megaproblemit të Ksamilit. /P. Zoto

ZP
13-10-2006