Prokuroria ka dërguar dy thirrje në Kuvend për paraqitje të Nishanit, në datat 18 dhe 26 shtator
Nishani refuzon Prokurorinë, Nuk dëshmon për padinë e Ramës
N.P
TIRANË- Zëdhënësi i grupit parlamentar të PD-së, Bujar Nishani, ka refuzuar kërkesën e organit të akuzës për të dëshmuar rreth deklaratave që ai ka mbajtur kundrejt kryetarit të PS-së, Edi Rama, të cilin e ka akuzuar se është i lidhur me botën e krimit dhe drogës.
Konkretisht, Nishani akuzohet për shpifje ndaj kryesocialistit Edi Rama, përmes një deklarate që ai ka dhënë në datën 2 shtator. Pikërisht për këtë arsye, organi i prokurorisë ka dërguar dy thirrje në Kuvend për paraqitje të deputetit Nishani, në datat 18 dhe 26 shtator. Por në të dyja këto data Nishani ka refuzuar të paraqitet, duke i lënë kohë vetes edhe 30 ditë për t’u menduar për një mundësi të tretë.
I pyetur pikërisht për këtë çështje, zëdhënësi i grupit parlamentar të PD-së, Bujar Nishani, ka deklaruar dje se më parë duhet të hetohet organi i akuzës, duke lënë të kuptohet gjatë deklaratës së tij se do të zbatojë të gjitha procedurat që parashikohen. “Më së pari Prokuroria duhet të deklarojë para njerëzve se çfarë po bën dhe kush po e heton kryeprokurorin Sollaku, të cilin Kuvendi shqiptar na bazë të provave e ka akuzuar për lidhje me krimin. Unë si deputete do të zbatoj të gjitha procedurat që parashikohen”,- tha dje Nishani. Deklarata e këtij të fundit edhe për prokurorin e përgjithshëm e ka një lidhje, pasi Nishani ka qenë një ndër kritikët kryesorë të punës së Sollakut. Qëndrimi i deritanishëm i Nishanit kundrejt punës së organit të akuzës, flet për një mundësi shumë të madhe, që ai vetë të mos paraqitet, ndërkohë që organi i akuzës, mund të ndjekë më pas të gjitha klauzolat ligjore që parashikohen në rast mosparaqitjeje të këtij të fundit.
29/09/2006
Shekulli
Ky tipi, është më lart se organi i akuzës dhe organi i akuzës duhet ti nënshtrohet këtij dhe jo ky LIGJEVE!!
Krijoni Kontakt