TIRANE
Zhdukja në rrethana të dyshimta e një familjeje të tërë më 29 shtator 2004, dhe më pas gjetja e tyre të varrosur në vende të ndryshme, trazoi dhe la gjurmë të rënda në memorien e qytetit të qetë Mangalia në Rumani. Ngjarja e vlerësuar si ndër më makabret të ndodhura ndonjëherë në gjithë Rumaninë, kishte në qendër të saj dy studentë shqiptarë. Viktimat, dy bashkëshortët, Aleksandër dhe Lukrezia Ion, së bashku me vajzën e tyre tetë vjeçare Amalia, banorë të këtij qytetit bregdetar, që gjendet pranë Kostancës, ishin vrarë barbarisht në mënyrën më tragjike të mundshme. Trupat e tyre, për rreth tre muaj, ndenjën në dhe' pa mundur të gjenden nga policia. Pas shumë kërkimesh të policisë lokale, e cila për këtë rast ishte ndihmuar edhe nga specialistë të mbërritur enkas nga Bukureshti, u bë i mundur fillimisht arrestimi i dy personave të dyshuar si autorë të krimit, një studenti shqiptar dhe një rumuni dhe më pas dhe gjetja e tre kufomave të familjes Ion.
Investigimi
Kanë qenë ditët e parë të muajit tetor, kur të afërmit dhe komshinjtë e familjes Ion, e cila pak kohë më parë ishte kthyer nga emigrimi në Gjermani, filluan të shqetësohen për mungesën e tyre. Për këtë fakt u lajmërua edhe policia e Kostancës, e cila nisi kërkimet dhe hetimin për të zbardhur të vërtetën. Falë kontrollit të imtësishëm dhe mjeteve moderne, të përdorura gjatë kontrollit të banesës së familjes Ion, policia arritit të identifikonte disa gjurmë gjaku, të cilat ishin fshirë, por që gjithsesi linin një nënkuptim të qartë. Që nga ky moment, të paktën policia ishte e qartë se pas gjurmëve të gjakut, fshihej një ngjarje e rëndë. Hetimin pas këtij konstatimi e mori në duar sektori i krimit të organizuar i policisë së Kostancës, i cili pas rreth tre muajsh kërkimi dhe investigimi intensiv, arrin të bjerë në gjurmët e personave të dyshuar si autorë të masakrës. Ata ishin Blenis Shyti, 21 vjeç, student në Fakultetin e Ekonomisë në Universitetin "Ovidius" të Kostancës, Albin Todri 19 vjeç, i cili vazhdon shkollën e mesme në Kostancë, të dy shqiptarë, dhe rumuni, Stefan Nikulesku, i cili ishte edhe nipi i viktimës, Aleksandër Ion. Pas ndalimit të tyre u arrit të zbardhej gjithë skema tragjike e zhdukjes së familjes Ion.
Konflikti dhe masakra
Sipas deklaratave të policisë së Kostancës, studenti shqiptar Blenis Shyti, së bashku me mikun e tij rumun, Stefan Nikulesku, ishin angazhuar prej disa kohësh në trafikun e lëndëve narkotike së bashku me viktimën, Aleksandrin. Por në një moment "pune", mosmarrëveshjet në trafik dhe frika se mos Aleksandri i denonconte në polici, nxit dy shokët studentë, Blenisin dhe Stefanin të organizojnë vrasjen e Aleksandër Ionit. Sipas versionit të ngritur nga policia vendase, Shyti dhe Nikulesku, më 29 shtator kanë shkuar në banesën e Aleksandrit, i cili fare natyrshëm u ka hapur derën. Sapo kanë hyrë në banesën e tij, agresorët e kanë ekzekutuar duke e therur në fyt me thikë. Bashkëshortja e Aleksandrit, Lukrezia, e cila për fatin e saj të keq, u gjend në banesë në atë moment, nuk ka mundur dot të reagojë apo të kërkojë ndihmë, pasi ishte shokuar nga skena e dhunës. Ndërkaq dy agresorët, për të mos lënë dëshmitarë, i janë sulur edhe Lukrezias duke e mbytyr me anë të shtërngimit në fyt. Në këtë pike, duket me gjykimin të dobësuar nga dy vrasjet, dy miqtë vendosin të kryejnë edhe një tjetë krim makabër. Pasi sistemojnë dy kufomat në banesë, ata nisen për të "hequr qafe" edhe vajzën e tyre të vogël, Amelian tetë vjeçare. Sipas policisë, vrasja e vajzës ishte bërë për të humbur çdo gjurmë të mundshme për zbardhjen e krimit.
Vrasja e fëmijës
Pasi i kishin ekzekutuar të dy prindërit, Blenis Shyti dhe miku i tij rumun, Stefan Nikulesku, marrin autoveturën tip "Opel" të Aleksandrit dhe shkojnë në shkollën e vajzës. Pas mbarimit të mësimit, Amelia shikon autoveturën e të atit dhe i afrohet. Pasi sheh se brenda ndodheshin kushëriri i saj me mikun e tij shqiptar, të cilët i njihte, vajza tetë vjeçe hipën në makinë e bindur, pasi asnjë fëmije në atë moshë nuk mund t'i punojë mendja për më shumë. Sipas policisë automjeti nuk ka marrë drejtimin për nga shtëpia e saj, por është futur në një zonë pyjore në rrethinat e qytetit të Mangalias. Në këtë moment vajza ka filluar të interesohet se ku po shkonin, por përgjigja ishte pa fjalë. Dy vrarësit duke përdorur një rrip pantallonash kanë tentuar ta mbysnin vajzën tetë vjeçare, duke e shtrënguar në fyt. Në një moment vrasësit kanë menduar se vajza vdiq, duke e futur në bagazhin e autoveturës. Por kur kanë arritur te vendi, ku do ta varrosnin, kanë parë që vajza vazhdonte ende të merret frymë dhe të luftonte me vdekjen. Në këtë moment, dy agresorët përfundojnë masakrën e tyre duke e goditur vajzën me sende të forta në kokë. Pasi janë bindur plotësisht, që vogëlushja nuk kishte më shenja jete, e kanë varrosur atë në zonën pyjore në periferi të Mangalias.
Fshehja e gjurmëve
Pasi i marrin jetën dhe e varrosin vogëlushen tetë vjeçare në pyll, Shyti dhe Nikulesku kthehen sërish në banesën e çiftit Ion, ku kishin lënë kufomat e Aleksandrit dhe Lukrezias. Përgjatë gjithë natës, ata janë përpjekur të fshehin çdo gjurmë, që kishin lënë nëpër banesë. Gjithashtu ata kanë larë edhe gjurmët e gjakut të Aleksandrit, të shpërndara nëpër mure dhe dysheme. Gjatë së njëjtës natë, dy vrasësit kanë gjetur momentin, kur jashtë nuk ka patur lëvizje, dhe pasi i kanë futur të dy kufomat në bagazhin e makinës, i kanë transportuar në periferi të qytetit, duke i varrosur. Sipas policisë, gruaja mendohet se është varrosur e gjallë. Ky ishte një konstatim i bërë nga mjekët ligjorë, të cilët kishin bërë autopsisë. Ata deklaruan se kishin gjetur dhe' në mushkritë e gruas. Pasi kanë futur poshtë sipërfaqes së tokës gjithë familjen Ion, dy agresorët janë kujdesur për të zhdukur të gjitha gjurmët edhe nga makina "Opel" e përdorur prej tyre për vrasjen e vajzës dhe transportin e kufomave. Makina u gjet një muaj më vonë në një parking në periferi të qytetit të Mangalias.
I treti
Ndonëse ende nuk është i qartë implikimi i një tjetër studenti shqiptar në gjithë këtë ngjarje, policia e Kostancës ka deklaruar se për llogari të këtij hetimi është vënë në pranga si bashkëpunëtor edhe Albin Todri, 19 vjeç. Ky i fundit vazhdon shkollën e mesme në qytetin e Kostancës dhe njihej që kishte miqësi me Blenis Shytin, të dyshuarin kryesor për këtë masakër. Burimet policore janë shprehur për mediat rumune se emri i shqiptarit tjetër, Albin Todrit ka dalë pas ndalimit të Shytit dhe Nikuleskut. Të njëjtat burime kanë deklaruar se 19-vjeçari Todri është ndaluar në aeroportin e Kostancës në përpjekje për t'u larguar nga Rumania. Në rast se tre të ndaluarit për këtë vrasje tepër tragjike, do të shpallen fajtorë nga Gjykata e Vrasjeve të Rënda në Rumani, atëherë ata rrezikojnë dënimin me burgim të përjetshëm.
Trafiku i drogës zbuloi vrasjen
Policia gjeti lidhjen e studentit shqiptar me viktimat
Policia e Kostancës fillimisht kishte bësuar se zhdukja e familjes Ion, kishte lidhje me një grabitje të mundshme, kjo duke patur parasysh se ata nuk kishin shumë kohë, që ishin kthyer nga emigrimi në Gjermani. Por kjo pistë do të binte shumë shpejt, pasi policia filloi të hetonte mbi kryefamiljarin e vrarë, Aleksandër Ion, i cili rezultonte i implikuar në një rrjet të trafikut të drogës. Duke ecur në këtë linjë, policia zbulon se në të njëjtin rrjet bënin pjesë edhe shqiptari Blenis Shyti si dhe nipi i viktimës, Stefan Nikulesku. Ky ishte zbulimi i madh, që do të orientonte policinë në zbardhjen e ngjarjes dhe motivit të saj. Dyshimi për lidhje të studentit shqiptar me ngjarjen ishte përfocuar edhe më, pasi gjatë kontrollit të banesës, atij i'u gjetën disa sende të familjes Ion. Më tej gjithçka për policinë kidhte qenë e lehtë. Dy miqtë, shqiptari dhe rumuni futen në qeli dhe ndërsa "përpunohen", rrëfejnë të vërtetën. Gjithçka kishte filluar pas një pazari të papërfunduar droge. Sipas policisë Aleksandri, së bashku me nipin e tij Stefanin dhe shqiptarin Blenis, kishin vendosur të kryenin blerjen e një sasie droge dhe shitjen e saj në Rumani. Për realizmin e këtij pazari, viktima e ardhshme, Aleksandri investoi 7 mijë euro, për të blerë drogën. Të tre së bashku kishin gjetur edhe klientin, i cili ishte një biznesmen rumun. Pak përpara shitjes së lëndës narkotike, studenti shqiptar dhe miku i tij Stefan, i propozojnë Aleksandrit një plan grabtijeje dhe ekzekutimi të biznesmenit rumun. Sipas planit, në momentin që biznesmeni do të vinte me paratë për të marrë drogën, ai do të ekzekutohej me qëllim për t'i marrë lekët dhe për ta mbajtur sasinë e drogës, duke dalë dyfish të fituar. Por ky plan nuk është pranuar nga Aleksandri, i cili ka paralajmëruar nipin e tij dhe studentin shqiptar, se do t'i denonconte, në rast se ata do bënin një gjë të tillë. Pas këtij dialogu, dy të rinjtë janë frikësuar dhe e kanë marrë seriozisht, që Aleksandri mund t'i denonconte në polici. Në këtë pikë ata kanë vendosur të "hiqnin qafe" Aleksandrin. Hetuesit e çështjes shpjegojnë, se vrasja e bashkëshortes dhe vajzës së Aleksandrit kanë ardhur, pasi këto të fundit mendohet se kishin dijeni mbi marrëdhëniet mes tyre dhe mund të ishin një rrezik serioz gjatë hetimeve për vrasjen. Ndërkaq, burimet policore të Kostancës kanë deklaruar se studenti shqiptar Blenis Shyti ishte i dyshuar edhe për trafik të qënieve njerëzore.
Masakra e familjes në mediat rumune
Mediat rumune kanë pasqyruar hap pas hapi ngjarjen makabre të zhdukjes së një familjeje të tërë në qytetit bregdetar Mangalia. Pothuaj të gjitha gazetat kryesore, si "Libertatea" apo edhe televizionet, kanë pasur në fokus zhvillimet, që pas arrestimeve të të dyshuarve, deri tek gjetja e kufomave. Titujt e mëdhenj të gazetave, por edhe lajmet e para të edicioneve televizive janë hapur disa ditë radhazi me fjalët "pazaret për drogën zhdukin një familje" e të tjera të ngjashme. Ndërkohë që komuniteti shqiptar në Rumani nuk është prekur nga ngjarja, për arsye se në këtë vend ky mund të llogaritet të jetë krimi i parë i madh realizuar nga shqiptarë. E vërtetë është se komuniteti shqiptar në Rumani gëzon respektin e qytetarëve të këtij vendi.
Përgjigju Duke Cituar
Postuar më parë nga White_Angel
Krijoni Kontakt