Puls

[yjori]

Të rrinim brenda,
mbyllnim perdet,
qepnim qepallat,
këto ditë që mbetën

Në një vend të huaj,
ku nuk dimë gjuhën,
Në një shtëpi të vogël
pa tavan, me pus

N`çmendinë mbase
E s`dalim ca vjet
Për të ngrëne ka
e për të fjetur

Si zogj në kuvli
që sillen vërdallë,
Vetëm njëri tjetrin,
në mërzi dhe mall

Veshur qefinë,
Ja kështu, kot,
Të bëjmë sehir
marrinë në botë

Të presim fundin
dorë më dorë,
si ëndërra gjumi,
si akrepë ore...

[yjori]

Vjen një kohë

Vjen një kohë kur njeh më shumë të vdekur se të gjallë,
Ëndërrat vijnë e bëhen gjithnjë e më të pakuptueshme,
Kujt t`ia tregosh? Pleqtë, që i lëçisnin dikur, kanë shkuar,
Do doja dhe unë, po nuk jam fantazëm, nuk tretem dot,
Apo jam, nuk e kam ditur, e të ma thote nuk ka se kush?

Vjen një kohë kur ke jetuar më shumë seç të ka mbetur,
Babai ka vdekur, yt bir është bërë baba, e njëjta ëndërr
shikohet nga të gjithë, fluturime, rënie, qiej e humnera,
Rrënjët e krahëve na mbajnë lidhur, pupël është dheu,
Tym i bardhë a i zi e gjitha, që dliret papushim nga era...

[yjori]

Lëneshat

Erdh vjeshta e verë s`pat,
U nisën të shtegtonin zogjtë po s`ditën ku,
Fluturuan mekur, u lagën,
U tulatën strehëve hutuar e mbetën këtu

Erdh vjeshta e rreze s`pat,
Hije nuk mbollën pemët, njerëzit, muret,
N`pasqyrë të saj nuk u panë,
Harruan kush qenë e u mekën po ashtu

Erdh vjeshta, na gjeti fillikat...

[yjori]

Horeb

Malin e shenjtë
e copëtuan,
me gurët ndërtuan
tempuj,
piramida,
mure,
statuja

Lumin e shenjtë
e bënë pis,
me ujët u lanë,
pinë,
u pagëzuan,
hodhën kufomat atje,
të pëgërat,
urat

Fjalën e shenjtë
e thanë aq shpesh,
e përfolën
apo belbëzuan,
u shanë me të,
u falën,
e shkruan,
mësuan përmendësh,
harruan

Etërve, heronjve, prijësve, të vdekurve u besuam e humbëm shkretëtirave,
labirinteve, betejave, zgavrave bosh të tempujve, kafkave, anijeve, busteve,
me gjarpërinj në duar, pushkë, pranga, penë, mish e kazma, gjak e spermë,
vramë po nuk krijuam, kërkuam atë çfarë gjetëm, urryem dhe u deshëm, kaq,
asgjë më shumë, zjarri s`jemi që pjek shkëmbin e ujët rrjedh qoftë dhe i ndyrë

5000 gjuhë,
2 ditë pushim,
2 fëmijë,
2 duar herë 5 gishta,
dhjetë dollarë ora,
pesëdhjetë seksi,
sytë i ngremë rrallë
nga pjatat, librat, tjetri,
llogaritë, varret,
hapat, makinat, udha,
për të parë qiellin

E ç`të shohësh?
Avionë e antena,
Kulla, tela, kamera,
Tym, oxhakë, CO2,
Vrima ozoni, astronautë
me helmeta në Hënë,
Eteri plot sinjale, pamje,
filma, luftë, drogë,
kurva, tiranë, idiotë,
Aids, e njerëz që në Tokë
nuk kanë ç`hanë

Krreji në të dhembin
nga vetëtimë e hakut
të bardhat vezë lyer
për pashkë me gjak,
fshehur për fëmijët
në kopësht a në pjatë
me farë të ngordhur
zogjsh, drite, fati

Udhë-, fjalëkryqeve,
thyer eshtrat gjuhës,
s`kullon gjak mali,
veç duron kur rrjedh
frymën që hesht,
duron zgjedhën,
borën e gjurmës,
dëgjon e mardhet,
dorë e të drejtit
që dalë nga gjoksi
nuk flet, vec i zgjatet
tjetrit e zbardhet...

[yjori]

Ranë këmbanat

Ranë këmbanat,
M`u kujtove ti
Tempull mendja,
plot me perëndi

Tallur, pështyrë
tek jep shpirt,
Purpur e gjemba
“Inri”

Verë gjaku,
Bukë e mish,
Vdis e lindu
sërish

Bosh e hiç,
Veç ne të dy,
Frymë dhe mish,
Të dëgjoj ty

Bark ardhjeje,
Lehona fle,
Skuqje faqesh,
Ndërrim vendesh

Në mes të territ
një shenjë,
Foshnjë e qiellit
Në djep

U ngatërruam,
Fjetëm në rrymë,
Peshq të lodhur,
Lumenj shkume

Fllad i ri
Gjetheve të turmës
Fiq, arra, qumësht
Tregomë udhën

Një lot syrit tënd
Premton falje
E më bëhet se të shoh
Në ringjallje...

[yjori]

Këmbanat ranë

Jam kush jam,
Zjarr që s`djeg,
Nuk jam rrush,
Jam vreshtë

Shihmë në sy,
Asgjë s`mbaron,
Do të marr tutje
në horizont

Çështje kohe,
Ja dhe ca vjet,
Shkon e vjen
si tërmet

Po mos ki frikë
se më ke mua,
S`jam bosh e hiç,
Kam kë të dua

Fjalët mbeten,
Klithma në ferr,
Varre që hapen,
Zgjohet i vdekuri

Hëna skuqet,
Dielli shuhet,
Skuqje faqesh,
Kohë fundi

Gjumë tundjesh,
Mollë rëniesh,
Shegë të çara,
Ullinj shkundjesh…

Prit edhe ca
Të mbyllësh sytë
Të marr në krahë
Ku mos me pyet,

Është kalter atje,
Vjen erë e mirë
Pa moshë, pa jetë,
pa errësirë...

[yjori]

Fjala është

Fjala është
grua për burrin,
burrë për gruan

Ç`ka themi
është ajo ç`ka duam,
ç`ka duam të jemi,
ç`ka duhet,
falje, shpifje,
ç`ka besojmë,
çfarë presim
të dëgjojmë
e nuk thuhet

Ç`ka flasim
është pasqyrë
ku shohim veten,
djallin,zotin,
heshtjen,
botën

Fjala është
puhi,
fllad a shi,
thikë, mëri,
diell, stuhi,
lot, buzagaz,
mërzi, lot,
bosh e plot,
ti e unë,
tok

Kot e hiç
nuk lind,
pos memecë,
Fjala mbin,
gjallon,
piqet,
vdes

Fjala është
zjarri,
ç`ka bën
kafshën
të mendojë,
të njohë veten,
të qeshet

Fjala është
burim,
krua,
prind,
të parët,
fjala është femijë,
grua për burrin,
burrë për gruan...

[yjori]

Jehonë

Kafka është bosh,
Veç pak mish e kocka,
Në zgaver pret jehona
zërin, si jastëkun koka

Pyesim me zë të lartë
“A ka njeri këtu?”
Dëgjojmë veten kur flasim
Për herë të dytë..

[yjori]

Binjakë

Përbindëshi ngjan i zymtë,
Luspat e hijeve të vrenjtura,
Në të vërtetë janë pupla resh,
ofshamash, ankthi ynë
që ngjitet tym kur digjemi
në brengë të vezës, vetes

Krrokamë a cicërimë, trok,
tik tak, shkrepëtime a thjesht
një pëshpërimë, sidoqoftë
guacka dikur kris, nga brenda
klith drita e na derdhet sipër,
grerëzat e arta që na thithin
palcën e sëmbojne shpirtin
me thumba shprese, hareje,
mbjellin nektar të ri aty për
flatra e petale, gjethe e qepalla,
prarojnë ajrin, ujët, pinë helmin
e zhyten lugjeve të padukshme,
botëve të shkuara, së ardhmes

Krokodili dalë nga llumi qenka
nimfë, zanë, sirenë, ëngjëll,
Përbindëshi e dielli binjakë,
Veç ti e di çfarë, kush jam,
në jam gjarpër a pëllumb,
në jam pasqyrë apo maskë

[yjori]

More këtë plis në dorë e i fryve,
Nyjet u zgjidhën,
Ullinjtë e zinj mbushur me vaj,
bërthamë e tul,
u trandën në degë të trungut
që dridhej,
Brinjë e rrënjës u ngul më fort
në dhe, në shkrumb,
thuri të çarën me deje të reja,
lëkurë e puthje

More këtë plis në krahë, e ngrohe,
Nyjet u zgjidhën,
Buzët, çelur kur tamli mëkoi fjalën,
grahmën e gjuhës,
u skuqën gjak në gjoks të shegës
që çahej,
Shkumë u derdh mbi të, u shua
vrimave në breg,
mbuloi valën, gjurmët me të reja,
fatin me fatin...