Puls

[yjori]

Presim gjurmët

1.

Në fund të asaj udhe
u ktheva njëherësh
e pashë gjurmët....
Kisha qenë unë?

Apo qenë gjithnjë aty?
Në borë fshehur si farë
këmbet duke pritur
si piano duart...

Gjithçka ka qenë kaherë,
Mos dhe jo, nga hiçi lind,
Jam ç`kam qenë?
Do jem dikur po ky?

Zog i lodhur në mjegull
kam qenë dikur,
Lodhur duke kërkuar
foleve të huaja

Xhind me lëkurë përmbi
në zhgjëndërr të mishit.
shkallë për n`këmbanore
lart, në majë të kishës

Derisa mbërrite ti...
Ajrin ngjyrosje me frymë,
Pulëbardhat fluturonin ulët
pas anijes në shkumë

Ishin gjurmët tona në breg?
Apo kishim lindur sërish bashkë
në një botë tjetër, ku
fjalët ngjisin në mjaltë?

Degjoja bletët në kokë,
Në fund të mendjes hoje:
"A do t`i biesh pak
kesaj pianoje?"

Kishim qenë ne?
Apo kënga gjithnjë aty?
Tastave fshehur në borë si farë,
duke pritur frymën si piano duart,
fryma puthjen, fyelli buzët...

2.

Gjurmët,
Piano që pret duart,
Në dhe fshehur si varre,
Presin udhët...

Ajri,
Puthje që pret buzët,
Në gjoks fshehur si falje,
Pret frymën...

Kënga,
Erë që pret këmbanën,
Në frymë kallur së gjalli
Pret mallin...

Ne,
Të tjetërkujt,
Mumje qepur keq,
Presim gjurmët...

[yjori]

Bosh janë pyjet

Të parët e mi nuk kishin emër,
nuk flisnin fare, përgjigjeshin
me gjeste, sytë gjysmë të mbyllur,
janë të egër thuhej e i kishin frikë

Nuk dihej nga vinin, flinin në këmbë,
në këmbë vdisnin e më lindën mua,
Më lanë e shkuan, më gjetën prindët,
Një burrë ishte babai, nëna një grua

Më veshën tesha, më vunë një emër,
më bënë të flas, të qaj, të qesh, të ha,
u rrita e kur po mbushja të tridhjetat,
theva pasqyrën e dola rrugëve cullak

Bosh janë pyjet....

[yjori]

Rreth është rruga

1.

Kamarierja bjelloruse më thotë me akcent,
Çdo njeri e ka ndonjë qëllim në këtë jetë

I saji është përshembull për çastin të bëjë
një fluturim me balon me burrin mbi qytet

"Ja e bëre, po pastaj?"-"Pastaj diçka tjetër"
"I fundit qëllim i realizuar?","Dyert" e qesh

Qesh dhe unë, zbraz gotën, kërkoj llogarinë,
20 milionë dollarë për një javë në hapësirë

2.

Çdo gjë ndodh tani,
Jemi aty ku shkojmë,
Jemi qëllimi po pati...

Rruga është rreth,
Qendra pikë
e pika rreth,
Lidhur në direk
nuk dëgjojmë sirenat në breg

S`ka pikture më të bukur se dritarja,
Statujë më të bukur se pema,
Kishë më të bukur se njeriu,
(Gjashtë e ca miliardë tempuj të gjallë,
Përpos atyre të rrënuarve tashmë)

Më e bukur se fjala është kënga,
Mendimi më i bukur se fjala,
Ideja më e bukur se mendimi,
Heshtja më e bukur se ideja,
Përtej saj? Një tjetër përrallë

Memeci më bën shenja se po shoh një ëndërr të ligë,
Paskam qenë në ferr e dënimi shpagohet me jetëzgjatje,
Më vjen keq për ju e për veten e seç kam ca frikë
se mos është labirint i mbyllur, qorrsokak pa dalje

[yjori]

11 Prill, 1985

O sa gëzim!
O sa gëzim!
Të gjithë po shkojmë në varrim

[yjori]

Pikë pikë

Pikë pikë gërryhet shkëmb i gjoksit,
Paskam ftohtë vetëm, dërgomë frymë,
erëra nga larg, pusulla resh me zogj,
Dërgomë lajmëtarë, ëndërra, shenja,
Dërgomë fëmijë, shenjtorë, dritë, tym,
Dërgomë lëkurë tjetër të mbulohem

Krahërori bosh kumbon jehonën tënde,
Zëri s`është imi, as mendimi, as qënia,
Nektar drite prej rrezeve thith mendja,
Bën tutje fushave, veç të ikë, të rendë,
Nga buzë e hapur kullon pikë pikë etja,
lëngu që deh e bën t`harrosh këtë vend

[yjori]

Trokasin në portë

Vdekjen,
Foshnjen që qan,
E mora në krahë

E tunda ca,
I dhashë të pijë,
derisa fjeti

30 e ca vjet,
edhe një herë kaq,
derisa të rritet

Natyrë e qetë
me kocka e kafkë
kjo jetë

Vë ca lule mbi varrin tim:
“Këtu dergjet ushtari i panjohur,
Lindi në luftë,
Armët e tij fjalë,
më fal,faleminderit,
buzëqeshje,
Dashuronte armikun,
I dha dorën, u puth me të,
u shtri e fjeti...”

Në djep përherë,
Trokasin në portë,
Mbyll sytë, pi në terr
gjinjtë e ftohtë
të kohës...

[yjori]

Ca kocka

Kuti e dhomës dhe unë,
Mund të dilja jashtë për të parë qiellin,
po ja që dua të shkul tavanin

Hapur janë dyert,
Mund të dilja jashtë për të parë qiellin,
po ja që dua të shemb muret

Shtrati është gati,
Mund të flija për të parë qiellin,
po ja që dua të ëndërroj zgjuar

Ëndërroj të dal nga kuti e trupit,
Nga vrimë e syve dyerve të gjoksit,
Të lyp rrugëve të natës ca yje,
Sa për të shuar urinë e territ,
që hëngri dritat e prapë s`u ngop,
qe nuk di ç`do, që nuk fle dot

Ca kocka ëndërrash për qenin e zi,
Nuk jam i zoti, jam ai

[mondishall]

Jane ca vargje kaq kuptimplote, sa cdo koment eshte i tepert. "...Te lyp rrugeve te nates ca yje, sa per te shuar urine e territ...", teper fantastike. Suksese me tej.

[yjori]

Film


“Dikur bota do të jetë muze,
Çdo gjë do të jetë monument,
Bebet do lozin me kryevepra,
S`do ketë lexues, veç poetë

Njerëzit do jenë gjithnjë të rinj,
Askush i shtrembër a gungaç,
Vetëm Helena dhe Davidë
do qarkullojnë n`atë parajsë

S`do ketë kafshë që s`shkojnë
Minj, gjarpërinj a krokodilë,
Veç sorkadhe, lopë, pallonj,
E gjelbërim në shkretëtirë

Ç`të të zërë syri veç perfeksion,
Muzike hyjnore dhe dashuri,
Të gjithë njëlloj do të mendojmë,
Krushqit do të shkojnë në varrim..”

“Jam i verbër”- the .Mbamë!
“The end” si amen në ekran.
Prekëm tjetrin e qamë,
Katarsis ndoshta.

Jashtë film tjetër,
Shtëpive shfaqet
Adami dhe Eva,
Gjarpëri dhe molla.

Kameras lotë,
Pa fund ky thriller
me ose pa Zot,
Kinema bota.

Dritë e terr,
Asgjë tjetër,
Gjallë jemi?
Aktorët e vdekur.

Dy jetë para, pas,
Si gjetur,humbur,
Komedi a dramë?
Ca qeshin, ca qajnë

Bashkë prapë,
Vetëm si gjithnjë,
I paanë ti ndaj,
Ne 1.70m e ca

Mërzia,
Krimb në man,
Na ha fletët
e vjell mëndafsh

U lodhëm
me ditë e natë,
Sillna Mesiun,
po pa shpatë

Të qajmë barrët,
e qeshim të vdekurit,
Kokëposhtë varur,
si Pjetri

Përbindëshi dhe dielli janë binjakë...

[yjori]

Ikarus

Preu krahët e pemës,
Me dyllin që rrodhi
ia ngjiti vetes

N`ëndrrën e një zogu
u tremb kur po binte,
U mbush me frymë,
Po nuk ish i sigurt
në ish zgjuar a flinte

Në qeli nuk kish njeri,
As vetë nuk qe aty,
Po atëhere nga e dinte?

Muret e larta të qiellit,
Rojet në kullat me gjemba,
Drita e hekurt e mendjes,
Kjo ish pema, vetja, liria,
Ati, biri dhe fryma,
Reja, shiu dhe rrënja

Fluturoi në gjoks,
U zhyt rrëpirave,
Brenda u dogj,
E ra përjashtë
i sapolindur...