Puls

[yjori]

Anija ime

Anija ime e shkretë
t`i grisen velat shtrëngatat
t`i thyen erërat direkët
Tani ne breg ke dalë
e anuar mënjanë
Valët të sjellin më pranë
Valët të largojnë prapë

Dikur u nise për udhë
ngarkuar me erëza të rralla,
indianë, zezakë e kinezë,
mëndafsh, fildish e temjan,
po detarët e kishin bërë me fjalë
kapitenin e lidhën, e hodhën në det
e mallrat mes tyre i ndanë

Dikush mori vëthët e unazat,
një tjetër idhujt, gjerdanët e artë
ndërsa per të virgjerën e huaj
u grindën gjatë, pastaj
pinë, hodhën zarat, u shanë
derisa nxorën thikat
e njëri tjetrin vranë

Kështu e braktisur, pa drejtim,
u ende ujrave pa emër,
diku ish thellë e diku cekët
aty këtu hidheshin delfinë,
po më të shumtën shkretë,
stuhitë të grisën velat,
dallgët të thyen direkët

Përmbytur bota,
Pëllumbin në dorë,
E lashë të lirë
zogun e gjorë

Ku janë të tjerët?
Ështe bosh kjo arkë
Fillikat vetëm
Noeu i ngratë...

[yjori]

Curril blu

Curril blu në kafenë esëll të gjërave,
Qumësht që pikon nga sisa e qiellit,
Lër pak mish kockave të ëndrrave
për korbat e vdekjes, nxirë nga dielli

Me kafkë është flamuri ynë i fundit,
Anije piratësh në shkretëtirë,
Karvanë të humbur të mbyturish,
fëmijësh që lindin të pirë...

[yjori]

Thesari

Hyra në kullë në muzg,
Rojen e kish marrë gjumi,
megjithatë e vrava
për të qenë i sigurtë

Iu afrova thesarit
duke bërë dredha,
Shkruar mbi kapak
"Ndalohet vjedhja!"

Nuk ndjeja asgjë,
turp a krenari aspak,
veç habi që paska qenë
gjithmonë këtu, i hapur

Kur dola jashtë,
(Rregullat e lojës)
bëra kryqin tek pragu
mbi kufomën e rojes

[yjori]

Fata Morgana

Një çast i shkurtër nën hije,
nën hijet qe hedhin devetë

Të çojnë në oazin tjetër,
Është çast i ri apo i vjetër?

Si deve që bie në gjunjë
kur mbushen gungat me ujë

E rrugës pinë nga sisë e saj
të rekrutuarit e vrarë

Fata Morgana nëpër zheg,
Është një anije që i ndjek

E nuk e dinë se ku janë
Në këtë botë apo matanë...

[yjori]

Rënie

Jemi shtrirë mbi çarçafë
si lajme në gazeta,
Të lexoj ty,
Më lexon ti,
Vriten përditë,
Në Izrael
kanë hedhur prapë raketa

Flemë më mirë?
Shuhemi pak?
Boll me flakë e zhurmë
Avionë nuk jemi,
as kulla binjake,
Babeli jo se jo,
Ndoshta ngujimi
apo këmbanore,
Flamurë në gjysmështizë,
Epshi na tund,
Rrëzohemi poshtë,
Ortekë bore,
Gurë që hodhi Galileu
nga kulla e pjerrët e Pizës

[yjori]

Tungjatjeta

The prapë " Tungjatjeta!", fotokopje e së djeshmes, kafe në mëngjes,
hëngra drekë e përsëri kafe, dy cigare rrjesht, në tym të pashë prapë,
të nxora nga ujët, të dhashë frymë, hape sytë, “Jam në kllapi”- më the,
buzët mavi nga të ftohtët e dridheshe, të pëshpërita një fjalë në vesh,
u ngrohe dalëngadalë e në prehërin tim të zuri gjumi, ecja me kujdes,
kalimtarëve u bëja shenja me gishta të heshtnin, mbylla perdet shpejt,
rrija anash shtratit tënd, rrugicë me kalldrëm, plakat ulur mbi gur,
fëmijët luanin me top, hurmat mbi komodinë e kavanozat e reçelit,
vinte era narkozë aty, hapa velëzat për herë të fundit, po më thernin,
dikush me një skufje të bardhë e fshesë në dorë hapi derën, futi kokën,
e mbylli prapë, më perzihej, një aeroplan letre të kish ngecur ndër flokë,
dëshirën e fundit thanë, prifti lexon pasazhe nga darka e fundit,amen,
vishnjet në oborrin e gjyshes, tavani i drunjtë me hieroglife hijesh
njollat në mure, çarku i akrepave kapte edhe një sekondë tjetër,
gardalinë e verdhë me pika në gjoks, në radio një këngë e vjetër,
ishte e djeshmja, një kollë e thatë, gjumë në drekë, gjithshka rritej,
e midis dy frymëmarrjesh përgjigjem si gjithmonë "Tungjatjeta!"...

[yjori]

Getsemane

Mot i zymtë si vaj,
Krizë arsyetimi,
me hije vërdallë
e një tis trishtimi

Këtu jam, po pres,
Pjesë e karriges,
Rrufis pak të zezë
një espresso frike

Po vinë të më marrin,
Nuk e di se ç`duan,
Nuk kam dhëmbe ari
e nuk kam shëruar

Ti vjen e më puth,
“Përshendetje rabi!”
“Për këtë ke ardhur?”
Njëri nxori shpatën

Më pret një copë vesh,
Nuk qenkam Mesia
Jam roje i thjeshtë,
bëja çfarë dija...

[yjori]

Lëmsh

Loz me lëmshin që të ra nga prehëri kur ti po thur çorapet e leshit,
Shtëllungat e tymit të bardhë i bën fill, i kalon në gishta, i bën top,
Qethur janë delet e reve që po mjelin bijtë e tu në vathën e largët,
Të fërkohem këmbëve, të lutem të më përkëdhelesh prapa veshit,
të më pëshpërisësh fjalë tigrash, ndonëse ka kohë që jam maçok,
Po ti bën nyje të tjera e hesht, pa anë e fund kjo cergë merimange..

Provoj t`a zgjidh, e di, është e kotë, trung jam dhe vetë, me nyje,
Anash vatrës fle e thahem në avullin e frymës tënde të parregullt,
Gjuhë çastesh më lëpijne në fytyrë, qentë që ruajnë tufën e lehin,
Zgjohem, nuk ka ndodhur gjë, veç ti ndërkohë ke bërë edhe ca yje,
Mëngët e vjeshtës ke filluar me kaçurrelat e bardha të një mjegulle
e veç gishtat shoh që nuk lodhen kurrë, kukullat varur në penjë..

[yjori]

Asgjë

Më pyet ç`mendoj e kur të them “Asgje!” zbrazesh dhe ti,
Qiell pas shiut, kraharor që tkurret ,frymën që nxore thitha,
Fjalët rrudhen përditë më shumë, pleq ulur anës sokakëve,
Kujtimet janë shumuar, kryqëzuar, degëzuar në pafundësi ,
E kthjellët është tani drita e syve, shpesh përjetuar e gjitha,
Digjesha dikur, tani veç ngrohem i përfjetur sipër flakëve
Si ndjehem të them po deshe, vetëm se është pa rëndësi

Gjithë ato çka janë të përkohshme, kohë, njerëz apo vende,
do kalojnë të tëra ashtu siç po kalon tani kjo që po shkruaj,
Edhe kjo tundje dore është e atij që po largohet përgjithmonë,
Veçse në kërkim të asaj që nuk çbëhet po humbas mendjen,
Sa më tepër plakem, aq më tepër bëhem në këtë botë i huaj,
Ata që do të humbasin jetën, ata do e fitojnë përsëri thonë,
Kjo është asgjëja që mendoj, për t`iu përgjigjur pyetjes tënde...

[yjori]

Horizont

Pamje ballore

Filli i horizontit mban lidhur
foshnjen (ndoshta binjakët) me nënën
Kërthizë e paprerë e botëve
qe mbajnë tjetrën në bark
si koka mendjen, toka hënen,
Paralelet, shenjat e barazimit,
ulur shalëve të ekuacionit,
Shilarës vendesh

Bebëza sysh që lëvizin sinkron,
Brigje lumenjsh, në mes rrjedh,
Në fillin e bardhë të horizontit
mbahet balona në erë,
Kujdes!, mund të të marrë me vete,
si litari kovën e mbushur në pus,
Stërkalë djerse në fije të flokut,
Tespije mundimesh
që gishtat e rrudhur të fatit
prekin një për një...

E shkon si lajm sipër,
Më prisni! Po vij!
Një kovë borë
në pus të ngrirë,
Litar i mendimit
lidh hemisferat e trurit,
Varur teshat tona aty,
Lakuriq lindim,
Merren gërshërët
që presin kërthizën,
Duart mbeten pezull
me një copë fill,
Tjetri ngjitet lart,
Letër e hapur,
Më prisni! Po vij!...

Pamje anësore

Në skaj të mendjes
horizonti është veç një pikë
në fund të fjalisë,
Tunel që lidh universet,
Litar i parë nga poshtë
ndërsa ti hipën në stol,
thua të fundit lamtumirë
e bebëzat zhduken nga ekrani,
Vetëm bardhë,
Mizë në borë...

Bëj një vrimë në vezë
del një nëpërkë e zezë...