Durres, grabiten 30 mijë $ me uniforma policie

[ClaY_MorE]

"Jemi policia. Askush të mos lëvizë, se kemi ardhur për kontroll”.

Me këtë “fjalëkalim” kanë mundur të kapërcejnë portën e 73-vjeçarit Shefqet Cangoi dy grabitës të veshur me uniforma policie e të armatosur me pistoleta.

Mbrëmjen e së premtes, shtëpia private në Shkozet të Durrësit është “kontrolluar” cep më cep nga grabitësit e maskuar si policë, e uniforma e tyre ka mashtruar të zotët e shtëpisë, të cilët janë zënë në befasi, teksa po hanin darkë.

Asnjëri prej tyre nuk ka mundur t’i pengojë policët e rremë të kthenin shtëpinë përmbys, deri në gjetjen e vendit ku kryefamiljari Cangoi mbante rreth 30 mijë dollarë amerikanë.

Personat e paidentifikuar kanë marrë paratë, kanë hipur në makinë e janë larguar sa hap e mbyll sytë.

Fill pas kësaj grabitjeje spektakolare, të zotët e shtëpisë kanë lajmëruar policinë e Durrësit, ku kanë denoncuar ngjarjen.

Sipas policisë së Durrësit, 73-vjeçari Shefqet Cangoi ndodhej në shtëpi së bashku me të shoqen, 2 vajzat, bashkëshortët e tyre dhe dy mbesat e vogla.

E gjithë familja ka qenë duke ngrënë darkë, në momentin që ka rënë dera.

“Mysafirët” e veshur me uniforma policie i kanë pohuar të zotit të shtëpisë se kishin shkuar aty për të ushtruar një kontroll për armë.

Burime nga grupi hetimor pohojnë për “Shekullin” se njëri prej grabitësve ka qenë i maskuar dhe tjetri mbante vetëm kapele policie në kokë.

“Personi i maskuar ka mbajtur nën kontroll familjarët, ndërsa tjetri ka kontrolluar në shtëpi, derisa ka gjetur lekët e fshehura në një sënduk”,-pohuan burime nga grupi hetimor.

Mësohet se e vetmja që ka dyshuar ka qenë gruaja e Shefqet Cangoit, por ajo është kërcënuar me pistoletë.

Marre tek http://www.a1tv.com.al