Studentët Prodit: Ndaloni ngritjen e TEC-eve në Vlorë
Përfaqësuesit e lëvizjes studentore kanë shfrytëzuar vizitën e kryeministrit italian dhe kanë kërkuar ndihmën e tij
VLORË- Studentët, përfaqësues të lëvizjes studentore në kuadër të aleancës për mbrojtjen e gjirit të Vlorës, i janë drejtuar dje me një letër të hapur kryeministrit italian Romano Prodi, duke i kërkuar ndihmë për problemin e ngritjes së TEC-it. Ata kanë shfrytëzuar rastin e vizitës së tij në vendin tonë dhe kanë bërë listën e tyre të kërkesave. Në një konferencë për shtyp të mbajtur dje, studentët i kërkojnë Prodit të rishikojë marrëveshjen që ai kërkon të shkruajë me qeverinë shqiptare, duke e ftuar të distancohet nga planet e bëra në lidhje me këtë marrëveshje e projekte që kërkohen të nënshkruhen me të. Në të kundërt studentët kujtojnë që të mos vihen në rrezik marrëdhëniet ndërmjet dy vendeve, pasi Shqipëria, kanë kujtuar studentët nëpërmjet letrës, nuk është koloni mjedisore. Ata i kanë pohuar kryeministrit italian se ndërtimi i veprave të tilla me bazë nafte në gjirin e Vlorës do të ketë ndikim edhe në marrëdhëniet e dy vendeve tona.
I nderuari zoti Prodi,
Është kënaqësi e veçantë për ne, si përfaqësues të komunitetit të Vlorës por edhe më gjerë, që t'ju kemi të ftuar në vendin tonë. Kontributi juaj në ndërtimin e shtëpisë europiane, e veçanërisht ndihma që i keni dhënë vendit tonë në orë të vështira, është e njohur për të gjithë.
Por ne dëshirojmë të përfitojmë nga prania juaj në Shqipëri për t'ju tërhequr vëmendjen lidhur me disa shqetësime që kanë të bëjnë me marrëdhëniet mes dy vendeve tona në përgjithësi dhe me përfaqësime firmash italiane në Shqipëri në veçanti, në vepra që për arsye se shkojnë kundër interesave të vendit tonë, kanë hasur kundërshtimin e komuniteteve qytetare, sidomos në Gjirin e Vlorës.
Pa marrë miratimin e qytetarëve vendas, që kanë kërkuar referendum për këtë çështje, pa marrë miratimin e këshillit bashkiak të Vlorës, në shkelje flagrante të Konventes së Aarhusit që kërkon informimin dhe tërheqjen e pjesëmarrjes së publikut në vepra të mëdha me ndikim mbi mjedisin, kompania "La Petrolifera" ka filluar punimet në zonën e Pyllit të Sodës, për të ngritur depozita gjigante nafte. Ne studentët e universitetit të Vlorës jemi mbledhur pikërisht për të kundërshtuar ndërtimin e veprave me bazë nafte në këtë Gji, që ka e do të ketë destinacion kryesor ekonomik turizmin, e ka shprehur protestën e popullit të Vlorës në dhjetëra aksione masive, por edhe me ankimime në instanca ndërkombëtare duke gjetur aty miratim të plotë.
Ne e dimë se trysnia mbi qeverinë shqiptare për të pranuar projektin Petrolifera në Gjirin e Vlorës mund të ketë pasur autorë paraardhësit tuaj politikë por ne ju theksojmë këtu së kundërshtimi publik i këtij projekti, që tashmë ka filluar, do të marrë përmasa edhe më të mëdha, çka do të rëndonte vetë marrëdhëniet midis dy vendeve tona mike, në qoftë se kjo kompani nuk ndërpret menjëherë punimet dhe nuk tërhiqet nga Gjiri i Vlorës.
Pak qindra metra larg këtij objekti, kanë filluar gjithashtu punimet për ndërtimin e një termoncentrali me bazë nafte, i marrë përsipër nga firma tjeter italiane "Meyer Engeneering". Edhe ky projekt, që kërkon të zbatohet në zonën e një pylli e plazhi të virgjër ranor, nuk ka marrë miratimin e komunitetit vlonjat, është bërë pa informuar publikun e gjerë e për këtë arsye qeveria shqiptare është kritikuar ashpër nga Komisioni i Gjenevës. Edhe punimet për TEC-in apo TEC-et e Gjirit të Vlorës duhet të ndërpriten menjëherë, pa u zhvilluar për to referendumi vendor i kërkuar nga komuniteti vlonjat sipas të gjitha rregullave kushtetuese.
I nderuar zoti Prodi, nga mediat shqiptare mësojmë se ju do të nënshkruani me qeverinë shqiptare një marrëveshje per energjinë. Ne këtë informacionin e kemi të paktë, sepse qeveria shqiptare në përgjithësi kujdeset që populll shqiptar të mos i marrë njoftimet e duhura për veprimet e saj. Dimë vetëm se janë projektuar TEC-e gjigante të cilat do të ndërtohen në Vlorë, në Seman e në Elbasan, nje hidrocentral i madh në Skiavicë dhe tani së voni edhe centrale bërthamore!
Ndërkohë Shqipëria nuk është në gjendje të rregullojë rrjetet e veta shpërndarëse të energjisë, shteti ynë është i paaftë të vërë në rrugë shfrytëzimin e energjive të brendshme hidrike dhe populli vuan përditë mungesën e energjisë. Eshte e qartë që këto projekte, të cilat nuk kanë marrë miratimin e komuniteteve përkatëse, ndërtohen për arsye se qeveria shqiptare e fal tokën tonë me një euro, se këtu nuk zbatohen ligjet mjedisore, se në Shqipëri është e lehtë të lësh mbeturina fosile dhe të ndotësh ajrin.
Zoti kryeminister i Italisë. Shqipëria nuk mund të kthehet në një koloni mjedisore dhe në një abort të kontinentit. Ne e ndjejmë veten prej kohësh pjesëtarë të familjes europiane me të drejta të barabarta me gjithë popujt e tjerë të kësaj familjeje, edhe pse nominalisht nuk jemi anëtarë të Bashkimit Europian. Ajo që s'mund të ndërtohet në Itali, nuk duhet të ndërtohet as në Shqipëri. Aq me pak në Shqipëri, kur dihet që ne ende nuk e kemi teknologjinë dhe vetëdijen mjedisore. Ashtu siç e kanë ngritur mirëqënien e tyre kryesisht mbi turizmin vendet fqinje Greqia, Mali i Zi, kërkojmë këtë perspektivë edhe në për Shqipërinë. Kujtojmë me mirënjohje letrën që kemi marrë nga zyra juaj në Bruksel në qershor 2004, e cila mbështeste protestën tonë kundër një projekti të ngjashëm të asaj kohe: planit për të transportuar e djegur plehra të Italisë në sasi të mëdha në dyert e kryeqytetit tonë dhe qyteteve të tjera shqiptare. Po kështu dëshirojmë që ju të distancoheni sot ndaj gjithë atyre planeve që përbëjnë rreziqe për mjedisin dhe jetën e qytetarëve shqiptarë dhe që u bien ndesh dëshirave të tyre dhe perspektivave të zhvillimit të vendit tonë.
Me respekt studentët e Universitetit të Vlorës
Përgjigju Duke Cituar
Postuar më parë nga Albo
Krijoni Kontakt