IPKO licencohet per telefoni fikse

[dodoni]

IPKO NET- operator i dytë i telefonisë fikse

Sot në Prishtinë u bë nënshkrimi i licencimit të telefonisë fikse ne mes të ART-së dhe IPKO NET-it. Kjo Kompani deri më tani ka pasur të drejtën e operimit në fushën e internetit, ndërkaq prej sot edhe në atë të telefonisë fikse. Sipas kryetarit të ART-së, Anton Berisha, projekti i IPKO-NET-it, do të jetë në të mirë të ekonomisë kosovare, sektorit dhe të shfrytëzuesve, po njëkohësisht edhe për kompaninë e PTK-së pasi që konkurrenca u ndihmon edhe operatorëve dominant.


Deri më tani në Kosovë ka qenë vetëm një operatorë i telefonisë fikse, PTK-ja. Prej sot me nënshkrimin e këtij licencimi do të jetë edhe operatori i dytë, IPKO NET, projektin e të cilit e ka analizuar komisioni për Autorizim, licenca dhe monitorim i ART-së, dhe sipas kryetarit të ART-së Anton Berishës e ka marrë të drejtën të implementohet sepse: “Ai është në të mirë të ekonomisë kosovare, të sektorit dhe shfrytëzuesve, besoj që kjo do të jetë mirë edhe për kompaninë e PTK-se, sepse konkurrenca ka treguar se ju ndihmon edhe operatoreve dominant”. Berisha ka shtuar se në ndërkohë do të zgjidhet çështja e kodit të përkohshëm për ta implementuar projektin. Drejtori ekzekutiv i IPKO-NET-it, Akan Ismaili, ka bërë të ditur se tani atyre u mbetet të vazhdojnë me fazat tjera të punës ku do të jenë edhe bisedat e marrëveshjet me operatorin ekzistues.“E synim i yni është që bashkërisht ta rrisim tregun e komunikimeve dhe të telefonisë fikse në Kosovë”, ka thënë Ismaili. IPKO-net-it i duhet të pres për ta filluar punën deri sa të zgjidhet çështja e numeracionit për periudhën e përkohshme dhe marrëveshjen e inter-konekcionit me operatorët ekzistues legal në Kosovë. Kjo licencë e nënshkruar sot i ka kushtuar IPKO-NET-it, afër 90 mijë euro.


RTK 08/09/2006 15:10:07