Ndahet nga jeta Hysen Selfo, kreu i Ballit Kombëtar

[Albo]

Kryetar i Ballit Kombëtar për gati 10 vjet, Selfo, vdiq dje nga një sëmundje e pashërueshme

Ndahet nga jeta Hysen Selfo


a.r

TIRANË- Është ndarë nga jeta Hysen Selfo, një nga figurat më të spikatura të Ballit kombëtar, njëkohësisht ish-kryetar i kësaj partie për shumë vjet. Së fundi Selfo ishte zgjedhur president nderi i një fraksioni të dalë nga kjo parti, Balli Kombëtar Demokrat. Selfo u nda nga jeta dje në moshën 71-vjeçare, pas vuajtjeve prej disa muajsh nga një sëmundje e pashërueshme. Ai u vu në krye të Partisë Balli Kombëtar gati 10 vjet më parë pas largimit nga kjo detyrë të Abaz Ermenjit, liderit historik të kësaj partie. Hysen Selfo për dy legjislatura me radhë ka qenë deputet i Ballit Kombëtar në Parlamentin shqiptar. Në vitet e diktaturës ai, së bashku me familjen e tij, kanë qenë vazhdimisht në internim, për shkak të kaluarës politike. Madje Selfo i përkiste familjes që ka ndihmuar për të vazhduar shkollën në Francë ish-diktatorin Enver Hoxha. Por ky i fundit, pas Luftës së Dytë Botërore, e përndoqi, duke vrarë shumë pjesëtarë të kësaj familjeje. Selfo ka qenë inxhinier-kimist në profesion. Homazhet në nderim të figurës së Hysen Selfos pritet të zhvillohen sot nga ora 13.00-16.00 në mjediset e Shtëpisë Qendrore të Ushtrisë. Kjo pasi salla e Kuvendit ndodhet nën rikonstruksion. Pritet që në homazhe për nderimin e të ndjerit të marrë pjesë edhe kryeministri i vendit, Sali Berisha, si dhe shumë deputetë e politikanë të tjerë.

Shekulli

[Brari]

RD

--


Lamtumirë Hysen Selfo!


Të dielën vdiq në moshën 72-vjeçare politikani i njohur Hysen Selfo. Me vdekjen e tij, nacionalizmi shqiptar humbet një figurë të rëndësishme. Partia Balli Kombëtar Demokrat humbet themeluesin dhe drejtuesin e saj, familja humbet babain dhe bashkëshortin e dashur.

Hysen Selfo dhe familja e tij patën fatin e gjithë familjeve nacionaliste nën dhunën e komunizmit. I vetmi faj i tyre ishte mbështetja e Ballit Kombëtar, i cili luftonte për një Shqipëri demokratike. Pas rrëzimit të komunizmit, ai u aktivizua në politikë dhe përkrahu po ato ideale për të cilat familja e tij kishte luftuar për katër dekada, idealet e Ballit Kombëtar. Me themelimin e Ballit Kombëtar, ai u zgjodh kryetar dhe qysh atëherë punoi pa u lodhur. Ai kontribuoi në rizgjimin e ndjenjave nacionaliste në gjithë Shqipërinë. Komunizmi u mundua ta shuante nacionalizmin dhe shpirtin demokrat të shqiptarëve, por nuk ia arriti dot falë rezitencës së njerëzve dhe figurave si Hysen Selfo.

Partia e Ballit Demokrat, nën udhëheqjen e Hysen Selfos, punoi jo vetëm për zbardhjen e historisë, kthimin në vendin e duhur të ideve dhe figurave nacionaliste, por edhe në përfaqësimin dinjitoz të politikave të djathta të ditës, për të cilat kishte dhe ka nevojë Shqipëria.

Hysen Selfo ishte deputeti i parë i Ballit në parlamentin shqiptar dhe e përfaqësoi atë me dinjitet për dy legjislatura.

Një vit më parë, Hysen Selfo dha dorëheqjen nga kryesimi i Partisë Balli Demokrat, e cila e zgjodhi "Kryetar Nderi". Por edhe pas tërheqjes në jetën private, ai na është gjendur pranë. Me largimin e tij nga jeta do të na mungojë një lider, një politikan me vizion dhe një njeri me zemër të madhe. Ne të rinjtë do të kemi nevojë për këshillat e tij, që nuk na munguan kurrë deri pak ditë më parë. Ne do ta kemi Hysen Selfon Kryetar Nderi të Përjetshëm.

Lamtumirë i dashur Kryetar!

ARTUR ROSHI, Kryetar i PBKD

---------------------










Ngushellime familjes Selfo.. per humbjen e z Hysen Selfo..