Kandidimi i myftiut, Forumi Musliman kritika ndaj PDK-se

[iliria e para]

Forumi Musliman i Shqipërisë deklaroi dje përmes një njoftimi për shtyp se Partia Demokristiane me kandidimin e muftiut të Lezhës, Tomorr Ballabani, për postin e kryetarit të Bashkisë së Rrogozhinës, i ka provokuar rëndë muslimanët e Shqipërisë.

"Forumi Musliman i Shqipërisë konstaton me keqardhje dhe shqetësim se lejimi i veprimtarisë së një partie me afishim të dukshëm fetar, siç është Partia Demokristiane, është në kundërshtim flagrant me Kushtetutën e Republikës së Shqipërisë, dhe cenon karakterin laik të shtetit shqiptar, duke krijuar preçedentin i cili mund të çojë në ndarjen e popullit shqiptar sipas përkatësisë fetare",- thuhet në njoftimin për shtyp.

Në këtë deklaratë, Forumi Musliman citon se,"PDK ka dëmtuar rëndë veten dhe koalicionin e djathtë ku aderon, pasi popullsia muslimane e Rrogozhinës ndjehet e provokuar dhe e fyer rëndë, kur një klerik i lartë musliman është bërë gati të ftojë muslimanët e Rrogozhinës që të votojnë për vlerat kristjane të PDK-së, ndërkohë që ai e ka për detyrë të predikojë vlerat islame.

Forumi Musliman i Shqipërisë i apelon parlamentit shqiptar dhe presidentit të Republikës së Shqipërisë si garant i Kushtetutës dhe unitetit të shtetasve, që të marri nismat e nevojshme ligjore për anullimin e Partisë Demokristiane të Shqipërisë, si një forcë politike problematike për të ardhmen e vendit",- thuhet në deklaratë.

Shekulli/ G.