IHB Grup: Do të investojmë 14 milion euro për "Birra Korça"

[angeldust]

Birra Korça, 15 milonë euro për rikthim në treg
04 Jul 2005


Një bashkëpunim mes biznesmenëve shqiptarë dhe atyre çekë dhe një investim prej 15 milionë eurosh, birra Korça do të rikthehet në tregun vendës
Rikthehet në treg birra Korça. Pas një mungesë të gjatë në tregun vendës së shpejti kjo birrë do të jetë në baret, marketet e gjithë vendit. Kështu, pas një investimi prej 15 milonë eurosh kjo fabrikë do të rifillojë të prodhojë birrën më të vjetër në vend. Administratori i kësaj fabrike, Besnik Duka, shprehet për gazetën “Biznesi” se birra e parë pas rindërtimit të kësaj fabrike do të dalë në shtator. Aktualisht, sipas tij, kanë filluar nga instalimi i teknologjisë. Lidhur me teknologjinë që do të përdoret, Duka shprehet se do të bashkëpunojnë me një firmë çeke. Firma çeke ZVU Potez merret me prodhimin e teknologjisë për prodhimin e birrës. Përfaqësuesi i kësaj kompanie, Zdenek Fiala, u shpreh se ata janë të interesuar për të rindërtuar birraritë e vjetra. Sipas tij, ata ruajnë anën historikë të birrarive. Ai thekson se ata kanë rindërtuar rreth 220 fabrika mbi 100 vende të botës. Fiala shprehet se fabrika të cilën ai përfaqëson ka një eksperiencë 150-vjeçarë në këtë fushë. “Në Nuremburg çdo vit organizohet një panair në të cilin kompanitë prodhuese prezantojnë prodhimet e tyre dhe vjet ishte hera e parë që ne pritëm biznesmenë shqiptarë”, u shpreh ai. Investimi Për rindërtimin e kësaj fabrike janë investuar rreth 15 milonë euro. “Por, pavarësisht investimit që po i bëhët kësaj fabrikë, po ruhet edhe fasada historike e saj. Kështu, nuk do të ndryshohet struktura e saj si nga jashtë, ashtu edhe nga brenda”, u shpreh Zdenek Fiala. Kapaciteti prodhues Sipas Besnik Dukës, me futjen e teknologjisë së re fabrika e birrës Korça do të prodhojë rreth 100 mijë hekolitra në vit. Lënda e parë për prodhimin e birrës do të vijë nga Çekia. Sipas administratorit të kësaj fabrike, në të do të punësohen rreth 100 punëtorë, dukë përfshirë këtu edhe inxhinierët më të vjetër si Bashkim Bregu. Tregu Besnik Duka shprehet i bindur se konsumatori vendas do të mirëpresë rikthimin e birrës më të vjetër në vend dhe jo vetëm ai korçar. Sipas tij, birra e prodhuar do t’i plotësojë të gjitha standardet edhe për eksport. Historiku Birra Korça është prodhuar për herë të parë në vitin 1928, dukë qenë kështu birra më e vjetër në vend. Kjo fabrikë është ndërtuar nga italianët të cilëve iu duk më me interes që kjo të ndërtohej në Korçë për vetë faktin se në këtë qytet uji është shumë i përshtatshëm për t’u përdorur për prodhimin e birrës. Aktualisht ajo është blerë (vitin e kaluar) nga grupi Egnatia.

[angeldust]

Etiketa ......

[Albo]

Kompania IHB Grup investon në “Katedralen e Birrës”


Rikthehet e famshmja Birra Korça


Dikur, rreth 80 vjet më parë, një godinë e madhe që po ndërtohej në qytetin e Korçës, do të tërhiqte vëmendjen e shumë kureshtarëve. Turma njerëzish, kryesisht burra, interesoheshin çdo ditë se çfarë ishte kjo ndërtesë e re dhe dëgjonin një fjalë që për ta ishte ende e panjohur. Çudia nuk ishte aspak te ndërtesa, por tek ajo që po ndodhte në brendësi të saj. Aty do të fillonte të buronte për vite më radhë një pjesë e rëndësishme e jetës korçare.

Ajo që kërkonin burrat në këtë ndërtesë të re me një arkitekturë të veçantë nuk ishte as kështjellë me femra të bukura, as një muze me vepra arti, por as një kantier ndërtimi, ku ata të gjenin një punë. Ajo që do të tërhiqte vëmendjen ishte vetëm një fjalë e thënë nga një italian. Të gjithë në qytet diskutonin për këtë. Çështja e ditës ishte se si do të ishte fjala që shqiptonte i huaji. Ai quhej Umberto Umberti dhe pasi kishte shëtitur në disa qytete të Shqipërisë u vendos në qytetin e Korçës për të realizuar ëndrrën e tij, që më pas do të bëhej shumë shpejt një ëndërr për korçarët dhe shqiptarët. Ndërtesa mori emrin “Birra Korça”. Ka qenë viti 1928, kur në fasadën e ndërtesës me arkitekturë italiane do të lexohet e gdhendur me shkronja të mëdha “Birra Korça”. Të gjithë do të provonin pijen e re, e cila ishte e panjohur, por pas gotës së parë, korçarët do të dashuroheshin me birrën që prodhohej në qytetin e tyre. Në vargjet e këngëve do të përfshihej edhe birra Korça”: “Jo, jo në botë s’ka si birra Korça jonë, eja e dashur eja, së bashku ta shijojmë”. Lajmi se korçarët kishin birrë për të pirë mori dhen. I gjithë vendi do të provonte birrën Korça, e cila u bë e famshme dhe tepër popullore. Mbrëmjet morën tjetër ngjyrim nën tingujt e muzikës, ajrit të pastër dhe birrës Korça.


***

80 vjet më vonë nuk do të ishte më një italian që do të sillte këtë pije, por një kompani shqiptare. Pas shumë viteve jetë, birra Korça kishte nevojë të merrte një tjetër ngjyrë, jo bionde, apo brune, por një ngjyrë që të sillte tek të dashuruarit e birrës, një shije shumë herë më cilësore. Kështu filloi historia nga e para. Në vitin 1928 Umberto Umberti do të bashkëpunonte me një inxhinier shqiptar që quhej Selim Mborja. Emri. Tradita dhe imazhi i birra Korçës tërhoqën vëmendjen e një kompanie shqiptare, e cila do të zgjidhte për krah një partner jo italian, por çek dhe kjo për shkak të teknologjisë. Vitet ndryshojnë dhe me hapin e kohës ndryshojnë dhe standardet dhe kërkesat. Kështu në shkurt të vitit 2005, do të fillonte puna për të rikonstruktuar fabrikën e parë të birrës në Shqipëri. Ishte kompania shqiptare IHB Grup dhe ajo çeke ZVU POTEZ, që do të ndërmerrnin një iniciativë dhe një punë kolosale për të sjellë një birra Korça sa tradicionale aq dhe moderne.
Data 20 gusht 2006 shënon dhe fillimin e prodhimit të birrës Korça pas një ndërprerje disavjeçare. Lënda e parë për prodhimin e birrës, malto, do të merret nga Austria, nga firma Pilsen. Pajisjet të gjitha me sistem të automatizuar janë ato, të cilat do të vënë në punë teknologjinë më të fundit. Për këtë arsye u zgjodh partneri çek. Kompania e huaj do të ndihmonte së tepërmi në vendosjen e teknologjisë së vitit 2005, montimit të pajisjeve dhe instalimit të sistemit të informatizuar nga ku komandohet prodhimi. Me fillimin e prodhimit kanë filluar dhe kërkesat e para për birrën e famshme Korça.


***

Një grup specialistësh të përkushtuar për punën kolosale të bërë për më pak se dy vjet të pret me dashamirësi në hyrje të fabrikës më të vjetër të birrës dhe asaj më moderne në vend aktualisht. Ndërtesa e birrës Korça është rikonstruktuar për të gjetur një harmoni të plotë me aparaturat moderne që ndodhen në brendësi të saj. Çdo centimetër është shfrytëzuar më së miri dhe në mënyrë sa më efikase. Arkitektura e vjetër italiane ruan të njëjtat karakteristika dhe të njëjtën strukturë. Tani fabrika e birra Korça, emri i së cilës nuk mund të ndryshohej për shkak të famës, traditës dhe imazhit, duket vërtet si një vepër arti. Linjat e fermentimit, të përpunimit, stazhonimit, trajtimit të ujit e të ajrit steril, repartet e veçanta të bluarjes, ambalazhimit e kështu me radhë nuk janë më të amortizuara dhe të vjetra si më parë. Vendin e tubave të ndryshkur e kanë zënë pajisjet e reja dhe moderne. 14 tanke fermentimi, reparti i filtrimit të gazit, reparti i ambalazhimit, duken në katin e parë të fabrikës. Ndërsa stafi i specializuar dhe administratorët shpjegojnë me hollësi gjithçka që është bërë në fabrikë gjatë një viti e gjysmë punë për rikonstruksionin e fabrikës.


***

Krejt investimi i kompanisë IHB Grup ka kapur një shifër mbi 14 milionë euro. “Për të pasur një ekonomi duhen kapitale, mjetet qarkulluese dhe njerëzit”, thotë zv.presidenti i kompanisë, Qirjako Theodhori. “Pa investimin, pa teknologjinë dhe pa specialistët e vjetër shqiptarë dhe ata të rinj, që njohin teknologjinë bashkëkohore, kjo fabrikë nuk do të ishte në gjendjen që ndodhet aktualisht. Por ka qenë një vullnet i mirë dhe një punë e madhe për të arritur deri këtu. Të gjitha këto janë shoqëruar me mikpritjen e institucioneve të Korçës dhe të biznesit korçar, të cilët janë treguar dashamirës për këtë investim të rëndësishëm. I pari ka qenë investimi dhe dëshira për të bërë diçka. Teknologjia është ajo që e rendit këtë fabrikë të parën në rang botëror, që është certifikuar me standardin e cilësisë ISO 22000. Ndërsa specialistët janë inxhinierë me përvojë, të cilët kanë punuar për 30-40 vjet në fabrikë, si dhe personeli i ri i kualifikuar brenda dhe jashtë vendit lidhur me teknologjinë e fundit”. Sipas tij, pjesë e stafit janë dhe specialistët e huaj çekë dhe maqedonas, gjithsej 30 vetë, një pjesë e të cilëve do të qëndrojnë për një periudhë 5-vjeçare”, thotë Qirjako Theodhori. Fabrika e re e birra Korçës, e cila është vizituar nga shumë të huaj ka marrë vlerësime të ndryshme. “Një inxhinier specialist italian e ka quajtur këtë fabrikë Katedralen e Birrës”, shprehet administratori i mbikëqyrjes së prodhimit, Besnik Duka. Birra Korça synon të jetë një birrë elitare, por dhe tradicionale popullore për të ruajtur kështu traditën e kësaj pijeje. Prodhimet e para janë testuar nga specialistët te 200 korçarë. “Kjo është vërtet birra Korça”, ka qenë shprehja e korçarëve, të cilët kanë shijuar të parët produktin e ri të fabrikës. Shumë të tjerë që për vite me radhë vinin pranë birrës Korça ose e shijonin pranë familjeve të tyre, do të kenë mundësinë të rikujtojnë ato vite dhe të thonë të njëjtën shprehje.


Teknologjia
Në fabrikë do të punojnë 100-120 vetë. Kjo do të jetë fuqia punëtore, ndërsa kapaciteti prodhues do të jetë 120 mijë hektolitra në vit, ndërsa synohet që më vonë ky kapacitet të rritet deri në 500 mijë. Teknologjia e fundit e vitit 2005 mundëson dhe prodhimin e birrave të ndryshme për të plotësuar të gjitha shijet e klientëve: birrën bjonde, birrën e zezë, atë pa alkool, e kështu me radhë. Kompania ka menduar që birra Korça të shkojë edhe te shqiptarët jashtë atdheut, ndërsa në vend do të sigurojë 14% të tregut.

Fabrika-muze
Edhe pse tashmë janë ngritur pikat e shpërndarjes në të gjithë vendin, vizioni i kompanisë IHB Grup është që krahas biznesit dhe planeve për të ardhmen mbi kapacitetin prodhues dhe tregun të sigurojë dhe një aktivitet turistik. Në brendësi të fabrikës ka punime guri, gdhendje në gurë, punime qeramike, si dhe një muze i konceptuar për të ruajtur elementët e vjetër të fabrikës, që daton që nga viti 1928. Këtyre u shtohen dhe rrugët, të cilat priten të kenë trotuare prej kalldrëmi.


Administratori i mbikëqyrjes tregon fazat e rikonstruksionit
Duka: Fabrika në Korçë, kryeqyteti i birrës në Shqipëri

Administrator i mbikë-qyrjes së prodhimit, Besnik Duka, thotë se kompania ka nisur punë në qershor 2004, por një vit më vonë nisi rikonstruksioni i plotë i fabrikës. Dy ishin drejtimet kryesore që ndryshuan tërësisht vendin ku prodhohej birra Korça: teknologjia dhe infrastruktura. “Arkitektura u ruajt duke u gërshetuar me elementë modernë dhe u angazhuan dhe artistë e mjeshtra të përpunimit dhe gdhendjes në gurë dhe të qeramikës për ta bërë sa më atraktive këtë fabrikë, më e vjetra në vend. Po ashtu synojmë të tërheqim turistët, që mund ta vizitojnë krahas pikave të tjera të vizitueshme në Korçë”, thotë Duka. Faza ndërtimore u pasurua dhe me elementë tradicionalë, duke ruajtur strukturën arkitekturore italiane. Ai shprehet se i ka ndjekur punimet që në lindje dhe deri tani që fabrika është bërë dy vjeçe. Faza e dytë, e cila është zhvilluar paralelisht për të arritur në një kohë rekord fillimin e prodhimit, ishte futja e teknologjisë në fabrikë. Për këtë ndihmuan shumë dhe specialistët që kishin deri në 40 vjet që punonin në këtë ndërtesë, inxhinierë të mirënjohur shqiptarë. “Fabrika ka dy laboratorë, një qendror dhe një bakteriologjik, për të siguruar sterilitetin e duhur dhe pastërtinë që të arrihet standardi më i lartë për konsum. Firma ka marrë dhe patentën për prodhimin e birrës së zezë. Ky mund të quhet me të vërtetë kryeqyteti i birrës. Birra e famshme dhe tradicionale do të ketë çmime konkurruese në treg dhe si birrë tradicionale mendojmë që të jetë edhe popullore”. Në ambientet e fabrikës do të ketë një restorant për VIP-a, një për familjarë me çmime të arsyeshme të birrës dhe një ambient tjetër për klientët e përhershëm. Fabrika do të ketë dhe muzeun, ku do të ruhen elementët e vjetër të saj”.



Flet Fatbardh Çangu: Do kapim 14 për qind të tregut
Administratori: Puna dhe investimi për të krijuar një produkt elitar

Fatbardh Çangu, administrator i “Birra Korça” thotë se të gjithë përpjekjet dhe investimet kanë një qëllim të vetëm: krijimin e një produkti elitar. “Mentaliteti i drejtuesve ka qenë që të ngrihej një fabrikë e standardeve ndërkombëtare, bazuar në emrin dhe imazhin e birra Korçës si një birrë me cilësi të lartë dhe tradicionale”, thotë Çangu. Ai tregon se për të arritur këto standarde normalisht që duhej teknologjia e fundit bashkëkohore dhe kjo qe arsyeja që u përzgjodh Çekia. Bëhet fjalë për një firmë çeke që ka prodhuar për herë të parë birrën e hidhur, si dhe makineritë dhe pajisjet për të prodhuar këtë lloj birre. Nisur nga përvoja shumëvjeçare e kësaj kompanie çeke u sigurua jo vetëm teknologjia, por dhe sistemi i automatizuar për komandimin e të gjithë rrjetit të vendosur brenda në fabrikë, që nga trajtimi osmotik i ujit, që është një trajtim në thellësi për të siguruar pastërtinë maksimale dhe deri te linjat për trajtimin e ajrit steril dhe të gazit. “Uji sigurohet nga burimi i Gjergos, ndërsa lënda e parë sigurohet nga Austria. Çdo gjë në fabrikë është me sistem kompjuterik. Vizioni ynë është që me kapacitetin aktual prodhues prej 120 mijë hektolitra në vit të kapim 14% të tregut dhe të kemi shpërndarje tek të gjitha shtetet ku jetojnë shqiptarë. Kanë filluar tashmë dhe kërkesat e para për marrjen e birra Korçës qysh nga fillimi i prodhimit”. Kompania është e para në botë që është certifikuar me standardin më të lartë të cilësisë. Çangu thotë se, fillimisht fabrika ka qenë në gjendje të amortizuar dhe tani ka reparte të veçanta, duke punuar me një cikël të plotë. Fabrika ka repartet e bluarjes së maltos, zierjes dhe të majasë, repartet e fermentimit, të stazhonimit dhe të ambalazhimit, krahas dy linjave të trajtimit të ujit dhe të ajrit. “Produkti i kalon këtu të gjitha proceset e përpunimit, pasterizimit, fermentimit etj. Ne synojmë të krijojmë një produkt elitar në treg”.



Çeku
Investim i përmasave gjigante

Filip Mazura, përfaqësuesi çek thotë se, “këtu teknologjia u bë skllave e ndërtesës. Ky është i vetmi investim që kryhet në Shqipëri i këtyre përmasave gjigante dhe është për t’u vlerësuar një bashkëpunim i tillë”. Sipas tij, që në fillim ka qenë e vështirë vendosja e teknologjinë e re, por iu përshtatën më vonë më së miri ndërtesës, e cila realisht ishte e vjetër dhe me pajisje të amortizuara. “Niveli i teknologjisë së përdorur është i lartë dhe kompania ka ndikuar mjaft në nivelin e teknologjisë ushqimore dhe atë të informatizimit. Kemi pasur një bashkëpunim të mirë. Kemi gjetur një mbështetje të madhe nga specialistët shqiptarë me përvojë me të cilët shkëmbyem eksperiencat. Njëkohësisht edhe stafi i ri filloi t’i përshtatet shumë mirë sistemit të komandimit kompjuterik dhe punës me makineritë moderne. Më fillimin e prodhimit shpresoj se tregu shqiptar do të jetë i kënaqur nga ky produkt dhe cilësia që do të sjellë në treg”.


JULI KAPURANI/ KORÇE
Panorama

[murik]

Ky eshte nje lajm i mire per te gjithe amatoret e birres dhe shume pozitiv per ekonomine,sepse 14 milione dollare jane nje investim serioz ne rrang kombetar.

[Qerim]

Nuk eshte hera e pare qe flitet per nje investim masiv tek Birra Korca.Nje here u tha se u ble nga Birra Tirana.Besoj se edhe kete here kemi te bejme me nje flluske sapuni.Tregu i birres ne Shqiperi eshte mjaft i ngarkuar dhe do kete interes vetem nese fillohet te eksportohet jashte vendit.

[Albo]

Vizitë në fabrikë. Presidenti i kompanisë: Do 5-fishojmë prodhimin

Damo: "Birra Korça", investim me vlera për qytetin

JULI KAPURANI
KORÇE

Investimi në fabrikën e "Birra Korçës" ka tërhequr dje për ta vizituar kryebashkiakun e qytetit, Robert Damo, dhe nënkryetarin Mikel Dishnica.

Dy krerët e institucionit lokal janë pritur në fabrikën e re të prodhimit të birrës së famshme tradicionale nga vetë presidenti i kompanisë IHB grup, Irfan Hysenbelli. Përshtypjet e para kanë qenë ato mbi transformimin e ndërtesës së vjetër nëpërmjet një pune kolosale, e cila ka ruajtur strukturën arkitekturore, duke u pasuruar njëkohësisht dhe me elementë bashkëkohorë. Vizita ka nisur menjëherë në ambientet e brendshme, ku kryhet dhe përpunimi i lëndës së parë për të nxjerrë produktin final në kushte sa më sterile dhe nëpërmjet një sistemi modern, siç është ai i automatizuar, që komandon të gjithë rrjetin sipas reparteve përkatëse. E vetmja fabrikë me një investim të këtyre përmasave në qytet është parë në të gjitha repartet nga përfaqësuesit e bashkisë. Dy zyrtarët janë njohur që nga punimet e kryera në gurë dhe sallat e pritjes për personat e rëndësishëm për të kaluar më pas me radhë te sektorët e përpunimit të fermentimit, trajtimit të ujit dhe të gazit, repartet e bluarjes dhe të maltos etj. Reparti i ambalazhimit, me një kapacitet prej 7000 shishesh, të cilat mbushen përditë ka qenë dhe një nga pikat ku është parë me hollësi produkti final. Krahas investimit të tanishëm, kapacitetit prodhues dhe fuqisë punëtore të angazhuar në këtë fabrikë, presidenti i kompanisë ka njohur kryetarin e bashkisë dhe me investimet e pritshme, të cilat do të jenë në perspektivë ato që do t'i shtojnë cilësisë së birrës së famshme korçare dhe një klientelë më të pasur në treg. Presidenti i IHB grup ka thënë se synohet që kapaciteti prodhues të pesëfishohet në vitet në vazhdim, ndërsa që nga dita e prodhimit të “Birrës Korça”, e cila është rikthyer në treg më të njëjtin emër, traditë dhe famë, kërkesat kanë qenë gjithnjë në rritje dhe kjo në sajë të shijes dhe cilësisë së birrës, që prodhohet tashmë në kushte të teknologjisë moderne. Kryetari i bashkisë është njohur dhe me përshtypjet e para të dhëna nga korçarët tradicionalë në konsumimin e birrës lidhur me cilësinë dhe shijen e produktit të ri. Dy laboratorët që janë të instaluar në fabrikë, si dhe sistemi automatik i informatizuar, ku janë angazhuar të paktën 50 të rinj të specializuar në sektorë të ndryshëm në universitetet vendase dhe të huaja, kanë qenë një pjesë e rëndësishme e vizitës për të parë investimin e ri që po hedh në treg një nga birrat më të dëgjuara në rang republike. Sipas Damos, "ky padyshim është një investim i konsiderueshëm që i rrit vlerat qytetit të Korçës. ‘Birra Korça’ ka një emër dhe ky emër i mirë po i rikthehet qytetit tonë". Ndërsa për presidentin e kompanisë, ky është një investim që krahas emrit dhe imazhit të birra Korçës synon të jetë një investim gjithnjë në rritje për të sjellë në treg një produkt sa tradicional aq dhe elitar.

120 persona
janë të punësuar aktualisht në fabrikën e "Birra Korçës", mes të cilëve specialistë me përvojë e të rinj. Sipas pronarit Hysenbelli, me rritjen e kapacitetit prodhues do shtohet dhe fuqia punëtore
5 here
është parashikuar që të rritet prodhimi i "Birra Korçës" nga shifra aktuale e tij. Që nga fillimi i prodhimit çdo ditë mbushen 7 mijë shishe birrë, duke u shpërndarë në qytete të ndryshme të vendit

Panorama

[Albo]

“Birra Korça” vlerësohet me “Harkun Internacional të Evropës”

Ermira Shpëtimi

Të fitosh një “Oscar” në kinematografi ose një “Nobel” në mjekësi, letërsi, shkencë etj., është ëndrra e të gjithë atyre që kërkojnë të lënë gjurmë me punën apo misionin që kanë marrë përsipër. Ndërkohë edhe në biznes po bëhet gjithnjë e më e rëndësishme që suksesi të mos matet vetëm me të ardhura të mira që krijon, por edhe me vlerësime si një sipërmarrje që ka sjellë vlera, që ka përçuar ide, që ka dhënë mesazhe të qarta, se marrëdhëniet në treg nuk mund të thjeshtëzohen vetëm në shitje dhe blerje. Kjo ka qenë arsyeja që sot kompani të mëdha botërore kanë krijuar institucione vlerësimi për të gjithë ato biznese që me punën e tyre po shkruajnë një copëz të rëndësishme historie në librin e madh, ku tregohet se si ndërtohet një ekonomi tregu moderne me të gjithë aksesorët e duhur, pasi të vlerësohesh si më i miri mes më të mirëve, vlen shumë. Prandaj dhe një “Oscar” apo një “Nobel” për biznesin u pa si i domosdoshëm për të krijuar dhe kuptuar më mirë hierarkinë e vlerave.
Edhe pse shpesh themi se tranzicioni po mban peng çdo hallkë zhvillimi të shoqërisë tonë, përsëri me krenari pohojmë se mjaft sipërmarrje private po japin shembullin se disa standarde perëndimore tashmë janë një realitet edhe në Shqipëri. Ndërkohë vlerësimet e këtyre standardeve nuk kanë munguar, si në rastin e “Birra Korça”. Nuk është më një risi fakti që “Birra Korça” vlerësohet me çmime ndërkombëtare. Tani fama e këtij produkti cilësor i ka kaluar kufijtë e Shqipërisë. Pak kohë më parë, në Frankfurt të Gjermanisë u zhvillua ceremonia e dorëzimit të çmimeve “Harku Internacional i Evropës”. Me qindra kompani prestigjioze nga mbarë globi, prisnin të vlerësoheshin nga BID, organizatore e këtij evenimenti. Ndër ta ishte edhe “Birra Korça”. Dhe lajmi i mirë erdhi, “Birra Korça” arriti të marrë çmimin “Harku Internacional i Evropës”, përkatësisht në kategorinë “Diamant” krahas shumë kompanive të tjera botërore me investime kolosale, teknologji, shërbim dhe cilësi të standardeve të larta. Personalitete të botës së biznesit, pjesëmarrës në këtë eveniment, patën mundësi të njihen me arritjet e “Birra Korça”, pasi të vlerësohesh me këtë çmim dëshmon për kualitete të veçanta. Presidenti i BID, Jose E. Prieto, i cili i dorëzoi personalisht këtë çmim përfaqësuesit të kompanisë, zotit Kasem Hysenbelli, theksoi se “Birra Korça” ka përmbushur të gjitha standardet e kërkuara për të merituar vlerësimin e tyre. Kompania është vlerësuar në angazhimin në lidership, në teknologji dhe novacion, ka çmime konkurruese, duke u bërë kështu model i kompanive që operojnë në të njëjtin sektor.
Për BID emri i “Birra Korça” është më se i njohur, pasi dy vite më parë ajo e vlerësoi me çmimin “Quality Golden Crown”, (Kurora e Artë e Cilësisë) në një ceremoni të mbajtur në Londër. Ky çmim jepej për të gjitha ato kompani të cilat prezantojnë një produkt cilësor në të gjitha parametrat e saj. Dhe “Birra Korça” është e tillë. BID, i cili vlerëson me çmime kompanitë simbol në cilësi, ka shtrirë aktivitetin e saj vlerësues në 178 vende të botës. Çmimi “Harku Internacional i Evropës” ka shkuar tek kompani me investime kolosale në 53 vende të botës, në Evropë, Amerikë, Afrikë dhe Azi, si shenjë e arritjeve të tyre në kulturën e cilësisë. Konventa e parë e BID është mbajtur në vitin 1975, duke krijuar një traditë të përvitshme në përzgjedhjen e atyre që e meritojnë çmimin e cilësisë.

***
Të punosh për cilësinë e lartë të një produkti, është shpërblimi më i madh që mund t’i bëhet konsumatorit, i cili beson në angazhimin serioz, që nga momenti që përzgjedh këtë produkt mes disa alternativave. As reklamat më të sofistikuara nuk arrijnë të kamuflojnë cilësinë e vërtetë nëse ajo nuk është me të vërtetë në nivelet e duhura. Prandaj dhe “Birra Korça” nuk ka kursyer asgjë për përsosjen e cilësisë së saj, si garancia më e madhe për të patur sukses në treg. Duke filluar që nga rikonstruksioni i fabrikës ekzistuese në Korçë, më pas me një teknologji të fjalës së fundit, por duke ruajtur edhe tiparet e birrës së dikurshme, ky produkt ka fituar sot besimin e konsumatorit dhe vlerësimet e ndërkombëtarëve. Gjithashtu edhe mënyra e organizmit, politikat sociale, ruajtja e ambientit, cilësia e shërbimeve kanë qenë prioritete të kësaj sipërmarrjeje gjigante. Sot kur kompanitë shqiptare kërkojnë suksesin e tyre me mallra importi, “Birra Korça” ka treguar se edhe në Shqipëri mund të prodhohen produkte me parametra perëndimorë, falë punës dhe kërkesës në rritje për perfeksion në çdo drejtim. Nuk duhet harruar se një investim në Shqipëri si fabrika e “Birra Korça”, është ndër të tjera edhe një kontribut i madh edhe në politikat e punësimit.


Çmimet kanë ndjekur njëra-tjetrën

Tashmë “Birra Korça” mban shumë “kurora” mbi kokën e saj brune dhe bionde. Historia e çmimeve ka filluar shumë herët, me çmimin e cilësisë në Selanik, në vitin 1928. Edhe pse mban emrin e një qyteti, ajo ka qenë vazhdimisht birra e preferuar e çdokujt, nga veriu në jug. Sot mbas një investimi kolosal në infrastrukturë dhe teknologji, ky produkt vjen me ambicien për të qenë më e mira në treg. Dhe ia ka dalë. Sot ajo ka arritur të fitojë certifikatën ISO 22.000 për cilësinë dhe garancinë e konsumatorit, si e vetmja kompani birre në Shqipëri dhe Ballkan që ka arritur ta fitojë këtë certifikatë. Më pas ka ardhur çmimi “Kurora e Artë e Cilësisë” dhe vetëm një muaj më parë, çmimi “Harku Internacional i Evropës”, duke dëshmuar edhe një herë se një punë e madhe në drejtim të cilësisë, shpërblehet jo vetëm nga konsumatorët vendas dhe të huaj, por nuk mund të kalojë pa u vënë re edhe nga kompani të tilla si BID, të cilët përzgjedhin më të mirët e botës.

Kategoritë e çmimeve
Tre kategoritë e çmimeve që jepen në “Harkun Internacional të Evropës” janë: I treti “Harku i Argjendit”, i dyti “Harku i Artë” dhe i pari “Harku i Diamantit”, çmim të cilin në edicionin e sivjetshëm e mori “Birra Korça”.

Panorama