Nisma e kryeministrit Berisha: Shqiperia, 1 €

[Humdinger]

Rekomandimi i Bashkimit Evropian nuk lejon zbatimin e nismës pa u zgjidhur çështjet e pronësisë

Legalizimet, qeveria ngrin paketën "Shqipëria 1 euro"

Berisha kthen mbrapsht investitorët kureshtarë

Leonard Mitro

Qeveria shqiptare ka ngrirë për momentin paketën "Shqipëria 1 euro", duke ndërprerë në këtë mënyrë hovin e shumë investitorëve kureshtarë, që provuan të marrin informacion për nismën e bujshme të shpallur me iniciativën personale të Kryeministrit Sali Berisha.
Arsyeja kryesore është procesi i legalizimeve, pa përfundimin e të cilit, qeveria nuk mund të hartojë dhe zbatojë dhënien e tokave me qira për 1 euro.
Burime zyrtare pranë Kryeministrisë bëjnë të ditur se, shefi i qeverisë ka urdhëruar pezullimin e çdo nisme për promovimin e paketës "Shqipëria 1 euro", për aq kohë sa do të vazhdojë procesi i legalizimeve të zonave informale. Përveç kësaj, ekziston një rekomandim i prerë i Bashkimit Evropian, sipas të cilit, qeveria shqiptare duhet të pezullojë të gjithë procesin e dhënies me qira të tokave apo pronave të tjera publike, deri në momentin që të ketë përfunduar procesi i kthimit dhe kompensimit të pronave. Në shtator, parulla që i ftonte investitorët e huaj të hynin me hyxhym në Shqipëri, sapo ishte artikuluar nga Kryeministri Sali Berisha, ndërsa modalitetet qëndronin të errëta. Sot paketa duhet të kishte marrë formë dhe duhej t‘u ishte paraqitur investitorëve të huaj, pasi afati i vendosur nga qeveria për hyrjen në fuqi ishte data 1 janar 2007. Nga ana tjetër, në strategjinë e saj për thithjen e investimeve të huaja, Ministria e Financave nuk ka aspak në konsideratë paketën "Shqipëria 1 euro", e cila u promovua me shumë bujë nga qeveria në muajt e fundit të vitit të kaluar. Kreu i Financave, Ridvan Bode, ka pohuar për "Shqip" se rruga e vetme për thithjen e investimeve të huaja është përmirësimi i infrastrukturës, duke lënë të nënkuptohet se dikasteri që ai drejton nuk ka marrë seriozisht nismën e shpallur nga Kryeministri. Dukë iu përgjigjur pak ditë më parë interesimit të gazetës "Shqip", lidhur me faktin se kur do të aktivizohet paketa "Shqipëria 1 euro", ministri i Financave u shpreh se "mendojmë që zhvillimi i rrugëve është hapi i parë i rëndësishëm dhe i qenësishëm për t‘i dhënë një hov zhvillimit të ekonomisë së vendit dhe për ta bërë Shqipërinë atraktive për më shumë investime. Kjo është dhe përgjigjja ime për "Shqipëria 1 Euro". Nisma e shpallur me angazhimin personal të Kryeministrit Sali Berisha ishte parashikuar të kalonte për diskutim në parlament në muajin nëntor, ndërkohë që kohët e fundit qeveria ka shmangur çdo diskutim lidhur me këtë nismë, me të cilën qeveria synonte që kjo ofertë e re të tërhiqte vëmendjen e investitorëve të huaj.

Janë përllogaritur rreth 500 mijë euro, një faturë e papërfillshme, pasi kaq janë të ardhurat që derdhin në arkën e shtetit disa subjekte, të cilave mund të mos u ripërtërihet qiraja", vijoi këshilltari, duke ekspozuar kështu të vetmet viktima të projektit. Megjithatë, ai nuk shfaqi dijeni nëse në paketë ishte përllogaritur edhe kostoja e infrastrukturës së domosdoshme - si ujë teknologjik, energji dhe rrugë - e cila duhet të ekzistojë në trojet e ambientet që jepen për 1 euro, në çastin që vjen investitori. Xhepa shtoi se "investimet janë parashikuar të bëhen kryesisht në parqe industriale, ku këto facilitete ekzistojnë"

[ATMAN]

Ngec integrimi

Topalli kthehet nga Çekia pa premtimin për ratifikim. Arritja më e madhe e Berishës mbetet në letër...

Edlira Prenga

Marrëveshja e Stabilizim Asociimit e nënshkrua më 12 qershor të vitit të kaluar. Kryeministri, Sali Berisha e renditi këtë si suksesin më të madh të qeverisë së tij, duke e lidhur këtë me punët e bëra të të djathtëve. Por nëse nënshkrimi i kësaj marrëveshje u arrit, pjesa më e vështirë, ratifikimi i saj nga 25 vendet anëtare të BE-së duket se do të kalojë në procedura të gjata. Kanë kaluar 9 muaj që nga nënshkrimi i saj dhe asnjë nga vendet anëtare nuk e ka ratifikuar atë. Sa herë që janë kthyer nga takime jashtë vendit, udhëheqësit e mazhorancës kanë deklaruar se kanë marrë premtimin për ratifikim të shpejtë. Aq sa u krijua edhe ideja e një gare mes vendeve mike të Shqipërisë se kush do ta ratifikonte e para. Por deri më sot, asnjë parlament, me përjashtim të Kuvendit të Shqipërisë, nuk e ka kryer këtë procedurë.

Të gjithë përfaqësuesit e lartë të shteteve të huaja që kanë ardhur në vendin tonë, apo në të gjithë vizitat zyrtare të bëra nga krerët tanë në këto vende anëtare kanë dalë vetëm me premtime për mbështetje integruese, por asnjë fjalë nëse do e ratifikojnë marrëveshjen apo jo. Zgjedhjet për pushtetin lokal duket se mbeten kontestimi më i madh për ratifikimin e saj. BE-ja është shprehur skeptike për procesin zgjedhor dhe ngërcin që solli politika gjatë kësaj periudhe. Duket dhe një herë se “suksesi” i Berishës në nënshkrimin e MSA-së mbetet vetëm një firmë e hedhur në Bruksel, pasi aplikimi i saj mbetet ende larg. Standardet tona zgjedhore lënë ende shumë për të dëshiruar dhe kjo duket se mbetet pengesa kryesore për të ratifikuar MSA-në e cila kalon në një proces të gjatë dhe kërkon plotësimin e të gjithë pikave të paraqitura në këtë marrëveshje. Fqinji ynë Maqedonia e ratifikoi MSA-në në një vit, ndërsa ne duket se do të shkojmë në një hark kohor tre vjeçar a diku më shumë, për vetë faktin se viti tashmë kaloi.

Topalli në Ceki nuk e merr premtimin

Kryetarja e Kuvendit, Jozefina Topalli e ka nisur sesionin parlamentar jashtë vendit. Por në asnjë nga vizitat e bëra deri tani nuk ka mundur të shkëpusë premtimin se vendet anëtare të BE-së do të ratifikojnë marrëveshjen e MSA-së. E rasti më konkret është vizita e saj e fundit në Ceki që është konsideruar si mjaft e suksesshme nga zyra e shtypit të parlamentit. Por në asnjë nga takimet që Topalli ka patur me drejtuesit e lartë të shtetit çek nuk është folur për ratifikim marrëveshje, veçse do të “japim eksperiencën tonë, do të ndihmojmë, do ju mbështesim për integrimin në NATO, etj”. Kryetari i senatit çek, Sobotka, me ftesë të të cilit shkoi dhe Topalli atje shprehet qartë se “jemi të gatshëm t’ju ofrojmë përvojën tonë, në mënyrë që ju të mësoni edhe nga gabimet që ne kemi bërë. Mbështesim reformat dhe progresin e bërë nga Shqipëria”. Ndërsa zonja Topalli vlerësoi se

“Çekia është një model i mirë për ne në etapat drejt integrimit në BE dhe NATO. Vitin e kaluar Shqipëria nënshkroi MSA-në dhe për ne është hapur një kapitull me detyrime të reja. Ndaj, është e rëndësishme që ne të përfitojmë nga përvoja juaj. Ju falënderojmë për mbështetjen në BE dhe NATO. Shpresojmë në vitin 2008 të marrim ftesën për t’u bërë pjesë e NATO-s. Po ashtu, ne shpresojmë që Parlamenti çek të ratifikojë MSA-në sa më shpejt”. Kjo ka qenë kërkesa e vetme që ka mundur të bëjë Topalli për parlamentarët çekë, pra vetëm duke shpresuar. Ndërsa presidenti çek, Vaclav Klaus me të cilin gjithashtu u takua kryeparlamentarja shqiptare u shpreh se “ju keni padyshim mbështetjen tonë. Kjo tashmë është e qartë dhe nuk ka vend për të dyshuar. Sigurisht do të nxisim edhe bashkëpunimin e mëtejshëm politik dhe ekonomik, si dhe më gjerë. Po ashtu, besoj në ratifikimin e shpejtë të MSA-së nga Parlamenti i Çekisë”. Pra veç fjalës “shpresojmë” qeveria shqiptare nuk ka mundur akoma të marrë asgjë tjetër nga vendet anëtare të BE-së për ratifikimin e MSA-së.

[qafezezi]

Nuk eshte faji i qeverrise aktuale. Kjo eshte çeshtje politike. Te gjithe e dime pozicionin e Shqiperise . Shqiperia ka zgjedhe rrugen drejt Evropes. Por Evropa nuk na do. Per ju qe ia hidhni fajin qeverise Berishes a keni ndonje zgjidhje tjeter. Mos eshte me mire qe Shqiperia te shkoje drejt Rusise apo Iranit?

[flory80]

Nuk e di se ca u be me ate "Shqiperia nje euro" sepse kryeministri yne nuk po e permend me. Gjithashtu ka humbur edhe ai entuziazmi i prezantimi i ketij projekti. Nuk ka dal as zedhensi i tij e as ministri i financave te na deklaroje perqindjen e investitoreve te huaj te ardhur per te hapur nje biznes me nje euro, nuk po e marim vesh akoma se sa eshte perqindja e investimeve gjithashtu.
Kam frike se edhe kjo tullumbace do te shfryhet ashtu sic u shfryne edhe tullumbacet e tjera te leshuara nga kryeministri jone kohe me pare si i famshmi "çeku u bardhe" i premtuar prej tij.

[flory80]

Pozicionimi i Shqiperise perkrah Iranit eshte nje tjeter dhurate qe kryeministri yne, dikur president ja beri ketij vendi, duke e kthyer Tiranen ne kryeqytetin e militanteve Islamik nga e gjith bota, edhe duke e drejtuar vendin ne nje rruge pa krye shume larg nga rruga qe vendet e tjera po ndiqnin per tu afruar me Europen

[vagabondo_nyc]

Nuk e di se ca u be me ate "Shqiperia nje euro"

E o flory as une nuk e di cfare u be. Nuk flet me kryeministri per nismen e qeverise. Te pakten nje investim te ishte bere. Kam degjuar qe kryeminsitri shkon fshat me fshat por jo per te pa investimet e nismes 1 Euro por per te premtuar ca ti vij ne moment ne koke. Duhet ti shkruajme ti kerkojme hesap se sduhet ta lejme te beje eksperimente.

Mire kryeministri sflet per nismen 1 Euro por as kta ktu ne forum sflasin me

E di njeri sa milliona u harxhuan per ta promovuar nismen neper Evrope?

[Albo]

"Albinvest", fushate per investimet e huaja

E Shtune, 24 Shkurt 2007

Per nxitjen e investimeve te huaja (FDI) ne Shqiperi kete vit, "Albinvest" parashikon realizimin e disa programeve promovuese jashte Shqiperise. Organizimi i disa aktiviteteve te rendesishme promovuese, te cilat synojne nxitjen e investimeve dhe te imazhit te vendit tone, mbetet perparesi e punes se kesaj agjencie. Agjencia Shqiptare e Biznesit dhe e Investimeve, ne kete kuader, do te realizoje disa studime mbi korporatat e huaja shumekombeshe, ndermjet atyre qe parashikojne shpernguljen ne Evropen Qendrore dhe Lindore. Krahas studimeve, "Albinvest" gjate ketij viti do te ndermarre edhe nje fushate lobingu aktiv, qe synon sjelljen e ketyre korporatave ne Shqiperi.

[Albo]

Banka Botërore financon dy projekte në Shqipëri:

Regjistrimin e prones private brenda 10 ditesh
Financimin e segmentit të rrugës Durrës-Morinë

Korrieri

[Albo]

Qeveria shqiptare nënshkruan marëveshje me kompaninë gjigande të informatikës, Microsoft.

Albo

[DYDRINAS]

Kryeministri pret përfaqësues të kompanisë internacionale “Oppenheimer”

5/3/2007

Kryeministri Berisha u takua sot me një grup përfaqësuesish të kompanisë internacionale “Oppenheimer”, e cila operon në tregun ndërkombëtar të kapitalit, të kryesuar nga Drejtori Ekzekutiv i kompanisë, zoti Samuel Grossmann.

Në takim u diskutua mbi mundësitë e bashkëpunimit dhe krijimin e hapësirave konkrete për sjelljen nga kjo kompani të investimeve të huaja në Shqipëri. Në këtë kuadër, përfaqësuesit e kompanisë shprehën gadishmërinë për të nënshkruar së shpejti me palën shqiptare një kontratë për investime me vlerë disa miliardë dollarë në fushën e turizmit për zhvillimin e infrastrukturës turistike dhe ndërtimin e fshatrave turistikë, në fushën e energjisë dhe të industrisë, në ndërtimin e një porti të ri dhe një rafinerie. Kjo kompani ka përfunduar studimin paraprak për hartimin e një masterplani për zhvillimin e gjithë bregdetit shqiptar.

Ky projekt do të zbatohet në disa faza dhe për realizimin e tij do të përfshihen kompani të mëdha ndërkombëtare të tregut financiar dhe investitorë të tjerë. Realizimi i këtij projekti do të ketë gjithashtu mbështetjen e institucioneve financiare ndërkombëtare,si IFC, Banka Botërore, etj.

Kryeministri Berisha siguroi se qeveria shqiptare po bën çdo përpjekje për krijimin e klimës sa më favorizuese dhe lehtësuese për tërheqjen e investimeve të huaja në Shqipëri. Në këtë drejtim, Kryeministri shprehu mbështetjen e plotë të qeverisë dhe garantoi bashkëpunimin e të gjitha institucioneve përkatëse për finalizimin e këtij projekti.

Pëfaqësuesit e kompanisë internacionale “Oppenheimer” vizitojnë për herë të dytë Shqipërinë për të detajuar me autoritetet shqiptare këtë projekt, me qëllim konkretizimin shumë shpejtë të këtij projekti.

Departamenti i informacionit te Kryeministrise