Nisma e kryeministrit Berisha: Shqiperia, 1 €

[Albo]

Kryeministri Berisha takon përfaqësues të IEC- Europetrol, të cilët kanë prezantuar metodën e re të shfrytëzimit më të mirë të naftës

10/7/2007

Sot në mesditë, Kryeministri Berisha ka takuar në zyrën e tij pranë Këshillit të Ministrave një grup përfaqësues të kompanisë IEC- Europetrol, të kryesuar nga presidenti i kësaj kompanie, W.F. Hertel. Në këtë takim Kryeministri është njohur me interesin e kësaj kompanie për të prezantuar edhe në Shqipëri një metodë të re të shfrytëzimit më të mirë të burimeve të naftës. Kryeministri ka shprehur interes për këtë teknologji të re të nxjerrjes së naftës përmes shplarjes së puseve me lëngje katalitik, që përvec naftës siguron dhe prodhim të energjisë elektrike. Në fund të takimit, përfaqësuesve të kësaj kompanie u është siguruar mbështetje përmes strukturave përkatëse, kompanisë shqiptare të naftës, për të eksperimentuar dhe implementuar këtë metodë të re edhe në Shqipëri.

Keshilli Ministrave

[Albo]

Kryeministri Berisha takon zv. Drejtorin e përgjithshëm të Vodafone, z. Victor Colao

13/7/2007

Kryeministri Berisha ka pritur sot në zyrën e tij z. Victor Colao, zv. Drejtor i përgjithshëm i grupit të madh Vodafone. Në këtë vizitë të parë në Shqipëri, z. Colao ka kërkuar takim me kryeministrin Berisha për t’i shprehur atij mirënjohje për mbështetjen që qeveria shqiptare ka dhënë përmes reformave dhe ligjeve në përmirësimin e klimës së biznesit dhe të konkurencës së lirë në Shqipëri. Z. Colao ka shprehur gjithashtu interesin që kompania Vodafone ka për rritjen e investimeve në Shqipëri, me qëllim përmirësimin e cilësisë së shërbimit, duke e shtrirë atë edhe në frekuenca të tjera bashkëkohore. Kryeministri Berisha, pasi ka vlerësuar punën e Vodafone, si një nga investitorët kryesorë në Shqipëri në fushën e telekomit, ka theksuar se praktika e uljes së tarifave të shërbimit që ka filluar tashmë, duhet të zhvillohet edhe më tej, në kushtet e konkurencës së lirë. Në fund të këtij takimi, kryeministri Berisha dhe z. Colao ranë dakort se shërbimi I popullsisë dhe biznesit me cilësi dhe kosto sa më të ulët përbën prioritet të përbashkët për kompaninë Vodafone dhe qeverinë shqiptare.

Keshilli i Ministrave

[Albo]

Kryeministri njihet me projektet e Balkan Accession Fund për të investuar në fushën bankare dhe në institucione të tjera financiare në Shqipëri.

16/7/2007

Kryeministri Sali Berisha priti në zyrën e tij përfaqësues të lartë të Balkan Accession Fund, një fond investimesh private që operon prej vitesh me sukses në Ballkan, zotërinjtë Thomas Higgins, Managing Partner, Horia D. Manda, Managing Partner dhe Dennis C. Wallach, General Manager.
Përfaqësuesit e Balkan Accession Fund prezantuan para Kryeministrit studimet paraprake të bëra në fushën e telekomunikacioneve dhe bankave të tipit morgage dhe leasing.
Aktualisht Balkan Accession Fund (BAF) ka kryer blerjen e një kompanie shqiptare në fushën e Leasing dhe nisur nga kjo eksperiencë e konsideron ekonominë shqiptare dinamike dhe si një potencial për shtrirjen e biznesit të saj.
Kryeministri e njohu delegacionin e lartë të Balkan Accession Fund me situatën ekonomiko-financiare në vend dhe shprehu angazhimin e qeverisë për të mbështetur projektet e Balkan Accession Fund. Kryeministri garantoi mbështetje ligjore dhe institucionale për këtë lloj sipërmarrje.

Keshilli i Ministrave

[Albo]

Këshilli i Ministrave miraton vendimet që i hapin rrugë realizimit të dy projekte të mëdha në fushën e çimentos

18/7/2007

Këshilli i Ministrave miratoi në mbledhjen e tij dy vendime që i hapin rrugën realizimit të dy projekteve të mëdha në fushën e prodhimit të çimentos, me vlerë prej 500 milionë euro.

Këto dy projekte janë realizuar nga kompania greke “Antea Cement” dhe nga kompania spanjolle “Cementos Aguila” dhe parashikojnë ndërtimin e dy fabrikave të çimentos në zonën e Fushë Krujës.

Të dy kompanitë kanë përcaktuar sheshet e ndërtimeve për projektet e tyre, për të cilat qeveria miratoi sot ndryshimin e destinacionit të zonës, dule i kaluar ato në zona minerale.

Kompania greke “Antea Cement ka parashikuar për këtë projekt një investim prej rreth 250 milionë euro. Kjo fabrikë do të ketë një kapacitet prodhues fillimisht mbi 2 milionë ton e më tej do të vijë në rritje. Edhe projekti i kompanisë spanjolle “Cementos Aguila” parashikon një investim prej rreth 250 milionë euro dhe kapacitet prodhues të fabrikës mbi 2 milionë ton si fillim.

[Albo]

Banka e njohur franceze “Societe Generale” blen Bankën Popullore dhe bëhet pjesë e sistemit bankar në Shqipëri.

18/7/2007


Kryeministri Sali Berisha priti në zyrën e tij një përfaqësi të bankës franceze “Societe Generale”, e cila ka blerë Bankën Popullore Shqiptare.
Zv Presidenti i “Societe Generale”, Bernard Davidd prezantoi tek kryeministri paketën e shërbimeve bankare që do të ofrohen në Bankën Popullore. Në planin e zhvillimit parashkohet dyfishimi i kapitalit dhe forcimi i sistemit të kreditimit.
Përfaqësuesit e “Societe Generale” i shprehën kryeministrit Berisha vlerësime për sistemin bankar, zhvillimin ekonomik të vendit dhe klimën në mbështetje të biznesit.
Kryeministri Berisha vlerësoi planin bankar të “Societe General” , tashmë aksioneres kryesore të Bankës Popullore, si një banke që do të ndikojë në zhvillimin e metëjshëm të sistemit bankar në Shqipëri. Kryeministri theksoi se prezenca e kësaj banke të njohur franceze do të përshpejtojë edhe projektet e kompanive të tjera franceze , të interesuara për të investuar në Shqipëri.



Investimet e huaja në sistemin bankar, vlerësim dhe besueshmëri në ekonominë shqiptare

18/7/2007

Kryeministri Berisha mori pjesë, sot në mbrëmje, në ceremoninë zyrtare të bashkimit të Bankës Popullore shqiptare me Bankën franceze Societe Generale.
Të ftuar në këtë ceremoni ishin personalite të larta të vendit, si kryetarja e Kuvendit Popullor, zonja Topalli, deputetë, përfaqësues të trupit diplomatik në vend, si dhe autoritetet drejtuese të bankave përkatëse.

Zoti Bernard David zëvendësdrejtor i përgjithshëm për sistemin e bankave jashtë Francës, u shpreh në fjalën e tij, se Societe Generale ndihet krenare që mund të investojë në Shqipëri, duke kontribuar në këtë mënyrë në zhvillimin e vendit.

Kryeministri Berisha, duke përshëndetur, theksoi se ardhja e Societe Generale në vendin tonë përbën një zhvillim jashtëzakonisht të rëndësishëm, jo vetëm për sistemin bankar, por për të gjithë jetën e vendit.

Kryeministri e vlerësoi këtë ngjarje si investimin më të madh francez të viteve të fundit, i cili përbën një kredencial të çmuar për Shqipërinë.

Duke falenderuar drejtuesit e Societe General për besimin e treguar ndaj vendit tonë, Kryeministri theksoi se ky besim është një mbështetje e fuqishme për ekonominë shqiptare në tërësi.

Në përfundim, Kryeministri Berisha nënvizoi se ardhja e bankave prestigjoze në vendin tonë dëshmon se ekonomia shqiptare është një ekonomi dinamike, entuziaste, dhe e sigurtë, për hapsira të reja tregu dhe zhvillimi.

Ndër të tjera, Kryeministri u shpreh:

“Ardhja e bankës franceze, Societe General përbën një zhvillim jashtëzakonisht të rëndësishëm jo vetëm për sistemin bankar, por për të gjithë jetën e vendit. Një nga bankat më të fuqishme të Evropës dhe më gjerë, vendos të bashkohet me Bankën Popullore, tu bashkangjitet kështu bankave të tjera të mëdha prestigjoze që ushtrojnë veprimtarinë e tyre në Shqipëri dhe që kanë bërë tregun bankar të jetë në avanguardën e tregjeve të tjera të vendit.

Me këtë rast, dua të falenderoj shumë përzemërsisht drejtuesit e Societe General për besimin e madh që kanë shprehur, jo vetëm ndaj Bankës Popullore, por ndaj Shqipërisë në tërësi.

Bankat janë para së gjithash, para se të jenë banka monedhash apo letrash me vlerë, janë banka besimi. Në këtë kontekst ky besim i madh që shprehet sot është një mbështetje shumë e fuqishme për Shqipërinë dhe për ekonominë shqiptare. Por dua të theksoj se kjo përbën një ngjarje të madhe në marrëdhëniet midis Shqipërisë dhe Francës. Ky është investimi më i madh francez në Shqipëri gjatë të gjitha viteve të fundit. Ardhja sot këtu e Societe General përbën një kredencial shumë të çmuar për Shqipërinë.Me ardhjen në Shqipëri të Societe General, kompani të mëdha franceze, të cilat dëshmojnë një interes në rritje, do të ndihen shumë më mirë, do të ndihen më të sigurta dhe do të projektojnë në Shqipëri investime shumë më të mëdha, në vitet që vijnë.

Gjithashtu dëshiroj të bëj një falenderim të veçantë për drejtuesit e Bankës Popullore dhe të gjithë aksionerët e saj . Kjo bankë u themelua pak vite më parë, e tëra mbi bazën e kapitalit shqiptar, por u menaxhua tërësisht nga staf shqiptar, i aftë, i cili me përkushtimin e madh arriti të mbijetojë dhe të zhvillohet në një treg bankr konkurrues me aktorë të mëdhenj ndërkombëtarë , të pranishëm në Shqipëri. Banka popullore me punën e stafit të saj ia doli të tërheqë në ortakëri njërën prej bankave më me emër në Evropë, Societe Generale. Drejtuesit dhe aksionerët e saj dhanë një meritë të vecantë, ndaj dhe unë dua ti përgëzoj ata.

Në një hark kohor të shkurtër ne së bashku jemi dëmitarë të dy ngjarjeve jashtëzakoniosht të mëdha të jetës së vendit.Vetëm dy javë më parë ne së bashku festuam ardhjen e San Paulo IMI në Bankën Amerikane të Shqipërisë. Sot ne festojmë ardhjen e Societe Generale, dëshmi këto, se ekonomia shqiptare është një ekonomi dinamike, entuziaste, e sigurtë në hapsira të reja tregu dhe zhvillimi.

Edhe njëherë dua ti falenderoj dhe të bëj urimet më të përzemërta Societe Generale dhe Bankës popullore."

[Albo]

Kryeministri Berisha diskuton për dixhitalizimin e RTSH-së me kompaninë e njohur Sony System

20/7/2007

Kryeministri Berisha u takua sot paradite me përfaqësues të Kompanisë Sony System, ndër të cilët Norio Emoi, Drejtori i Përgjithshëm për Europën Perëndimore dhe Lindore, për Lindjen dhe Afrikën, Paul Wollis, Drejtor Marketingu për Europën.

Në këtë takim përfaqësuesit e kompanisë Sony System i shprehën Kryeministrit Berisha gatishmërinë për të bashkëpunuar për realizmin e projektit të dixhitalizimit dhe rinovimit teknik të Radiotelevizionit Publik Shqiptar.

Kryeministri Berisha mirëpriti gatishmërinë e kompanisë së njohur Sony Sistem për të ndihmuar në modernizimin e teknologjisë së Televizionit Publik Shqiptar dhe shprehu mbështetjen e plotë të qeverisë për realizmin e këtij projekti. Duke vlerësuar këtë bashkëpunim Kryeministri u shpreh se Shqipëria është vendi më i përshtatshëm në rajon për të investuar. Kryeministri Berisha theksoi se nga 1 janari 2008 Shqipëria do të bëhet vendi me barrën fiskale më të ulët në Europë.

Nga ana e tyre përfaqësuesit e kompanisë Sony System shprehën interesin për investime të tjera në Shqipëri.

[vagabondo_nyc]

Duke vlerësuar këtë bashkëpunim Kryeministri u shpreh se Shqipëria është vendi më i përshtatshëm në rajon për të investuar

Olldashi pranon dështimin në investime

Friday, 20 July 2007

Ministri Sokol Olldashi, njëherë kandidat për kryetar bashkie në Tiranë, njihet si njeri i prerë dhe pa shumë fjalë, por dje kaloi çdo parashikim. Duke prezantuar draft Strategjinë Sektoriale për Transportin Shqiptar, ministri i Punëve Publike deklaroi hapur dhe pa frikë shifrat skandaloze të investimeve të kryera në 6-muajt e parë 2007. Sipas Olldashit, kemi një realizim të investimeve për rrugët me financim të brendshëm vetëm 48,2% ndërsa nga financimet e huaja vetëm 5%. Deklarata u bë në prezencë të donatorëve të huaj, të cilët nuk iu shpëtuandhe “kritikave” të ministrit tonë lidhur me procedurat e stërzgjatura në akordimin e fondeve. “Duke përfituar nga prezenca e të gjithë donatorëve të mëdhenj, unë do të doja të tërhiqja vëmendjen në një situatë problematike. Realizimi i financimeve buxhetore ne rruge, për vitin në vijim, është 48.2% ndërsa realizimi i investimeve me financime të huaja është vetëm 5%. Ky është një disnivel i papranueshëm, ku ne kemi pjesën tonë të përgjegjësisë. Unë ju siguroj se po bëjmë çdo përpjekje për të korrigjuar defektet, në mënyrë që të shmangim vonesat e shkaktuara prej nesh, por ju ftoj që të njëjtën gjë ta bëni edhe ju” tha dje ministri i PPTT-së. Duke shfrytëzuar prezencën e të huajve Olldashi theksoi, se “Me modesti dhe me mirënjohje për të gjithë kontributin tuaj shumëvjeçar, më duhet të them se ne do të jemi gjithnjë e më pak të prirur për të pranuar procedura të stërzgjatura financimesh, kostoja në kohë e të cilave në disa raste kapërcen diferencën e këtyre financimeve nga ato që mund të përthithen duke iu drejtuar tregut bankar”. Deklarata e kreut të Punëve Publike vjen në një kohë kur Shqipëria po aplikon për kredi tregtare, si mjet efikas në gjetjen e burimeve në kohë tepër të shpejtë. Madje dhe vet FMN ka ngritur zërin në faktin se vendi ynë po përjeton rritje ekonomike, stabilitet e si rrjedhojë duhet të largohet nga aplikimi i kredive të nga donatorët si BB apo BERZH.
Investimet
Parashikimet e investimeve të Planit Kombëtar të Transportit janë tejkaluar tashmë, nëse do të kishim në vëmendjen tonë fondet që Qeveria ka vënë në dispozicion të korridorit Durrës-Kukës-Morinë. Olldashi pranon indirekt, kështu, faktin se janë hedhur shuma të mëdha për këtë aks rrugor, madje dhe në buxhetin shtesë janë akorduar 70% të fondeve. Vetëm buxheti i miratuar për vitin 2007 parashikon 270 milionë USD, ndërsa nga këto, vetëm financimi i brendshëm është rreth 140 milionë USD. Sipas kreut të MPPTT-së, shpenzimet e mirëmbajtjes së sistemit rrugor parashikojnë rritje më të madhe me privatizimin e shërbimeve në të ardhmen, duke rritur standardet e mirëmbajtjes, shoqëruar me kosto shtesë, pasi aktualisht, fondet për mirëmbajtjen e rrugëve nuk përballojnë nevojat e rrjetit rrugor. Nisur nga kuotat e përcaktuara, parashikohet rritje progresive e fondeve operative për vitet 2007-2009. Me futjen në shfrytëzim dhe të disa akseve të reja, kërkesa e fondeve për mirëmbajtje dhe për sigurinë rrugore parashikohet të rritet ndjeshëm.
Strategjia
Të gjithë aktorët që mund të kontribuonin për konturimin e strategjisë së transportit, shoqatat e Transportuesve Shqiptarë, disa katedra të Universitetit të Tiranës, Administrata Qendrore ajo lokale dhe grupe të tjera interesi, profesionistëve që ndërtuan draftin e parë të kësaj strategjie iu kërkua që zhvillimin e infrastrukturës kombëtare t’a shihnin ngushtë të lidhur me përmirësimin rrënjësor të kuadrit ligjor dhe atij institucional. “Sigurisht, produkti që ju paraqitet sot, nuk është as perfekt dhe as përfundimtar. Ai do të ishte i mangët, nëse nuk do të merrte edhe kontributet tuaja, analizën dhe eksperiencën tuaj të vlefshme në sektor” tha Olldashi.

TRANSPORTI DETAR
•Ngritjen e Administratës Detare
•Rritjen e sigurisë së anijeve
•Rinovimin e flotës detare me anije sipas standardeve
•Sigurimin e kushteve për zhvillimin e Turizmit

TRANSPORTI HEKURUDHOR
•Integrimi i rrjetit hekurudhor shqiptar në rrjetin rajonal të transportit.
•Përmirësimi gradual dhe i vazhdueshëm i infrastrukturës hekurudhore
•Ndarja organizative e sistemit te infrastrukturës hekurudhore
•Hapja e tregut hekurudhor të transportit nëpërmjet privatit

TRANSPORTI AJROR
•Reformimi i plote i Drejtorisë së Përgjithshme të Aviacionit Civil
•Liberalizimi i tregut, sipas standardeve dhe me kushte të konkurrencës
•Studimi i hapësirës ajrore shqiptare për zhvillimin e aeroporteve te tjerë

TRANSPORTI RRUGOR
•Menaxhimin nga një agjenci e vetme për rrugët urbane dhe rurale
•Riorganizimin përfundimtar të Drejtorisë së Përgjithshme të Rrugëve
•Hartimin e Sistemit të Menaxhimit të Pasurive Rrugore
•Rishikimin dhe ndryshimin e ligjit për shpronësimet Nr.8561.
•Përgatitjen e një harte rrugore të përditësuar.

[klesta16]

Kjo nisme me duket apsurde.Ai nuk mund te vej cmimin e tokes kjo duhet percaktuar nga pronari.

[Albo]

One Stop Shop, regjistrimi i bizneseve nga 647 USD, tani vetëm me 1 dollar

Nga Ergys Mertiri

Sipas një studimi të Bankës Botërore, kostoja e regjistrimit të një biznesi në Shqipëri shkon në rreth 647 dollarë. Kjo përllogaritje ka dalë në bazë të një sondazhi të bërë nga Banka Botërore, “Të bësh biznes në Shqipëri”, ku kostoja prej 647 dollarësh për regjistrimin e biznesit është nxjerrë pa llogaritur shpenzimet e tjera për licencimin etj. Po kështu, kjo kosto i përket vetëm pengesave financiare zyrtare që kërkon administrata dhe jo shpenzimeve të noterëve etj. Shoqata amerikane USAID, e cila ka marrë përsipër investimin e projektit të qeverisë për thjeshtimin e procedurave të regjistrimit One Stop Shop, ka pohuar se do të bëhet e mudur që kjo shumë financiare të thjeshtohet në një shumë krejtësisht minimale, e cila shkon në 100-150 lekë. Kjo nuk përfshin pagesat për noterët që do të certifikojnë statusin e sh.p.k. dhe aktin e themelimit. NRC do t`i zvogëlojë këto shpenzime në mënyrë dramatike, të cilat nuk janë përfshirë fare në pagesat zyrtare të cituara. Gjithashtu, në procesin e tanishëm të regjistrimit, përveç pagesave ligjore, një faktor tjetër i rëndësishëm i kostos së lartë të regjistrimit është edhe pengesa kohore. Për sa i përket kostos kohore, sipas studimit të Bankës Botërore, për regjistrimin e një biznesi në Shqipëri duhen mesatarisht rreth 47 ditë, gjë që përbën një pengesë të rëndësishme burokratike për të gjitha bizneset e reja, të cilat synojnë të hapin aktivitetet e tyre. Qeveria shqiptare ka marrë përsipër që të tërë këtë kosto kohore dhe financiare ta eliminojë, duke e çuar në minimumin e mundshëm. Nisma ONE Stop Shop do të bëjë të mundur pikërisht thjeshtimin e procedurave për të përfunduar çdo regjistrim biznesi në një ditë dhe me një dollar. Gjithashtu, lidhur me thjeshtimin e procedurave USAID ka mbështetur një projekt, i cili do të bëjë të mundur që i gjithë procesi i regjistrimit të kryhet On Line, nëpërmjet internetit. E gjithë kjo do të bëjë të mundur që në procesin e regjistrimit, kompanitë që regjistrojnë aktivitetet e tyre të mos kenë nevojë as të paraqiten në zyrat e administratës për këtë gjë. E gjithë kjo do të synojë që procedurat të shkurtojnë çdo pengesë të mundshme administrative, duke bërë që biznesi të shpenzojë sa më pak energji, kohë dhe para për administratën.

Ky projekt do të shtrihet edhe te pagesa e taksave dhe te tenderat, ku gjithçka mendohet të kalohet On Line.

Tema

[Albo]

Kryeministri Berisha: Interesi i biznesit ndërkombëtar për të investuar në Shqipëri, në rritje

8/8/2007

Në mbledhjen e sotme të qeverisë Kryeministri Berisha theksoi se investimet e huaja vazhdojnë të mbeten kryefjala e veprimtarisë së ekzekutivit. Në fjalën e tij Kryeministri u ndal në disa investime të mëdha që po konkretizohen në kërkimin, nxjerrjen dhe zhvillimin e hidrokarbureve nga dy kompani serioze ndërkombëtare që kanë nënshkruar kontratat me qeverinë shqiptare dhe ALBPETROL për kërkime të naftës dhe gazit në Detin Jon dhe për zhvillimin dhe rritjen e prodhimit në vendburimet ekzistuese. Kryeministri e cilësoi futjen e këtyre kompanive si një dëshmi të fokusimit dhe dëshirës së biznesit ndërkombëtar për të investuar në Shqipëri. Ai nënvizoi se futja e këtyre dy kompanive shënon një kthesë rrënjësore si në nxjerrjes ashtu edhe në kërkimin e naftës dhe gazit.

Në fjalën e tij Kryeministri u shpreh:

“Mbledhja e sotme ka si kryefjalë investimet e huaja. Ne miratojmë sot dy kontrata për ndarje të prodhimit për kërkim-zhvillim dhe prodhimin e hidrokarburave në Shqipëri në bllokun Jon 5 në det ndërmjet vendit tonë dhe kompanisë MEDOIL, dhe një kontratë tjetër shumë e rëndësishme për zhvillimin dhe prodhimin e hidrokarbureve në vendburimet Ballsh-Hekal-Gorisht-Kosur-Cakran-Mollaj dhe në vendburimin e Delvinës ndërmjet ALBPETROL- STREAMOIL GAS LIMITED. E para është një kompani angleze e dyta është një kompani mikse ndërkombëtare. Këto janë dy kompani shumë serioze të cilat pas një periudhe negociatash intensive kanë firmosur kontratat me ALPETROL, kontrata shumë të rëndësishme për naftën, kërkimin nxjerrjen dhe prodhimin e saj në vendin tonë. Së pari këto i bashkohen kompanive të tjera që operojnë sot dhe që faktikisht kanë ndryshuar në mënyrë të ndjeshme prodhimin e naftës në vend deri në 500 mijë tonë vitin që kaloi. Sërish ky vit parashikohen rritje të tjera të ndjeshme. Rrisim me këto kontrata rreth 3 herë të ardhurat e ALPETROLIT. Disa prej tyre janë të angazhuara në kërkim, por mbeten të përqëndruara shumë në shfrytëzimin e naftës në fushat e njohura, e cila sipas vlerësimeve të ndryshme arrin një sasi shumë të madhe rreth 1 miliardë e 800 milionë fuçi. Nga kjo natyrisht me metodat parësore të cilat do të aplikojnë këto kompani do të rimerret një përqindje 10 -12 %, një përqindje kjo që është e mjaftueshme për Shqipërinë për shumë e shumë vite për të plotësuar nevojat. Kurse me metodën dytësore përfitimi i saj mund të shkojë deri në 60 %. Nafta është një sektor që duhet të ketë vëmendje të veçantë dhe faktikisht kompanitë serioze ndërkomëbatre po tregojnë interes të madh në rritje. Me futjen e këtyre dy kompanive shënohet një kthesëe rrënjësore si në kërkimin ashtu edhe në nxjerrjen e naftës dhe të gazit. Futja e tyre është një dëshmi madhore, e fokusimit të biznesit ndërkomnbëtar e dëshirës dhe vendimit për të investuar në Shqipëri. Ndonëse verë dhe vapë, faktikisht vendimet për investimet e huaja gjatë këtyre 3-4 javëve kapin shifra shumë të mëdha. Para tre javësh ne miratuam Devollin që shkonte në rreth 1 miliardë Euro si kaskadë, çimenton Titanin. Dy kompani shumë serioze në naftë, por javën e ardhme ka sërish vendime shumë të rëndësishme në fushën e investimeve”.


Kryeministri Berisha: Miratimi i kontratave me MEDOIL dhe STREAMOIL, kthesë rrënjësore në kërkimin dhe nxjerrjen e naftës

Këshilli i Ministrave miratoi gjatë mbledhjes së sotme dy kontrata të rëndëishme që i hapin rrrugën shumëfishimit të prodhimit të hidrokarbureve në Shqipëri. Këto dy kontrata, e para mes qeverisë shqiptare dhe kompanisë MEDOIL për kërkimet e naftës dhe gazit në detin Jon, dhe e dyta mes ALBPETROL dhe STREAMOIL & GAS LIMITED për zhvillimin dhe prodhimin e hidrokarbureve në vendburimet ekzistuese Ballsh-Hekal-Gorisht-Kosur-Cakran –Mollaj dhe në vendburimin e Delvinës, do të rrisin me tre herë të ardhurat e ALBPETROL. Prezenca e kompanive të huaja ka rritur në mënyrë të ndjeshme prodhimin e naftës në vend duke e çuar në mbi 500 mijë tonë vitin e kaluar. Sipas vlerësimeve Shqipëria ka një sasi të madhe nafte që shkon deri në 1 miliardë e 800 milionë fuçi. Futja e këtyre dy kompanive në tregun e hidrokarbureve shënon një kthesë rrënjësore në kërkimin dhe nxjerrjen e naftës në Shqipëri. Kontrata me këto dy kompani ndërkombëtare serioze vjen pas nënshkrimit të kontratave për ngritjen e disa hidrocentraleve nw vend, apo investime të tjera siç ishte ajo në fushën e çimentos me kompaninë TITAN. Kompanitë MEDOIL dhe STREAMOIL & GAS LIMITED u bashkohen kompanive të tjera që operojnë në sektorin e kërkimit, zhvillimit, nxjerrjes dhe prodhimit të naftës në Shqipëri.

Keshilli i Ministrave