Lajmet nga Superliga 2006/2007

[Noizy]

Shqiptaro maqedonasi Elvis Bajrami ka një detyrë tjetër në ekip, pasi është urë lidhëse me maqedonasit.


Për futbollistin e Apolonisë, shqiptaro maqedonasin Elvis Bajrami, aktivizimi me fierakët është një përvojë e mirë. Vetëm 19 vjeç, Bajrami i ardhur në Fier në merkaton e janarit së bashku me disa futbollistë të tjerë nga shteti fqinj, tashmë është klimatizuar mjaft mirë dhe ndihet si në shtëpinë e tij. Krahas stërvitjes, të cilën e kryen me mjaft përkushtim, Bajrami ka marrë përsipër edhe një detyrë jo të lehtë, atë të përkthyesit nga shqipja në maqedonisht për shokët e tjerë të ekipit. Kështu Bajrami dashur pa dashur është bërë një urë midis stafit teknik dhe bashkëpatriotëve të tij nga Maqedonia, të cilët në çdo moment kanë nevojë për ndihmën e tij. Por çfarë thotë në intervistën e tij mesfushori Bajrami për ekipin, shokët, drejtuesit dhe për mikpritjen e qytetarëve të Fierit? Ja dhe përgjigjet e tij:
Elvis, ndaj Vllaznisë e filluat lojën si titullar. Ç'do të thotë kjo për ju?
Me të vërtetë jam ndier mirë që jam aktivizuar si titullar në 45 minutat e para të takimit me Vllazninë dhe së bashku me shokët e tjerë të ekipit kemi zhvilluar një lojë të mirë në këtë pjesë loje. Por s'qe e thënë që loja e mirë e 45 minutave të para të shpërblehej me sukses edhe në përfundimin e krejt 90-minutëshit të këtij takimi. Ndoshta e morëm disi lehtë këtë takim, por mendoj se edhe fatin e kemi pasur kundër. Në pjesën e parë, nëse do të kishim marrë një 11 metërsh të mohuar ndaj goleadorit tonë Plaku, apo edhe nëse gjyqtari do të tregohej i saktë në zbatimin e rregullores kur portieri mik e preku si lojtar i fundit topin me dorë, ndoshta kjo ndeshje do të ishte mbyllur që në këtë pjesë në favorin tonë.
Edhe pse keni pak ditë që ndodheni në Fier, duket se jeni klimatizuar jo vetëm me shokët e ekipit, por edhe me tifozët, apo jo?
Jo vetëm unë, por të gjithë futbollistët që kanë ardhur nga Maqedonia janë të kënaqur nga kushtet që kemi gjetur në stërvitje dhe akomodim. Edhe tifozët janë të shkëlqyer. Unë dhe Suadi kemi privilegjin që jemi shqiptarë dhe komunikojmë lirshëm me të gjithë, por edhe shokët e tjerë që kanë ardhur nuk e kanë ndier mosnjohjen e gjuhës. Futbolli ka kodin e tij dhe deri në këto momente nuk kemi pasur asnjë problem. I vetmi shqetësim është pozicioni që mbajmë në tabelën e klasifikimit, i cili na tundon për të dhënë maksimumin tonë në të gjitha ndeshjet.
Atëherë si e mendoni vazhdimësinë e mëtejshme të ndeshjeve të superligës, sepse tashmë keni krijuar një ide më të saktë për të?
Pa dyshim, nëse do të përpiqemi të qëndrojmë në superligë, duhet të djersijmë më shumë. Së pari, duhet të besojmë te forcat dhe mundësitë tona. Së dyti, në çdo takim duhet të marrim maksimumin e pikëve në mënyrë që diferencën që kemi me ekipin e tetë dhe të shtatë dalëngadalë ta ngushtojmë. Eshtë një detyrë jo e lehtë për ne, por jo e pamundur. Ndoshta me këtë paraqitje tonën në ndeshjet e fundit kanë ndikuar edhe largimet e futbollistëve brazilianë, të cilët ishin pjesë e formacionit bazë.
Të dielën është përballja me Dinamon. Ç'mendim keni për këtë takim?
Përveç fitores, nuk kemi në kokë asnjë mendim tjetër. Asnjë rezultat tjetër nuk na shërben. Pas eliminimit në kupë me Besën, Dinamo do të kërkojmë të rehabilitohet në takimin me ne, por mendoj se do të jetë një takim i hapur, ku natyrisht fitorja do të na pëlqente të anonte nga ne.

[Noizy]

Trajneri Bici kërkon që ekipi të qëndrojë me.


Ka merituar mbështetjen dhe përgëzimet e gjithë tifozërisë kavajase trajneri Vasil Bici jo vetëm për kualifikimin e Besës në kupë ndaj Dinamos, por më së shumti për fitoret që ekipi i tyre po korr nga ndeshja në ndeshje. Krahas vlerave dhe meritës të futbollistëve, nuk mund të mos vlerësohen edhe ndërhyrjet tepër të zgjuara e efikase të Bicit në disa fitore të Besës. Falë kësaj zgjedhjeje taktike perfekte të tij, loja e kavajasve ndaj Tiranës e Dinamos dha frytet e saj. Po si e vlerëson trajneri Bici pak kaq kohësh drejtimi Besën e tij? Çfarë quan arritje trajneri Bici dhe çfarë defekti ka nevojë të korrigjohet? Po sfida e sotme ndaj Elbasanit çfarë përbën për trajnerin? A do të kërkojë Besa edhe sot fitoren e radhës?
Kur morët Besën, kishit plot ankesa për shumë probleme që nuk shkonin, si përgatitja fizike, sulmi, mesfusha deri te mbrojtja. Po tani?
Nuk e kam zakon t'i them të zezës së bardhë. Kur mora drejtimin e Besës, konstatova se disa titullarë nuk gëzonin formën e sezonit të kaluar. Loja e Besës çalonte në të gjitha repartet. Shqetësimi më i madh ishte shterpësia e golave, ku jo pak herë ndëshkoheshim pikërisht prej humbjes së rasteve. Kjo më detyroi të shfrytëzoja në maksimum fazën përgatitore dhe t'i kërkoja presidentit Bizhdili përforcime në merkaton dimërore. Si unë, ashtu dhe kolegët e mi, djersitëm fort bashkë me ekipin për të marrë maksimumin në çdo seancë stërvitore. Siç konstatoni edhe nga rezultatet e arritura gjatë këtij viti, tani këto vërejtje i përkasin vitit që shkoi.
Sukseset tuaja rresht të javëve të fundit janë shpërblimi i djersës së derdhur, apo...?
Pa dyshim që gjithçka ka ardhur prej djersës së futbollistëve. Të gjithë janë tashmë të vetëdijshëm për vlerat reale që disponojnë. Kanë kuptuar se tolerimi që Bizhdili u ka bërë në rezultatet e fazës se parë është një nxitje për të justifikuar këtë besim. Nuk u ka munguar asnjë qindarkë edhe kur janë mundur. Tashmë lojërat dhe rezultatet kanë vendosur një harmoni të plotë midis vlerave të futbollistëve dhe detyrimit që kanë për tifozërinë dhe presidentin. Të luash tri takime në 7 ditë, këto dy në transfertë ndaj Tiranës e Dinamos dhe Shkumbinit në shtëpi dhe t'i fitosh nuk është pak. Besoj se kemi bërë më të mirën tonë këtë vit dhe shpresoj të vazhdojmë kështu.
Ndërkohë eliminuat Dinamon në kupë, ekipin që drejtonit vetëm një vit më parë. Ju ndihmoi ky fakt?
Njohja për një ekip ka ndikimin e tij. Po ajo që sjell e garanton suksesin mbetet angazhimi dhe cilësia e lojës në ekipin që drejton. Besa tregoi një besim për t'u vlerësuar që nga nisja nga Kavaja deri në minutën e 90 të. Ju e patë se shënuam një gol në min e 77 të dhe besuam deri në fund. Fitorja na buzëqeshi në fund, duke na shpërblyer djersën dhe besimin. Ishte një fitore plotësisht e merituar dhe u përjetua si festë nga tifozëria jonë si në stadium, ashtu dhe pas kthimit në Kavajë.
Po ndaj Elbasanit do të synoni fitoren?
Pavarësisht momentit që po kalon Elbasani, ai mbetet një kundërshtar për t'u vlerësuar. Vërtet që Besa po kalon një moment mjaft të mirë, por kjo falë përqendrimit maksimal për çdo takim dhe mbajtjes sa më larg të euforisë. Mbeten edhe 12 javë për t'u luajtur bashkë me takimin e sotëm dhe gjithçka mund të ndodhë. I kam kërkuar ekipit të tregojë përqendrim dhe vlerësim maksimal ndaj kundërshtarit në çdo sektor të fushës, deri në vërshëllimën e fundit të gjyqtarit. Synimi ynë dihet që është vazhdimësia e lojërave dhe rezultateve pozitive. Shpresoj t'ia dalim mbanë edhe në këtë takim.

[Noizy]

Presidenti i Teutës u kujton të tijve rëndësinë e madhe të dy ndeshjeve të radhës.


"Kemi përpara dy sfida tepër të rëndësishme, që nuk duhen humbur në asnjë mënyrë." Kështu është shprehur për "Sportin shqiptar" presidenti i klubit të futbollit të Teutës, Edmond Hasanbelliu, sipas të cilit ndeshja e radhës në kampionat me Vllazninë dhe ajo e kupës me Tiranën janë pjesë e objektivave të sezonit që ka Teuta dhe kurrsesi nuk mund të humben. Sipas Hasanbelliut, ekipi duhet të tregojë karakterin e duhur për të kaluar këto prova të rëndësishme.
Si e vlerësoni ecurinë aktuale të ekipit?
Mendoj se është futur në rrugën e duhur. Pas dy rezultateve të dobëta në kupë me Tiranën dhe në kampionat me Shkumbinin, ekipi iu rikthye fitoreve në ndeshjet me Elbasanin dhe Kastriotin. Pra, reagimi erdhi, por na duhet kjo vazhdimësi, ndryshe nuk ka vlerë.
A besoni se do të ruhet ky ritëm?
Nuk ka pse të ndodhë ndryshe. Grupin e kemi dhe ana morale e ekipit është pozitive.
Mendoni se ndeshja me Vllazninë është një provë vendimtare?
Eshtë një ndeshje delikate dhe e rëndësishme për ne. Duhet me çdo kusht të ruajmë vendin e dytë. Jo vetëm kjo ndeshje, por edhe ajo me Tiranën në kupë është tepër e rëndësishme për ne, pasi lidhen direkt objektivat që ka ekipi në këtë sezon futbollistik.
Me çfarë objektivi shkon Teuta në Shkodër?
Objektivi janë tri pikët, por edhe një barazim do të ishte i justifikueshëm. Mendoj se do të jetë një ndeshje e bukur, ku do të luhet futboll dhe ku ekipet do të shfaqin në fushën e lojës vlerat e tyre më të mira.
Sa i motivuar do të jetë ekipi në këto takime?
Më i motivuar se kurrë jo vetëm për rëndësinë që kanë këto ndeshje, por edhe për faktin se ia kemi plotësuar të gjitha kushtet.
A ju shqetëson fakti se disa nga futbollistët më me eksperiencë në ekip nuk po japim maksimumin?
Jo, unë mendoj se futbollistët me eksperiencë po bëjnë detyrën e tyre, por mundësitë i kanë që ta bëjnë më mirë. Këto gjëra i di më mirë trajneri, por unë kam shumë besim se ky ekip do të dijë t'i realizojë objektivat.

[Noizy]

Kuqeblutë sot kanë një arsye më shumë për të fituar, pasi Valter Fushaj mbush 39 vjeç.


Deri dje është konsideruar me të vërtetë detyrim fitorja ndaj Teutës për ekipin e Vllaznisë. Kjo për shumë arsye, një fitore për publikun, për veten dhe shpenzimet e presidentit Fushaj dhe mbi të gjitha edhe për klubin që kërkon të sigurojë daljen në kupat e Europës. Por që prej ditës së djeshme futbollistët kuqeblu duket se kanë një arsye më shumë pse kërkojnë ta fitojnë me çdo kusht këtë takim ndaj durrsakëve. Ata pikërisht 48 orë përpara nisjes së takimit, ndoshta më të rëndësishëm të kampionatit për ta, kanë mësuar se presidenti i tyre Valter Fushaj kishte ditëlindjen. Një koincidencë e bukur kjo dhe natyrisht që ndeshja me Teutën është momenti më i mirë për t'i bërë atij një dhuratë pikërisht në shenjë respekti për atë që ai po bën për të ngjitur Vllazninë në nivelet më të larta. Në stërvitjen e djeshme, e fundit para sfidës me "djemtë e detit", kuqeblutë kanë diskutuar jo pak për këtë eveniment të jetës private të Fushajt. Bëhet fjalë për 39 vjetorin e tij të lindjes dhe ngjitja në vendin e dytë të renditjes do ta kënaqte atë pa masë. Nuk bëhen të ditura detajet e tjera të festës së planifikuar, mënyrës së dedikimit të golit që do të shënohet, apo të tjera pjesë të planeve të futbollistëve kuqeblu. E rëndësishme është që ambienti në skuadrën shkodrane është më se i shkëlqyer. Raportet futbollist trajner president janë shumë të ngrohta, prandaj kanë ardhur edhe rezultatet gjithnjë në rritje të kësaj skuadre. Valter Fushaj ka meritë jashtëzakonisht të madhe që arriti të ndërtojë një Vllazni krejt ndryshe nga ajo e një sezoni më parë, kur skuadra diskutonte qëndrimin në kategori. Sot diskutohet vetëm për daljen në arenën ndërkombëtare dhe sikur pak më pak gabime të ishin bërë në javët e para të kampionatit, sot do të kishim pasur një skuadër pretendente për titull. Presidenti aktual i skuadrës shkodrane njihet si pasionant i madh i futbollit dhe, krahas suksesit në biznesin e tij, kërkon të jetë i tillë edhe në sport. Fushaj vlerësohet së tepërmi për korrektësinë e tij financiare në raport me trajnerët dhe lojtarët, duke qenë shembull në këtë drejtim, sepse në jo pak raste ky është një nga problemet më të mëdha të futbollit shqiptar. Planet e këtij njeriu janë që sivjet Vllaznia të sigurojë daljen në kupat e Europës dhe njëkohësisht të pretendojë edhe fitimin e Kupës e Shqipërisë, ndërkohë që për sezonin e ardhshëm ka në mendje të tij të tjera plane ambicioze. Për të gjitha këto kuqeblutë sot e ndiejnë si detyrë që fitoren ndaj Teutës dhe vendin e dytë në renditje t'ia bëjnë atij dhuratë për 39 vjetorin e lindjes.

[Noizy]

Pasi ka dhënë menjëherë pas fitoreve premiot e premtuara për sukseset ndaj Partizanit dhe Apolonisë për kampionat, presidenti i Vllaznisë bëhet e ditur se ka bërë gati premion e radhës për kuqeblutë. Nga sa bëhet e ditur, shuma e premios edhe për këtë ndeshje pritet të jetë 4 mijë dollarë dhe kësisoj futbollistët shkodranë me një fitore edhe sot kanë mundësi t'i mbushin sërish xhepat e tyre.

[Noizy]

Ende nuk ka asnjë gjë të qartë se cili do jetë formacioni që Vllaznia do të hedhë në fushë sot ndaj Teutës. Mundësitë më të mëdha janë që në fushë të jetë ai formacion që fitoi ndeshjen e kaluar në Fier, por nuk përjashtohen mundësitë që të ketë edhe ndonjë lëvizje të re. Kështu Bejzade ende është në pikëpyetje nëse do të luajë apo jo, ndërsa sulmuesi tjetër Cani është jashtë skuadre për këtë takim, sepse nuk është rikuperuar ende. Nga sa bëhet e ditur nga burime pranë skuadrës, për formacionin e sotëm mund të ketë edhe ndonjë lëvizje në repartin e mbrojtjes. Ky ndoshta është reparti më i populluar, teksa të gatshëm për të luajtur janë Lici, Dabulla, Teli, si dhe dy malazezët Vukçeviç e Radusinoviç. Pra, 5 lojtarë për 3 vende, sepse Josa përdor skemën me 3 mbrojtës. Nisur nga ky fakt, nuk përjashtohet mundësia që edhe sot të ketë ndonjë lëvizje në mbrojtje.

[Noizy]

Obi Mishel dhe Kitio Ferve edhe dje kanë qenë prezentë në klubin e kuq, sigurisht jo për t'u stërvitur, pasi ata e kanë marrë me kohë vendimin për t'u kthyer në vendlindje. Kamerunasit kanë qëndruar për pak ditë në klubin e kuq, por ata kanë hasur vështirësi në gjetjen e biletave për rikthim. Ata janë shprehur mjaft të rezervuar për atë çka u ka ndodhur tek Partizani, pasi prisnin një tjetër fund të aventurës shqiptare. Lojtarët në fjalë do të largohen të hënën nga Shqipëria, ndërkohë që i kanë dorëzuar të gjitha rrobat e akomodimit. Nga ana tjetër, drejtori i akademisë, Genc Tomorri, është shprehur se klubi i kuq ka bërë më shumë se ç'i takon për akomodimin e tyre, pasi shpenzimet, në rast se nuk pëlqeheshin nga Partizani, do të hiqeshin nga vetë ata. Nuk është hera e parë që futbollistët e ardhur nga Afrika mbeten të zhgënjyer me aventurën shqiptare, ku faj kanë edhe menaxherët, që u premtojnë parajsën në Shqipëri.

[Noizy]

Trajneri Lika ka zhvilluar dje seancën e fundit të javës në prag të sfidës me Flamurtarin. Situata gjatë gjithë javës ka qenë e qetë, madje edhe stërvitja e djeshme ka nisur me të njëjtën atmosferë, por me kalimin e minutave, ndoshta ngaqë ky takim ka filluar të ndihet më shumë, futbollistët dhe vetë trajneri Lika janë bërë disi nervozë. Stërvitja ka filluar me cirkuitet e zakonshme, me vrapimet e lehta dhe në fund me minindeshjen e kontrollit. Deri në këtë moment kanë mbizotëruar vetëm situata humori, por kur ka nisur loja dhe formacioni i dytë ka shënuar, situata ka ndryshuar menjëherë. Lika, duke kërkuar më të mirën tek futbollistët e tij, e ka ndalur herë pas herë lojën, në mënyrë që idetë e tij të përçoheshin me saktësi në kokat e lojtarëve. Në disa momente futbollistët kanë pasur përplasje mes tyre, sigurisht në kuadrin e luftës sportive, por nganjëherë dukej sikur tejkalohej masa. Duke pasur parasysh rëndësinë e kësaj ndeshjeje, ku një fitore e mundshme e ngjit Partizanin automatikisht të paktën një vend në renditje, Lika ka kërkuar maksimumin tek të tijtë, duke dashur të shmangë gabimin më të vogël. Në ndonjë rast trajneri ka ngritur tonet, duke kërkuar sjellje sa më profesionale nga futbollistët.

[Noizy]

Mbrojtësi autokton Besmir Sinani, ka lënë pas dëmtimin, dhe tani po kontribuon për ekipin e vendlindjes.


Aktualisht Luftëtari në përbërje të tij ka në skuadër 11 futbollistë jovendës, nga të cilët pjesa më e madhe do të largohen në fund të sezonit. Kështu që bërthama për sezonin e ri, që duket larg, por që në thelb është afër, do të jenë futbollistët vendës, midis të cilëve është edhe Besmir Sinani, i cili pas një dëmtimi serioz sezonin e kaluar dhe si rezultat i mungesave të shumta në këtë kampionat, në 3 4 ndeshjet e fundit ka rigjetur pozicionin e tij. Në ndeshjen e fundit në sektorin e tij qe ndër më të mirët. Por le të ndjekim Sinanin për lojën e Luftëtarit dhe për perspektivën e ekipit të tij:
Cili është vlerësimi juaj për lojën e Luftëtarit?
Po ju them si shembull ndeshjen e fundit, ku hymë me mendimin dhe dëshirën për të fituar, gjë që po ta kishim arritur, do të kishim zënë vendin e 8 të dhe do të kishim rritur distancën nga dy vendet e fundit, sepse rezultatet e ndeshjeve të tjera folën në favorin tonë. Por defekti ynë fatkeqësisht është se nuk arrijmë të shënojmë gol. Jo se unë luaj në repartin e mbrojtjes, por është e dukshme që rezultatet tona kanë pësuar ulje pikërisht për efekt mosrealizimi golash në mjaft ndeshje, ku qoftë edhe me një gol mund të kishim fituar disa pikë të tjera.
Për lojën tuaj çfarë do të thoni?
Unë jam në fillim të karrierrës sime dhe do të ishte pa dyshim mendjemadhësi të bëja vlerësim për lojën time. Atë do ta vlerësojnë në radhë trajnerët, por edhe tifozët. Vetë them se jam duke iu përgjigjur kërkesave të trajnerëve dhe vetë lojës, por duhet vazhdimisht të punoj me ritëm për t'u bërë sa më cilësor.
Si e shikoni ndeshjen me Kastriotin dhe në tërësi fatin e Luftëtarit?
Ndeshja në Krujë me Kastriotin është përcaktuese për renditjen përfundimtare të fazës së dytë se cilin vend do të zëmë që do të na përcaktoj edhe kalendarin për fazën e tretë. Pra, duhet të mobilizohemi të arrijmë qoftë edhe barazimin, por, sidoqoftë, unë jam optimist për fatin e Luftëtarit se ai do të qëndrojë në superligë.

[Noizy]

Rikthimi i portierit titullar në stërvitjen e fundit të javës i ka qetësuar drejtuesit e kuq.


Sot, në orën 14:00, në stadiumin "Flamurtari" vendësit do të presin për ndeshjen e fundit të fazës së dytë Partizanin e vendit të katërt, që akoma e ka "vëth në vesh" humbjen e thellë të "Qemal Stafës". Formacioni i Likës do të jetë i plotë, pavarësisht gjendjes jo të mirë të disa lojtarëve, që u dëmtuan në derbin e së shtunës së kaluar me Dinanom. Shqetësimi tjetër për trajnerin Lika erdhi dy ditë më parë, kur Orges Shehi, ndër futbollistët më të rëndësishëm të skuadrës, mungoi në stërvitje për arsye shëndetësore. "Gardiani" i portës së kuqe është ndër futbollistët më të vlerësuar të Partizanit, falë punës serioze në stërvitje dhe paraqitjeve shumë të mira në ndeshjet zyrtare. Megjithëse gjendja gripale nuk i ka kaluar plotësisht, Shehi siguron se do të bëjë çmos për të mos i lejuar futbollistët kundërshtarë të shënojnë. "Fakti që në ndeshjet e fundit kemi pasur ecuri pozitive do të thotë se merita u takon të gjithë lojtarëve. Unë kam bërë thjesht detyrën, jam munduar ta mbaj sa më të paprekur portën e Partizanit dhe, nëse kam pësuar më pak gola se të tjerët, kjo nuk është vetëm merita ime. Kur futemi në fushë, jemi një skuadër e vetme dhe i ndajmë bashkë meritat dhe disfatat. Kurrsesi nuk do të isha efikas pa ndihmën e futbollistëve të tjerë. Gjithsecili ka meritat e tij në ecurinë e skuadrës. Edhe në ndeshjen e radhës me Flamurtarin mobilizimi i të gjithë lojtarëve do të na çonte tek suksesi. Forma optimale e një portieri nuk do të mjaftonte, nëse skuadra nuk funksionon si e tërë. Këtë radhë Partizani nuk ka nevojë vetëm për mobilizim, por edhe për sakrificë, duke filluar nga i pari deri tek i fundit,"- është shprehur portieri i Partizanit. Vetëm Tirana dhe Flamurtari kanë arritur të shënojnë tre gola në një ndeshje në portën e Partizanit. Sigurisht, humbja me vlonjatët në fazën e parë rëndon më shumë, por ky fakt nuk i demoralizon aspak djemtë e Likës në synimin për t'u kthyer me rezultat pozitiv nga Vlora. Shehi e vlerëson në maksimum kundërshtarin, për vetë traditën që ka në futbollin shqiptar. "Jemi të vetëdijshëm për vështirësitë që na presin në këtë ndeshje. Flamurtarin e vlerësojmë mjaft të fortë jo vetëm pse na ka mundur në fazën e parë, por sepse është skuadër me traditë dhe të gjitha ekipet më të mira të vendit e kanë pasur mjaft të vështirë, për të mos thënë të pamundur marrjen e një rezultati pozitiv në këtë fushë. E thashë edhe më lart, kjo është një ndeshje sakrifice, ku të gjithë duhet të japim më të mirën në fushë. Kjo është e vetmja mënyrë për të dalë me sukses nga stadiumi i Vlorës,"- ka përfunduar deklaratën e tij Orges Shehi. Për momentin portieri i Partizanit mban rekordin për sa u takon golave të paktë të pësuar, rekord të cilin do të kërkojë ta mbrojë në Vlorë, përballë një Flamurtari, që e nis lojën me avantazhin e fushës dhe të epërsisë së ndeshjes së fazës së parë. Sidoqoftë, sot duket se portieri Shehi ka vendosur ta fshehë "çelësin" e portës së Partizanit për sulmuesit vlonjatë.
Dhëmbi, stërvitje të diferencuar
Paulin Dhëmbi nuk është në 100% të formës së tij, ndaj mund të luajë vetëm për një pjesë loje me Flamurtarin. Dëmtimi i pësuar në derbi e ka detyruar korçarin të punojë veçmas, gjë që ka ndodhur edhe në seancën e fundit stërvitore. Dhëmbi që në fillim ka bërë vetëm vrapime rreth fushës, sa për të ruajtur formën fizike, duke shmangur kontaktet e forta me topin. Korçari është shumë i rëndësishëm për formacionin e Likës, madje ai do të bënte shumë punë edhe nëse nuk është në formë optimale.