Lajmet nga Superliga 2006/2007

[eagle's son]

Presidenti i Partizanit deklaron se skuadra e tij do ta synojë deri në fund titullin kampion.


Një ditë pas bisedës së gjatë me një grup tifozësh të Partizanit, të cilët kanë kërkuar shpjegime për trofetë e munguara gjatë viteve të drejtimit të tij, Albert Xhani, presidenti i Partizanit, është shprehur se nuk do të dorëzohet kurrë përballë presioneve në media, por do të luftojë me mish e me shpirt për skuadrën e kuqe, natyrisht duke marrë përgjegjësitë që i takojnë për trofetë e munguara. "Unë tifozët e vërtetë të Partizanit i kam pritur dhe do t'i pres gjithmonë, i kam respektuar dhe do t'i respektoj, pasi ata gjithmonë kanë të drejtë për atë që kërkojnë. Edhe mua më vjen shumë keq për titujt e munguar dhe për këtë marr përgjegjësitë e mia, por dua të theksoj se kam punuar me përkushtim për aq kohë sa jam president i skuadrës. Unë u jap të drejtë tifozëve po u kërkoj gjithashtu që gjatë 90 minutave të lojës ta përkrahin skuadrën dhe jo ta demoralizojnë,"- është shprehur presidenti i Partizanit, që ka mbetur shumë i zhgënjyer, sipas tij, nga keqinterpretimet e shtypit, mbi bisedën që ai ka zhvilluar me përfaqësinë e tifozëve të Partizanit. Sipas njëshit të të kuqve, ai nuk është dorëzuar, madje as e çon nëpër mend një gjë të tillë. "Nuk kam ndër mend të largohem nga Partizani dhe as jam dorëzuar siç është thënë në shtyp. Garantoj mbështetjen e plotë financiare, derisa të jem president i Partizanit. Nuk do të jetë e largët dita kur do ta shihni Partizanin me trofe në duar, siç i ka hije,"- ka vijuar më tej Xhani. Edhe pse përforcimet me lojtarë cilësorë kanë munguar, numri "një" i klubit të kuq beson se skuadra e tij do ta synojë deri në fund titullin, pasi lojtarët që ka premtuar do të vijnë. "Vërtet kanë ikur disa lojtarë, por kjo nuk do të thotë se kemi hequr dorë nga trofetë. Përveçse kemi lojtarë të mjaftueshëm për t'i zëvendësuar, ne presim përforcimet që kemi synuar që në hapjen e merkatos. Ne e kemi përgatitur prej kohësh dokumentacionin e tyre, por për arsye objektive këta futbollistë nuk kanë mundur të mbërrijnë më parë. Në këtë rast nuk bëhet fjalë për lojtarë që duhet të provohen, por për futbollistë cilësorë, që do të jenë të gatshëm të kontribuojnë menjëherë sapo të mbërrijnë. Mund t'ju them se njëri prej tyre është lojtar i AEK-ut, të cilin Gerardi e njeh shumë mirë. Partizani do të bëjë një paraqitje shumë të mirë gjatë ndeshjeve të ardhshme, madje do të synojë deri në fund titullin kampion,"- ka përfunduar presidenti i të kuqve.

hahahahahahahahah



ky eshte jashte realitetit komplet

[Noizy]

Barazimi i së premtes me Vllazninë, nuk i ka kënaqur drejtuesit e ekipit vlonjat, por më së shumti ka zhgënjyer tifozët që ishin në stadium. Dy pikët e lëna brenda në shtëpi i kanë "tendosur" jashtëzakonisht kuqezinjtë e Vlorës, të cilët ndiejnë presionin e ndjekësve, që synojnë mbijetesën. Trajneri Ruci është shprehur optimist pas ndeshjes me Vllazninë, edhe pse ka lënë dy pikë, duke evidentuar lojën e mirë të të tijve, por duke u "qarë" për fatin e keq. Kjo do të thotë se Flamurtari i ka mundësitë të ecë përëpara dhe të mos e vërë në diskutim qëndrimin në superligë, pavarësisht se pas javës së 18-të gjendet në vendin e 7-të, me pikë të barabarta me Besën dhe Luftëtarin. Sidoqoftë, llogaritë duhen bërë mirë, kur dihet se në "aksin" e fundit të kampionatit lufta për mbijetesë nuk përqëndrohet vetën në kuadratin e blertë, por edhe jashtë tij. Duhet filluar të mendohet seriozisht, sepse ndeshja e radhës është mjaft e vështirë për vlonjatët. Flamurtari, javën e ardhshme, do të udhëtojë drejt Kavajës, ku e pret një Besë tjetër, me një sulmues të frikshëm, siç rezultoi edhe ndaj Luftatarit, Arben Nuhiu. Pra, transferta e Kavajës nuk mund të konsiderohet e thjeshtë, por tepër e vështirë, duke parë "oreksin" e Besës për pikë, aq më tepër që luan në fushën e saj. Një gjë të tillë e di dhe trajneri Ruci, i cili do të mundohet kësaj jave të rrisë moralin e të tijve, pas barazimit me Vllazninë, dhe të përgatisë taktikën e duhur për të dalë faqebardhë nga Kavaja, një transfertë e vështirë në dukje kjo.

[Noizy]

Mesfushori fierak shprehet se ekipi vërtet e filloi mbarë, por duhet të vazhdojë të fitojë.


E ka filluar si titullar takimin me Shkumbinin mesfushori fierak Julian Gërço. I ardhur pas një dëmtimi që e mbajti larg fushave të blerta prej disa muajsh, Gërço ndihet i lumtur që tashmë mund të japë maksimumin për skuadrën e tij. Edhe pse është zëvendësuar nga trajneri Marko, Gërço nuk ndihet i pezmatuar, sepse qëllimi i vetëm i skuadrës ishte fitorja, të cilën e mendon se duhet bërë edhe në javët në vazhdim, në mënyrë që ekipi të mos notojë në ujëra të turbullta.
E keni filluar mbarë sezonin e ri, duke fituar ngushtësisht ndaj një rivali direkt. Si ndiheni pas kësaj fitoreje?
E si të mos ndihemi mirë. Kishim ditë që e përgatisnim këtë fitore dhe ajo nuk erdhi rastësisht. Guxuam dhe tashmë, pas përfundimit të këtij 90-minutëshi, jemi më të qetë e të gëzuar, se kaluam një betejë tepër të madhe. Vetë gjendja ku ndodhemi kërkon një vlerësim maksimal për të gjitha ndeshjet e mbetura. Objektivi që kemi për të mbetur në superligë pa dyshim që kërkon të japim maksimumin në çdo ndeshje. Pas kësaj fitoreje nuk kemi kohë për të festuar, pasi na presin ditë përgatitjesh më intensive.
Keni vuajtur jo pak gjatë takimit që zhvilluat në Shijak ndaj Shkumbinit...
Pa dyshim që kemi arritur një fitore tepër të rëndësishme ndaj Shkumbinit. Të gjithë futbollistët ishin të mobilizuar dhe të vetëdijshëm për detyrën e vështirë që na priste në atë takim. Ishim dy skuadra që për vetë gjendjen që po kalonim na vlente një fitore në takimin direkt. Tashmë që na buzëqeshi neve, i kemi të gjitha mundësitë të guxojmë edhe në takimet e tjera që do të luajmë. Mendoj se e kemi larguar edhe tersin që na rrinte nëpër këmbë. Arritëm një fitore sakrifice, sepse, përveç kundërshtarit, na u desh të përballonim edhe terrenin tepër rrëshqitës që ishte krijuar.
A patët vështirësi në lojë në alternimin e skemave taktike të dhëna nga trajneri Marko?
E kuptoj kontekstin e pyetjes suaj. Eshtë fjala për mirëkuptim midis reparteve. Me gjithë kohën e paktë që kemi pasur për të luajtur bashkë dhe vështirësitë që sjell edhe gjuha e komunikimit, arritëm t'ia dalim me sukses. Futbolli është një sport praktik dhe suksesi i një skuadre kërkon një harmonizim perfekt. Do të na duhet të punojmë shumë në këtë drejtim, por gjithsesi me kualitetet që kemi në ekip është më e lehtë të merresh vesh. Unë them se e kemi filluar mbarë 2007-ën.
Përpara keni të tjera beteja të rëndësishme. Javën e ardhshme, në "Loni Papuçiu" prisni kampionët në fuqi. Si i parashikoni sfidat e ardhshme?
Për ne, çdo takim ka vështirësitë e tij, por mendoj se me përforcimet e kryera në skuadër jemi më të konsoliduar për vazhdimin me sukses të ndeshjeve të superligës. Ndaj Elbasanit kemi luajtur mjaft mirë në "Ruzhdi Bizhuta". Eshtë një ekip që të lejon të luash futboll. Mendoj se do të jetë një takim i hapur, por besoj që fitorja do të na buzëqeshë neve.

[Noizy]

Trajneri i verdhebluve tregon se ekipit i mungoi grinta e duhur dhe reagimi pas golit të kundërshtarit.


Në një intervistë për "Sportin shqiptar", trajneri i Elbasanit, Edmond Gëzdari, është shprehur se ka mbetur i zhgënjyer nga humbja e ekipit të tij. "Nuk e prisja këtë humbje," ka theksuar Gëzdari, i cili të paktën priste një reagim pas golit të parë të shënuar nga kundërshtari. Sipas trajnerit Gëzdari, ekipi i tij jo vetëm që nuk reagoi, por u dorëzua pa kushte, duke humbur një ndeshje shumë të rëndësishme, që edhe tifozëria nuk do t'ia falë.
Debutuat me zhgënjim, apo jo?
Dështuam në takimin e parë, pavarësisht se në disa momente ekipi ishte mjaft mirë në fushën e blertë. Nuk e prisja këtë humbje, sidomos pas fazës përgatitore që zhvilluam dhe pas përforcimeve që presidenti Laze ka bërë gjatë merkatos. Ndjesë për tifozët tanë, të cilët ky ekip që pamë nuk i meriton.
Pra, doni të thoni se e pranoni pa mëdyshje humbjen?
S'ka arsye pse të mos e pranoj. Futbollistët e mi luajtëm mirë një fraksion loje dhe më pas pësuan dy gola. Sa për golin e parë, ju e patë edhe vetë ato lloj golash shënohen një herë në 50 vjet dhe nuk është faji i portierit që terreni ishte rrëshqitës. Nuk dua të justifikoj portierin, por gola të tillë nuk ndodhin shpesh.
Gëzdari, çfarë nuk shkoi në këtë ndeshje?
Mbase u futëm në fushë me dëshirën për të fituar pa e luajtur takimin. Futbollistët e mi kujtuan se Partizani ka futbollistë të rinj dhe nuk fiton dot, por sot futbolli është aq i paparashikueshëm, sa që bëhet edhe më i veçantë në llojin e tij. Gjithsesi, ne kemi ndeshje të tjera përpara, kështu që na duhet të mbledhim forcat për takimet e ardhshme.
A i rrezikon Elbasani objektivat e tij këtë sezon?
Kampionati është i gjatë dhe nuk duhet të dorëzohemi nga një humbje e tillë. Sigurisht që na vjen shumë keq për këtë humbje, por ama Elbasani nuk ka pse të tkurret përpara një ndeshjeje. Ne do të vazhdojmë të punojmë për t'u kthyer te fitorja dhe shpresoj që ky moment i vështirë të mos zgjasë shumë.
Tifozëria ka sharë në kor pas pësimit të golit të dytë...
Unë e përmenda edhe më lart që kjo humbje për ne nuk ka justifikim, pasi sapo na ishin kthyer tifozët e zjarrtë me përforcimet që Elbasani mori gjatë këtij viti. Kur kam mbetur unë i zhgënjyer, besoj se tifozët që e duan kaq shumë këtë skuadër e besoj që janë tepër të trishtuar dhe unë nuk gjej fjalë që t'u kërkoj shumë falje për atë humbje. Duke nisur që sot, duhet të punojmë shumë për të dalë menjëherë nga kjo krizë, do ta quaja unë, e cila erdhi si rezultat i humbjes.

[Noizy]

Askush nuk flet nga drejtuesit e kampionëve të Shqipërisë, por sot ekipi do të zbresë në stërvitje nën drejtimin e Gëzdarit. Ndërkohë burime të rezervuara bëjnë të ditur se me shumë mundësi sot në mesditë mund të zhvillohet edhe analiza e humbjes me ekipin e Partizanit, një humbje që nuk është kapërdirë mirë nga Laze dhe tifozëria e zjarrtë e Elbasanit.

[Noizy]

Kur pritej që Shkumbini ta niste mbarë vitin 2007 për të bërë një hap përpara në ngushtimin e diferencës me ekipet e tjera, ndodhi e kundërta. Për më tepër, kjo goditje i vjen nga kundërshtari i drejtpërdrejtë në luftën për mbijetesë, Apolonia e Fierit. Vërtet Shkumbini pësoi një humbje që nuk e meritonte me lojën që zhvilloi, por pas kësaj jave detyrohet të zbresë në fundin e tabelës, duke ndryshuar vendin me Apoloninë, që ngjitet një shkallë më lart. Sigurisht, meritë ka edhe kundërshtari i Shkumbinit, i cili arriti ta kalojë me sukses, ku vlera e kësaj fitoreje bëhet më e madhe sesa tri pikët e marra, për më tepër jashtë fushës. Edhe fusha e Shijakut nuk i solli fat Shkumbinit, ashtu si dhe ajo e Elbasanit dhe Lushnjës, ku peqinasit luajtën për të shlyer dënimin prej 6 ndeshjesh. Në këto 6 takime Shkumbini nuk arriti të merrte as edhe një pikë të vetme, për të përfunduar pas kësaj jave në fundin e tabelës. Ishte mundësia më e mirë e Shkumbinit për ta kaluar këtë situatë, që rezultoi pa sukses, sepse me gjithë lojën e mirë që ai zhvilloi, sidomos në pjesën e parë, në fund të fundit janë pikët ato që ngelin dhe flasim më mirë. Në këtë drejtim ekipi ka humbur jo pak dhe kjo po i kushton shumë. Në ndeshjen me Apoloninë të premten e kaluar Shkumbini mund të quhet i pafat, duke iu referuar sidomos pjesës së parë, kur bëri gjithçka, tronditi shtyllën dhe fitoi 11-metërsh, duke iu afruar aq shumë golit me Bubeqin dhe Rizvanollin, por pa qenë në gjendje të ndryshonte rezultatin e vendosur nga Sabino Plaku me atë gjuajtje nga distanca. Ishte një goditje fatale për Shkumbinin ajo e "bomberit" fierak Plaku, që i ka shënuar në këtë sezon tre gola Shkumbinit. Sportdashësit e shumtë peqinas mbetën të zhgënjyer në fund të takimit, duke parë të bien shpresat për ekipin, duke mos qenë në gjendje të përballojnë një ekip të ndërtuar në orët e fundit, ndërkohë që grupi kryesor i Shkumbinit ka zhvilluar një fazë përgatitore të mirë. I mërzitur pas ndeshjes ka qenë edhe trajneri Sejdini, i cili duhet përgëzuar në fakt për punën e bërë në përgatitore, e treguar kjo mjaft mirë në pjesën e parë të takimit. Në këtë pjesë Shkumbini zhvilloi një lojë të pëlqyeshme, duke merituar më shumë. Edhe pse ekipi e pësoi shpejt golin, diti të reagojë e të krijojë situata të vështira. Ishte mungesa e finalizimit ajo që e dëmtoi Shkumbinin përballë një kundërshtari që ishte me fat. Fati ishte me Apoloninë, që i buzëqeshi fitorja. Ashtu siç u shpreh dhe "Xhaxhi", jo gjithmonë të ndodh që mund të luash mirë dhe mund të shpërblehesh. Sipas tij, ishte një lojë e mirë e Shkumbinit, që nuk arriti të marrë frytet e veta. Në këtë drejtim ndikoi humbja e rasteve, ku më flagrant ishte shpërdorimi i penalltisë nga ana e Bubeqit, që do të kishte ndryshuar rrjedhën e lojës. "Ndodh që në futboll të luash mirë në fushë dhe nuk arrin rezultatin. Kjo i ndodhi edhe Shkumbinit në ndeshjen me Apoloninë. Humbi disa raste, humbi edhe penalltinë, që mund të kishte ndryshuar rrjedhën e lojës dhe këto ndikuan jo mirë në ekip. Ky është futbolli, nuk fiton edhe kur luan mirë," - komenton trajneri Sejdini për humbjen me Apoloninë. "Xhaxhi" pranon se kjo humbje e rëndoi gjendjen e ekipit në tabelë, duke pasur ndihmën e vet, sidomos në anën morale, duke humbur besimin te futbollistët. Por nga ana tjetër, ai shpreson dhe beson se ekipi ka forca për ta vazhduar synimin që ka, sepse ka grupin e duhur të futbollistëve dhe se është bërë një punë e mirë në fazën përgatitore nga i gjithë grupi, që ka marrë ngarkesën e duhur fizike. "Humbja e fundit sigurisht që e ka rënduar gjendjen dhe ekipi tani ndodhet në vendin e fundit, por nuk kemi pse të dorëzohemi. Na ndëshkoi fati në takimin me Apoloninë, por do të dimë të mobilizohemi në ndeshjet e tjera për ta kaluar këtë situatë të vështirë," - përfundon trajneri i Shkumbinit, Faruk Sejdini, duke qenë optimist për të ardhmen e ekipit, që tani mbyll tabelën e renditjes.

[Noizy]

Flet sekretari i Luftëtarit, Eduard Pesha, pas humbjes me Besën dhe para ndeshjes me Tiranën.


Luftëtari, me humbjen që pësoi në Kavajë nga Besa dhe në kombinim me ndonjë rezultat tjetër nga vendi i 7 të, gjendet në të 9 tin dhe për javën e 19 të pret gjigantin e futbollit shqiptar, Tiranën. Duhet thënë se në merkaton e dimrit Luftëtari u tregua më i varfri, pasi arsenalit të tij i shtoi edhe një kamerunas tjetër, pas Simos, Roxherin, të dy me pasaporta franceze. Ndërkaq u rikthye Dhima e të tjerë pa shumë peshë. Faza e dytë ka edhe 4 ndeshje për t'u mbyllur dhe Luftëtari pas ndeshjes me Tiranën shkon në Peqin, ku edhe vetë Shkumbini ka "harruar" se kur ka luajtur aty, pastaj pret Elbasanin dhe së fundi shkon në Krujë për të kryqëzuar "shpatat" me Kastriotin. Pra, një kalendar jo për t'u pasur zili. Duhet pasur parasysh që, nëse një lojtar mendon se me vete gjatë ndeshjes ka "vezë" dhe kujdeset që të mos i thyejë ato, ai nuk mund të luajë futboll. Në këtë sens flet sekretari i klubit gjirokastrit. Por le të shohim se ç'mendon sekretari i klubit gjirokastrit, Eduard Pesha, për humbjen me Besën, merkaton dhe ndeshjen e së premtes në Gjirokastër me Tiranën:
Cilat janë arsyet e humbjes së Luftëtarit me Besën?
Humbja në Kavajë me Besën erdhi si rezultat i gabimeve në mbrojtjen tonë, ku Nuhiu lëvizte lirshëm në korridore, pasi lojtarët tanë ishin statikë. Ndoshta nuk janë shkrifëruar nga ngarkesat e rënda që kanë marrë në procesin stërvitor në Ulqin. Po ashtu mendoj se ekipi ynë krijoi raste të pastra për gol me aksione të bukura, por që nuk u finalizuan qoftë për paaftësi, por edhe mungesë fati.
Çfarë do të thoshit për trajnerët?
Trajnerët tanë në përgjithësi kanë punuar shumë mirë për përgatitjen e ekipit, por duhet t'i mëshojnë më tepër kulturës sportive, si dhe disiplinës taktike. Edhe në ndeshjen me Besën u ndëshkuan katër lojtarë me kartonë të verdhë për asnjë lloj shkaku. Trajnerët duhet të arrijnë t'i minimizojnë këto dënime, që kanë pasojat e tyre për më tej.
Rezulton që Luftëtari kreu merkaton më të dobët. Cili është reagimi juaj? Ku janë organizatori dhe golashënuesi që do të merreshin?
Duket në pamjen e parë se Luftëtari, në krahasim me ekipet e tjera, ka kryer merkaton më të dobët, por duhet pasur parasysh se nga ekipi ynë nuk u largua asnjë futbollist dhe ndërkaq u afruan Roxher nga Flamurtari, Hyso nga Apolonia dhe dy ish tanët, Dhima e Shalari. Për sa u përket dy lojtarëve nga kampionati francez, që do të ishin blerje cilësore dhe ishin shumë afër ardhjes, them se nuk u realizuan për faktin se vepruan faktorë që në pamje hiqen dashamirës të Luftëtarit, por që i stepën dhe i ftohën donatorët tanë me presionet e tyre, duke ia arritur qëllimit.
Në ndeshjen e radhës prisni Tiranën. Si e parashikoni takimin?
Tirana tani është ortek i madh, që gjithsesi edhe mund ta frenojmë. Besoj te përgatitja e ekipit, te harmonizimi i reparteve, te mbështetja e publikut, te shpirti i garës, që ekipi në shumicën e rasteve prezantoi në fushën e vet. Mundet që këto të na japin një rezultat të kënaqshëm.

[Noizy]

Mesfushori kosovar, Shpëtim Babaj, ishte i pafat, tek u dëmtua gjatë takimit me Luftëtarin dhe u zëvendësua.


Fitorja ndaj Luftëtarit, si në asnjë takim tjetër, te tifozëria kavajase para takimit quhej një punë e mbaruar. Një besim që vinte kryesisht prej zhvillimit të fazës përgatitore, por edhe fuqizimit në merkaton dimërore. Vërtet Besa realizoi objektivin nëpërmjet një loje mjaft të mirë dhe shënimit të tre golave. Po çfarë mendon mesfushori Shpëtim Babaj, njëri ndër shtyllat e Besës për këtë fitore? Përse tifozëria e quante detyrë fitimin e kësaj ndeshjeje? Me ardhjen e Arben Nuhiut, çfarë ndryshoi te Besa dhe si e vlerëson Babaj këtë futbollist? Pas dëmtimit që e largoi nga fusha, si ndihet ai? Ja dhe përgjigjet e tij:
Latë fushën për shkak të një dëmtimi. Sa serioz është ai?
Ishte një përplasje e panevojshme për fat të keq me shokun e skuadrës, mbrojtësin Hoxha, ku secili prej nesh ndërhyri për të larguar një top nga zona. Për fatin tim nuk është një dëmtim serioz dhe ndaj Flamurtarit besoj do të jem përsëri në fushë. Ajo që më erdhi më shumë inat ishte mosqenia në fushë për t'iu gëzuar fitores para tifozëve tanë. Në fitore të tilla kushdo dëshiron të jetë 90 minuta në lojë.
Kjo nuk e ul aspak kontributin tuaj gjatë 54 minutave sa luajtët...
U mundova të jap maksimumin dhe duatrokitjet e tifozëve gjatë largimit tim janë ajo çfarë vlerësoj më shumë. E përsëris, më vjen keq që nuk munda të kontribuoj më shumë për ekipin.
Besa jo vetëm fitoi, por shënoi tri herë. Si e vlerësoni këtë fitore?
Ju vetë jeni dëshmitar se gjatë gjithë javës në biseda me tifozërinë ata e quanin fakt të kryer fitoren. Kjo lexohej nga ne si futbollistë jo vetëm si detyrim, por edhe besim që ata kishin te forca jonë. Ishte një fillim i mbarë, çka tregon se faza përgatitore dhe merkatoja e presidentit Bizhdili ishin "armët" tona të suksesit. Një kontribut kryesor në këtë fitore ka pa diskutim sulmuesi Arben Nuhiu, që tregoi se do të jetë ndër armët tona më të forta në drejtim të shënimit të golave. Besa pikërisht për këtë kishte vuajtur gjatë vitit që shkoi.
Si do ta vlerësonit këtë futbollist?
Si mund t'ju përgjigjem unë, kur në CV në e tij ai ka disa klube ndër më të shquarat e besoj se më shumë se Shpëtim Babaj janë trajnerët e Beverenit, Hajdukut, Vardarit ata që besuan te vlerat e tij. Eshtë fatkeqësi që Arbeni nuk na u bashkua që verës, kur presidenti Bizhdili bëri ç'mos ta bënte të tijin. Mbetet një futbollist profesionist në fushë e jashtë saj. Besoj se me ardhjen e tij Besa ka gjetur njeriun-gol, por njëkohësisht edhe vlerat e Xhihanit përkrah tij do të jenë shumë më të mira e rezultative. Besa tashmë ka gjetur "doktorin" që shëron rastet e humbura.
Një fitore që ju hap shumë punë. Kjo pasi tani e tutje tifozëria do t'ju kërkojë vetëm fitore...
Ishalla gjithnjë na kërkojnë vetëm fitore. Jo vetëm tifozët, por jemi ne futbollistët të parët që dëshirojmë e djersijmë për këto fitore. Fundja, mos harroni se vitin e kaluar "u shembëm" me para vetëm prej fitoreve e këtë sezon "na janë tharë xhepat". Do të fitojmë edhe për vete, edhe për tifozërinë.

[Noizy]

Java e fundit jo vetëm e ka ngjitur Partizanin në tabelë, por e rendit të parin për golat e paktë të pësuar.


Statistikat e një skuadre futbolli të japin një ide të përgjithshme për mbarëvajtjen e rezultateve të saj gjatë kampionatit. Në rastin e Partizanit, duke pasur parasysh problemet e kohëve të fundit, shifrat mund të duken kontradiktore me realitetin. Në përfundim të javës së 18-të, Partizani është skuadra që ka pësuar më pak gola në kampionat, duke lënë pas Tiranën kryesuese, Teutën, Elbasanin kampion dhe sigurisht Vllazninë dhe Dinamom. Në 18 javë të luajtura, djemtë e Likës kanë arritur të shënojnë 22 herë, duke mbajtur të njëjtin vend si në renditje, por kanë pësuar vetëm 14 gola, më pak se çdo skuadër tjetër e superligës. Edhe Tirana e vendit të parë ka pësuar më shumë gola se Partizani, por ka arritur të shënojë gati dyfishin e të kuqve. Ky fakt tregon se Partizani i këtij sezoni nuk ka çaluar aspak në repartin e pasmë, megjithëse disa nga humbjet u faturohen gabimeve foshnjarake të futbollistëve të këtij reparti. Shifrat flasin për një kuotë të ulët në golat e pësuar, por në të njëjtën kohë një remdiment i tillë ekziston edhe në golat e shënuar. Në 18 ndeshje të luajtura, Partizani ka arritur të barazojë katër herë me rezultatin 0-0, ndërsa humbjen më të thellë e ka pësuar me Flamurtarin në "Qemal Stafa" me rezultatin 3-0. Që në fillim të sezonit Partizani është shquar për një mbrojtje të fortë, por gjatë merkatos së janarit ka pasur rrjedhje të rëndësishme. Në fillim u largua Henri Ndreka, që bashkë me Dorian Bylykbashin kanë nisur një aventurë të re tek skuadra ukrainase e Krivbasit. Më pas radha i takoi lezhjanit tjetër të mbrojtjes, Robert Grizhës, që në fund të merkatos kaloi tek Besa, madje duke u aktivizuar që në takimin e parë të këtij viti. Nuk duhet harruar largimi i papritur i Kardekut në fund të muajit tetor. Lojtarët titullarë të mbrojtjes, Pinari dhe Tafaj, kanë pasur përmirësim të dukshëm të formës që nga fillimi i kampionatit. Nëse në ndeshjet e para këta dy lojtarë kanë qenë në plan të dytë për trajnerin Bajko, tani e gjithë pesha e mbrojtjes bie mbi ta, natyrisht duke pasur një mbështetje të fortë si Ardi Beqiri, që tashmë nuk mund ta kalojë vijën e mesit të fushës. Me këtë ecuri të mbrojtjes dhe me rritjen e efikasitetit të sulmit, Partizani do të ngjitet më shumë në tabelë, për të shpresuar të paktën vendin e dytë, pas Tiranës kryesuese, që ka 10 pikë më shumë se të kuqtë.

[Noizy]

Fitorja e fundit e Partizanit në Elbasan ka vënë baraspeshën mes dy trajnerëve që kanë drejtuar Partizanin në këtë sezon. Në përfundim të javës së 9-të të kampionatit, kur Neptun Bajko u largua nga drejtimi i skuadrës, Partizani kishte arritur 4 fitore, 3 barazime dhe 2 humbje, me 15 pikë të grumbulluara. Me Elbasanin Partizani luajti ndeshjen e nëntë edhe nën drejtimin e Likës, i cili ka arritur të njëjtat rezultate si paraardhësi i tij Bajko. Për 18 javë Partizani ka grumbulluar 30 pikë, ndër të cilat 15 Bajko e 15 Lika.