Lajmet nga Superliga 2006/2007

[Noizy]

Në një takim miqësor që ekipi i teutës së durrësit ka zhvilluar me ekipin e Besës së Kavajës ,takimi ka përfunaduar me rezultatin 0 0.rezultati i takimit i ëhstë pèërgjigjur mënyrës së lojës të dy ekipeve.Storova ka zbritur në fushën e lojës me formacionin mëtë mirë ,me të cilin do të përballet me Tiranën ,ndonëse rikthimi i Daniel Xhafajt mund të prishë planet dhe varjantin taktik të Starovës.

[Noizy]

Peticioni i nënshkruar nga 319 tifozët e Partizanit, ku kërkohej largimi i presidentit Xhani nga drejtimi i skuadrës, ka nxitur reagimin e klubit të kuq. Drejtori i akademisë, Genc Tomorri, ka folur në emër të klubit në mungesë të presidentit Xhani, i cili ndodhet në Greqi, duke ftuar një përfaqësi të tifozëve në një takim në klub. "Jam informuar nga shtypi rreth peticionit të një grupi të tifozëve të kuq, por nuk mendoj se problemet e skuadrës zgjidhen në këtë mënyrë. Do të ishte e udhës ulja në tryezë për diskutimin e situatës me një përfaqësi të tifozëve, ku secila palë të mbajë qëndrimin që i takon, në funksion të zgjidhjeve të problemeve,"- është shprehur Tomorri. Ky reagim nga drejtori i akademisë vjen si masë zbutëse ndaj qëndrimit të tifozërisë së kuqe, e cila nuk pajtohet me ecurinë e Partizanit jo vetëm në këtë sezon, por gjatë gjithë kohës së drejtimit të presidentit Xhani. Njëshi i të kuqve ndodhet në Greqi dhe nuk ka reaguar ndaj peticionit të tifozëve, detyrë që e ka marrë Genci Tomorri.

[Noizy]

Futbollisti i ri i Partizanit, Enco Malindi, zor se do të transferohet në fillim të muajit që vjen te skuadra e AEK-ut të Athinës. Megjithëse kalimi i tij në kampionatin grek konsiderohej i kryer, e vërteta qëndron ndryshe. Sipas drejtuesve të stafit teknik, Malindi do të qëndrojë te Partizani deri në fund të sezonit, pasi është i nevojshëm për skuadrën. Duke parë aktivizimin e detyruar të Muzakës dhe Bakajt ne mesfushë, Malindi është rezerva e vetme në sulm, pasi Progri dhe Abilaliaj do ta nisin takimin e radhës nga minuta e parë. Në pjesën e dytë të kampionatit Malindi do të ketë më shumë hapësira në formacion, çka i jep mundësi të afirmohet më tej, pse jo të rrisë edhe çmimin e kartonit.

[Noizy]

Një pistë që i ka lodhur jo vetëm drejtuesit, por edhe tifozët e shumtë të kuq, që presin me padurim përforcimin e skuadrës. Afrikanët e premtuar në fund të 2006-ës janë e vetmja shpresë për kompletimin e grupit. Sipas Genci Tomorrit, brenda dy ditësh ata duhet të mbërrijnë në Tiranë, për t'u bërë menjëherë pjesë e grupit. Një fakt tjetër i çuditshëm vjen nga kampi bardheblu. Bashkë me futbollistët e Tiranës nga Stambolli në Tiranë kanë udhëtuar edhe dy lojtarë me ngjyrë, të cilët, sipas bardhebluve, mbanin në dorë një shkresë me firmën e Xhanit dhe stemën e Partizanit. Të kenë humbur vallë afrikanët? Ekziston frika e dëbimit nga Shqipëria, nëse dokumentacioni i tyre nuk ka qenë i rregullt. Në klubin e kuq akoma shpresohet në mbërritjen e tyre, në ndodhtë kjo në ditën e fundit të merkatos.

[Noizy]

Trajneri i bardhebluve thekson se rezultatet e stërvitjes në Turqi do të merren që në sfidën e së shtunës ndaj Teutës.


Të gjithë në kampin bardheblu janë të bindur se faza përgatitore e zhvilluar në Turqi do t'i vlejë shumë Tiranës për pjesën e mbetur të sezonit. Për trajnerin Shkëlqim Muça, rezultatet e stërvitjes në Kemer do të merren duke filluar nga sfida më e afërt, ajo ndaj Teutës. Dita e djeshme u ka shërbyer kampionëve të dimrit për të kryer vetëm disa vrapime të lehta, ndërkohë që nga sot vëmendja do të përqendrohet në anën tekniko-taktike. Në intervistën e tij për "Sportin shqiptar", Muça bën të ditur se tashmë ky grup që është në dispozicion mund të synojë pa frikë titullin kampion, por edhe Kupën e Shqipërisë.
- Muça, si do t'i vlerësonit ditët përgatitore të Tiranës në Turqi? - Pa dyshim që këto ditë na shërbyen për të bërë një punë shumë të mirë përgatitore si në aspektin fizik, por edhe atë tekniko-taktik. Mendoj se skuadrës i morëm më të mirën gjatë kësaj periudhe qëndrimi në Turqi dhe në vazhdim të sezonit do të shihni edhe ndryshimet në fushë.
- Në tri ndeshje miqësore të zhvilluara morët një fitore, një barazim dhe një humbje. Çfarë do të thoshit për këto përballje?
- Pavarësisht rezultatit teknik, mund të them se skuadra në përgjithësi luajti një futboll të mirë. Ndaj Istambulsporit morëm një fitore të merituar, ndërkohë që ndaj azerbajxhanasve të Arazit nuk kishim fatin me vete në momentet e goditjes së shtyllave nga Muka dhe Bulku. Goli që pësuam në minutat e fundit ishte rrjedhojë e zëvendësimeve të shumta që u kryen. Për sa i takon barazimit me kombëtaren, duhet theksuar se në formacion u bënë shumë lëvizje, sepse Duro, Muka, Dede dhe Bulku ishin në dispozicion të trajnerit Bariç.
- Për sa u takon lojtarëve të ardhur në merkato, a mund të themi se janë përshtatur me grupin?
- Nuk mund të themi se ata janë përshtatur plotësisht, sepse është normale që kanë pak kohë me grupin dhe u duhet ende punë për të bërë. E rëndësishme është që ata janë lojtarë që mund ta ndihmojnë Tiranën në objektivat që i ka vënë vetes.
- Flitet se në skuadër do të afrohet sulmuesi Sabino Plaku, ndërkohë që ju keni bërë të ditur se merkatoja për janarin mund të quhet e mbyllur...
- Unë vazhdoj t'i qëndroj besnik idesë time se skuadra pas pesë ardhjeve të fundit është e kompletuar në çdo repart, ndërkohë që për zërat e merkatos le të merren të tjerë njerëz.
- Çfarë Tirane do të shohim në fushë, duke filluar që nga kjo e shtunë?
- Do të jetë një skuadër më e fortë se ajo që mbylli vitin 2006. Në aspektin fizik kemi rritje të ndjeshme të parametrave, ndërsa na mbetet edhe pak punë për sa i takon harmonizimit të formacionit.
- Pas largimit të Salihit, do të luani vetëm me Sinanin në sulm, apo Pema dhe Abazaj mund ta nisin që nga minuta e parë?
- Kemi disa alternativa në dispozicion. Sinani mund të luajë me Mukën, por edhe me njërin midis Pemës dhe Abazajt. Ndaj Teutës do ta nisim me dy sulmues që nga minuta e parë.
- Në fund, sa e rëndësishme është sfida me durrsakët në luftën për titullin kampion?
- Çdo ndeshje për Tiranën ka rëndësinë e vet, sepse në fund të fundit ka tri pikë. Teuta është një rivale direkte dhe për këtë ky takim do të ketë një tjetër specifikë. Edhe në rast se fitojmë, nuk duhet ta shohim si të mbyllur luftën për titullin kampion, pasi janë edhe shumë javë të tjera derisa çdo gjë të përfundojë.

[Noizy]

Bardheblutë zhvilluan dje seancën e parë stërvitore në kryeqytet pas kthimit nga Turqia. Në orën 15:00, nën drejtimin e trajnerit Shkëlqim Muça, përgatitësit atletik Rauf Dimraj dhe drejtorit teknik Alban Tafaj, fillimisht u krye një analizë e shkurtër dhe më pas lojtarët kryen vrapime rreth fushës. U vu re mungesa e Vioresin Sinanit, të cilit i është dhënë një ditë leje për të shkuar pranë familjes në Shkodër, ndërkohë që Isli Hidi vetëm dje u kthye në Tiranë, pasi ishte pjesë përbërëse e ekipit kombëtar. Deri ditën e premte, kampionët e dimrit do të kryejnë nga një seancë stërvitore, ndërkohë që nesër theksi do të vihet në harmonizimin e formacionit.

[Noizy]

Stërvitjes së djeshme të Tiranës i mungoi edhe kamerunasi Abada Fish, i cili po vuan një dëmtim në gju, çka nuk po e lejon të stërvitet normalisht me grupin. Dje, ai është parë në stadiumin "Selman Stërmasi", së bashku me menaxherin e tij, Gëzim Mançe. Duhet theksuar se gjendja psikologjike e kamerunasit është e rënduar pas këtij dëmtimi, sepse kjo mund të sjellë edhe një shkëputje të mundshme të marrëdhënieve. Gjithsesi, në ditët në vazhdim do të mësohet më shumë në lidhje me të ardhmen e mesfushorit flokëgjatë të Tiranës.

[Noizy]

Tirana shton sërish radhët me lojtarët e saj të rinj. Disa prej atyre që nuk mundën të shkonin me ekipin e parë në fazë përgatitore janë rikthyer dje stërvitjes në stadiumin "Selman Stërmasi". Bëhet fjalë për Vladin, Fjollën, vëllezërit Sharra, por edhe të riun Sorra, pjesë përbërëse e paratërinjve bardheblu. Pritet që këta futbollistë të federohen për pjesën e mbetur të sezonit, në mënyrë që të plotësojnë çdo nevojë që mund të shfaqet gjatë rrugës.

[Noizy]

Ndaj Teutës në miqësoren e djeshme sulmi ka qenë pika më e dobët e Besës, duke vënë në alarm drejtuesit.


Në stadiumin "Besa" vendasit zhvilluan takimin e parë miqësor ndaj fqinjëve të tyre durrsakë. Një takim që jo vetëm u mbyll me rrjeta të paprekura, por dëshmoi para së gjithash mangësinë themelore të Besës, që mbetet sulmi i saj. E nisur me Xhihanin e Viktor në sulm, loja e vendësve nuk prodhoi dot atë rrezikshmëri që pritej dhe kërkohej nga qindra të pranishëm në stadium. Madje i ardhuri nga jashtë, Viktor, nuk tregoi asgjë si një sulmues që pritej. Më pas rezervat e Starovës e Bicit sikur e gjallëruan lojën, por në tërësi ajo mbeti nën ritmin e një miqësoreje dhe nuk ngjalli asnjë emocion, përkundrazi, shtoi pikëpyetje të mëdha për fatet e ekipit kavajas. Mungesën e qartësisë dhe nevojën për sulmues nuk e fsheh as trajneri Bici, i cili i pyetur nga ne për miqësoren dhe mesazhin e saj, do të shprehej: "Siç e patë edhe vetë, si trajner kisha synimet e mia dhe në tërësi jam i kënaqur nga rritja që kanë disa futbollistë. Ajo që vazhdon të më shqetësojë është finalizimi i manovrës sulmuese. Të paktën sot kjo manovër nuk funksionoi, sa për dobësi të sulmuesve, aq edhe për mungesën e alternativave në këtë repart. Nuk mund të synojmë fitore, qoftë në shtëpi, qoftë jashtë, nëse mbetemi vetëm me këta sulmues. Megjithatë, edhe pse nuk po i bëj publikë, sot ju garantoj se deri të mërkurën do të mësoni se Besa do të marrë tre futbollistë mjaft cilësorë. Emrat mos m'i kërkoni, pasi presidenti Bizhdili ende nuk ka firmosur me ta një kontratë përfundimtare." Ndërsa trajneri Bici flet për forcime, gjatë kësaj miqësoreje na tërhoqi vëmendjen prezenca në tribunën VIP të presidentit të ekipit grek Iraklis, Jorgos Spanullaqis, i cili shoqërohej nga donatori i Luftëtarit, Mihal Delijorgji. Ishte ky i fundit që në rolin e përkthyesit na bëri me dije se bëhej fjalë për një kalim të mundshëm të mbrojtësit Kraja dhe mesfushorit Lila në radhët e ekipit grek. I pyetur për këtë fakt, Bizhdili pohoi kërkesën e homologut të tij grek, por nxitoi të thoshte se nuk do të largohet askush. Ndërsa nga burime tonat mësuam se presidenti grek Spanullaqis kishte dhënë në parim "ok" in për mbrojtësin Kraja dhe, me sa duket, shkodrani nuk do të jetë më në radhët e Besës për pjesën e mbetur të sezonit. Po ashtu, fjalë mjaft të mira edhe për Andi Lilën, por që mbetet për t'u sqaruar vetëm sot, kur të dy presidentët, Bizhdili e Spanullaqis, të shoqëruar nga Delijorgji e trajneri Ramadan Shehu, vijuan bisedën e tyre pas takimit për disa orë në piceri "Fiore". Në këtë mënyrë, shtohen enigmat për fatet e Besës, kur të gjithë futbollistët e aktivizuar si rezerva nuk lanë asnjë përshtypje se mundet të jenë qoftë edhe rezerva në një ekip superlige. Sipas premtimit të presidentit Bizhdili, ai dje do të na zbulonte blerjet e tija të bujshme, por deri në këto momente nuk kemi asnjë emër konkret. Miqësorja ndaj Teutës ishte një pasqyrë e qartë se kjo Besë që u paraqit vështirë se do të mundet të përballet me emra, si Tirana, apo Elbasani e Vllaznia. Sa për fjalët mbi rastin "Grizha", deri tani asnjë fjali e thënë në kampin verdhezi.

[Noizy]

Gjatë takimit miqësor ndaj Teutës, në tribunën VIP ndodhej edhe presidenti i ekipit grek të Iraklisit, Jorgos Spanullaqis. I pyetur nga ne mbi prezencën e tij, ai nuk ngurroi të deklaronte se kishte ardhur për të parë futbollistët kavajas, Kraja e Lila. Ndërsa për një kalim të mundshëm që këtë javë, apo bëhej fjalë për sezonin tjetër, Spanullaqis deklaroi se nëse arrijmë konsensusin me presidentin Bizhdili, atëherë Kraja, ndoshta edhe Lila, që këtë javë do të niseshin drejt Greqisë. Mbetet sot për të mësuar mbi fatin e këtyre dy futbollistëve.