Lajmet nga Superliga 2006/2007

[OO7]

Një gol i shënuar në minutat e fundit u ka dhënë krutanëve një barazim të artë përballë ekipit shkodran 15-10-2006

Kastrioti ndal Vllazninë në "kalanë" e vet

Kastrioti - Vllaznia 1-1
Shënues: Lici 37', Hasa 91'

Kastrioti: Koçi, Dushku, Grami, Gallo, Pashja, Turdiu, Tanushi, (Auia 46'), Rustami, (Hasa 46') Osusi, Ziambo, Abazaj. Trajner: P.Haxhia.
Vllaznia: Grima (Phaninstel 60'), Vukçeviç, Dabulla, Teli, Osja, Lici, (Ahi 65'), Doçi, Radusinoviç (Lika 68'), Dalipi, Kotrri, Bejzade. Trajner: U.Schulze.
Gjyqtarë: Mentor Sopjani (Durrës), Alfred Lamçe, Fatmir Lamaj (Patos)
Kartonë të verdhë: Hasa, Dabulla, Turdiu
Karton i kuq: Turdiu

"Radiografia"
15'- Bejzade ka futur një top të përpiktë në zonë për kokën e Kotrrit, i cili jo vetëm që e ka goditur lehtë, por e ka dërguar drejtpërsëdrejti në duart e portierit Koçi.
19'- Dalipi ka shkarkuar një të djathtë në hyrje të zonës së rreptësisë disi prirtaz dhe topi i tij që ka kaluar mes shumë futbollistësh ka prekur këmbën e Dabullës dhe ka përfunduar ngjitur me shtyllën pingule jashtë.
27'- Doçi, duke kërkuar të bëjë spektakël, ka shpërdoruar një rast ideal për gol.
37'- Lici ka goditur afër pikës së 11 metërshit dhe topi ka prekur shtyllën pingule. Aty pranë është një mbrojtës që tenton ta largojë topin, por e përplas në traversë dhe topi rifutet sërish në lojë, por vijërojtësi, edhe pse nuk është në vijë të drejtë me portën, ka ngritur flamurin, duke sinjalizuar për gol. Vllaznia është në avantazh 0-1.
42'- Lici ka lëshuar një bombë nga afro 20 metra larg dhe topi ka kaluar ngjitur me traversën.
47'- Abazaj ka dalë vetëm për vetëm me portierin Grima, por topi i ngatërrohet nëpër këmbë, duke i dhënë mundësi mbrojtjes t'i afrohet dhe t'ia bllokojë goditjen.
62'- Bejzade i është vjedhur mjeshtërisht mbrojtjes dhe në pozicion të prirët godet, por Koçi e frenon topin që po drejtohej për në rrjetë.
63'- Grami, i hedhur në sulm, ka dhënë një pasim të artë për Auian, që ndodhej 2 3 metra larg portierit shkodran, por në momentin që tenton të gjuajë, ndërpritet dhunshëm nga një mbrojtës dhe gjyqtari lejon avantazhin.
75'- Pas një krosimi nga e majta, Turdiu ka fluturuar mbi mbrojtësit, duke goditur bukur me kokë, por në fund topi është devijuar nga portieri.
77'- Hasa ka ekzekutuar mjeshtërisht një goditje dënimi nga afro 25 metra largësi, por ka fluturuar portieri Phaninstel, duke grushtuar topin mbi traun e sipërm të portës së tij.
81'- Kastrioti mbetet me dhjetë lojtarë, pasi gjyqtari kryesor ka ndëshkuar me karton të kuq Turdiun për një ndërhyrje të rëndë ndaj Bejzades.
88'- Bejzade me pak kujdes mund ta kishte dyfishuar rezultatin, por ngurron të gjuajë në hyrje të zonës dhe topi i goditur në fund prej tij ka humbur forcën nga ndërhyrja e një mbrojtësi dhe përfundon lehtësisht në duart e Koçit.
91'- Hasa në një inkursion të tij personal ka goditur fort nga afro 20 metra, ndërkohë që Auia i ndodhur fare pranë portierit bën një lëvizje mashtruese dhe topi ka përfunduar në rrjetë. Rezultati barazohet në 1-1.

Komenti
Që në fillim skuadra shkodrane hidhet në sulm, duke befasuar futbollistët vendës, të cilët për shumë kohë do të ndihen të çorientuar dhe duke humbur mesfushën. Vllaznia, siç edhe e ka zakon, fillon të "vallëzojë" me një spektakël të vërtet dhe duke krijuar raste të pastra për shënim, siç ishte ai i minutës së 27 të, kur Doçi i vetëm me portierin në zonën e tij gjuan pa përgjegjësi, duke e nxjerrë topin mbi traun e sipërm. E ndërkohë që Vllaznia po pritej nga çasti në çast të shënonte, vjen ai gol fantazëm i dhuruar nga vijërojtësi, i cili ngre flamurin duke sinjalizuar për gol, kur topi pasi ka prekur shtyllën pingule e traversale, është rikthyer në fushë dhe prekur në tokë. Ky gol është dhuratë e vijërojtësit, për faktin se vendosi ta quante gol nga një pozicion që edhe ai e kishte të vështirë ta shikonte, aq më tepër kur gjithçka u zhvillua në ajër dhe nuk kishte një pikë që të gjykonte se topi kishte kaluar vijën fatale. Një gol ky që jo vetëm krutanët, por me siguri edhe futbollistët shkodranë zor se do ta harrojnë lehtë. Kjo bën që futbollistët krutanë të humbasin qetësinë dhe të bëhen më të pa lidhur me njëri tjetrin, por që fatmirësisht nuk pësuan më, kjo edhe për meritë të Gramit, që arriti të bllokonte në shumë raste veprimet e rrezikshme të Bejzades.
Me fillimin e pjesës së dytë, trajneri Haxhia ka bërë dy zëvendësime të gjetura, të cilat rezultuan efikase. Loja e Kastriotit në këtë pjesë bëhet më e rrezikshme. Hasa, në rolin e një organizatori, u ka krijuar Turdiut, Abazajt, Ziambos e Pashajt raste të pastra për shënim. Vllaznia tashmë ka filluar të mendojë edhe për mbrojtjen, por duke mos harruar edhe kundërsulmin me Bejzaden e rrezikshëm.
Por çlirohet disi nga ankthi i sulmeve të krutanëve në dhjetë minutat e fundit, kur Kastrioti detyrohet të luajë me dhjetë lojtarë, pasi gjyqtari kryesor i takimit me të drejtë nga ndëshkuar me karton të kuq sulmuesin Turdiu. Dhe Vllaznia ka filluar të sulmojë sërish për të dyfishuar rezultatin, por atëherë kur nuk pritej, pikërisht në minutën e 91 të, Hasa ka goditur fort nga afro 20 metra në drejtim të portës. Auia, i ndodhur fare pranë portierit, tenton ta mashtrojë atë me një lëvizje të zhdërvjelltë dhe tentativa i del me sukses. Portieri Phaninstel ka rendur pas tij, ndërkohë që topi ka vazhduar i qetë rrugën drejt rrjetës. Në këtë moment stadiumi ka shpërthyer në brohorima entuziazmi, sepse arrihet të merret një pikë, kur askush nuk e besonte. Po ja që futbolli e paska këtë sekret brenda, duke të hidhëruar, por edhe duke të gëzuar atëherë kur nuk e pret.
Pa dashur të akuzojmë askënd, nisur nga ato çfarë pamë në atë 90 minutësh lojë, gjykojmë se në disa raste vendimet e treshes së gjyqtarve ishin tepër të diskutueshme, gjë që irritoi shpeshherë jo vetëm futbollistët, por edhe tifozët e shumtë në stadium.

Deklarojnë:
Petrit Haxhia, trajner i Kastriotit: "E synuam fitoren, por nuk e arritëm dot. Kjo edhe për meritë të skuadrës shkodrane, e cila sot demonstroi nivelin e saj më të mirë. Megjithatë, mendoj se ne golin e Vllaznisë, pasi të shihen edhe filmimet e televizioneve të pranishme, ka vend për të diskutuar e gjykuar. Unë dyshoj se ishte një gol i parregullt, ashtu siç dyshoj se gjyqtari nuk e di pse nuk dha një 11 metërsh, kur Auia u pengua fare pranë portierit shkodran në momentin që do të gjuante. Sidoqoftë, edhe një pikë, kur arrihet me një lojtar më pak, aq më tepër ndaj Vllaznisë, është tepër e kënaqshme."
Ulrih Schulze, trajner i Vllaznisë: "Na duhej domosdoshmërisht tripikëshi i sotëm për shumë arsye, ndaj dhe skema që përdorëm kishte brenda synimin për fitoren. Megjithatë, në futboll nuk vendos vetëm dëshira. Ne gabuam në disa raste, siç ishte ai i Doçit, që ishte një gol i sigurt. Dhe më pas çdo gjë mund të ndryshonte. Por edhe Kastrioti na u kundërpërgjigj denjësisht, duke u bërë gjithnjë e më i vështirë për t'u thyer, sidomos në pjesën e dytë. Megjithatë, kur nuk humbet, përsëri kemi të drejtë të gëzojmë."

Sporti Shqiptar

[OO7]

nuk mund te thuash se jane te pa fasjhem dhe drejtuesit e klubit peqinas
sa per skuadren ato jane te gjithe djem te ri dhe te prespektives por do thoja se keshtu nuk ecet me
te denohen dhe rende bile

Drejtuesit nisur qe nga Kryetari i Bashkise, Deputeti i Zones e me rradhe jane fajtoret kryesore per reagimet e tifozerise. E njejta ishte tabloja dhe ne ndeshjen e Flamurtarit ku lojtaret heshten dhe drejtuesit acaruan gjendjen qe u pasqyrua ke tifozeria. Nuk besoj se do te denohen rende. Ndonje denim me gjobe dhe fusha e denuar tre ndeshje ndoshta. Po te jap nje lajm te sotem per ndeshjen.

“Kundersulmi” absurd i politikes

Ndersa eshte eshte real rreziku i pezullimit te fushes se Shkumbinit nga ana e Komisionit te Disiplines, eshte per te ardhur keq qe nuk ka distancim nga ana e atyre qe duhet te jene shembull ne ruajtjen e rendit e qetesise. Dje eshte shprehur per median nenprefekti i Peqinit, Sokol Elezi, i cili ka dale me qellimin per te pergenjeshtruar futbollistet e Partizanit dhe presidentin e tyre, Albert Xhani. Elezi eshte shprehur se Xhani dhe futbollistet e kuq “kane hedhur balte mbi qytetin e Peqinit dhe futbollin e tij”, nderkohe qe ka marre persiper te identifikoje gjyqtarin si shkaktar te humbjes se Shkumbinit. Nje perpjekje aspak per t’u lavderuar nga ana e nenprefektit, i cili do te bente mire te distancohej nga ajo pakice tifozesh qe hedhin sende e ushtrojne dhune, e jo te justifikonte korin e sharjeve me shprehjen se “kjo ndodh ne cdo stadium”. Me teper se gjithcka qe mund te thone Xhani e lojtaret e Partizanit, jane pikerisht guret e hedhur nga tifozet ata qe vrasin e demtojne futbollin e Peqini dhe imazhin e tij. Ne fund te fund te fundit, Partizani fitoi e u largua, por guret e shishet e hedhura nga nje numer tifozesh pa arsye rrezikojne te bien mbi kurrizin e vete skuadres se tyre. E nese ajo cka ndodhi shihet si normale dhe nenprefekti apo deputeti bejne ekspertin per gjykimin, atehere rrezikohet perseritja qe nuk do t’i vlente kujt. Do te ishte thjesht nje tjeter hierarki.

[goldian]

po pra ketu qendron i gjithi problemi se keto palo deputete dhe prefekte jane me keq se tifozet e thjeshte po nk kane faj ata jo se kane 4 vjet qe rrine ne kategori te pare vetem se fitojne me dhune ne fushe te tyre
sa per tre jave denim me mire mos te ja denojne aspak.
une mesa pash tek nje kronike e shkurter ne internet se di as linkun tani me duket se dikush i bie me grushta xhanit dhe njerezve rreth tij apo e kam gabim?
e si mund te tolerohet kjo?

[OO7]

Eshte e vertete. Xhani dhe Genc Tomorri u sulmuan nga tifozet. Henri Ndreka ka thene se i kane nxjerre thiken kur doli nga dhomat e zhveshjes. Po kjo e fundit eshte e pa konfirmuar. Te gjitha keto tolerohen me nje shume te majme drejtueseve te korruptuar te federates dhe atyre te komisioneve disiplinore.

[OO7]

Drejtuesit e klubit të kuq i kërkojnë FSHF-së të analizojë hollësisht ngjarjen e Peqinit 17-10-2006

Partizani kërkon "kokën" e Shkumbinit

Ekipi i Partizanit, me anë të një shkrese të dërguar dje në Federatën Shqiptare të Futbollit, dënon ngjarjet e ndodhura në Peqin. Sipas shkresës së mbërritur në FSHF, Partizani në radhë të parë jo vetëm që shpjegon pozicionin e tij në lidhje me ngjarjet e fundjavës, por gjithashtu të kuqtë kërkojnë "kokën" e Shkumbinit. Sipas tyre, peqinasit janë sjellë në mënyrë brutale ndaj të kuqve, kështu që meritojnë të ndëshkohen shumë rëndë nga ana e disiplinorit. Gjithashtu të kuqtë kanë shpjeguar çdo detaj të ngjarjes së ndodhur ditën e shtunë në stadiumin e Peqinit.
Sikurse dihet, pas golit të Muzakës, tifozë dhe drejtues të Shkumbinit goditën anësorin, çuditërisht jo atë që ishte në krahun e duhur për të dhënë ose jo pozicion jashtë loje, ndërsa tifozëria peqinase sulmoi presidentin e Partizanit dhe drejtuesit e tjerë të kuq, të pranishëm në stadium. Irritimi i mikpritësve kaloi çdo cak, saqë zyrtarë edhe me imunitet u futën në fushë dhe në dhomat e zhveshjes së lojtarëve duke kërcënuar, sharë e goditur. Nga ana tjetër, policia mezi nxori nga stadiumi presidentin Xhani dhe skuadrën e kuqe, duke i shoqëruar ata deri afër Durrësit.

Sporti Shqiptar

[OO7]

Komisioni i disiplinës pritet të zhvillojë mbledhjen më të nxehtë të këtij fillimkampionati 17-10-2006

Disiplina, sot me "lupë" dhunën e Peqinit

Komisioni i disiplinës në Federatën Shqiptare të Futbollit pritet që sot, në orën 14.30, të zhvillojë mbledhjen më të gjatë të tij. Në duart e disiplinës, komisionit të parë juridik, pritet të jetë çështja më e nxehtë e javës së gjashtë. Bëhet fjalë për takimin mes Shkumbinit dhe Partizanit. Në këtë takim ka pasur gjëra nga më të ndryshmet. Kështu janë sulmuar lojtarë e drejtues klubesh. Kaosi ka qenë shumë i madh, për më tepër në sytë e drejtuesve më të lartë të federatës, shefit të garave e disa prej anëtarëve të komitetit. Të gjitha ngjarjet që kanë ndodhur të shtunën do të shihen me kujdes nga komisioni i disiplinës. Kështu, lista e kryqëzuarve të mundshëm është shumë e madhe. Në lojë janë edhe shumë emra të njohur. Bëhet fjalë për kryebashkiakun e Peqinit Skënder Hasa (njohje e vjetër e disiplinës), deputenin Dashnor Sula dhe sekretarin Astrit Isaj në një shkallë faji më të vogël. Të dy këta persona publikë, ditën e ndeshjes kanë qenë nismëtarë të ngjarjes që mund të kishte shkuar edhe në tragjedi. Të paktën kështu kanë shkruar të gjitha relacionet e delegatit të ndeshjes gjyqtarëve dhe drejtuesve të FSHF së. Sipas relacioneve, këta dy persona publikë dhe në njëfarë mënyre shefi klubit, Astrit Isaj, kanë qenë ata që kanë lëvizur ingranazhet. Të gjitha hallkat e federatës kanë relatuar për këtë problem me përpikëri dhe me siguri ata që do ta pësojnë sot nga disiplina janë pikërisht dy personat në fjalë. Të gjitha këto informacione janë marrë dje në rrugë jozyrtare në FSHF. Burime të paidentifikuara kanë bërë të ditur se ndoshta Shkumbini këtë herë ka luajtur më shumë se ç'duhet me zjarrin.
Realisht, dje në FSHF, ka qenë qetësi olimpike. Institucioni i futbollit nuk ka dhënë asnjë përgjigje. Si shefi i sektorit të garave në FSHF, Hito Hitaj, si sekretari Roland Mici, por edhe punonjësit e tjerë të institucionit, nuk kanë dashur të flasin për këtë problem. Ata u janë shmangur problemeve, duke deklaruar se gjithçka do të qartësohet nga komisioni i disiplinës. Gjithsesi, një gjë është e sigurt: faji duket se u mbetet në derë peqinasve. Ata janë më të dëmtuarit dhe ata do të ndëshkohen rëndë nga disiplina, pasi janë bërë pre e manipulimeve në një ndeshje futbolli nga drejtuesit e këtij qyteti për një tripikësh të qelbur. Realisht të mos kishin qenë forcat e policisë dhe drejtuesit e federatës të matur, me siguri të shtunën do të kishte ndonjë fatkeqësi në Peqin. Me këtë nuk duam të hapim panik, por thjesht të themi një të vërtetë. Po të mos kishte qenë shefi i garave, Hitaj, gjyqtarët edhe mund të ishin bërë viktima. Indrit Shima, anësori që nuk kishte lidhje me ngjarjen, vetëm nga goditjet dhe frika nuk ka pasur forcë dhe fuqi që dje të ishte i pranishëm në një ndeshje futbolli për moshat. Vaj hallit çfarë ka hequr në Peqin të shtunën. Gjithsesi, "karrigia elektrike" për Shkumbinin është gati. Duket se disiplina sot do të ndëshkojë rëndë një qytet që gjithsesi nuk qëndron dot pa zullume në një ndeshje futbolli që vetëm arenë gladiatorësh kurrsesi nuk mund të bëhet.

Olsi Avdiaj
Sporti Shqiptar

[GeNi_25]

Komisioni duhet ta beje shembull kete Peqinin, jo vetem se keto jane ngjarje te perseritura nga ky ekip por dhe eshte e pamoralshme te goditet nje president.

Megjithate mendoj se keto rremuja qe mbijne neper stadiumet Shqiptare pothuajse çdo jave ka dore shteti, dhe mbi te gjitha ai ( M. M ) k**** qe per te privatizuar Dajtin ka mese 1 vite qe veç lajme sportive nuk jep.

[OO7]

Sapo mora vesh qe fusha e Shkumbinit u denua 6 jave. Ma merr mendja se ky vendim do te ulet nga apeli sic eshte bere gjithmone.

[OO7]

Skuadra peqinase merr dënimin më të rëndë gjatë këtyre 16 viteve demokraci 18-10-2006

Dhuna e Peqinit, 6 jave pezullim dhe 3 mln gjobë!

Komisioni i disiplinës i Federatës Shqiptare të Futbollit vendos të dënojë 6 javë ekipin e Shkumbinit për ngjarjet e ndodhura në ndeshjen me Partizanin. Kështu, pas më shumë se 6 orë mbledhjeje, komisioni juridik i FSHF së ka marrë një vendim që asnjëherë gjatë këtyre 15 vjetëve nuk ka pasur guxim njeri që ta japë. 6 javë "burg" për ekipin e Shkumbinit dhe një gjobë të majme. Në fakt, disiplinori ka ndëshkuar shumë rëndë vetëm klubin dhe nuk është marrë me emra të përveçëm. Gjithsesi, ajo që është kryesorja është fakti se Peqini më në fund u ndëshkua shumë rëndë. Jo se kemi ndonjë gjë me këtë skuadër, por të paktën njerëzit e këtij qyteti të kuptojnë se duhet të ndryshojnë në sjelljen e tyre dhe se këtë qytet nuk duhet të ketë ngjarje të këtilla. Realisht, dënimi 6-javësh e dënon përfundimisht skuadrën peqinase. Nëse ky ekip nuk nuk do të luajë shumë ndeshje në Kupën e Shqipërisë, atëherë i bie që ndeshjen e radhës peqinasit në fushën e tyre ta zhvillojnë rreth muajit shkurt. Për ta, ky do të ishte fundi, pasi këtë sezon, ndonëse e kanë nisur mirë, skuadra shpreson tek një qëndrim në kategorinë superiore. Gjithashtu, veç dënimit ekzemplar prej 6 javësh jashtë stadiumit të tyre, peqinasit duhet të paguajnë edhe një gjobë prej 300.000 lekësh. Pra, duke parë vendimet më të fundit, realisht mund të thuash se FSHF për herë të parë së bashku me komisionin e disiplinës ka mbajtur një qëndrim korrekt në lidhje me këtë problem, duke ndëshkuar për herë të parë sa e meriton fajtorin. Komisioni i disiplinës, veç çështjes "Shkumbini", ka ndëshkuar edhe plot aktorë negativë të ndeshjeve të kategorisë superiore, të parë dhe të dytë.

Ja vendimet e disiplinës
1. Mbështetur në relacionet e paraqitura nga arbitrat, vëzhguesit dhe i deleguari i FSHF së, rezulton dukshëm se ndaj arbitrave dhe veçanërisht ndaj anësorit të ndeshjes, Indrit Shima, dhe Sokol Avdo ka pasur presione dhe goditje si fizike nga ana e personave të caktuar, ashtu edhe nga hedhja e sendeve të forta në fushë. Këto goditje kanë vijuar edhe pas përfundimit të ndeshjes Shkumbini Partizani, gjatë daljes së arbitrave, ku mund të veçohet edhe goditja e bërë nga një gazetar lokal, e kryer gjatë largimit të arbitrave (goditje e cila i ka shkaktuar arbitrit një çarje në qafë), prandaj konstatohet se shkeljet disiplinore të ndodhura në fushën e Peqinit janë të rënda dhe cënojnë mbarëvajtjen e aktivitetit futbollistik. Gjithashtu konstatohet se veprimet e dhunshme nuk janë kufizuar vetëm në hedhjen e sendeve të forta në fushë dhe goditjen e dëmtimet e arbitrave, por janë shfaqur edhe ndaj drejtuesve të ekipit kundërshtar. Të ndodhur në këto kushte, të njohur edhe me shkresën nr:172 Prot. datë 15.10.2006 të KF Shkumbini, komisioni i disiplinës, sipas parashikimeve të neneve 23, paragrafi 1, 14, 15, 18, 23 dhe Neni 21/ 4.5, Neni 13/1, Neni 19, Neni 4/5 i KDS, duke qenë se për këto shkelje disiplinore Klubi i Futbollit "Shkumbini" i Peqinit është përsëritës, në përfundim ky komision e dënoi këtë klub me sanksionet e mëposhtme: a) Pezullimin e fushës së Peqinit për 6 ndeshje, duke qenë i detyruar që ky klub t'i zhvillojë ndeshjet në fushë asnjanëse. b) Gjobitjen e KF "Shkumbini" me 300.000 lekë.
2. Futbollisti i ekipi të Dinamos Goran Vinçetiç, për lojë të ashpër dhe të rrezikshme ndaj kundërshtarit, por pa krijuar pasoja për kundërshtarin, në bazë të KDS gjobitet me 5000 lekë.
3. Trajneri i ekipit të Elbasanit, Luan Deliu, për moszbatim të urdhëresës së FSHF së për ndërrimin e pankinave të ndeshjes, në bazë të KDS së gjobitet me 10.000 lekë.
4. Drejtuesit e KF "Kastrioti" Shaban Dollaku dhe Ali Veseli, për goditje të arbitrit, në bazë të KDS dënohen me 1 vit pezullim nga drejtimi i ekipit.
5. Futbollisti i ekipit të Kastriotit, Shkëlzen Rustami, për ofendim të arbitrit, në bazë të KDS dënohet me 4 javë pezullim dhe gjobitet me 100.000 lekë.
6. Futbollisti i KF "Besëlidhja" Kreshnik Ivanaj, për ofendim të arbitrit, në bazë të KDS dënohet me 4 ndeshje për pezullim dhe gjobitet me 100.000 lekë.
7. Trajneri i ekipit Bilisht Sport, Spartak Meraku, për goditje dhe ofendim të arbitrave, në bazë të KDS pezullohet 1 vit nga drejtimi i ekipit dhe gjobitet me 150.000 lekë gjobë.
8. Në ndeshjen Pogradeci Skënderbeu, KF "Pogradeci", për dëmtimin e arbitrit të katërt, si pasojë e hedhjes në fushë të sendeve të forta, në bazë të KDS dënohet me 200.000 lekë gjobë.
9. Zëvendëstrajneri i ekipit të Pogradecit, Ardian Abazi, për protesta dhe ofendim të arbitrit, në bazë të KDS dënohet 2 ndeshje pezullim nga drejtimi i ekipit dhe gjobitet me 150.000 lekë.
10. Futbollisti i Pogradecit Anesti Lipo, për fyerje të arbitrit, në bazë të KDS dënohet me 4 ndeshje pezullim dhe gjobitet me 100.000 lekë.
11. Futbollistët Sidor Sekseri, Endri Bakiu, Denis Beta, bazuar në kërkesat e paraqitura nga klubet dhe lejet e kalimit përkatëse të lëshuara nga këto klube, mbështetur në parashikimet e Rregullores së Veprimtarisë Futbollistike, janë të lirë dhe lejohen të aktivizohen dhe federohen në klube të tjera, ku kanë kërkuar të aktivizohen.
12. Kërkesën e KF "Veleçiku" për marrjen e lojtarëve të KF "Ada" nuk pranohet në kushtet aktuale kur mungon miratimi nga vetë KF "Ada" dhe vetë futbollistët.
13. Futbollisti i U 19 i Gramshit, Rilind Dyrmishi, për kundërshtim të gjyqtarit të ndeshjes, në bazë të KDS pezullohet 4 ndeshje nga aktiviteti futbollistik.
14. Futbollisti U 17 i Tomorit, Henrik Kacaresko, për ofendim të gjyqtarit të ndeshjes, në bazë të KDS pezullohet 4 ndeshje nga aktiviteti futbollistik.
15. Futbollisti i U 17 i ekipit të Tomorit, Julian Bejko, për goditje me grusht të kundërshtarit, në bazë të KDS dënohet me 8 ndeshje pezullim.
16. Futbollisti i U 19 i ekipit të Laçit, Arion Aliu, për ofendim e goditje të arbitrit kryesor, pezullohet 2 vjet në bazë të KDS.
17. Ndeshjet U 17 dhe U 19 ndërmjet Pogradecit dhe Elbasanit do të merren në shqyrtim javën e ardhshme për arsye se mungonte protokolli i ndeshjes.

Olsi Avdiaj
Sporti Shqiptar

[Kleidi]

Ne javen e 7 te kategorise se pare Sopoti udhetoi per ne Shijak ku luante me Erzenin vendas. Pjesa e pare ka qene ne nivel mesatar ku mbizoteronte loja e paster e ekipit mik dhe nje loje "dhune" e vendasve. Pjesa e pare mbaroi 0-0 por qe mund te kishte folur shume per miqte. Pjesa e dyte nis vrullshem ku ne min e 65 shenon Hajdari per miqet ne nje aksion model. Pas golit miqte librazhdas ulen ritmin e lojes , nenvleftesuan kundershtarin {si ne Berat , Lushnje qe mund te merrnin fitore pa diskutim} dhe vendasit shenuan dy here duke permbysur gjithcka.
Eshte e disata here qe Sopoti nenvlereson kundershtarin dhe e peson. Eshte dicka qe po peresritet shpesh. Ky ekip ka vlera , ka lojtare , ka elemente te rinj qe jane ne gjendje te bejne shume. KY EKIP KA VLERA por qe mosha e lojtareve ben ate qe cdo ekip ne bote ruhet "Nenvlersim i kundershtarit". Ne gjirin e ekipit ka shume lojtare qe per here te pare luajne ne nje kompeticion kaq te larte.
Shpresoj qe me kalimin e kohes cdo gje te rregullohet dhe eksperienca e hidhur e ketyre ndeshjeve te behet mesim per te gjithe.

Erzeni 2 - 1 Sopoti