Lajmet nga Superliga 2006/2007

[CERIKSI-CHICAGO]

Java E Peste

Rezultatet

Erzeni 1-0 Turbina
75' [1-0] Arapi

Lushnja 3-1 Sopoti
30' [1-0] Elezi
57' [1-1]hajdari
85' [2-1] Cela
93' [3-1] Boric

Burreli 1-0 Tpelena
78' [1-0] Nika

Ada 2-1 Pogradeci
42' [0-1]
60' [1-1]
70' [2-1]

Skenderbeu 1-0 Laci
5' [1-0] Tocuku

Gramshi 1-0 Bilisht
82' [1-0] Muca

Beslidhja 4-0 Tomorri
27' [1-0] Arberi
30' [2-0] Grudaj
46' [3-0] Ivanaj
66' [4-0] Arberi

[CERIKSI-CHICAGO]

Java E Gjashte

Rezultatet

Laci 0-0 Beslidhja

Tepelena 0-0 Lushnja

Sopoti 1-0 Gramshi
93' [1-0] Rustemi

Tomorri 1-1 Burreli
74' [1-0] Fani
89' [1-1] Gjoka

Pogradeci 2-3 Skenderbeu
20' [0-1] Cajku
50' [1-1] Rustemi
52' [1-2] Tiko
80' [2-2] Muska
85' [3-2] Tocuku

Turbina 1-0 Ada
13' [1-0] Sekseri

Bilisht Sport 2-4 Erzeni
8' [1-0] Macolli
30' [1-1] Ndoja
39' [2-1] Zazo
53' [2-2] Tropolini
76' [2-3] Berzezi
85' [2-4] Tropolini

[OO7]

Dhunohet Partizani.

Shkumbini - Partizani 0-2
Shkumbini: Llani, Xhafa, Muça, Zmijani, Dervishi (Cani 60'), Byzhyti, Ndoni (Salliu 60'), Nexha (Ramazani 42'), Beqiri, Sefa, Bubeqi Trajner: Vasil Bici
Partizani: Shehi, Ndreka, Kardek, Beqiri, Leandro, Gjyla, Progri (Karapici 41'), Dhëmbi, Bylykbashi, Muzaka (Bakaj 75'), Xhunior (Babamusta 84') Trajner: Neptun Bajko
Shënues: Muzaka 55', Leandro 70'
Kartonë të verdhë: Bubeqi, Byzhyti, Dhëmbi
Gjyqtarë: A.Lulaj (Vlorë), S.Avdo (Tiranë), I.Shima (Durrës)

"Radiografia"
2'- Rrezikon i pari Shkumbini në portën e Elbasanit me anë të Byzhytit, që gjuan fluturimthi me forcë, por Shehi grushton me vështirësi, duke larguar rrezikun.
9'- Sefa përfiton nga një gabim i mbrojtjes së Partizanit dhe del përballë portierit Shehi, por nuk gjen kuadratin e portës.
14'- Progri lëshon një "predhë" nga distanca paksa mbi traun e portës së Llanit.
18'- Bylykbashi ekzekuton saktë një goditje të lirë, por tregohet në lartësinë e duhur Llani.
24'- Xhunior nga e djathta shërben saktë për Bylykbashin, gjuajtja e të cilit pritet përsëri nga Llani.
40'- Shehi arrin të ndërhyjë më shpejt se Sefa, i cili për pak sa nuk e ndëshkon portën mike, pas një topi të marrë nga Byzhyti.
46'- Ndoni ngulmon nga e djathta dhe shërben për Bubeqin, gjuajtja e të cilit me kokë pritet nga Shehi.
55'- Goditje këndi për Partizanin. Topin e larguar nga mbrojtja e zotëron Muzaka pranë zonës, i cili godet fort duke tundur rrjetën, 0-1. Protestojnë vendësit, pasi Leandro, në pozicion jashtë loje, i kishte zënë pamjen Llanit.
50'- Byzhyti nxjerr të lirë Dervishin, që në kufijtë e zonës mike pengohet nga mbrojtja, por gjyqtari Lulaj bën shenjë që loja të vazhdojë.
60'- Beqiri merr një inkursion nga e djathta, shmang Ardit Beqirin dhe Kardekun dhe gjuan fort tokazi, ngjitur me shtyllën e portës së Shehit.
70'- Kundërsulm i Partizanit me anë të Xhuniorit, i cili pason për Leandron, që nuk fal para Llanit, 0-2.
81'- Xhunior shfrytëzon si duhet asistin e Bylykbashit, duke gaditur shtyllën e djathtë të portës peqinase.
90'- Sefa tenton të shënojë golin e nderit për Shkumbinin, por gjuajtja e tij me kokë përfundon mbi shtyllë.

Komenti
Shkumbini pëson humbjen e parë në Peqin përballë Partizanit, e dyta radhazi në dy javët e fundit, ndërkohë që Partizani, pas shumë vitesh, arrin të dalë me pikë të plota nga Peqini. Takimi u prit me interesim të madh nga ana e tifozërisë vendëse, por duhet pranuar se loja për asnjë moment nuk u ngrit në nivelin e duhur, aty ku e pritnin sportdashësit. Partizani në fund u gëzohet tri pikëve, duke kërkuar të mos i ndahet Tiranës kryesuese, ndërsa Shkumbinit nuk i ngelet gjë tjetër veçse të kënaqet me ecurinë e mirë të 4 javëve të para. Në takimin e djeshëm duhet pranuar se nuk u pa në fushë ai Shkumbin i javëve të para dhe kjo u shfrytëzua mirë nga kundërshtari, që i ndëshkoi vendësit me dy gola, duke i dhënë një mësim të mirë. Fakti që Partizani kishte disa sezone që nuk fitonte në Peqin u dha një siguri më të madhe nga sa duhej futbollistëve të Shkumbinit, e kjo u pa mjaft mirë në fushë. Nëse do të analizojmë minutat kur rezultati ishtë 0 0, sepse pas golit peqinasit dolën nga loja, Shkumbini i djeshëm ishte larg takimeve me Flamurtarin, Elbasanin e Vllazninë në shumë drejtime, ku më kryesore ishte mungesa e shpirtit të garës. Portieri Shehi pak u vu në provë nga sulmuesit e Shkumbinit, sepse munguan veprimet e shpejta nga krahët dhe krosimet nga fundorja. Fakt është që Shkumbini pati më tepër epërsi në terren, duke luajtur në gjysmëfushën e Partizanit, por kjo ishte e pamjaftueshme. Shkumbini e mori lehtë këtë takim, duke bërë gabime të shumta në pasime, saqë shpesh i dhurohej topi kundërshtarit. Shkumbini e pati të vështirë të dalë në lojën e vet dhe meritë për këtë ka pa dyshim edhe ekipi i Bajkos, i cili luajti më i tërhequr, duke qenë tepër i saktë në veprimet e veta. Partizani u përpoq të luajë me kundërshtarin me taktikë dhe ia arriti qëllimit. Leandro, Xhunior e sidomos Muzaka në një ditë të mirë, nën drejtimin e Bylykbashit, ishin shqetësim i vazhdueshëm për mbrojtjen e Shkumbinit, duke e gjetur shpesh në befasi. Reparti i sulmit me Bubeqin dhe Sefën pak u ndien, sepse ata luajtën të shkëputur nga njëri tjetri dhe nga reparti i mesfushës. Të metat e lojës së Shkumbinit do të dilnin në pah më mirë pas pësimit të golit të parë. Ky gol i diskutueshëm ndikoi shumë në psikologjinë e Shkumbinit. Për më tepër, zëvendësimet në pjesën e dytë nuk sollën asgjë të re, përveçse thelluan rezultatin me golin e dytë, me autor Leandron. Rezultati në favor i dha mundësi Bajkos të largojë Muzakën e Xhuniorin nga fusha, duke aktivizuar El.Bakajn e Babamustën, në një moment kur kundërshtari kishte humbur shumë terren. Nga dëshira për të shënuar, futbollistët vendës gabonin e kjo ua bënte më të lehtë mbrojtësve të Partizanit ndërprerjen e sulmeve të tyre. Të kuqtë, me pasime të shpejta e të sakta, nisnin kundërsulme të njëpasnjëshme e në këto minuta janë pranë golit të tretë dhe vetëm shtylla e shpëton Shkumbinin. Humbja duhet t'u shërbejë peqinasve si një mësim, për t'u rikthyer shumë shpejt që në ndeshjen e radhës te loja e vet karakteristike, sepse më shumë se rezultati, dje Shkumbini zhgënjeu me paraqitjen që bëri, duke qenë larg traditës. Nga ana e skuadrës peqinase ka pasur kontestime për gjykimin e kryesorit Lulaj në dy rastet e golave dhe në momente të veçanta pranë zonës së Partizanit. Gjithsesi, me apo pa fajin e gjyqtarit, Shkumbini humbi tri pikë në shtëpinë e tij.

Deklarojnë
Vasil Bici, trajner i Shkumbinit: "Ishte një ndeshje e barabartë deri në pësimin e golit të parë. Me kalimin në avantazh, Partizani shfrytëzoi mirë dobësitë e skuadrës sonë, që kaloi në nervozizëm. Kishim pretendime në lidhje me golin e parë, që ishte goli i kthesës në këtë ndeshje e që i dha lojës rrjedhë tjetër. Pretendoj se në rastin e golit një futbollist mik i kishte zënë rrezen portierit Llani. Më pas skuadra u shpërbë, duke luajtur me pasime të gjata. Atyre u dukej e pabesueshme që Partizani më në fund po fitonte në Peqin. Ekipi ynë për vetë kushtet që ka nuk mund të luajë me ballë të gjerë me skuadrat e mëdha, por duhet të mbahemi mirë për të goditur kundërshtarin."
Neptun Bajko, trajner i Partizanit, nuk i prononcua.

"Të veçanta"
- Shkumbini dje ndryshoi pankinën, duke preferuar atë të miqve, por ky nuk qe shans i mirë për të marrë rezultat pozitiv.
- Futbollistët peqinas në ndeshjen me Partizanin përuruan uniformat e reja karakteristike bardhekaltër.
- Në mungesë të protokollit, që dje nuk u paraqit nga gjyqtari i katërt, gazetarët e patën të vështirë të plotësonin formacionet. Në ndihmë u erdhën futbollistët e dy ekipeve. Nga Partizani ndihmoi Olivera, braziliani që luajti për Shkumbinin sezonin e kaluar.
- Braziliani Leandro brenda një muaji luan dy herë rresht në Peqin, madje këtë radhë arrin edhe të shënojë.
- Veç drejtuesve të dy ekipeve, ishin të pranishëm edhe H.Hitaj, shefi i garave, dhe S.Hyka, anëtar i komitetit ekzekutiv.

Ali Hallulli
Sporti Shqiptar

[OO7]

Kampionët verdheblu arritën të mposhtin dinamovitët falë autogolit të kroatit Kastel 15-10-2006

Elbasani merr fitoren e kthesës së madhe

Elbasani - Dinamo 1-0

Shënues: Kastel (autogol) 60'
Elbasani: Kotorri, Sina, Osmani, Leci, Kasollja, Kuçi (Merxha 65'), Kaçi, Abdulla, Dalipi (Mehmetaj 85'), Stojku, Çapja.
Trajner: Luan Deliu
Dinamo: Lika, Vinçetiç, Xhafa, Ahmataj, Jupi, Gudjabi, Poçi (Ferraj 72), Deliallisi (Çaushaj 45'), Diop, Qorri, Kastel.
Trajner: Faruk Sejdini
Gjyqtarë: T.Latifi, P.Goxho, R.Zhuli (Gjirokastër)
Kartonë të verdhë: Osmani, Leci, Dalipi, Kastel, Poci, Xhafa, Diop.
Karton i kuq: Vinçetiç

"Radiografia"
4'- Provon Abdulla nga distanca, por Lika pret në dy kohë.
10'- Sulmuesi senegalez i Dinamos, Gudjabi, gjuan nga jashtë zone dhe largon Kasollja.
18'- Përsëri sulmojnë dinamovitët dhe Qorri, në një kundërsulm të shpejtë, shmang një mbrojtës, gjuan, por jashtë kuadratit të portës.
24'- Stojku tenton të godasë portën e Likës, por topi përfundon jashtë.
32'- Gudjabi kërkon të depërtojë në zonën e verdhebluve pas një topi të marrë nga Jupi, por vonon në pasim.
39'- Është radha e Kaçit, i cilin gjuan, por pret Lika.
44'- Kuçi kalon dy kundërshtarë, godet, por topi shkon në qëndrore dhe pret portieri Lika.
52'- Provon Jupi nga një goditje dënimi, por topi përfundon mbi traun e portës.
59'- Kaçi kombinon me Abdullain dhe ky i fundit gjuan ngjitur me shtyllën pingule të portës dinamovite, por jashtë.
60'- Aksion i nisur nga Tefik Osmani për Kaçin, i cili gjuan, topi devijohet nga Kastel dhe përfundon në rrjetë. 1 0 për Elbasanin.
66'- Provon Qorri me një mundësi tepër të pastër, por çuditërisht topi kalon ngjitur me shtyllën pingule.
71'- Ahmataj gjuan jashtë zone, por pret Kotorri në dy kohë.
81'- Godet Çapja nga distanca dhe Lika pret i sigurt.
89'- Është përsëri Elbasani që sulmon, gjuan Kaçi, por topi përfundon jashtë.


Komenti
Elbasani buzëqesh dhe ngjitet në klasifikim pas tri pikëve tepër të çmueshme të marra dje ndaj Dinamos. Për kampionët e drejtuar nga Deliu, sfida ndaj bluve ishte tepër pozitive, ndonëse puna që duhet të bëjnë djemtë verdheblu do të jetë më e vështirë në javët në vijim. Gjithsesi, fanellat e bardha i kanë sjellë fat ekipit elbasanas, i cili është futur në fushë vetëm me mendimin për të mos dalë pa tri pikët e shumëpritura. Që në minutat e para vendësit kërkojnë golin, por janë të paorganizuar në fushën e lojës dhe përballë kanë një kundërshtar me shumë kualitete brenda si Dinamo e Jupit. Gjithsesi, pjesa e parë do të zhvillohej më tepër në mesfushë me shumë pak raste nga të dy ekipet, për të mos thënë se rastet e pjesës së parë ishin me pikatore. Deliu mundohet të udhëzojë të tijët që të hidhen më në sulm, ndërsa nga ana tjetër miqtë të drejtuar nga Sejdini përdornin kundërsulmin me anë të Gudjabit, i cili ishte larg erës së golit në takimin e djeshëm. Pas 45 minutave të para, të mbyllura në barazim në aksin e dytë të lojës të dyja ekipet paraqesin një tjetër tablo. Vendësit duken më kërkues për të shënuar, por edhe Dinamo nuk qëndron pas. Jupi, Qorri dhe i sapofuturi Çaushaj vënë shpesh në tension mbrojtjen verdheblu, e cila duhet theksuar se ishte në lartësinë e duhur deri në fundin e takimit. Por, kur Dinamo po reagonte mirë me anë të sulmeve të shpeshta, vjen edhe reagimi i kampionëve, të cilët falë një aksioni me pak pretendime të Osmanit për Kaçin shënojnë golin e parë dhe të fitores, të ndihmuar nga mbrojtësi Kastel, i cili e devijon topin në rrjetë, duke shënuar autogol në portën e tij në minutën e 60-të takimit. Pas këtij goli Dinamo e ka të vështirë të reagojë dhe frenat e lojës në dorë i marrin kampionët e drejtuar nga Deliu, të cilët krijuan disa raste të pastra shënimi, por çuditërisht përpara portierit Lika nuk arrinin të gjenin rrugën e rrjetës. Në fund, Elbasani iu kënaq tri pikëve tepër të domosdoshme, por duhet theksuar se në ndryshim nga takimet e tjera, kampionët treguan në tapetin e blertë një shpirt gare tepër të lartë dhe mbi të gjitha një përgatitje fizike në lartësinë e duhur, ku spikati në veçanti afrikani Abdulla, i cili është edhe me agjërim. Pas kësaj fitoreje në kampin verdheblu ka nisur të mendohet për takimin e së mërkurës në transfertë me Partizanin, një përballje që do të ndezë sërish "brirët" e kësaj jave.


Thanë pas ndeshjes:
Luan Deliu, trajner i Elbasanit:
"Ishte një fitore tepër e domosdoshme si nga ana morale ashtu edhe nga ajo psikologjike. Dua të falënderoj futbollistët për fitoren që e merituam, ndonëse kemi ende punë për të bërë. Unë e kam thënë dhe herë të tjera që Elbasani ka një ekip me futbollist të rinj, të cilët po përmirësohen nga ndeshja në ndeshje. Sot falënderoj publikun që na mbështeti, pasi kemi nevojë për të. E ftoj që të na qëndrojë pranë edhe në takimet e ardhshme. Për sa i përket takimit të së mërkurës me Partizanin, mund të them se, me përjashtim të Tiranës, të gjitha ekipet e superiores janë njësoj, kështu që nuk më çudit fitorja e Partizanit në Peqin, pasi edhe ne mund të bëjmë të njëjtën gjë të mërkurën ndaj tyre."
Faruk Sejdini, trajner i Dinamos:
"Ndeshja do të ishte më e drejtë po të kishte përfunduar në barazim. U ndëshkuam në momentin më të mirë, por ky është futbolli. Gjithsesi, kam rezervat e mia për gjykimin, pasi na ndëshkoi shumë. Gjyqtari që në fillim na ndëshkoi me tre kartonë të verdhë dhe më pas me karton të kuq të Vinçetiçit. Nëse nuk do të kishin ndodhur këto, mund të kishim marrë më shumë. Gjithsesi, Dinamo ka ende punë për të bërë. Do të shohim përpara për t'u kthyer rezultateve pozitive."

Të veçanta:
- Për herë të parë, në tribunën e "Ruzhdi Bizhutës" mungonte presidenti Laze dhe drejtori teknik, Artin Kovaçi, të cilët ende nuk janë kthyer nga Holanda. Ndërkohë, si gjithmonë, nuk ka munguar kryetari i bashkisë, Ardian Turku.
- Për herë të parë, ekipi kampion i Elbasanit ka zbritur në fushë me fanella të bardha, duke sjellë dhe një reagim nga tifozeria e zjarrtë verdheblu.
- Në tribunën "VIP" ishte dhe një menaxher nga Kuvajti, i cili pasi ka folur me trajnerin Deliu, i ka premtuar këtij të fundit sjelljen për testim të 10 futbollistëve të huaj, kryesisht afrikanë, të cilët janë më lart si cilësi në krahasim me futbollistët e deritanishëm që luajnë në kampionatin shqiptar. Mësohet se këto ditë të 10 futbollistët do të zbresin në stërvitje me kampionët, ndonëse më parë duhet të testohen nga trajneri Deliu.

Fatmir Popja
Sporti Shqiptar

[OO7]

Vlonjatëve u ka mjaftuar vetëm një gol për të thyer ecurinë negative dhe tashmë shohin para 15-10-2006

Flamurtari, autokritika vjen me Luftëtarin

Flamurtari - Luftëtari 1 - 0

Shënues: Delain 49'

Flamurtari: Dine, Driza, Delain, Sakaj, Begaj, Guga, Arifaj (Strati 46'), Roxher, Nenaj, Sisoko (Kuqi 75'), Bokotola (Guna 81'). Trajner: E.Memushi.
Luftëtari: Toçi, Dibra, Shameti, Novi, Hasalla, Gaxhaj (Braho 52'), Muço, Shenaj (Stoja 67'), Kaçi (Bejollari 46'), Stafa, Nora. Trajner: I.Spahiu.
Gjyqtarë: S.Velçani (Patos), V.Guranjaku (Elbasan), F.Elezi (Durrës)
Kartonë të verdhë: Bokotola, Sakaj, Novi, Shameti, Begaj, Guga

"Radiografia"
17' Kros nga e majta për Nenajn, i cili godet dobët me kokë nga afër.
20' Sisoko godet fuqishëm një goditje dënimi nga 25 metra, topi "qeth" shtyllën traversale.
27' Arifaj, në një tjetër tentativë goditje nga distanca, nuk ka gjetur kuadratin e Toçit.
36' Gabim foshnjarak i portierit gjirokastrit Toçi, i cili i pashqetësuar nga miqtë, përplas topin në kurrizin e Roxherit, duke rrezikuar seriozisht pësimin e golit.
45' Begaj fut një kros rrafsh me tokën, ku topi pasi kalon nëpër shumë këmbë, nuk gjen futbollistin e duhur për ta shtyrë në rrjetë.
49' Delain vallëzon në zonën gjirokastrite dhe konkretizon me gol, duke shënuar rrafsh me tokën. 1-0 për Flamurtarin.
52' Sisoko, në një rast identik me atë të Delain godet bukur, por Toçi i thotë "jo" me një zhytje spektakolare.
60' Sisoko nuk shfrytëzon siç duhet një pas të Begajt, teksa vonon në gjuajtje, duke i dhënë mundësi Hasallës të ndërhyjë.
62' "Predhë" e Sisokos, por topi trondit trekëndëshin ku bashkohen dy shtyllat, duke i mohuar një eurogol futbollistit të Flamurtarit.
70' Braho shërben për Norën, por Dine i thotë "jo" Norës, i cili mund të kishte shënuar.
72' Braho shërben bukur për Bejollarin, i cili nuk koordinon siç duhet kërcimin e tij për të goditur me kokë 2 metra larg portës.
75' Më në fund shfaqet edhe Nora, i cili me një gjuajtje spektakolare në gjysmë lartësi detyron Dinen të bëjë një pritje spektakolare.
78' Novi godet fuqishëm, por devijon Bokotola, duke evidentuar një gol të sigurt.
86' Portieri gjirokastrit Toçi, në një duel shpejtësie me vlonjatin Strati, tregohet më i shpejtë, duke e zotëruar topin brenda zonës së tij.
90' Përsëri Strati i ndodhur i lirë përballë Toçit humbet rastin më të mirë për të dyfishuar rezultatin, duke goditur jashtë kuadratit.

Komenti
Vlonjatët e trajnerit të ri Eqerem Memushi kanë arritur të marrin një tripikësh të artë në të ashtuquajturën ndeshje shtëpie, që pas pezullimit të fushës së tyre janë detyruar të luajnë në tapetin mjaft komod të "Roza Haxhiut". Tifozëria e paktë në numër e ardhur nga dy qytetet jugore priste një ndeshje të bukur nga ekipet e tyre, të cilën do ta lejonte të zhvillohej në kushte të barabarta vetë fusha asnjanëse e Lushnjës. Por një gjë e tillë ka ndodhur vetëm në pjesën e dytë të lojës. Themi kështu, pasi pjesa e parë e këtij takimi ka qenë në përgjithësi nën nivelin mesatar, gjë të cilën e vërteton më së miri edhe numri i paktë i rasteve të krijuara në të dy portat. Ekipet e kanë nisur takimin me një mungesë dëshire për të ngacmuar në veprimet sulmuese, teksa pasimet e shumta në mesfushë e bënë më shumë të mërzitshme këtë pjesë të parë për të pranishmit e pakët që kishin mbushur vetëm tribunën qendrore të "Roza Haxhiut". I vetmi rast për t'u fiksuar në këtë 45-minutësh të parë ishte për vlonjatët, kur portieri Toçi për pak sa nuk i dhuron një gol pa djersë kundërshtarit, teksa përplas një top te Roxher, i cili për pak sa nuk përfundon në rrjetë. Pjesa e dytë, ndryshe nga e para, nis më agresive, ku vërtetoi se vërejtjet e dhëna në dhomat e zhveshjes nga trajnerët respektivë të dy ekipeve kishin dhënë ndikimin e duhur te futbollistët e të dy kampeve. Dhe janë futbollistët e Flamurtarit ata që marrin frenat e lojës në dorë, kur shfaqen rrezikshëm në portën gjirokastrite me sulme të filtruara bukur me protagonistë kryesorë Sisokon dhe Sasha Delainin. Dhe në njërin prej këtyre sulmeve ky i fundit, pasi ka marrë një top brenda zonës së bluzinjve, vallëzon në një triblim fantastik, duke finalizuar me një gjuajtje rrafsh me tokën, për të fiksuar avantazhin e shumëpritur nga vlonjatët. Goli i Delainit ka shokuar disi formacionin e Spahiut, teksa nuk gjejnë forcën për t'u kundërpërgjigjur, të paktën deri në minutën e 70 të, kur më në fund regjistrohet edhe rasti i parë serioz në portën vlonjate. Që pas këtij momenti, loja zhvendoset dalëngadalë në portën e Flamurtarit, kur gjirokastritët krijojnë raste të tjera, por pa rrezikshmërinë e duhur, ndërkohë që dëshira për të barazuar u krijon atyre të çara në prapavijë, të cilat nuk u shfrytëzuan siç duhet nga Sisoko dhe Strati për vlonjatët. Ky i fundit humbet një rast ideal pak sekonda përpara se gjyqtari Velçani të sinjalizojë përfundimin e këtij takimi, i cili ngeli i fiksuar me avantazhin e golit të Delainit për Flamurtarin që në minutën e 49-të. Me këtë fitore, Flamurtari më në fund arrin t'i rikthehet fitores së munguar, duke kaluar jo pa vështirësi këtë ndeshje shtëpie, me synimin për t'iu larguar sa më shpejt fundtabelës, ndërkohë që gjirokastritëve, të cilët nuk paraqitën asnjë vlerë në këtë 90-minutësh, nuk u ngelet gjë tjetër, veçse të korrigjojnë sa më shumë që të jetë e mundur në ndeshjen pasardhëse të shtëpisë.

Deklarojnë:
Eqerem Memushi, trajner i Flamurtarit: "Jam i kënaqur për fitoren dhe falënderoj të gjithë djemtë për atë që dhanë në fushë. Ajo që ishte më kryesore për ne konsistoi në faktin që djemtë hynë në fushë me mentalitet fituesi. Kjo fitore do të jetë një hapje rruge për fitore të tjera. Reagimi erdhi, tani na duhet të vazhdojmë në këtë rrugë."
Ilir Spahiu, trajner i Luftëtarit: "Mendoj se ndeshja pati dy tablo, ku në pjesën e parë ne luajtëm të tërhequr, duke e pritur kundërshtarin në gjysmëfushën tonë, ndërsa në pjesën e dytë, pas shënimit të golit, u hodhën të gjithë në sulm. Vuajtëm shumë nga dy mungesa mjaft të rëndësishme në formacion. Pas shënimit të golit Flamurtarit, ata u mbyllën tërësisht në zonën e tyre, duke na e vështirësuar punën për krijimin e rasteve dhe nxjerrjen e golit."

Sporti Shqiptar

[goldian]

me ate ngjarjen ne peqin une mendoj se ato duhen denuar rende
sepse nuk mund te luhet me ashtu
me gjithe respektin qe kam per ta.

[OO7]

Jam shume mosbesues ne komisionet disiplinore te federates. Pasi me denimet e tyre perhere e kane "ledhatuar" fushen e Peqinit e cila eshte gjithmone ne cdo ndeshje problematike. Duhet theksuar se futbolli i luajtur ne fushe ishte shume i paster. Nuk eshte marre as edhe nje karton. Problemi i Peqinasve eshte tifozeria e pabindur pasi kane nje skuader te mire kete vit. Tifozeria mund te coje edhe ne zbritjen e Peqinasve nje kategori me poshte.

[OO7]

Ngarkesat psikologjike nuk lejuan të zhvillohej ai nivel loje që pritej të bëhej në Kavajë 15-10-2006

Besa-Teuta, barazimi që kënaqi durrsakët

Besa - Teuta 1-1

Shënues: Xhafaj 20', Xhihani 54'

Besa: Mustafa, Dragusha, Kraja, Belisha, Krasniqi, Bajgora (Abanda 37'), Veliaj (Nana 62') Arapi, Binagolo (Hoxha 82'), Xhihani, Elokan. Trajner: P.Daiu.
Teuta: Osmani, Vrapi, Duro, Kapaj (Kote 66'), Tetova, Devolli, Buna, Idrizoviç (Gjondeda 55'), Hodo, Kuli (Gega 90'), Xhafaj. Trajner: S.Starova.
Gjyqtarë: S.Jareci (Tiranë), A.Molla (Laç), A.Guçe (Lushnjë)
Kartonë të verdhë: Buna, Dragusha, Kuli, Kraja, Binagol, Belisha
Karton i kuq: Xhihani

"Radiografia"
1'- Xhihani depërton në zonë, shmang një mbrojtës, shmang edhe portierin dhe në finalizim gjuan dobët dhe i jep mundësi një mbrojtësi ta largojë topin jashtë fushe.
2'- Sulmuesi kavajas i Teutës, Bekim Kuli, realizon një goditje të shkëlqyer me kokë dhe Mustafa është i detyruar që me vështirësi të grushtojë në goditje këndi sipër traversës.
5'- Xhihani godet nga distanca, pret me vështirësi portieri mik.
14'- Devolli brenda zonës ka kërkuar të befasojë me një harkore portierin Mustafa, por topi ka qethur vetëm traversën.
17'- Veliaj ka ekzekutuar mjeshtërisht një goditje dënimi dhe Osmani ka qenë i detyruar të largojë topin ngjitur me shtyllën pingule jashtë.
20'- Aksion nga e majta i Xhafës, i cili sapo i afrohet zonës së rrepësisë, godet mjeshtërisht në krahun e kundërt me një diagonale dhe shënon për miqtë durrsakë. 0-1 për Teutën.
35'- Xhafaj në dylyftim me qendërmbrojtësin Dragusha arrin në godasë, por dobët edhe për shkak të mbulimit të mbrojtësit.
54'- Parid Xhihani i është vjedhur qendërmbrojtësit durrsak dhe përballë portierit Osmani gjuan dhe mposht edhe atë, duke barazuar takimin në 1-1.
60'- Hodo ka kërcyer më shumë se të tjerët me kokë në zonë, ka gjuajtur dhe Mustafa nuk ka pasur zgjidhje tjetër, veçse ta shtyjë topin në korne sipër traversës.
73'- Vrapi ka përfituar nga një hutim i mbrojtjes vendëse dhe ka goditur, por jo saktë.
80'- Devolli lëshon një gjuajtje të fortë jashtë zone, por gabon shënjestrën.
84'- Bekim Kuli ka realizuar një goditje mjeshtërore me kokë dhe vetëm zgjatja e Mustafës e kalon topin mbi traversë dhe eviton golin.
87'- Goditje dënimi për Besën, që ekzekutohet nga Belisha dhe një mbrojtës durrsak me kokë për pak shënon autogol.

Komenti
Eshtë pritur me mjaft interesim takimi midis dy rivaleve të vjetra, Besës e Teutës. Për ta ndjekur atë madje nuk munguan as mjaft specialistë të njohur. Po sa e justifikoi këtë interesim vetë ndeshja? Që në fillim duhet pranuar se takimi nuk mundi dot të shpaloste ato vlera që këto ekipe i kishin shfaqur në takimet e mëparshme. Një Besë e cila e filloi takimin mjaft e ngarkuar psikologjikisht dhe kjo vërehej nga gabimet e shpeshta në pasim të vendësve. Kjo mënyrë loje e la Besën larg portës dhe zonës së rreptësisë së miqve. Dëshira e madhe për ta fituar këtë takim duket ndikoi jo pak edhe në realizimin e detyrave taktike nga futbollistët. Kur jemi te detyrat taktike, trajneri Daiu kishte zbritur në fushë në formacion kosovarin shtatlartë Bajgora dhe shkodranin Belisha e kishte spostuar në krahun e majtë të mbrotjes, duke dashur të frenojë depërtimet nga krahës të Xhafajt, apo Mancakut. Ky i fundit nuk zbriti në fushë, madje nuk ishte as në stolin e durrsakëve dhe në vend të tij ishte preferuar kavajasi Kuli. Kur ishim duke folur për lojën e Besës në këtë pjesë të parë, vlen të theksohet se loja e saj ishte një lojë ku reparti i sulmit dhe mesfushës ishin disi të shkëputura. E rreshtuar me pesë mefushorë, për çudi, nuk pamë ndonjë inkursion nga krahët të këtyre mesfushorëve, me përjashtim të dy, apo tre tentativave të Arapit të pasuksesshme. Ndërsa miqtë durrsakë, nëse në fillim nuk realizuan me Kulin pas asaj goditjeje të shkëlqyer me kokë, këtë e bëri i përhershmi Daniel Xhafaj. Pa mohuar meritat në ekzekutimin mjeshtëror të goditjes, duhet fajësuar mbrojtja e Besës, e cila e vendosur në vijë të drejtë nuk e mbuloi sulmuesin durrsak, duke i ditur vlerat e tij. Në këtë pjesë, miqtë nga Durrësi, pasi arritën të shënojnë, duket se më shumë kërkuan të mbajnë këtë gol, sesa të sulmojnë për ta thelluar rezultatin. Këtu duhen veçuar disa përpjekje të Bekim Kulit, i cili ishte një shqetësim permanent për mbrojtjen e Besës, por i pambështetur nga shokët e tij. Thënë më qartë, kjo pjesë nuk u ngjit në nivelin mesatar të kampionatit dhe diferenca midis dy ekipeve ishte vetëm goli.
Pjesa e dytë solli një Besë më të qartë taktike. Një ekip me më shumë dëshirë e ambicie, e cila u shpërblye që në 10 minutat e para, falë edhe aftësive të Parid Xhihanit. Në këtë pjesë vendësit iu afruan më shumë golit, por u mungoi konkludimi në rastet e krijuara. Ndryshe nga takimet e tjera, disa futbollistë titullarë te Besa nuk dhanë maksimumin e tyre dhe kjo e detyroi Daiun të ndërronte emra të tillë, si Veliaj, apo Binagolo. Sikur të mos mjaftonte kjo, Besa luajti 15 minutat e fundit me 10 futbollistë pas daljes me karton të kuq të autorit të golit, Xhihanit, një karton që nuk u kuptua nga publiku i pranishëm në stadium. Te Besa vlen të përgëzohet përmirësimi i lojës së Krasniqit dhe disa pritje mjaft të mira të Mustafës. Durrsakët morën një barazim me mjaft vlera, por loja e tyre nuk bindi dhe ndoshta të krijohej bindja se një mungesë e Xhafës do t'ia vështirësonte mjaft këtij ekipi shkuarjen te goli. Qenien në formacionin e parë te miqtë duket se e justifikoi mjaft mirë kavajasi Bekim Kuli.
Si konkluzion i këtij takimi, mund të themi se barazimi ishte rezultati më i drejtë për atë çfarë ekipet dhanë në fushën e lojës. Pas këtij rezultati, më i fituar doli ekipi mik i Teutës, ndërsa Besa tregoi se kërkon ende punë nga trajneri Daiu për të pasur atë rezultat e lojë që pritej prej saj.


Deklarojnë:
Përparim Daiu, trajner i Besës: "Një pjesë e parë ku futbollistët nuk treguan vlerat e tyre edhe për shkak të ngarkesave psikologjike që mbart një derbi. Ndryshe pjesa e dytë, ku ekipi ndryshoi fytyrë dhe jo vetëm barazoi, por kishte shanse për fitore. Këtu mos harroni se u ndëshkuam, kur 15 minuat e fundit u detyruam t'i luanim me 10 futbollistë. Për mua, me rrjedhën e lojës, barazimi ishte rezultati më i drejtë."
Sulejman Starova, trajner i Teutës: "Zhvilluam një lojë të mirë. Kishim përballë një ekip mjaft të fortë dhe arritëm jo vetëm ta përballonim, por edhe të kalonim në avantazh të parët. Besa na goditi psikologjikisht me atë gol të shpejtë të pjesës së dytë, megjithatë ne i kishim mundësitë edhe ta fitonim takimin. Pas golit të pësuar, përsëri luajtëm më mirë se Besa. Një fitore do të na kishte vlejtur shumë për të ardhmen tonë."

Feriz Ferizaj
Sporti Shqiptar

[OO7]

Bardheblutë mundin me vështirësi 3-1 Apoloninë, falë golave të Patushit, Sinanit dhe Salihit 15-10-2006

Tirana, ankth deri në fund për tri pikë

Tirana - Apolonia 3-1
Tirana: Nallbani, Allmuça, Penja, Pisha, Abraham, Fish, Bulku, Patushi (Bakalli 70'), Merkoçi (Duro 70'), Pema (Sinani 46'), Salihi. Trajner: M. Josa.
Apolonia: Miço, Kote, Bega, Meto, Kule, Da Silva (Demiraj 46'), Rosha, Dos Santos (Hyso 70'), Zheraldinjo, Mema (Rushani 55'), Plaku. Trajner: Dh. Papuçiu.
Shënues: Patushi 7', Sinani 79', Salihi 83', Plaku 38'.
Gjyqtarë: Sh. Guçe (Lushnjë), E.Miho (Durrës), E. Biçaku (Tiranë).
Karton i verdhë: Bega.

"Radiografia"
7'- Patushi, me një të majtë potente jashtë zone, gjen golin e parë të takimit dhe gjithashtu befason fierakët. 1-0 për Tiranën.
17'- Bulku kroson nga një goditje këndi, Pema me kokë devijon topin, por nuk është i saktë për të gjetur portën.
26'- Salihi lirohet mirë brenda zonës, nuk godet, por pason për Bulkun, i cili me një të djathtë potente e përplas topin në trupin e Metos.
29'- Zheraldinjo kroson në zonë për Memën, por korçari e ka të pamundur të devijojë "sferën" në kuadrat.
33'- Merkoçi kërkon Salihin me një gjuajtje në formë krosi, por shkodrani është larg aksionit.
38'- Pas një goditjeje dënimi me shumë pasime, fierakët me anë të Plakut gjejnë golin e barazimit, ku i pambuluar në zonë, sulmuesi i Apolonisë e çon topin në këndin më të prirët të portës së mbrojtur nga Nallbani. 1-1.
43'- Miqtë marrin zemër dhe për pak nuk e ndëshkojnë Tiranën me golin e dytë, ku Mema me kokë e devijon topin ngjitur me shtyllën.
48'- Bulku kërkon të gjejë golin me një gjuajtje nga distanca, por topi devijohet aq sa për të prekur vetëm rrjetën e jashtme.
51'- Zheraldinjo shpëton portën e tij nga një gol më se i sigurt, kur largon topin mbi vijën fatale, pas gjuajtjes së Salihit.
54'- Dos Santos shpërthen brenda zonës, por në çastin e gjuajtjes bllokohet nga Penja, duke humbur kështu një mundësi goli. Drejtuesit fierakë në të njëjtën kohë pretendojnë për penallti.
59'- Bulku kroson nga një goditje këndi, Penja me kokë devijon drejt portës, por mbrojtja fierake është në gatishmëri të plotë.
62'- Plaku gjen mundësinë për të goditur drejt portës, por pret Nallbani.
69'- Kundërpërgjigjet Merkoçi me të brendshmen e këmbës së djathtë, por Miço i thotë "jo" golit.
73'- Duro depërton nga e djathta, kroson për Sinanin, por portieri mik mbyll aksionin e bardhebluve.
76'- Penja lë mbrojtjen për t'u hedhur në sulm, por fiton vetëm një goditje këndi.
79'- Duro ekzekuton saktë një goditje dënimi, Sinani i pambuluar shënon golin e dytë dhe të avantazhit për skuadrën e tij. 2-1 për Tiranën.
83'- Kote del "huq" në zonë, Salihi përfiton, ku pasi shmang edhe portierin, shënon golin e tretë. 3-1 dhe këtu mbyllet gjithçka.
89'- Sinani, në një formë të mirë, lëshon një "predhë" drejt portës, por Miço grushton.

Komenti
Tiranës iu desh që të vuante deri në minutën e 79-të për të gjetur golin e fitores përballë një Apolonie me shumë brazilianë në përbërje. Ashtu siç e kishin menduar, bardheblutë nuk e patën aspak të lehtë për të marrë tri pikët e radhës në kampionat, kur bëhej fjalë se përballë kishin një kundërshtar që ishte në vendin e fundit dhe s'do t'i lejonte të bënin lojën e tyre. Me mungesën e Mukës të skualifikuar, Dedes së dëmtuar, por edhe Duros së bashku me Sinanin, që kishin kohë larg fushave, trajneri Mirel Josa hodhi në fushë një formacion me shumë ndryshime. Kështu, pas dyshes sulmuese Salihi-Pema, u preferua Merkoçi, ndërkohë në qendër të mbrojtjes u vendos kolumbiani Penja. Për sa u takon fierakëve, pas dorëheqjes së trajnerit rumun Silviu Dumitresku, vendin bosh e zuri një emër i njohur, si Dhimitër Papuçiu. Ky i fundit preferoi të hidhte në fushë një formacion me tipare mbrojtëse, ku të vetmit që mendonin për sulmin, ishin braziliani Dos Santos dhe Plaku. Ndeshja nis me gol që në fillim, ku është Saimir Patushi, i cili me një të majtë potente gjen cepin e djathtë të portës së mbrojtur nga Miço. Pavarësisht këtij momenti të keq, Apolonia nuk ndihet aspak inferiore në fushë dhe për minuta të tëra në lojë arrin të mbrohet mirë, ndërkohë që mendon edhe për kundërsulmin. Goli i Plakut ishte rrjedhojë e një aksioni me shumë pasime, që në fund u konkretizua me sukses. Me fillimin e pjesës së dytë, trajneri Josa zëvendëson Pemën me Sinanin dhe goli i avantazhit do të vijë vetëm në minutën e 79-të, ku shkodrani tregon se mbetet një "ujk i vjetër" i portave shqiptare. Kaq ka mjaftuar që nënkampionët të çlirohen plotësisht dhe pas katër minutash të gjejnë golin e qetësisë me anë të kryegolashënuesit, Hamdi Salihit. Me këtë fitore, Tirana ruan e vetme kryesimin pas javës së gjashtë, ndërkohë që nuk ka shumë kohë për të gëzuar, pasi të mërkurën e pret një transfertë delikate, siç është ajo me Teutën në stadiumin "Niko Dovana". Në lidhje me Apoloninë, duhet thënë se, pavarësisht shifrave të humbjes, tregoi se i ka mundësitë për të bërë diçka të mirë në këtë sezon, ku objektivi kryesor është mbijetesa në superligë.


Deklarojnë pas ndeshjes
Mirel Josa, trajner i Tiranës:
"Ishte një fitore e mundimshme, që na mbajti në ankth deri në minutat e fundit. E dinim vështirësinë e ekipit të Apolonisë, pasi kërkonte me çdo kusht pikë dhe fakti tregoi që në pjesën e parë patëm probleme në lojën tonë. Në pjesën e dytë, me ndryshimet e kryera, u treguam më shumë agresivë dhe si rrjedhojë gjetëm golin e Sinanit. Sigurisht, në lojën tonë ndikuan mungesat Mukës dhe Dedes, ndërkohë që jam i kënaqur me rikthimet e Duros e Sinanit, të cilët vinin pas një periudhe të gjatë dëmtimesh."
Dhimitër Papuçiu, trajner i Apolonisë:
"Përballë një Tirane me shumë emra në përbërje, ishim të ndërgjegjshëm që nuk mund të bënim çudira, qoftë edhe duke marrë barazimin. Djemtë luajtën mirë në pjesën e parë, ku edhe pse u ndëshkuam me një gol që në fillim, gjetëm forca për të barazuar. Në minutat e fundit, kundërshtari tregoi përgatitje më të lartë fizike, çka bëri diferencën në marrjen e fitores. Pavarësisht këtyre rezultateve zhgënjyese në javët e para, do të vazhdojmë të luftojmë deri në fund për mbijetesën në superligë."


Të veçanta
- Në mungesë të Devi Mukës, shiritin e kapitenit e mori portieri Blendi Nallbani.
- Trajneri Mirel Josa preferoi ta linte pushim mbrojtësin Nevil Dede, pasi u kthye i dëmtuar nga ekipi kombëtar.
- Përpara fillimit të takimit, tifozeria fierake hapi një banderolë të madhe në shkallët e tribunës përkarshi me mbishkrimin "Ultrasit fierakë".
- Në tribunën "VIP" ishin të pranishëm shumë drejtues dhe figura të njohura, duke filluar me presidentin e FSHF-së, Armando Duka, atë të Tiranës, Bamir Topin, dhe gjithashtu të Apolonisë, Koço Kokëdhima.
- Pas një dëmtimi që e mbajti larg fushave për 6 javë, dje Klodian Duro shënoi rikthimin në skuadër, ku për 20 minutat e fundit tregoi një nivel të lartë loje.

Aurel Celibashi
Sporti Shqiptar

[goldian]

Jam shume mosbesues ne komisionet disiplinore te federates. Pasi me denimet e tyre perhere e kane "ledhatuar" fushen e Peqinit e cila eshte gjithmone ne cdo ndeshje problematike. Duhet theksuar se futbolli i luajtur ne fushe ishte shume i paster. Nuk eshte marre as edhe nje karton. Problemi i Peqinasve eshte tifozeria e pabindur pasi kane nje skuader te mire kete vit. Tifozeria mund te coje edhe ne zbritjen e Peqinasve nje kategori me poshte.

nuk mund te thuash se jane te pa fasjhem dhe drejtuesit e klubit peqinas
sa per skuadren ato jane te gjithe djem te ri dhe te prespektives por do thoja se keshtu nuk ecet me
te denohen dhe rende bile