Lajmet nga Superliga 2006/2007

[Noizy]

Prezenca e njëshit të kuq në klub gjatë gjithë kohës së stërvitjes së skuadrës është interpretuar në mënyra të ndryshme. Versioni më i mundshëm, ka lidhje një thashethemnajë që ka nisur të qarkullojë në mjediset e klubit të kuq, sipas të cilës ka pasur ndonjë tentativë për të blerë lojtarët e Partizanit, duke e detyruar presidentin Xhani. Mirëpo Xhani nuk e pranon, ose më mirë përjashton çdo mundësi për shitjen e lojtarëve të tij dhe i hedh poshtë këto zëra. "Kjo gjë nuk mund të ndodhë, pasi tek Partizani nuk ka lojtarë matrapazë. Unë nuk shqetësohem aspak nga këto thashetheme, pasi i njoh me dhëmbë e dhëmballë të gjithë futbollistët e mi. Do ta shihni se Partizani do të kualifikohet për në turin tjetër,"- ka deklaruar njëshi i të kuqve.

[Noizy]

Mbrojtësi i djathtë i Partizanit, Ardit Beqiri, do të jetë mungesa e rëndësishme për Likën në takimin e kthimit të kupës me Vllazninë. Beqiri e ka nisur dje stërvitjen veçmas grupit dhe pasi ka bërë disa xhiro rreth fushës e ka ndërprerë vrapimin. Më pas lojtari në fjalë është nisur drejt klinikës. Sipas mjekut Rusi, i cili dje është marrë posaçërisht me ekzaminimin e saktë të dëmtimit të këtij futbollisti, do të duhet disa ditë për riaftësimin e plotë të Beqirit, çka do të thotë se me Vllazninë ai nuk mund të jetë i gatshëm për trajnerin. "Përfundimisht, Beqiri mbetet jashtë skuadrës për takimin e kupës me Vllazninë dhe për ndeshjen në kampionat me Kastriotin. Dëmtimi në pulpë nuk e lejon të luajë të paktën në këto dy ndeshje,"- ka sqaruar Rusi.

[Noizy]

Flet një nga ish futbollistët më luftarakë të ekipit gjirokastrit ndër vite, Luan Seiti.


Luftëtari nuk e përfundoi me sukses ndeshjen e fundit të fazës së dytë dhe tani e sheh veten i 10 ti në fillim të fazës së tretë. Për disa probleme të futbollit gjirokastrit flet një prej legjendave të tij, Luan Seiti, i cili e ndjek vazhdimisht Luftëtarin e sotëm, duke dhënë konkluzionet e tij për mbarëvajtjen dhe shanset e këtij ekipi për të qëndruar në superligë, mes ekipeve të mira të kampionatit shqiptar.
Cili është vlerësimi juaj për Luftëtarin e dy fazave?
Luftëtari u tregua i madh dhe agresiv vetëm në fazën e parë dhe vetëm në fushën e tij, ku i fitoi të gjitha ndeshjet dhe pa pësuar gol. Vërtet diçka e rrallë. Në ndeshjet jashtë fushe në tërësi dhe në ndeshjet e fazës së dytë në veçanti u tregua ekip pa fizionomi të spikatur dhe në këtë mënyrë doli si kandidat për rënie nga kategoria. Pra, ka një ecuri me dy fytyra dhe kontradiktore në ndeshjet brenda jashtë dhe fazë e parë fazë e dytë, por tani duhet urgjentisht të mobilizohet për fazën e tretë, sepse rreziku është real dhe nga dy vendet e fundit është 7 pikë përpara.
Në 8 9 vitet e fundit në Gjirokastër kanë vërshuar dhjetëra futbollistë jovendës, por përfundimet kanë qenë jo shumë pozitive. Përse, sipas jush?
Vërtet që në Gjirokastër kanë ardhur shumë futbollistë gjatë kësaj periudhe, disa madje me emër, por drejtuesit vendës nuk kanë ditur t'i shfrytëzojnë aftësitë dhe mundësitë dhe ata, pa u lodhur, duke iu përshtatur thënies "gjen shesh, bën përshesh", kanë marrë paratë dhe janë larguar qetë qetë, duke e lënë në mjerim të plotë, si në rastin kur qe president Tavo dhe pak më vonë Lena. Mendoj se një gjë e tillë nuk do të përsëritet edhe këtë sezon, megjithëse një futbollist kamerunas, ndoshta dhe me arsye, nuk po bëhet ende i gjallë.
Çfarë do të rekomandonit ju?
Historia e futbollit gjirokastrit tregon se Luftëtari ka arritur rezultatet më të mira vetëm atëherë kur është mbështetur në futbollistët vendës me shumë pak përforcime dhe jo kur të huajt bënin ligjin, bënin shumicën dhe vendësit pakicën. Në ekipe të tjera ndoshta ka ndodhur e ndodh ndryshe, por me sa duket kjo lidhet edhe me faktorë të tjerë, që lidhen me vetë Gjirokastrën. Kështu që jam i mendimit që Luftëtari duhet të bazohet kryesisht në futbollistë vendës.
A rrezikohet Luftëtari për rënie nga kategoria?
Sipas meje, Luftëtari ka gabuar me tolerancën e tij në dy ndeshje në Gjirokastër dhe tani kjo po i kushton shtrenjtë, sepse 5 pikë, le t'i quajmë të faluara, nuk janë pak për një ekip të tillë. Për ndeshjet e mbetura duhet bërë stërvitje në tërë kuptimin e fjalës dhe lojë me nerva të tendosura në çdo ndeshje, me çdo kundërshtar, në çdo fushë. Pra, unë shpëtimin e shikoj te lufta sportive. Kjo është gjëja më e dukshme, të tjerat u takojnë të tjerëve dhe jo ekipit. Them kështu sepse realiteti i viteve të fundit tregon se futbolli luhet edhe jashtë fushe, për fat të keq, por këtu Luftëtari tregohet më i dobët sesa në lojën brenda fushës së blertë.
Cili është mesazhi i juaj?
Këto vite është përdorur shpesh fjala "menaxhim", që nuk përdorej në kohën kur luaja unë. Me sa kuptoj, menaxhimi luan një rol parësor për ecurinë e një ekipi. Kështu që mesazhi im është që ata që drejtojnë Luftëtarin, fatet e tij, duhet të bëjnë menaxhimin e duhur në të gjitha aspektet dhe frontet, por që kjo të bëhet sa më mirë, Luftëtarit i duhet një president.

[Noizy]

Presidenti Albert Xhani është i bindur në forcën e skuadrës së tij, ndaj mendon vetëm kualifikimin.


Kupa e Shqipërisë ka njohur deri tani vetëm një çerekfinaliste, Besën, që në mënyrë krejt të papritur ka eliminuar Dinamon, për të cilën kupa ishte ngushëllimi i vetëm i një sezoni që solli vetëm zhgënjime. Kanë mbetur për t'u zbuluar vetëm tre emra, që do të nxirren nga çiftet Partizani-Vllaznia, Tirana-Teuta dhe Shkumbini-Turbina. Natyrisht, tifozëve të Partizanit u intereson më shumë ndeshja e "Selman Stërmasit" me shkodranët. Të kuqtë kanë shansin e madh për të kaluar në gjysmëfinale, pasi kanë mundur të marrin një barazim me vlera në ndeshjen e parë të luajtur në Shkodër. Megjithatë, ekziston dyshimi tek një hap i gabuar si ai i Dinamos, dyshim që nuk e ka presidenti Xhani, i cili mendon, madje shprehet me bindje, se do të jenë të kuqtë ata që do të kalojnë në turin tjetër. "A besoj te kualifikimi? Kjo pyetje duhet t'u bëhet shkodranëve, jo neve. Partizani e ka hedhur një hap të rëndësishëm që në ndeshjen e parë, kështu që i mbetet vetëm të ruajë atë avantazh të siguruar në "Loro Boriçi". Skuadra ime po kalon një formë të mirë, ndaj jam i bindur se do të arrijë të kualifikohet për më tej. Nuk duhet harruar se e nisim lojën të kualifikuar, që do të thotë se presionin e eliminimit e kanë kundërshtarët tanë,"- është shprehur njëshi i të kuqve, Albert Xhani.

[Noizy]

Me këtë deklaratë Xhani kërkon të mbajë lart moralin e djemve të tij, që në dy ndeshjet e fundit në transfertë nuk janë shfaqur aty ku duhet. Megjithatë, duke i parë në konpleks paraqitjet e skuadrës, Xhani është mjaft optimist për të ardhmen. "Mua nuk më shqetësojnë aq shumë dy humbjet e fundit në transfertë me Vllazninë dhe Flamurtarin, pasi më ka interesuar më shumë loja që ka zhvilluar skuadra ime. Si në "Loro Boriçi" dhe në Vlorë Partizani nuk e meritonte të humbiste. Megjithatë, për arsye të ndryshme, me ose pa fajin tonë, nuk kemi mundur të marrim pikë. Unë e shoh skuadrën me mjaft perspektivë, me dëshirë për të luajtur futboll të bukur. Rezultatet nuk do të mungojnë dhe për këtë jam i bindur. Janë edhe 11 ndeshje për t'u luajtur në kampionat, që do të thotë se janë edhe 33 pikë në fushë,"- ka vijuar më tej presidenti Xhani. Duket qartë se njëshi i të kuqve nuk është aspak i zhgënjyer nga të tijtë, edhe pse ecuria gjatë fazës së parë dhe asaj të dytë është thuajse e njëjtë. "Po, e vërtetë është, nuk ka pasur ndonjë ndryshim në pikët e grumbulluara, por ama loja nuk është e njëjtë. Tani skuadra ime luan futboll më tërheqës, që na bind se do të ketë përmirësime të dukshme edhe në pikët e fituara. Nuk duhet harruar se Partizani ka shumë futbollistë të rinj, të cilët sa vijnë e përmirësohen, kështu që nuk na bind se e ardhmja do të jetë krejt ndryshe,"- ka përfunduar Xhani.
Presidenti i Partizani, pas shumë kohësh, e ka ndjekur stërvitjen nga fillimi në fund, duke e mbajtur të karikuar ekipin në prag të sfidës së kupës me Vllazninë.

[Noizy]

U shënuan 13 gola (7 në 45 minutat e para), si edhe në javën e 9 të të kampionatit.
U realizuan mesatarisht 2.16 gola për çdo ndeshje të kësaj jave.
Numri i përgjithshëm i golave arriti në 299, që do të thotë mesatarisht 2.26 gola për ndeshje.
V.Sinani i Tiranës, me dopietën e shënuar ndaj Shkumbinit, ngjitet në kuotën e 17 golave dhe vazhdon të udhëheqë i vetëm listën e golashënuesve më të mirë të kampionatit.
5 futbollistë nga të huajt e kampionatit tonë kanë shënuar këtë javë; malazezi Vukçeviç i Vllaznisë, senegalezi El Haxhi Gudjabi po i Vllaznisë, kongolezi Sasha Delain i Flamurtarit, senegalezi Diop i Dinamos dhe nigeriani Xhejms Osusi i Kastriotit.
Shkodrani V.Sinani i Tiranës ka shënuar të vetmen dopietë të kësaj jave.
U dha vetëm 1 penallti, që u kthye në gol nga S.Delain i Flamurtarit. Me këtë kongolezi, me 4 penallti të realizuara në po kaq gjuajtje, bëhet snajperi më i mirë nga kjo distancë.
U sigluan 6 fitore, si edhe në javën e 4 t, 13 të dhe të 16 të.
Dy gjyqtarë drejtuan këtë javë takimet e tyre jubilare: S.Çekaj (Laç) të 15 tin dhe K.Meta (Tiranë) të 10 tin në këtë kampionat.
Pas 3 muajsh kampionët bien në kontakt me fitoren (e fundit më 2.12.2006 Flamurtari Elbasani 0 2).
Dinamo mund Apoloninë 2 1 dhe për herë të fundit me këto shifra blutë patën fituar më 2.3.2002, pra pas 5 vjetësh.
Pas 11 vitesh (2.4.1996) Kastrioti fiton ndaj Luftëtarit me të njëjtin rezultat (1 0).
U morën 17 kartonë të verdhë, duke e çuar numrin total të tyre në 522, që do të thotë mesatarisht 23.5 kartonë për çdo javë.
U dhanë 4 kartonë të kuq, kurse totali i tyre shkoi në 43, ose mesatarisht 1.95 kartonë për çdo javë

[Noizy]

Edhe pse vlonjatët kanë siguruar mbijetesën, do të jenë impenjativë deri në fund të kampionatit.


Në pamje të parë, skuadra që duket pa kurrfarë objektivi është Flamurtari, pasi e pozicionuar në vendin e tetë, 12 pikë para dy ekipeve dhe 11 larg vendit të dytë, nuk ka për çfarë motivi të luftojë në fazën e tretë të kampionatit. Ekipi vlonjat nuk rrezikon rënien nga kategoria, pasi distanca është relativisht e sigurt, por edhe të pretendojë për zënien e vendit të dytë, apo të tretë, është pothuajse e paarritshme. Por edhe pse në një pozicion të tillë, ndryshe mendojnë drejtuesit e ekipit të Flamurtarit, të cilët kërkojnë të ngjiten më shumë në klasifikim, duke mos bërë kompromis me asnjë ekip dhe për të kënaqur sa më shumë tifozët vlonjatë, të cilët janë të uritur të shohin vetëm rezultate pozitive në këtë kampionat. "Flamurtari me fitoren e fundit me Partizanin është i qetë, pasi nuk rrezikon aspak tashmë, por ne do të kërkojmë ngjitje në klasifikim, për ta renditur sa më lart të jetë e mundur, sepse mundësitë janë. Ne kemi mundësi të renditemi të pestët, pse jo ndoshta edhe më lart, pasi skuadrat në mes të renditjes janë të ngjeshura dhe me pikë të barabarta. Në këtë mënyrë do t'i shërbejmë jo vetëm publikut për t'u dëfryer, por edhe formës së futbollistëve, duke planifikuar që tani ekipin e sezonit të ardhshëm," shprehet trajneri Vasil Ruci, i cili po e drejton me mjaft sukses ekipin e qytetit të tij. Edhe pse ekipi nuk bëri ndonjë lojë të bukur në ndeshjen e fundit, Ruci mendon se objektivi u realizua, pasi në plan të parë ishte fitorja. "Skuadra arriti që të fitonte me një kundërshtar të fortë si Partizani, çka nënkupton se edhe në këtë ndeshje treguam se jemi një ekip që me kundërshtarë të tillë luajmë të mobilizuar dhe marrim fitore. Kjo ishte parësore për ne. Zgjidhjen e ndeshjes e bëri goli i realizuar me 11 metërsh nga Delain, që nuk gaboi në gjuajtjen e tij," - shton Ruci. Kështu Flamurtari është kthyer në një "mace të zezë" për Partizanin, por trajnerin në fakt e shqetëson më shumë humbja e shumë rasteve para porte. "Na vjen mirë që ndaj Partizanit arritëm të përsërisim suksesin e fazës parë. Kryem volum loje, por nuk kemi qenë të saktë në finalizim, çka nënkupton që këtu duhet të përmirësohemi shumë në këtë drejtim. Duke luajtur më të çliruar në fazën e tretë, pasi nuk kemi presionin e fitores së domosdoshme, them që ekipi do të korrigjojë shënjestrën dhe do të luajë më lirshëm, duke kënaqur në këtë mënyrë edhe tifozët," përfundon trajneri i Flamurtarit, Vasil Ruci. Ndeshjen e parë të fazës së tretë Flamurtari do ta luajë me Besën në Kavajë, aty ku ekipi vlonjat u turpërua, pasi u mund thellë nga kavajasit. Për këtë vlonjatët do të kërkojnë të paktën të mos munden në këtë sfidë, pasi do të ishte e pafalshme që këtë sezon të dilnin dy herë të mundur nga Kavaja. Pastaj Flamurtari pret sërish Partizanin në fushën e tij, një kundërshtar që duket se ia ka marrë dorën. Gjithsesi, Flamurtari do të kërkojë ngjitjen në klasifikim, edhe pse nuk shqetësohet për të realizuar ndonjë objektiv madhor.

[Noizy]

Në dy ndeshjet e fundit kanë shënuar të dy, si senegalezi El Haxhi Gudjabi, po ashtu edhe shkodrani Xhevahir Sukaj. E kanë bërë këtë gjë ndaj Apolonisë, por edhe në ndeshjen e fundit me Teutën. Madje më tepër sesa shënimi i golave prej tyre, ajo që konstatohet me kënaqësi është marrja vesh shumë mirë me njëri tjetrin e dy lojtarëve të sulmit kuqeblu. Një gjë e tillë u konstatua në kombinimet mes tyre, madje dhe golat që ata kanë shënuar, kanë ardhur pikërisht nga asistet e dhëna nga njëri tjetri. Por sikur të mos mjaftonin këta gola, ata kanë kombinuar edhe në raste të tjera, pavarësisht se nuk kanë shënuar, por pozitive është se sulmi shkodran është në "grand formë". Pikërisht bazuar në një fakt të tillë, pa lënë mënjanë edhe lojën e shkëlqyer që është duke zhvilluar Dalipi. Ndërkohë, Sukaj me golin e shënuar ndaj Teutës është ngjitur në kuotën e 6 golave, duke u barazuar me dy shokët e tij të skuadrës, Licin e Dalipin, që kanë shënuar të njëjtin numër golash.

[Noizy]

Edhe pse nuk janë favoritë nisur nga rezultati i ndeshjes së parë, kuqeblutë kërkojnë gjysmëfinalen e kupës.


Zënia e vendit të dytë në kampionat në përfundim të dy fazëve të para të tij ka qenë deri diku e justifikuar për shkodranët, të cilët shfrytëzuan në maksimum edhe problemet e tjera që kalonin kundërshtarët e saj. Diferenca që kishte qenë në renditje në momentin që drejtimi i Vllaznisë iu besua Josës, ka qenë i konsiderueshëm, por kuqeblutë bën një galopim të vërtetë në fazën e dytë. Ata arritën të marrin plot 26 pikë ndër 33 të mundshmet në këtë fazë dhe si rrjedhojë e kësaj ecurie e merituan vendin e dytë. Por sakaq për skuadrën shkodrane "oreksi vjen duke ngrënë" dhe si rrjedhojë ata kanë dëshirë të provojnë edhe kupën. Rezultati 1 1 i ndeshjes së parë çerekfinale me Partizanin në Shkodër nuk është shumë i favorshëm për të, megjithatë çdo gjë është e hapur. Dhe Vllaznia ka vendosur të matë forcat e saj edhe në këtë kompeticion, sepse duket se në radhë të parë ka shumë dëshirë të dalë në gjysmëfinale me Tiranën. Kjo sepse rivaliteti me këtë skuadër në kampionat, për vetë rrethanat e kaluara, nuk mund të jetë prezent. Nëse deri para ndeshjes së të shtunës me Teutën do t'i pyesje futbollistët dhe drejtuesit kuqeblu nëse do të preferonin vendin e dytë në kampionat, apo kalimin në gjysmëfinale të kupës, sigurisht që përgjigjja do të ishte fokusuar tek e para. Por tashmë që durrsakët janë lënë pas, dëshira është për të bërë të njëjtën gjë edhe me Partizanin në kupë. Fakti që skuadra medoemos në takimin e së nesërmes duhet të kërkojë që në fillim golin, nuk është ndonjë çudi e madhe. Në radhë të parë, sepse në dy ndeshjet e fundit të kampionatit Vllaznia ka qenë skuadra më "pjellore" në shënimin e golave. Plot 4 në Fier dhe së fundi 3 në "Loro Boriçi" ndaj "djemve të detit". Manovra sulmuese shkodrane po funksionon në mënyrën më të mirë. Treshja e përbërë nga Dalipi, Gudjabi e Sukaj është bërë problematike për të gjithë. Pa harruar edhe faktin tjetër se kjo skuadër ka filluar të jetë shumë rezultative edhe në goditjet standarte. Një element ky që deri para pak kohësh e ndëshkonte vazhdimisht këtë skuadër, ndërkohë që tashmë ajo ka fituar imunitet në këtë drejtim, madje është bërë e rrezikshme në krahun e kundërt. Këtë fakt e tregon më së miri dygolëshi i malazezit Vukçeviç në ndeshjet e fundit, apo dhe golat e Dalipit. Në këtë mënyrë kjo skuadër është bërë vërtet pretendente në të gjitha drejtimet. Aq sa ajo tani nuk ka frikë asnjë ekip për t'u ndeshur me të. Kësisoj, Vllaznia duket se nuk ka aspak frikë as Partizanin për ndeshjen e nesërme, në të cilën ajo do të kërkojë me ngulm kualifikimin. Në Tiranë bashkë me skuadrën pritet të jenë edhe një numër i madh sportdashësish shkodranë, të cilët çdo ditë e më tepër po bëhen njësh me skuadrën e tyre të zemrës. Kjo u pa sidomos në takimin me Teutën të shtunën që kaloi dhe pritet të shihet edhe nesër kur të gjithë shpresojnë të kthehen nga Tirana të kualifikuar për në gjysmëfinalen e Kupës së Shqipërisë.

[Noizy]

Çdo e mirë e ka një të keqe nga prapa. Kjo shprehje frazeologjike i shkon shumë për shtat ekipit të Elbasanit, i cili edhe pse ka fituar me Besën, nuk ka mundur të pozicionohet në gjashtë vendet e para, të cilat, sipas llogarive, kanë një kalendar pak më të mirë se ekipet e tjera. Dhe mes tyre është skuadra e Elbasanit, e cila edhe në këtë rast është jo pak fatkeqe, teksa do të luajë gjashtë ndeshje "ferri" rresht, duke nisur nga kjo e shtunë në transfertë ndaj Dinamos. Kjo e fundit, edhe pse nuk po kalon një moment të mirë, mbetet një kundërshtare për t'u marrë shumë në konsideratë. Menjëherë pas Dinamos do të presë për të dytën herë në dy javë ekipin e Besës, ndërkohë që përplasjet do të vijojnë me tej në Tiranë, ku kampionët do të gjejnë "macen e zezë", Partizanin. Për ekipin e Edmond Gëzdarit nuk do të ketë aspak frymëmarje, pasi menjëherë pas të kuqve do të zbresë në stadiumin e Elbasanit, Teuta e Starovës, që pak kohë më parë u dha një "shuplakë" të mirë kampionëve në fushën e vet. Dhimbjet e kokës nuk mbarojnë me kaq, pasi në vijim Elbasani do të udhëtojë me një tjetër rival tepër të fortë si Vllaznia, ndërkohë që në javën e gjashtë të kësaj faze, pikërisht me 21 prill, verdheblutë do të presin ekipin e vendit të parë, Tiranën. Mjafton vetëm kaq për të treguar se, nëse kampionët duan Europën, duhet ta bëjnë një gjë të tillë duke kaluar mbi rivalët e tyre të drejtpërdrejtë.