Lajmet nga Superliga 2006/2007

[Noizy]

Krutanët i kthehen fitores në shtëpinë e tyre, ndërsa Luftëtari sërish nuk merr asgjë në transfertë.

Kastrioti Luftëtari 1-0
Shënues: Osusi 70'


Kastrioti: Koçi, Gallo, Grami, Caca, Deliu (Asllani 54'), Hasa, Rustami (Hoxha 84'), Kalari (Çeliku 88'), Pashja, Osusi, Ziambo. Trajner: P.Haxhiaj
Luftëtari: Toçi, Dibra, Sinani, Bistri, Novi, Hasalla (Goxhaj 71'), Stoja, Braha (Bejollari 57'), Shenaj, Dhima, Stafa (Hysa 70'). Trajner: I.Spahiu
Gjyqtarë: Sh.Guçe, (Lushnje) L.Mustafaraj (Tiranë), Devis Koreshi (Lushnje)
Kartonë të verdhë: Grami, Kalari, Sinani
Karton i kuq: Sinani

"Radiografia"
5' Kundërsulm i Kastriotit nga e majta, ku Kalari kroson në zonë për Ziambon, i cili godet bukur me kokë, por topi shkon në duart e portierit.
10'- Braho ekzekuton një goditje dënimi nga e majta e sulmit gjirokastrit, por topi ka kaluar tërë pasqyrën e zonës pa rrezik për portierin Koçi.
11'- Ziambo në hyrje të zonës ka goditur fort, por portieri Toçi ka pritur në dy kohë.
25'- Shenaj përfiton nga një gabim i mbrojtjes dhe në hyrje të zonës godet, por topi kalon ngjitur me shtyllën pingule.
26'- Ziambo është futur bukur në zonë të rreptësisë, por në momentin e gjuajtjes ndërhyn saktë mbrojtësi Dibra, duke larguar topin në goditje këndi.
30'- Rustami nga një distancë prej 20 metra ka lëshuar një "predhë" drejt portës, por topi ka kaluar vetëm disa centimetra mbi traun e sipërm.
60'- Ziambo ka stopuar bukur me gjoks një top të krosuar nga Kalari dhe tek zona e portierit tenton të gjuajë, por një mbrojtës i ndërron drejtimin topit, duke e kaluar jashtë vijës fundore.
69'- Osusi vetëm tre metra larg portës gjuan me kokë, por topi shkon në duart e Toçit.
70'- Osusi fare pranë portës ka gjuajtur fort, Grami ka hutuar me një lëvizje mashtruese portierin, i cili nuk e sheh topin që përfundon në rrjetë. Kastrioti kryeson 1-0.
83'- Ziambo shmang me radhë njëri pas tjetrit tre mbrojtës dhe del përballë portierit, godet, por vetëm këmbët e Toçit nuk e lënë topin të përfundojë në rrjetë.
86'- Asllani në hyrje të zonës ka gjuajtur fort, por sërish këmbët e Toçit bëjnë mrekullinë, duke e ndalur topin.
91'- Ziambo ka gjuajtur bukur me kokë, por Toçi ka grushtuar, duke e kthyer topin tek Asllani, që provon të gjuajë, por sërish Toçi grushton duke e rikthyer topin në këmbët e Hasës, që gjuan fare pranë, por përsëri Toçi që bën mrekullinë, duke e grushtuar edhe një herë e duke e dërguar topin jashtë vijës fundore.

Komenti:
Ishte një takim që u dominua pothuajse gjatë 90 minutave nga ekipi i Kastriotit, që ka kërkuar me insistim golin e avantazhit që do t'i jepte qetësinë dhe shpresën për të ardhmen. Por në 45 minutat e para gjithçka kërkohej në mënyrë të paqartë e konfuze. Loja zhvillohej në zona të ngushta e shpeshherë edhe me veprime individuale, duke shkuar deri na afërsi të zonës, ku mbrojtja mike ishte e pakalueshme. Edhe në ato raste kur krijohej ndonjë e çarë, sulmuesit krutanë nxitoheshin duke gjuajtur pasaktësish jashtë kuadratit të portës. Ndërsa miqtë nga Gjirokastra vazhduan të kryenin me korrektësi detyrat e ngarkuara nga trajneri Spahiu, duke u mbrojtur vendosmërisht e duke mos harruar të bëjnë edhe ndonjë kundërsulm të befasishëm. Megjithatë, duhet thënë se të dy portierët në këtë pjesë loje ishin thjesht spektatorë.
Ndërsa në pjesën e dytë sulmuesit e Kastriotit, pas detyrave të marra në pushim nga trajneri Haxhia, fillojnë të mbështeten më fuqishëm nga mesfusha dhe fillojnë të tregohen më të rrezikshëm para zonës. Për këtë qëllim Haxhia kërkon të rifreskojë këto reparte me dy ndërrime të shpejta, të cilat i dhanë gjallëri lojës së Kastriotit. Rrezikshmëria në portën gjirokastrite tashmë bëhet evidente. Pothuajse të gjithë lojtarët e ekipit mik janë në gjysmëfushën e tyre në administrim të rezultatit të bardhë pa gola. Por Osusi me një veprim tepër intelegjent në minutën e 69 të përçan mbrojtjen gjirokastrite, duke vënë në provë për herë të parë portierin Toçi, që fati e ndihmon duke u gjendur në pozicion e duke e pritur topin 3 4 metra largësi. Por një minutë më vonë është Osusi që këtë radhë nuk i lejon vetes të gabojë. Ai ka fluturuar mbi mbrojtësit, kur topi ka ardhur nga një goditje këndi dhe me kokë bën një gjuajtje perfekte. Grami, që ndodhej fare pranë, ka kaluar para portierit thjesht duke e mashtruar dhe Toçi e pa topin vetëm kur ka pushuar në rrjetë. Dhe kështu Osusi bëhet heroi i ndeshjes, me emrin e të cilit stadiumi do të oshëtinte për minuta me radhë. E që nga ky moment gjithçka do të ndryshonte rrënjësisht. Tashmë gjirokastritët, që s'kanë se ç'të humbasin, fillojnë të dalin në gjysmëfushën krutane, duke hequr dorë nga mbrojtja, gjë që i lehtëson sulmuesit krutanë në veprimet e tyre. Kujtojmë këtu minutën e 83 të, kur vetëm këmbët e Toçit nuk e lënë topin e Ziambos të përfundojë në rrjetë. E rasti më ideal shfaqet në minutën e 91 të, kur Ziambo-Asllani-Hasa kanë tentuar njëri pas tjetrit të shënojnë, por në të tri rastet ka qenë portier Toçi që u ka thënë "jo" tentativave të tyre me ndërhyrje të shkëlqyera. Me këtë rast kulminant është mbyllur edhe takimi që më shumë se çdo gjë tjetër krutanëve u dha tri pikë të çmuara për pozicionimin në tabelen e klasifikimit. Ndërkohë, edhe pse pati edhe një karton të kuq për një ndërhyrje të rëndë, gjithçka që u zhvillua në fushë e jashtë saj ishte tepër korrekte.


Deklaruan pas ndeshjes:
Petrit Haxhia, trajner i Kastriotit: "E kishim vlerësuar takimin si shansin më të mirë për të rikuperuar ato çfarë kishim humbur tri javë me radhë. Mobilizimi ynë ishte total në kërkim të golit dhe të tri pikëve. E arritëm më shumë vështirësi, sepse dhe kundërshtari ynë kishte ardhur me të njëjtat synime. Megjithatë, fituam, por mund të kishim shënuar edhe më shumë. Sidoqoftë, tashmë jemi më të qetë, sepse edhe ekipi e ka rifituar besimin për të realizuar objektivin që kemi."

Ilir Spahiu, trajner i Luftëtarit: "Kastrioti luajti më mirë, ndaj dhe fitoi. Megjithatë, edhe ne luajtëm të mobolizuar, duke kërkuar të administrojmë një rezultat që do të na jepte një pikë. E kishim parashikuar që ky synim do të ishte tepër i vështirë, prandaj fitoi Kastrioti, që shfrytëzoi një gabim tonin të pafalshëm. Përgëzoj klubin krutan dhe presidentin e tij për organizimin mjaft të mirë të ndeshjes dhe për pritjen mjaft korrekte që na u rezervua."

Të veçanta:- Në shkallët e stadiumit, këtë radhë, ishin afro 2000 spektatorë.
- Në tribunën "VIP" ishte i pranishëm edhe kryetari i Bashkisë së qytetit të Gjirokastrës, Flamur Bime.
- Pranë njëri tjetrit, në këtë tribunë, ishin edhe ish kryetari i Bashkisë së qytetit të Krujës, Ismail Dani, dhe kryetari i sapozgjedhur Lulëzim Guni.

[Noizy]

Sulmuesi Alban Bushi tregon se si e ka përjetuar thirrjen në kombëtare nën drejtimin e Bariçit.


"Në faqen zyrtare të Apollon Kallamariasë është publikuar mbrëmë edhe ky lajm: "Futbollisti i PAE Apollon i Kallamariasë, Alban Bushi, u thirr në skuadrën kombëtare të Shqipërisë në prag të ndeshjes Shqipëri Slloveni, më 24 mars 2007, dhe Bullgari Shqipëri, më 28 mars".
Menjëherë pas këtij njoftimi iu drejtuam vetë Bushit për të mësuar se sa i vërtetë ishte ky lajm. "Loku" tha për "Sportin shqiptar" se lajmi i botuar në faqen zyrtare të internetit të Apollon Kallamariasë ishte i vërtetë: "Për këtë më kanë njoftuar edhe nga Federata Shqiptare e Futbollit. Një gjë të tillë ma ka komunikuar nëpërmjet linjës telefonike edhe përgjegjësi i skuadrave kombëtare në federatën tonë, zoti Besnik Çela."
Alban Bushi iu përgjigj edhe më gjatë interesimit tonë:
- Pas sa kohësh ktheheni në kombëtare?
- Nuk kam luajtur me ekipin kombëtar që kur atë e ka drejtuar për herë të fundit Brigeli, pra që në ndeshjen me Lituaninë.
- Domethënë, nuk jeni thirrur asnjëherë nga trajneri Bariç?
- Jo, asnjëherë dhe kjo është hera e parë.
- Si e ndieni veten tani, kur është ligjëruar thirrja juaj në ekipin kombëtar?
- Sigurisht që ndihem shumë i gëzuar.
- Kujt ia dedikoni atë?
- Besoj se jam rikthyer falë djersës dhe mundit në stërvitje dhe në ndeshje. Nëse ju kujtohet, e kam thënë gjithnjë se do të rikthehem në kombëtare, ndaj jam më shumë i gëzuar, sepse kam realizuar një objektiv që i kam vënë vetes.
- Si e mendoni rikthimin në kombëtare?
- Aspak të lehtë, madje do të thosha se është një rikthim i vështirë. Them kështu kur mendoj kërkesat që ka kombëtarja. Unë do të jap maksimimunin për ta justifikuar këtë rikthim. Falënderoj për këtë edhe trajnerin Bariç apo edhe drejtues të tjerë të futbollit tonë, të cilët kanë ndjekur dhe kanë vlerësuar kontributin tim gjatë këtij sezoni në futbollin grek.
Rikthimi i Alban Bushit në ekipin kombëtar nuk është aspak një nostalgji as edhe një thirrje për ta respektuar atë për kontributin e dhënë gjatë 13 vjetëve të aktivizimit të tij me fanellën kuqezi. Mbi të gjitha, ky rikthim është një vlerësim, ashtu siç thotë vetë Bushi, për mundin dhe djersën e derdhur. Sipas një statistike të botuar nga mediat greke, Alban Bushi rezulton futbollisti më i suksesshëm për muajin shkurt. Ai ka shënuar gjatë këtij muaji 3 gola, aq sa ka shënuar futbollisti Salpigidhis i Panathinaikosit dhe braziliani Luçiano i Egalios. Bushi ka qenë kësisoj më i suksesshëm gjatë këtij muaji edhe se vetë braziliani Rivaldo, i cili kryeson listën e golashënuesve më të mirë të kampionatit grek, me 13 gola. Ndërkohë, vetë Bushi, edhe pse luan me një skuadër modeste si Apollon i Kallamariasë, ka shënuar 7 gola, duke qenë pa dyshim ndër golashënuesit më të mirë të superligës greke.
Që "Loku" e ka fituar fanellën e kombëtares me djersë tregon edhe fakti se në 24 javë të kampionatit helen ai është aktivizuar në 22 prej tyre dhe ka munguar vetëm për arsye kartonësh. Viktimë e golave të Alban Bushit janë bërë skuadra të mëdha të kampionatit grek si Panathiniakos, AEK, Paok, Panionios, Iraklis e Korfuz.
Brenda këtyre shifrave e fakteve mjaft domethënëse fshihet djersa, mundi dhe sakrifica e Alban Bushit për t'u rikthyer në kombëtare. Në atë kombëtare për të cilën ai ka filluar të luajë që në vitin 1994. Brenda këtij kufiri janë regjistruar deri tani 59 ndeshje. Pikërisht në atë ndeshje të parë të luajtur në Maltë, Bushi shënoi edhe golin e parë me kombëtaren e tij, për të arritur deri tani tek shifra 14, e paarritur nga askush. Megjithatë, gjithçka mund të ndryshojë...

[Noizy]

Incidenti spontan dhe i veçuar pas takimit me trajnerin Muça është dënuar nga të gjithë në Peqin, duke e lënë në heshtje rezultatin teknik të ndeshjes me Tiranën. Duhej të ndodhte ky incident për të prishur gjithçka të mirë në atë takim "fair play", e pranuar kjo nga të gjithë, drejtues e futbollistë, ku u luajt burrërisht 90 minuta dhe në fund fitoi më i miri.
Pritej që pas këtij takimi Shkumbini të regjistronte një rezultat pozitiv dhe me lojën që zhvilloi ndoshta e meritonte një pikë, por është meritë e kundërshtarit, Tiranës, që diti ta administrojë si duhet dhe deri në fund fitoren. Ishin në fakt kualitetet në fushë të këtij ekipi që përcaktuan këtë, ku vlen të përmenden më të dalluarit K.Duro, Sinani e Dede. "Duhet të pranojmë se patëm përballë Tiranën, kryesuesen e tabelës, e shkëputur nga të tjerët. Ishim përgatitur për këtë dhe u përpoqëm të merrnim masat për të përballuar ekipin kryesues të kampionatit, duke u bazuar te loja kolektive. Por ishin kualitetet e këtij ekipi që bënë diferencën në fushë dhe vendosen rezultatin e takimit," shprehet trajneri Sejdini, duke vlerësuar elementët cilësorë të kundërshtarit. Në takimin e fundit me Tiranën trajneri Sejdini gjen rastin të analizojë edhe gabimet e futbollistëve të ekipit të vet, të shfaqura në të gjitha repartet dhe për më keq të përsëritura edhe në takimin e fundit. "Për mua loja ishte më afër barazimit dhe e kërkuam atë, por u ndëshkuam përsëri për gabimet tona. Jemi përpjekur gjatë javës në stërvitje për të korrigjuar diçka, por me sa duket pozicioni ku ndodhemi i bën futbollistët të mos luajnë lirshëm. Shkumbini ndodhet në fundin e tabelës në një situatë kritike dhe kjo ndikon në anën psikologjike," saktëson Sejdini, duke analizuar humbjen. Vetë "Xhaxhi" pranon se humbja e pësuar e vështirëson më shumë gjendjen e Shkumbinit, por duke besuar si gjithnjë në kalimin e situatës së vështirë. Për Sejdinin është përpara edhe një fazë e plotë, ku ekipi që ai drejton i ka mundësitë të tregojë plotësisht vlerat që ka dhe punën që ka bërë në stërvitje.

[Noizy]

Donatorët premtojnë 1.000 dollarë "për kokë" në rast kualifikimi për në gjysmëfinale të kupës.


Pavarësisht humbjes 2-1 në takimin e parë të luajtur në stadiumin "Niko Dovana", Tirana nuk dorëzohet për sa i takon kualifikimit për në gjysmëfinale. Duke parë forcat që ka në dispozicion, por gjithashtu edhe mbështetjen e fuqishme të donatorëve, skuadra është më se e karikuar në vigjilje të sfidës me durrsakët. Fitorja në kampionat përballë Shkumbinit ua ka shtuar edhe më shumë besimin kryeqytetasve se në këtë sezon mund të arrijnë të fitojnë të dy trofetë kombëtarë. Nesër në fushë do të shënojë rikthimin edhe kapiteni Devi Muka, i cili mungoi të shtunën përballë peqinasve për arsye shëndetësore. Një tjetër element i nevojshëm që do t'i shtohet skuadrës është edhe Eleandro Pema, që aktualisht po vuan një dëmtim të lehtë në gju, por që në këtë ndeshje mund të luajë disa minuta.
Nga burime brenda donatorëve mësohet se lojtarëve u është komunikuar orët e fundit një premio prej 1.000 dollarësh për secilin, në rast kualifikimi për në gjysmëfinale të Kupës së Shqipërisë. Donatorët kërkojnë me çdo kusht, që në këtë vit të katërt sponsorizimi te Tirana, të bëjnë realitet fitimin e të dy trofeve, që për herë të fundit ka ndodhur në vitin 1998. Por për të arritur deri këtu bardhebluve u duhet një përmbysje e rezultatit. Fitorja 1-0 është e mjaftueshme, por jo e sigurt deri në fund të 90 minutave, ndërkohë që fitorja 2-1 do ta çonte ndeshjen në shtesë. Rezultati i vetëm i favorshëm për kryeqytetasit është fitorja me shifrat 2-0 dhe nisur nga fakti se afro një muaj më parë, përballë Teutës u arrit një sukses i madh 5-0, të krijon përshtypjen se gjërat mund të përsëriten. Dje në mesditë, skuadra zhvilloi stërvitjen e radhës në kompleksin e ekipeve kombëtare në Kamëz, ku u vu re një përfshirje e të gjithë lojtarëve në dispozicion të trajnerit Shkëlqim Muça. Sot paradite pritet t'i jepet dora e fundit formacionit anti-Teutë dhe më pas në mbrëmje delegacioni bardheblu do të grumbullohet si zakonisht në një prej hoteleve luksoze të kryeqytetit.

[Noizy]

Mbrojtësi bardheblu karikon shokët në prag të sfidës së kthimit me Teutën, ku duhet një fitore me çdo kusht.


Arian Pisha është i bindur se nesër ndaj Teutës do të duhet një skuadër e pagabueshme, në mënyrë që të arrijë përmbysjen e rezultatit të ndeshjes së parë. Pas fitores 2-1 ndaj Shkumbinit për kampionat, në shtëpinë bardheblu nuk ka kohë për të marrë frymë, sepse duhet të përgatiten për sfidën me durrsakët. Një fitore 1-0 do t'u mjaftonte kryeqytetasve për të dalë në gjysmëfinale, por një rezultat i tillë është i rrezikshëm deri në vërshëllimin përfundimtare të gjyqtarit. Mbrojtësi i qendrës, Arian Pisha, duke folur për "Sportin shqiptar", u kërkon shokëve të jenë maksimalisht të përqendruar gjatë gjithë kohës, pasi vetëm në këtë mënyrë mund të arrihet kualifikimi. "Pa dyshim që do të duhet të zhvillojmë një ndeshje të madhe nëse kërkojmë të kualifikohemi përballë Teutës. Humbja 2-1 në Durrës na i ka komplikuar gjërat, por megjithatë do të mundohemi të shfrytëzojmë maksimalisht golin që kemi shënuar atje, sepse dihet që në takime kupe ai ka vlerë të dyfishtë. E rëndësishme për ne në këto momente është të tregojmë "dhëmbët", për t'u lënë të nënkuptojnë të gjithë kundërshtarëve se, përveç titullit, kërkojmë edhe kupën. Të mos harrojmë se jemi fitues në fuqi të këtij trofeu dhe nuk do të ishte normale po të dorëzoheshim që në mes të rrugës,"- bën të ditur ish-kapiteni i Dinamos tri sezone më parë.
Në fitoren e së shtunës përballë Shkumbinit, gjatë kontaktit fizik që pati me sulmuesin Dorian Bubeqi, mbrojtësi Arian Pisha pësoi një të çarë në hundë, hematomat e së cilës vazhdon t'i ketë ende. Pavarësisht këtij dëmtimi delikat, 27-vjeçari vazhdoi lojën, pasi ishte shumë e rëndësishme ruajtja e fitores. "Nuk arrita ta shmangia përplasjen me Bubeqin dhe kjo ishte arsyeja pse u dëmtova në hundë. E rëndësishme ishte fitorja dhe këtë e morëm falë një loje kolektive, por edhe veprimeve të sakta të Sinanit përpara portës. Kemi fatin që në sulm kemi një lojtar me shumë eksperiencë, që të tilla situata nuk i fal. Edhe pse peqinasit shënuan një gol, ata nuk patën forca për të na barazuar. Tashmë diferenca në renditje është +9 në favorin tonë, duke parë që Teuta humbi dhe u ngjit Vllaznia. Për ne ka pak rëndësi se cila është skuadra që na ndjek, sepse pikët që kemi janë të mjaftueshme për t'u shpallur kampionë,"- shton më tej numri 5 i bardhebluve.
Duke iu rikthyer përballjes me Teutën për kupë, Arian Pisha mendon se kundërshtari në këto momente po kalon një moment negativ, pas humbjes në Shkodër. Këtë gjë, ai shpreson që ta shfrytëzojë nesër në stadiumin kombëtar "Qemal Stafa", kur të dyja skuadrat do të përplasen në një finale të parakohshme. "Sigurisht që do ta shfrytëzojmë në maksimum gjendjen e rënduar psikologjike të durrsakëve. Humbjen që ata pësuan në Shkodër do ta ndiejnë edhe në përballjen me Tiranën. Synimi ynë është që të luajmë mjaft të organizuar që nga fillimi dhe deri në fund të takimit, ku e rëndësishme është të shënojmë një gol sa më shpejt të jetë e mundur. Teuta nga ana e saj do të shfrytëzojë armën më të fortë, kundërsulmin, për të na goditur në befasi, ku për t'u pasur në konsideratë janë Xhafaj, Shkëmbi apo Mancaku. Megjithatë, për më shumë le t'ia lëmë fushës,"- përfundon deklarimin e tij për gazetën mbrojtësi i dalluar i kampionatit shqiptar, Arian Pisha.

[Noizy]

Mesfushori kosovar Driton Krasniqi vlerëson ngarkesat fizike si shkak të humbjes në Elbasan.


Ka zhvilluar përsëri një lojë të mirë, edhe pse Besa humbi. Sapo është aktivizuar në mesin e pjesës së parë, krahu i majtë i sulmit verdheblu ka njohur postbllokun e pakalueshëm të kosovarit Driton Krasniqit. Jo vetëm në lojën mbrojtëse, por ai ishte inspirues i kombinimeve me Binagolin e krosimeve në zonë. Kujtojmë se falë këtyre krosimeve Besa shënoi si ndaj Tiranës, ashtu edhe ndaj Dinamos. Po si e gjykon kosovari humbjen e fundit? A kishte Besa mundësi të dilte me tjetër rezultat nga Elbasani? Ja shkaqet e humbjes sipas Krasniqit:
Qindra tifozë kavajas ju ndoqën në Elbasan, sepse besonin te fitorja, ndërsa ju humbët...
Besoj se të paktën për këtë vit i kemi kënaqur fansët tanë sa nuk ka më. Kemi mundur Tiranën, Flamurtarin, Shkumbinin, Luftëtarin dhe më kryesorja eliminuam Dinamon brenda në Tiranë për kupë. Nuk kemi bërë pak besoj. Më shumë se tifozëria ishim ne futbollistët që luajtëm për fitore, por nuk është e thënë që vetëm Besa të fitojë. Sa për tifozërinë, të jenë të sigurt se përsëri që këtë javë, kushdo qoftë kundërshtari, do t'u kthehemi fitoreve tona.
Atëherë përse Besa nuk mundi të merrte një rezultat pozitiv edhe në Elbasan?
Një ndër faktorët kryesorë që ndikoi në humbjen tonë ishte lodhja që u shfaq te pothuaj të gjithë futbollistët. Kemi luajtur 7 takime në 24 ditë, që kanë qenë pozitive për ne. Natyrshëm që Elbasani vinte pas një jave pushimi, ndërsa ne sapo kishim luajtur të mërkurën plot 95 minuta lojë apo edhe 100 ndaj Dinamos. Edhe ne jemi prej gjaku e jo makineri. Pastaj patëm dy mungesa mjaft të rëndësishme, si Elokan e Arapi. Stoli nuk ishte edhe aq komod, sepse ju siguroj se, pavarësisht lodhjes, nëse do të ishte edhe Arapi, veçanërisht Elokani, në pjesën e dytë me atë lojë që zhvilluam me garanci barazimi do të ishte minumimi i rezultatit.
Ndërkohë, trajneri mik u largua pas protestës për faullin tuaj të shkaktuar. Ishte vërtet kaq e rëndë?
U habita kur pashë trajnerin mik tek protestonte në mesin e fushës. Ishte një luftë për top dhe shikojeni në pamjet filmike, unë kam goditur vetëm topin dhe jo kundërshtarin. Eshtë normale që në atë pozicion këmba të shkojë te kundërshtari, por jo ta godasë e dëmtojë atë. Meqë faulli paska qenë tragjik, përse futbollisti u çua dhe vraponte madje më shumë se përpara? Personalisht m'u duk një moment tensioni psikologjik i trajnerit për mosnxjerrje rezultati sesa vetë rëndësia e faullit. Gjyqtari Janku ishte pranë meje kur bëra faullin dhe kartonin e verdhë e dha më shumë si reagim ndaj trajnerit mik sesa fajit tim. Nuk është faji ynë nëse Elbasani gjatë gjithë pjesës së parë ishte nën diktatin e lojës sonë.
Mund ta quajmë këtë humbje një "ngushëllim" për dashakeqët e fitoreve të Besës?
Keni bërë një përcaktim ideal. Kjo pasi, megjithëse jemi i vetmi ekip që deri dje kishim arritur pesë fitore rresht, shumë media e specialistë flisnin më shumë për Tiranën që humbiste e Dinamon që humbiste dy herë rresht sesa për shpërthimin e Besës. Le të ngushëllohen skeptikët, sepse përsëri që këtë javë do t'i "hidhërojmë" prapë, kur t'u kthehemi fitoreve. Besa nuk do të ndalet dhe Elbasani ishte vetëm një pushim sa për të marrë "frymë". Besa përsëri do të nisë udhën e saj drejt fitimit të kupës, por edhe ngjitjen në kampionat. Kush të dojë, le të na ndalë.

[Noizy]

Presidenti i Teutës, Edmond Hasanbelliu, është shprehur se gjyqtarët dhe fati ndëshkuan Teutën në ndeshjen e fundit me Vllazninë. Sipas presidentit të Teutës, është e patolerueshme që një futbollist si Gjondeda të dëmtohet rëndë dhe gjyqtari të mos marrë masë ekstreme ndaj futbollistit që kreu këtë ndërhyrje me pasoja të rënda, në një kohë që në mënyrë të pajustifikueshme nxirret nga fusha e lojës Bekim Kuli. Sipas Hasanbelliut, këto veprime ndikuan drejtpërdrejt në rezultatin e ndeshjes, pa mohuar edhe fatin e keq dhe paraqitjen e dobët të disa prej futbollistëve. Nga ana tjetër, Hasanbelliu nuk ka ndjekur rrugën e marrjes së masave ndaj ekipit të tij për këtë humbje, por e ka inkurajuar për të synuar kualifikimin në ndeshjen vendimtare të kupës me Tiranën.

[Noizy]

Dëmtimi i mesfushorit të Teutës, Gentian Gjondeda, ka qenë më i rëndë sesa mendohej. Sipas burimevë nga stafi mjekësor i Teutës, mesfushori rrezikon të qëndrojë rreth 1 vit jashtë fushave të futbollit, pasi ka pësuar një dëmtim të rëndë në gju, i cili është i ngjashëm me dëmtimin e Julian Brahjes, që gjatë gjithë sezonit nuk ka mundur të zbresë në fushën e lojës.

[Noizy]

Tetova dhe Devolli do të jenë të gatshëm për Teutën në ndeshjen e radhës me Tiranën për Kupën e Shqipërisë. Mungesat e Devollit dhe Tetovës ishin shumë të ndjeshme në takimin me Vllazninë, ku Teuta humbi me rezultatin 3 1, duke lëshuar edhe vendin e dytë në tabelën e klasifikimit.

[Noizy]

Trajneri i Teutës kërkon përqendrim për ndeshjet e tjera, pasi objektivat janë ende në lojë.


"Të harrojmë humbjen me Vllazninë, duke kërkuar kualifikimin me ekipin e Tiranës në kupë." Kështu ka deklaruar trajneri i ekipit të Teutës, Sulejman Starova, sipas të cilit ndeshja e kthimit për kupë ka një rëndësi tepër të veçantë për Teutën. Në një intervistë për "Sportin shqiptar", trajneri i Teutës komentonte humbjen në kampionat me Vllazninë, si dhe sfidën e radhës në kupë me Tiranën, që është po aq e rëndësishme sa ajo që kaloi.
Sa me pasoja ka qenë humbja në kampionat me Vllazninë?
Fatkeqësisht, kjo ndeshje nuk na gjeti me kontigjentin e plotë të futbollistëve, si Tetova, Devolli etj. Po kështu, negativisht ndikoi edhe dalja e shpejtë nga loja e Gjondedës. Situata u rëndua akoma më tej me largimin me karton të kuq të Bekim Kulit, për më tepër që largimi i këtij futbollisti ndodhi në një moment kur loja e ekipit ishte në rritje dhe po i afroheshim gjithnjë e më tepër portës së Vllaznisë.
Si e shpjegoni faktin që pati një dallim në mënyrën e lojës nga pjesa e parë në të dytën?
Eshtë e vërtetë që në pjesën e dytë bëmë më shumë presion sesa Vllaznia, por ekipi kundërshtar e kontrolloi rezultatin dhe nuk na dha mundësi që ta përmbysnim.
A ju shqetëson fakti që në dy prej ndeshjeve më decizive me Tiranën dhe Vllazninë humbisni thellë?
Futbolli e njeh fitoren, barazimin dhe humbjen. E rëndësishme është që ekipi po luan dhe kjo është një garanci, pa harruar që objektivat tanë janë në lojë akoma.
Sa po ndikon fakti që kundërshtarët kanë epërsinë e tifozërisë ndaj jush?
Kjo është e vërtetë. Në ndeshjen me Vllazninë kishim tifozërinë kundër, që ishte vërtet futbollisti i 12 të për ekipin shkodran. Eshtë për të ardhur keq, por ne nuk e ndiejmë këtë mbështetje në Durrës. Uroj që në takimin e kthimit për kupë me Tiranën tifozëria të na mbështesë, pasi është një ndeshje decizive për ne.
A ju shqetëson fakti që po rrezikoni vendin e dytë, në një kohë që një hap i gabuar në kupë ju lëkund objektivat për të dalë në Europë?
Nuk duhet të tregohemi pesimistë, por të shikojmë përpara. Vendi i dytë në kampionat sigurisht që është në valle përsëri si për ne, ashtu dhe për Partizanin, pra jemi 3 skuadra që do të tentojnë deri në fund.
Jeni i kënaqur me vendin e tretë, pas dy fazave?
E kemi mbajtur vazhdimisht vendin e dytë dhe e lëshuam në fund. Gjithsesi, mendoj se është një pozicion normal.
A mund të ndikojë humbja me Vllazninë në takimin me Tiranën?
Jo, nuk mendoj se do të ndikojë. E rëndësishme është që në këtë ndeshje të kemi kontigjentin e plotë të futbollistëve.
Sa janë shanset për të siguruar kualifikimin me Tiranën?
Askush nuk mund ta parashikojë një ndeshje të tillë. Ne do të luajmë me objektivin për të synuar kualifikimin dhe shpresoj ta realizojmë atë.
Eshtë i favorshëm rezultati i takimit të parë?
Eshtë një rezultat i favorshëm, por që nuk na garanton asgjë. Duhet të luajmë me Tiranën sikur të jemi në një finale, ku nuk ka pasur rezultat tjetër. Besoj se futbollistët do të dinë të japin maksimumin në këtë ndeshje.