Lajmet nga Superliga 2006/2007

[Noizy]

Edhe pse largësia mes dy qyteteve bregdetare është e konsiderueshme, drejtuesit e kuq nuk kanë dryshuar plan për vendin e grumbullimit. Pas seancës së djeshme stërvitore të kuqtë janë nisur për grumbullim në Durrës, pa ndërruar destinacion, pavarësisht se Vlora ndodhet në një distancë të largët nga plazhi i Golemit. Nisja për në stadiumin "Flamurtari" do të bëhet para orës 11:00, për të mbërritur në kohë në Vlorë.

[Noizy]

Dinamo dje ka kryer një analizë për të trajtuar problemet organizative brenda skuadrës, fakt të cilin e ka pranuar vetë trajneri dinamovit Redi Jupi, por që nuk ka preferuar t'i bëjë publike. Megjithatë, Jupi shprehu diçka rreth ekipit dhe të ardhmes së tij dhe gjithashtu konfirmoi se pezullimi i kapitenit Lika është vendim i presidencës dinamovite." Futbolli është një provim që duhet ta kryesh çdo javë dhe kështu do të vazhdojmë edhe ne. Kemi dalë nga të gjithë objektivat dhe arsyeja e kësaj mbledhjeje të gjatë që zhvilluam sot (dje) ka të bëjë me shqetësimin se si të dalim nga kjo rrugë dhe të rregullojmë diçka, pasi duhet ruajtur dinjiteti i Dinamos. Kemi shumë gjëra për të bërë dhe të kthejmë besimin tek njëri-tjetri dhe në radhë të parë te presidenti i skuadrës. Prandaj të dielën do të dalim në fushë dhe do të bëjmë maksimumin për të ndryshuar,"- është shprehur Redi Jupi dje pas mbledhjes 90-minutëshe që ka zhvilluar kampi blu.

[Noizy]

Presidenca dinamovite e ka ndarë mendjen që do t'i ndëshkojë lojtarët e saj dhe pritet që këto dënime të jenë më shumë të karakterit financiar. Dje, në kampin dinamovit u fol për mosimpenjim të lojtarëve dhe dyshime për trukim të ndeshjes me Besën. Skualifikimi me Besën ka sjellë një shkurtim të madh financiar për Dinamon, pasi pothuajse mundësitë për të luajtur në Europë janë në minimum dhe nuk kanë se me çfarë ta rimbursojnë arkën. Sipas disa burimeve jashtë gardhit të kompleksit "Dinamo", mësohet se "gjobat më të mëdha do të rëndojnë mbi lojtarët që paguhen më shumë dhe në këtë mënyrë bëhet edhe një balancim në financat e skuadrës". Prandaj, sipas këtyre burimeve, mësohet se "gjobat kanë të bëjnë më shumë me uljen e kostos së pagesës nga ana e presidencës, sesa të mosimpenjimit të futbollistëve, të cilët kanë kohë që e bëjnë një gjë të tillë, sepse nuk ishte skualifikimi ndaj Besës rasti i parë". Megjithatë, asgjë nuk është e qartë dhe pritet të qartësohet në ditët në vijim.

[Noizy]

Portieri i Dinamos pranon vendimin e presidentit, por e cilëson absurd.


Portieri dhe kapiteni i bluve, Ilion Lika, ka qenë viktima e parë e "grushtit të hekurt" që presidenti i Dinamos ka filluar të përdorë mbi skuadrën e tij. "Gardiani" dinamovit është i pari që është pezulluar nga ekipi. Këtë vendim Lika e ka marrë përpara fillimit të mbledhjes së djeshme, madje kapiteni nuk ka qenë i pranishëm në analizën që ka kryer dje grupi dinamovit. Sipas njëshit të skuadrës blu, ky vendim i ka ardhur si bombë dhe shpreson që pezullimi të përfundojë sa më shpejt, pasi mund t'i prishë punë edhe për përfaqësimin në ekipin kombëtar. Megjithatë, Lika dje ka pranuar që të japë mendimet e tij për krizën që ka përfshirë Dinamon. "Vendimi i marrë ndaj meje është një konkluzion i presidencës, të cilët më kanë pezulluar përkohësisht. Momentalisht nuk jam shumë i kthjellët dhe këtë vendim nuk e prisja, pra më ka ardhur si "bombë". Tek Dinamo jam që në fëmijëri dhe gjatë gjithë karrierës sime jam munduar të japë maksimumin për ekipin, megjithatë do ta respektoj vendimin dhe duhet t'ia lëmë kohës se çfarë do të bëhet. Në këtë rast mendoj se nuk bëhet fjalë për shitje ndeshjesh, sepse kur bëhen akuza të tilla duhet të kesh edhe fakte. Por nuk ka shanse që të gjenden fakte, prandaj nuk bëhet fjalë për shitje ndeshjesh. Po të shikosh golat që pësuam ndaj Besës, mendoj se nuk kam faj, prandaj nuk ka pse bëhen aludime për lënie ndeshjeje. Edhe vendimi ka qenë pezullim për mosimpenjim, megjithatë më duket disi absurd. Personalisht nuk kam pasur kontakte me presidentin e Besës, por ndoshta mund të kenë pasur të tjerë. Prandaj jam i ndërgjegjshëm dhe i qetë që nuk kam pasur asnjë kontakt nga kampi kavajas. Duke qenë kapiten i ekipit, kam përgjegjësitë e mia, por ashtu siç ka qenë i mërzitur presidenti nga skualifikimi, edhe unë ashtu e kam përjetuar, ndoshta më shumë, sepse në fushë e ndien më tepër. Futbolli i njeh surprizat, pasi jo gjithmonë fiton më i mirë, prandaj ashtu na ndodhi edhe ne me Besën. Momentalisht më shumë më preokupon çështja e ekipit kombëtar, por shpresoj që pezullimi të mbarojë shpejt dhe të mos ketë interferencë me kuqezinjtë,"- ishte prononcimi i djeshëm i dinamovitit Ilion Lika pas pezullimit të bërë nga presidenca blu.

[Noizy]

Blutë e kryeqytetit në kërkim të shkaktarëve të skualifikimit të skuadrës nga veprimtaria e kupës.


Ishte parashikuar që eliminimi i Dinamos nga veprimtaria e Kupës së Shqipërisë nuk do të kalohej lehtë. Dje presidenca blu ka dhënë ndëshkimet e para dhe pritet që ato të vazhdojnë edhe në ditët në vazhdim. Shqipëria ka një praktikë të vjetër në zbulimin e grupeve armiqësore, të cilët kanë qenë të pranishëm në shumë fusha të jetës. Me rënien e komunizmit këto praktika u venitën disi, por së fundi "grupet puçiste" po fillojnë të lulëzojnë në futboll. Presidenca e Dinamos ka filluar të analizojë situatën e papranueshme që po përjeton skuadra dinamovite dhe 12 javë përpara përfundimit të sezonit kërkon të vendosë pikat mbi "i". Presidenti i bluve i ka mbledhur dje lojtarët e skuadrës dhe ka dhënë vendimet e para, të cilat nuk do të jenë të fundit, pasi pritet që hetimet të shtrihen më gjatë, në mënyrë që "rrjeti i spiunazhit" të kapë sa më shumë tradhtarë. Sipas prononcimeve të djeshme të zotit Sulaj, ka dalë se kreu i "grupit armiqësor" është kapiteni dhe portieri i Dinamos, Ilion Lika, dhe pritet që atë ta shoqërojnë edhe të tjerë. Sipas logjikës së ndëshkimeve të djeshme, ka dalë se pjesa më e madhe e futbollistëve do të ndëshkohen, dhe këtë vendim do ta ndiejë më shumë portofoli i lojtarëve. Ndërkohë nga presidenca blu dje kanë dalë edhe akuza në drejtim të personave të jashtëm, ku më i lakuari është presidenti i Besës së Kavajës, Nexhat Bizhdili, i cili ka bërë të gjitha përpjekjet për të korruptuar futbollistët e Dinamos. Zoti Besnik Sulaj ka premtuar dje përpara medias se kësaj çështjeje do t'i shkojë deri në fund, derisa Dinamo të jetë pastruar nga dembelët dhe sabotatorët.

[Noizy]

Me përfundimin e ndeshjeve të javës së 22-të do të mësohet edhe ecuria e mëtejshme e kampionatit.


Deri tani, kalendarin e fazës së tretë e kemi parë vetëm me shifra, pa ditur emrat e skuadrave. Duke filluar nga sot dhe përfunduar nesër me dy ndeshjet e fundit të javës së 22 të, do të mësojmë edhe çiftet javë pas jave. Eshtë hera e parë që përdoret kjo skemë, edhe pse më parë ishte provuar kampionati me tri faza. Për momentin dihet vetëm skuadra e vendit të parë, ndërsa pozicionet e të gjitha skuadrave të tjera mund të ndryshojnë. Tirana pra është konfirmuar në krye, pasi distanca është e madhe dhe ndeshjet e sotme të rivalëve nuk e kapin dot. Nëse dy ekipe, apo më shumë pas kësaj jave përfundojnë me pikë të barabarta, atëherë do të shikohet golaverazhi. Kuptohet që gjashtë ekipet e para janë më të favorizuara për faktin se do të zhvillojnë gjashtë ndeshje brenda dhe pesë jashtë, ndërsa gjashtëshja e dytë të kundërtën. Ky është i vetmi avantazh për ekipet e gjashtëshes së parë. Nga kategoria do të bien dy skuadra. Nëse dy ekipe, apo më shumë përfundojnë kampionatin me pikë të barabarta në krye, atëherë do të ketë "play off" për të shpallur ekipin kampion. E njëjta gjë do të ndodhë edhe me ekipet që luftojnë për mbijetesë. Nëse ndodh që janë më shumë se dy ekipe me pikë të barabarta në fund të renditjes, atëherë do të ketë ndeshje "play out" i për të mësuar skuadrat që do të luajnë në kategorinë e parë sezonin e ardhshëm. Mendohet se kjo strukturë e kampionatit do të sjellë risi, por duhet parë deri në fund se çfarë avantazhesh, apo të metash, do të ketë me strukturat paraardhëse, të cilat pas një apo dy sezonesh janë kontestuar, sidomos struktura me katër faza, ku deklarohej se futbollistët tanë nuk kanë këllqe për të përballuar 36 ndeshje në kampionat.

[DEN_Bossi]

Sot
VLLAZNIA - TEUTA : 3-1

[Noizy]

Elbasanasi Egert Kuçi shprehet optimist për takimin e sotëm me kryesuesit e renditjes.


Përballja e sotme me Tiranën ka ngjallur një interesim jo të vogël sot në Peqin. Kjo për sportdashësit është e justifikueshme, sepse është ndeshja e fundit e fazës së dytë, por edhe sepse shpresojnë që me një fitore të mundshme ekipi i tyre të ngjitet disi në renditje dhe të shpresojë për mbijetesën. Optimizmi i futbollistëve është real, sepse motivet janë për të fituar, aq më tepër duke parë stërvitjen e kohëve të fundit, ku trajneri Sejdini ka punuar shumë edhe në aspektin psikologjik, duke u ngulitur çdo futbollisti se janë shanset për mbijetesë. Në një linjë me trajnerin është edhe Egert Kuçi, i cili edhe pse erdhi me vonesë në Peqin, është i bindur se Shkumbini do t'ia dalë mbanë. "E ndiej veten mjaft mirë dhe them se do të jem në fushë ndaj Tiranës për të dhënë edhe unë kontributin tim. Megjithatë, do të jetë trajneri Sejdini ai që do të vendosë në lidhje me këtë gjë. Trajneri mendon më të mirën, prandaj duhet t'i pranojmë të gjitha zgjidhjet e tij," shprehet i riu Egert Kuçi, i cili sezonin e kaluar është shpallur kampion me Elbasanin. Eksperiencën dhe mentalitetin fitues të tij Kuçi po përpiqet ta reflektojë edhe te të tjerët, duke dashur t'u japë kurajo në këto momente të vështira për ekipin. "Eshtë një takim i vështirë, por jo i pamundur për t'u fituar nga ekipi ynë. Vërtet kundërshtari është ekipi më i mirë në vendin tonë, por ne jemi më të motivuar se Tirana, për më tepër do të luajmë në fushën tonë, pa harruar që Shkumbini gjithmonë i ka hapur probleme ekipit bardheblu. Jemi në një gjendje të mirë fizike, por edhe psikologjike, pavarësisht nga humbja e fundit," shton Kuçi, i cili kërkon të thotë diçka në fund, kur dëgjon fjalët e përhapura lart e poshtë për favorizim ndaj peqinasve. "Rivalët po na bëjnë lloj lloj presionesh, duke thënë që Shkumbinit do t'ia lënë ndeshjen, apo gjëra të ngjashme. Në këtë drejtim ka punuar shumë trajneri ynë, i cili na ka porositur që të luajmë fort dhe të fitojmë, të tjerët le të flasin çfarë të duan. Ne duam të sigurojmë mbijetesën dhe këtë do ta realizojmë vetëm me djersë, duke filluar që nga Tirana," - përfundon i riu elbasanas i Shkumbinit, Egert Kuçi.

[Noizy]

Drejtori teknik, Alban Tafaj, e sheh delikate sfidën e sotme me peqinasit, megjithatë shpreson te fitorja.


Fundi i fazës së dytë e sheh Tiranën në transfertën e vështirë përballë Shkumbinit të vendit të fundit. Për ironi të fatit, të dyja skuadrat që mbajnë ekstremet e renditjes do të kërkojnë sot me çdo kusht fitoren, pasi barazimi nuk do t'i shkonte për shtat asnjërës. Sa herë që Shkumbini dhe Tirana janë përballur në fushën e Peqinit, nuk kanë munguar rezultatet sportive, madje kujtojmë se pesë vjet më parë bardheblutë "i dorëzuan" titullin Vllaznisë pas humbjes atje. Në njëfarë mënyre, Shkumbini vitet e fundit ka qenë skuadra që përcaktonte fatet e skuadrës kampione, pasi kush fitonte në Peqin, arrinte në fund të kurorëzohej. Për drejtorin teknik të Tiranës, Alban Tafaj, ky 90-minutësh duhet fituar, pasi në këtë mënyrë i bëhet një mbyllje dinjitoze fazës së dytë. "Jemi të ndërgjegjshëm se sot na pret ndeshja më e vështirë për fazën e dytë që po lëmë pas. Duke parë pozitat e Shkumbinit në fundin e renditjes, por gjithashtu edhe faktin se ata luajnë në fushën e tyre, kjo i ndërlikon pozitat tona, megjithatë, ne jemi përgatitur për t'i bërë ballë çdo lloj situate. Në të vërtetë, këto vitet e fundit gjithmonë peqinasit na kanë hapur telashe si në fushën e tyre, por edhe në kryeqytet, por shpresoj që këtë herë të jetë Tirana ajo që të dijë të triumfojë. Barazimi 2-2 i fazës së parë vazhdon të na "djegë" ende, pasi solli shumë lëvizje në skuadër,"- bën të ditur për gazetën ish-futbollisti bardheblu.
Për këtë përballje të radhës, trajneri Shkëlqim Muça ka në dispozicion të gjithë grupin e futbollistëve, sepse për fat të mirë nuk ka asnjë të dëmtuar apo të skualifikuar. Edhe formacioni që pritet të zbresë sot që nga minuta e parë në fushë do të jetë mjaft konkurrues, që do të thotë se nuk mendohet aspak për ndeshjen e së mërkurës për kupë përballë Teutës. Këtë e pohon edhe vetë drejtori teknik Alban Tafaj, kur shton: "Sot duhet të mendojmë vetëm për Shkumbinin, pasi deri të mërkurën, kur do të përballemi me Teutën, ka kohë për të bërë ndonjë ndryshim. E rëndësishme është që t'i marrim ndeshjet një nga një, duke parë që secila ka rëndësinë e saj. Të mos harrojmë, se në rast se fitojmë sot ndaj Shkumbinit, pas një jave do të vijmë të luajmë sërish po këtu, për vetë faktin se kalendari e përcakton qartë se skuadra e parë do të ndeshet me të fundit. Në këtë kontekst, do të ishte në dëmin tonë çdo lloj hapi fals që mund të bënim, duke filluar nga sot, ndërkohë që kundërshtarët janë gati për të përfituar dhe gjithashtu për të na u afruar në renditje. Synimi ynë është të zhvillojmë një ndeshje brenda atyre kuotave që i shkojnë për shtat një skuadre si Tirana. Mund të them se lojtarët janë të gjithë të gatshëm dhe nuk besojmë të ndryshojmë shumë gjëra për sa i takon modulit të lojës. Nëse mund të flas për sfidat që kanë kundërshtarët direkt, shpresoj që përballjet midis Vllaznisë dhe Teutës, por edhe Flamurtarit me Partizanin të mbyllen në barazim, në mënyrë që të thellojmë shkëputjen në krye të renditjes,"- përfundon deklarimin e tij për gazetën drejtori teknik dhe koordinatori i bardhebluve, Alban Tafaj.

[Noizy]

Bardheblutë i falen Sinanit, kampionët kthehen te fitorja, Delain ndëshkuesi i të kuqve, ndërsa Vllaznia shkatërron Teutën.


U luajtën dje katër nga gjashtë ndeshjet e javës së 22-të të superligës, ku Tirana tregoi edhe një herë tjetër se në këtë kampionat nuk di të bëjë kompromis me askënd. Sukses të rëndësishëm arritën edhe tri skuadrat pritëse, Elbasani, Flamurtari dhe Vllaznia, të cilat mundën respektivisht Besën, Partizanin dhe Teutën. Tashmë Elbasani është ngjitur në vendin e gjashtë, në pritje të përballjes së sotme të Dinamos me Apoloninë, teksa Besa, si rrjedhojë e një golaverazhi më të mirë, mbetet sërish në vendin e pestë. Ngjitjen më të bujshme e ka bërë Vllaznia, që brenda pak javëve ka kapur vendin e dytë.
Shkumbini, i pafuqishëm përballë bardhebluve
Dy gola për çdo pjesë të shënuar nga ana e Tiranës kanë qenë shokues për peqinasit, të cilët janë detyruar të pranojnë humbjen e 14-të në këtë sezon. Ndëshkuesi i peqinasve mban emrin e Vioresin Sinanit, i cili falë dy golave të shënuar, jo vetëm që i ka dhënë tri pikë të çmuara skuadrës së tij, por edhe ka thelluar diferencën e golave në listën e shënuesve më të mirë. Shkodrani numëron 17 gola në këto 22 javë kampionat dhe është më pranë se kurrë fitimit të "Këpucës së artë". Me këtë sukses të arritur, kryeqytetasit tregojnë edhe një herë tjetër se nuk bëjnë kurrsesi kompromis me ekipet e vendit të fundit, kur kujtojmë se më parë kanë mundur në fushat e tyre edhe Apoloninë dhe Luftëtarin. Tashmë gjërat për peqinasit bëhen edhe më të vështira për të qëndruar në superligë.
Elbasani ndal Besën, por ankthi vazhdon...
Elbasani mori dje fitoren e parë në "erën" Gëzdari. Një gol i kosovarit Leci rezultoi vendimtar në fund të takimit, edhe pse kavajasit u përpoqën me të gjitha mënyrat për të barazuar. Pas shumë javësh vuajtje, për kampionët në fuqi, duket një rreze drite në fund të tunelit, çka mund t'ua shtojë shpresat qoftë edhe për vendin e tretë, që të çon në Kupën Intertoto. Pavarësisht humbjes, kavajasit mbeten në vendin e pestë, edhe pse me pikë të barabarta me elbasanasit, por me golaverazh më të mirë.
Flamurtari mund për herë të dytë Partizanin
Dy ndeshje dhe dy fitore për Flamurtarin në këtë sezon, kësaj here përballë Partizanit. Edhe në këtë fazë të dytë, vlonjatët mundin të kuqtë, ku "vrasësi" mban emrin e Sasha Delainit. Mbrojtësi i dalluar në kampionatin shqiptar, në rolin e "ishit" shënoi sërish nga pika e bardhë e penalltisë. Duhet thënë se vlonjatët zhvilluan një ndeshje të mirë përballë publikut të tyre, madje mund ta kishin dyfishuar rezultatin nëse Bedini do të ishte treguar pak më i saktë përballë portës. Në të njëjtën kohë, nuk duhet të harrojmë se edhe Dhëmbi i pati të gjitha mundësitë për të barazuar, por fati nuk ishte me të.
Vllaznia bën rotacion me Teutën
Sfida mes Vllaznisë dhe Teutës përligjte luftën për vendin e dytë. Ajo skuadër që do të fitonte, do të renditej në fund të fazës në vendin e dytë. Sigurisht, Teutës i interesonte edhe barazimi, por shkodranët nuk u kanë dhënë mundësinë më të vogël durrsakëve për të ëndërruar. Gjithçka u zgjidh që në fillim të pjesës së parë, kur Sukaj, Vukçeviç dhe Gudjabi, do të krijonin diferencën e madhe. Teuta arrin të shënojë një gol në pjesën e dytë me anë të Hodos, por pa e rrezikuar në asnjë moment fitoren bindëse të Vllaznisë.