Lajmet nga Superliga 2006/2007

[Noizy]

- Dinamo dje ka bërë përgatitje të ndarë në dy grupe, ku titullarët e ndeshjes me Flamurtarin e kaluan pasditen në pishina me ujë të ngrohtë. Ndërsa pjesa e mbetur, në të cilën bënin pjesë edhe zëvendësuesit, është përgatitur në fushën me bar të kompleksit.
- Redi Jupi, trajneri lojtar i bluve, dje ka qenë pacient në klinikën e mjekut Kasa dhe aty ka kaluar një kohë të mirë. Ndaj Flamurtarit Jupi luajti vetëm 45 minutat e para, pasi është dëmtuar në kavilje. Dëmtimi i Jupit duket disi i rëndë, pasi ai është paraqitur dje në klub duke çaluar dhe të njëjtën gjë ka bërë edhe pas trajtimit mjekësor.
- Sokol Ishka në Vlorë pati fatin e keq, pasi ka luajtur vetëm 17 minuta. Shkak për këtë ka qenë dëmtimi që dinamoviti ka marrë nga përplasja me vlonjatin Bedini. Nga kjo përplasje Ishka është çarë në vetullën e majtë dhe i është dashur që të përballojë qepjen me 13 penj. Dje dinamoviti nuk është stërvitur, por vetëm ka mjekuar plagën si dhe ka pasur interesin e shokëve për gjendjen e tij shëndetësore.
- Rezart Maho është "i plagosuri" i tretë i betejës së Vlorës. Për shkak të mosnjohjes së dinamovitit nga gazetarët vlonjatë, Maho është raportuar në kronika si Çaushaj, por e keqja lojtarit i ka ardhur nga dëmtimi që ka marrë në gju. Dje dinamoviti nuk është paraqitur në klub dhe, sipas babait të Mahos, lojtari qëndon i shtrirë në shtëpinë e tij gjersa të marrë diagnozën e saktë.

[Noizy]

Suksesi në "Ruzhdi Bizhuta" e ngjit Teutën në vendin e dytë dhe për sulmuesin vlonjat tashmë ka filluar kthesa.


"Me Elbasanin morëm më shumë se 3 pikë." Ky është konkluzioni që nxjerr autori i golit të fitores për Teutën, vlonjati Daniel Xhafaj. Sipas sulmuesit Xhafaj, vlerat e fitores në Elbasan ishin të shumëfishta. Në një intervistë për "Sportin shqiptar", përveç fitores me kampionët në fuqi, ai komenton gjendjen e skuadrës durrsake dhe të ardhmen e saj, duke filluar nga ndeshja e radhës me Kastriotin e Krujës.
- Daniel, shumë njerëz e kanë quajtur të papritur fitoren e Teutës në Elbasan. Po ju si mendoni?
- Parashikohej një ndeshje mjaft e vështirë, që i kishte brenda të 3 rezultatet e mundshme, por nuk mund të them se fitorja jonë ishte e papritur. Fati i buzëqeshi Teutës, por duhet thënë se ajo e meritoi këtë fitore.
- Sipas jush, çfarë vlerash ka për ekipin durrsak kjo fitore jashtë fushe?
- Mendoj se vlerat e kësaj fitoreje janë të shumëfishta. Në radhë të parë, morëm 3 pikë në një fushë të vështirë, siç është ajo e Elbasanit, dhe jemi ngjitur në vendin e dytë. Të mos harrojmë se luajtëm kundër ekipit kampion në fuqi dhe para një tifozërie të zjarrtë, kështu që fitorja do të ndikojë shumë edhe në planin moral. Besoj se Teuta e ka bërë kthesën e madhe.
- Si jeni ndier në fund të takimit, kur tifozëria elbasanase ju ka duartrokitur?
- Pa dyshim që u ndjeva shumë mirë, ndërsa tifozëria elbasanase tregoi përsëri se është ndër më të qytetëruarat në vendin tonë.
- Po për momentin e golit çfarë do të thoshit?
- Në fakt, duhet të them se merita kryesore për golin që shënova i takon Kulit, i cili, pasi bëri një lëvizje të zgjuar në zonë, më dha topin në një pozicion ku nuk ishte e vështirë ta dërgoja në rrjetë.
- A mendoni se tashmë vendi i dytë mund të quhet i Teutës?
- Duhet shumë kujdes, sepse pas kemi Vllazninë dhe Partizanin, dy kundërshtarë vërtet të fortë. Nëse ruajmë përqendrimin në ndeshjet e radhës, them se do t'i konsolidojmë pozitat tona në klasifikim. Pas disa javësh do të luajmë në Shkodër, ku duhet marrë maksimumi i pikëve.
- Ndërkohë, Tirana është mundur në fushën e saj nga Besa. A mendoni se është rihapur lufta për titullin kampion?
- Tani Teuta është 8 pikë pas Tiranës, një diferencë e rikuperueshme, por mendoj se do të jetë shumë e vështirë.
- Do të luani me Tiranën ndeshjen e kthimit në kupë. Si e mendoni atë dhe sa besoni në fitimin e kupës?
- Të kalosh Tiranën do të thotë se ke hedhur një hap të rëndësishëm drejt fitimit të këtij trofeu. Ndeshja e kthimit në Tiranë do të jetë mjaft e vështirë për ne, por rezultati i ndeshjes së parë na favorizon. Kemi shanse të mëdha për t'u kualifikuar, por gjithmonë duhet të jemi të kujdesshëm.
- Po për takimin e radhës në kampionat me Kastriotin cili është mendimi i Xhafës?
- Do të thosha se tani nuk ka më takime të lehta. Pavarësisht rezultateve që ka arritur, Kastrioti është një ekip që luan futboll të mirë dhe mund t'i hapë probleme çdo kundërshtari. Duhet të luajmë tepër të impenjuar, në mënyrë që të mos gabojmë si në ndeshjen me Shkumbinin.

[Noizy]

Trajneri Shkëlqim Muça, së bashku me pjesëtarët e tjerë të stafit teknik, zhvilloi dje në mesditë një analizë të detajuar me skuadrën, në lidhje me humbjen e fundit me Besën. Njëshi i stolit bardheblu kritikoi të gjithë lojtarët titullarë për kontributin e paktë që dhanë në stadiumin "Qemal Stafa", duke mos e justifikuar aspak veten. Nga burime brenda skuadrës mësohet se Muça kërkoi që Tirana të rikthehet sa më shpejt te fitorja, duke filluar që nga përballja me Flamurtarin.

[Noizy]

Pas analizës me trajnerin Muça, skuadra më pas zbriti në tapetin jeshil të stadiumit "Selman Stërmasi", ku nën drejtimin e përgatitësit atletik, Rauf Dimraj, bardheblutë zhvilluan një seancë të lehtë stërvitore. Titullarët që luajtën 90 minuta me Besën, punuan me vrapime dhe aerobi, kurse pjesa tjetër e mori të plotë ngarkesën fizike. Sot në mesditë kryeqytetasit do të zhvillojnë stërvitjen e fundit anti-Flamurtar.

[Noizy]

Ervin Bulku është lojtari i vetëm që po vuan probleme shëndetësore në kampin e Tiranës. Mesfushori me tipare shkatërruese pësoi një dëmtim në ije, pas një dyluftimi ajror që pati me Ebandën e Besës, ku u përplas me shpinë në tokë. Kjo bëri që në minutën e 64-t Bulku të zëvendësohej me Sefën, pasi nuk mund ta vazhdonte më lojën. Dje, ai nuk u stërvit, ndërkohë që nuk dihet nëse do të jetë titullar nesër ndaj vlonjatëve. Në rast se nuk do t'ia arrijë dot të riaftësohet, mund të luajë njëri mes Sefës ose Bakallit në qendër të mesfushës.

[Noizy]

Trajneri-sekretar i bardhebluve kritikon skuadrën pas humbjes së papritur 1-2 në kampionat ndaj Besës.


Brenda një jave, Tirana pëson dy humbje radhazi për kupë dhe kampionat. Si për koincidencë, bardheblutë, edhe pse kalojnë të parët në avantazh, në minutat e fundit hedhin gjithçka në "erë". Ndaj Teutës ishte Klodian Duro që realizoi i pari, por më pas përmbysën rezultatin Vrapi dhe Blloku. Të mërkurën, përballë kavajasve, ishte Abazaj që e shtyu topin në rrjetë, ndërkohë që Arapi dhe Xhihani bën mrekullinë me dy golat e tyre. Shfaqje të tilla nuk i shkojnë aspak për shtat një skuadre si Tirana, ku për trajnerin-sekretar Shkëlqim Muça, arsyet e këtyre paraqitjeve negative janë rrjedhojë e një euforie që është krijuar mes lojtarëve. Njëshi i stolit bardheblu deklaron për herë të parë për "Sportin shqiptar" se Tirana nuk është një superskuadër. "Humbja me Besën duhej shmangur me të gjitha mënyrat, por ja që bëmë shumë pak në fushë dhe më pas rezultati ishte rrjedhojë logjike. Në pjesën e parë luajtëm mirë dhe e gjetëm golin, por në në fraksionin e dytë të lojës lëshuam shumë terren, duke i dhënë mundësi kundërshtarit të na godiste me dy gola. Pa dyshim që arsyeja kryesore e kësaj humbjeje është euforia që ka pushtuar lojtarët prej disa ditësh, ku nga opinioni sportiv është folur me superlativa në drejtimin tonë. Megjithatë, unë si trajner dhe një njohës i vjetër i këtij grupi futbollistësh, do të thosha se ne nuk jemi superskuadër, siç mund të mendojnë shumë vetë. Tirana ka në gjirin e saj disa kualitete, por nëse këto kualitete nuk tregojnë karakter gjatë 90 minutave, atëhere ne kthehemi në një ekip normal të superligës. Mjafton të marrim rastin e fundit me Besën, ku edhe pse kjo skuadër nuk kishte asnjë objektiv në këtë përballje të radhës, u tregua më tepër luftarake dhe na vuri në vështirësi. Pse të mos e bënim ne një gjë të tillë? Diferenca prej 11 pikësh që kishim përpara këtij takimi nuk ishte kurrsesi e mjaftueshme për të fituar titullin kampion dhe këtë gjë ua kisha bërë të ditur disa herë djemve,"- bën të ditur trajneri Shkëlqim Muça.
Pas këtyre dy humbjeve radhazi për kupë dhe kampionat, "ujërat" në kampin bardheblu janë trazuar ndjeshëm, ndërkohë që koha në dispozicion është mjaft e shkurtër për të përgatitur ndeshjen e radhës. Nesër, përballë kryeqytetasve do të jetë Flamurtari, ekip i cili në fazën e parë fitoi 3-2, ndërkohë që vlonjatët këtë herë do të kenë edhe moralin e lartë pas suksesit të arritur së fundmi me Dinamon. Shkëlqim Muça pret që skuadra që drejton të bëjë një kthesë 180-gradëshe, duke filluar nga përballja me Flamurtarin, pasi një tjetër hap i gabuar do të thoshte fillimi e një krize. "Ajo çfarë na ndodhi me Besën, duhet të na shërbejë të gjithëve si një mësim i mirë për në javët e mbetura të kampionatit. Është ende herët për të thënë se jemi shpallur kampionë dhe për këtë na duhet të djersijmë në dy javët e mbetura nga faza e dytë, për të marrë maksimumin e pikëve. Sfida e nesërme me Flamurtarin është një test i rëndësishëm për lojtarët që të reagojnë pas këtyre paraqitjeve të dobëta me Teutën dhe Besën. Kam bindjen se Tirana do të kthehet shumë shpejt tek emri i saj, sepse nuk është në traditën tonë që të marrim rezultate të tilla,"- përfundon trajneri Shkëlqim Muça.

[Noizy]

Mesfushori shkodran Amarildo Belisha e vlerëson fitoren si fryt të djersës së ekipit.


Besa mbetet ekipi i vetëm, i cili i ka shkaktuar deri tani humbje Tiranës brenda në shtëpi. Ishte lëvizja taktike e Bicit, kur Belisha kaloi në vendin e tij natyral, futja në lojë e Dragushës dhe e Krasniqit tre nga faktorët kryesorë që ndikuan në fitoren e Besës. Veçanërisht loja e Driton Krasniqit ishte befasia dhe "torta" e këtij takimi. Po çfarë mendon mesfushori shkodran, që pa frikë mund të themi se po kalon një formë të shkëlqyer? Përse ai mendon ndryshe nga ne për rolin e Nuhiut në këtë takim? Çfarë, mbi të gjitha, e solli Besën tek fitorja? Po analistëve përse kërkon t'u drejtohet? Ja përgjigjet e "asit nën mëngë" të Bicit, Amarildo Belisha .
- Tregohuni i sinqertë, e besonit këtë fitore para nisjes së takimit?
- Pavarësisht madhësive e modernizimit, më thoni ju lutem ju, a keni parë ushtri të niset për betejë për të humbur? Vërtet që Tirana mbetet Tiranë, por mos harroni se edhe Besa ka mbi supet e saj 87 vite histori e vlera për futbollin shqiptar. Me këtë rast dua të nënvizoj faktin se disa pseudospecialistë që shohin vetëm ndeshje në "Qemal Stafa" nxitojnë të deklarojnë se kjo fitore ishte falë dobësisë së Tiranës. Me humor po ju kujtoj historinë e hajdutit që vodhi lopën, kur dëshmitari pyeti gjykatësin, po ai që vodhi lopën nuk paska asnjë faj (nënkupto po Besa që fitoi, nuk paska asnjë meritë). Askush nuk ka të drejtë të gjykojë djersën tonë në fushën e lojës, aq më shumë njerëz që vetë s'kanë luajtur kurrë në jetën e tyre futboll.
- Duke u kthyer te fitorja, cilat ishin veçoritë që e sollën atë?
- Së pari, të gjithë futbollistët kishin deklaruar publikisht, madje edhe në shtyp, se shkonim në Tiranë për të mos u mundur. Pra, besimi dhe psikologjia ishin faktorët bazë. Më tej ju e patë vetë se ndërsa zhvilluam një pjesë të parë duke u mbrojtur, në të dytën kuptuam se Tirana duhej sulmuar e fitorja ishte plotësisht e arritshme. Vlerësoj si elemente të fitores, krahas gjithë ekipit, hyrjen në lojë dhe kontributin e Dragushës, Krasniqit dhe Elokanit. Por mbi të gjitha doja të veçoja trurin e skuadrës, që për mua mbetet Arben Nuhiu. Eksperienca e tij bëri që ai të mos gabonte asnjëherë në pasime dhe të ishte koordinatori kryesor i sulmeve tona. Jo pak herë e patë të thyente edhe sulmet e Tiranës, a thua ishte 20 vjeç dhe jo 34. Ai mbetet modeli i profesionistit, nga i cili duhet të mësojnë futbollistët tanë të rinj.
- Ndërkohë, ju vetë u bënë disa takime që ndërroni rol brenda ndeshjes...
- Ai futbollist që i thotë trajnerit se luan vetëm në rolin e tij, nuk është në shërbim të ekipit. Kështu, trajneri Bici më ka vendosur në pjesën e parë në mbrotje dhe të dytën në vendin tim natyral. Jam përpjekur të jap maksimumin tim kudo që kam luajtur. Më mirë këtë e gjykojnë stafi dhe tifozëria.
- Kjo fitore ka një adresë apo dedikim?
- Larg servilizimit, e them hapur se njeriu i vetëm që ka besuar e besoi tek fitorja, ishte presidenti ynë, Nexhat Bizhdili. Pas humbjes me Dinamon ai nuk nxori asnjë fjalë presioni ndaj nesh, por na u drejtua: Ju e humbët vetë takimin dhe kam besim se po ju do ta kaloni turin e kupës brenda në kryeqytet. Kjo na motivoi për takimin ndaj Tiranës dhe e quajtëm detyrim moral të jepnim maksimumin tonë. Nga ana tjetër, ia kushtojmë këtë fitore tifozërisë sonë, e cila e meriton një rezultat të tillë, kur besoi e na përkrahu edhe në Tiranë.
- Së fundi, Shkumbinin keni përballë të shtunën. E diskutoni fitoren?
- Nuk besoj se dikush do të mendonte rezultat tjetër. Çdo rezultat tjetër veç fitores do të sillte lloj-lloj interpretimesh. Megjithatë, nuk mund të flitet në futboll për fitore 100%, qoftë edhe ndaj një ekip inferior. Le t'ia lëmë fushës së lojës rezultatin. Për një gjë ju siguroj, do të bëjmë maksimumin për të arritur fitoren.

[Noizy]

- U shënuan 10 gola (4 në 45 minutat e para) shifër që regjistrohet për herë të parë këtë sezon.
- U realizuan mesatarisht 1.66 gola për çdo ndeshje të kësaj jave.
- Numri i përgjithshëm i golave kapi shifrën 270, që do të thotë mesatarisht 2.25 gola për çdo ndeshje.
- V.Sinani me 14 golat e tij vazhdon të udhëheqë listën e golëshënuesve më të mirë të kampionatit.
- Për të mbrojtur "nderin" e të huajve që luajnë në kampionatin tonë, këtë radhë mendoi Osusi i Kastriotit, që ka shënuar në portën fierake.
- A.Sakaj i Flamurtarit është i vetmi futbollist që realizoi dygolësh këtë javë.
- Nuk u dha asnjë 11 metërsh. Kështu ka ngjarë edhe në javën e 5 të, 6 të, 10 të, 14 të dhe të 19 të.
- U sigluan 5 fitore dhe 1 barazim, sikurse në javën e 5 të, 8 të, 9 të, 17 të dhe të 18 të.
- Besa mori fitoren e 15 të jubilare ndaj Tiranës. Në kryeqytet kavajasit e arrijnë këtë pas plot 35 vjetësh (1 0 më 18.11.1972).
- Pas plot 15 javësh Shkumbini rikthehet tek fitorja (3 1 ndaj shkodranëve më 23.9.2006) tek mund Luftëtarin me të cilin nuk ka asnjë barazim në 15 takime të luajtura.
- Çifti Elbasani Teuta na jep 3 shifra interesante: ndeshjen e 120 të jubilare mes tyre, fitoren e 40 të jubilare të durrsakëve dhe barazimin e golave të shënuar me ato të pësuar, 124 124.
- K.Dalipi i Vllaznisë dhe Osusi i Kastriotit shënuan përkatësisht ndaj Partizanit dhe Apolonisë golin e 130 të dhe të 15 të jubilar.
- Për L.Jeminin takimi midis Elbasanit dhe Teutës është i 10 ti në kampionat.
- Për herë të parë në këtë sezon u dhanë 24 kartonë të verdhë. Totali është 482 ose 24.1 për çdo javë.
- U morën 2 kartonë të kuq, totali i tyre shkoi në 38, ose 1.9 për çdo javë.

[Noizy]

Trajneri kuqeblu vlerëson paraqitjen e fundit të dy sulmuesve të tij, të cilët merren vesh me njëri-tjetrin.


Fitorja e fundit ndaj Partizanit në njëfarë mënyre ka qenë e vështirë, por në fund ka sjellë qetësinë në skuadër. Aq më tepër që Vllaznia e sheh veten tashmë në vendin e tretë të renditjes. Por, përveç këtyre fakteve, ajo çfarë është konstatuar në 90 minutat e këtij takimi, ka qenë funksionimi i dyshes sulmuese Gudjabi Sukaj. Me këtë vijë sulmi, kuqeblutë duket se e kanë zgjidhur problemin e golit, aq më tepër që pas tyre luajnë lojtarë të tillë si Bejzade e Dalipi. Për këtë arsye, trajneri Josa është shprehur shumë entuziast pas ndeshjes, kur ka thënë: "Pres një Gudjab që të vijë duke e rritur ritmin e lojës, qoftë në freskinë që mund të ketë, sepse nuk mund të shkohet i gjithë kampionati duke u bazuar tek Sukaj, i cili në këtë ndeshje shkoi shumë mirë. Do të doja t'u thosha edhe sportdashësve shkodranë, por edhe juve si gazetarë, që të mos e presin shpëtimin e Vllaznisë nga ky lojtar. Kemi pasur një Sukaj që në ndeshjet e fundit të vitit të kaluar luajti mjaft mirë, shënoi edhe 4 gola dhe na dha pikë shumë të vlefshme. Por natyrisht që nuk mund të presim gjatë gjithë kohës ta shohim këtë lojtar në një formë të tillë. Unë nuk kapem tek aftësitë individuale, por tek ato të kolektivitit, prandaj ai duhet të mbështetet nga lojtarët e tjerë". Pjesa e parë që shkodranët kanë zhvilluar të mërkurën ndaj të kuqve ka qenë e përkryer, ndërsa në të dytën loja ra disi, megjithatë Josa e konsideron shumë pozitive lojën në tërësi në këtë ndeshje. "Morëm një fitore të merituar. Skuadra luajti shumë mirë që nga momenti i parë. Zhvilluam një pjesë të parë, e cila ishte shumë pozitive për ne, qoftë në freskinë e lojtarëve, qoftë në mbështetjen e dy lojtarëve tanë, Gudjabit dhe Sukajt nga Dalipi, që luajti mjaft mirë, por edhe nga krahët. Kuptohet, kishte momente që skuadra u tërhoq prapa dhe kjo është e kuptueshme, sepse nuk mund të mbajë të njëjtin ritëm gjatë 45 minutave. Në pjesën e dytë i dhamë terren kundërshtarit, nisur edhe nga dy zëvendësimet e detyrueshme që patëm, si ai i Vukçeviç, ashtu edhe ai i Ahit, të cilët na i prishën disi planet tona. Megjithatë, jam i kënaqur, pasi skuadra nuk rrezikoi për të humbur. Jam i kënaqur edhe nga rigoroziteti i lojës në mbrojtje, çka na dha mundësinë të rrezikojmë me anë të kundërsulmit 2 3 herë, por nuk patëm fat për të shënuar," ka shtuar drejtuesi i stolit shkodran. Megjithatë, tërheqja e Vllaznisë në gjysmëfushën e saj për gati 30 minuta në pjesën e dytë solli edhe reagimin e tifozëve të saj, të cilët duke u drejtuar nga pankina, u bënin thirrje pjesëtarëve të saj për të mos e tërhequr ekipin, por për ta lëshuar përpara. Pikërisht për këtë arsye trajneri Mirel Josa kërkoi të sqaronte këtë gjë duke thënë: "Për të sqaruar publikun shkodran njëherë e mirë dua të them se një trajner asnjëherë nuk vendos për ta tërhequr skuadrën e tij. Por të tërheqin vetë situatat e lojës, të tërheq vetë rezultati. Nëse skuadra jonë do të kishte shënuar edhe ndonjë gol tjetër, kuptohet që ajo do kishte qenë më e qetë. Pastaj ndikuan edhe dy zëvendësimet e detyruara. Por me futjen e Bejzades gjërat u rregulluan disi, sepse ai është lojtar që di ta mbajë mirë lojën, ta qetësojë atë dhe për këtë arsye ndryshuam edhe mënyrën e vendosjes së lojtarëve në fushë, duke e lënë Sukajn të avancuar, të mbështetur nga pas prej Bejzades dhe Dalipit." I pyetur në lidhje me sfidën e ardhshme për kupë, sërish me Partizanin, Josa është përgjigjur shkurt dhe prerazi: "As më intereson fare ajo ndeshje për momentin. Para kemi ndeshjen me Apoloninë, për të cilën duhet të mendojmë tani për tani".

[Noizy]

Pasditen e djeshme kuqeblutë kanë qenë në stërvitje. Në orën 14.30 ata janë bashkuar në ambientet e stadiumit "Loro Boriçi" për të zhvilluar stërvitjen e radhës. Një stërvitje e shoqëruar kryesisht me masazhe dhe vrapime të lehta, ndërkohë që sot do të ketë edhe një tjetër seancë paradreke, para se skuadra të niset drejt Fierit për ndeshjen e radhës. Të vetmit lojtarë, të cilët janë në pikëpyetje për këtë ndeshje, janë mbrojtësi malazez Vukçeviç dhe mesfushori Ahi. I pari është duke kaluar një gjendje gripale dhe madje ndaj Partizanit luajti në fushë me temperaturë. Ndërkohë, Ahi vuan nga një dhembje në gjurin e tij të djathtë, e prej saj ai u detyrua të linte fushën e lojës në pjesën e dytë të ndeshjes me të kuqtë, ndeshje në të cilën Ahi ka qenë ndër lojtarët më të mirë në fushë për Vllazninë dhe prandaj mori dhe shumë duartrokitje nga ana e publikut shkodran.