Lajmet nga Superliga 2006/2007

[Noizy]

Mbrojtësi Mardian Kacollja shprehet se ndeshja e radhës ka vlerën e më shumë se tri pikëve.


Skuadra e Elbasanit është duke u dhënë dorën e fundit përgatitjeve për takimin e ditës së mërkurë ndaj Teutës. E cilësuar si një nga takimet më të rëndësishme të sezonit, ndeshja ndaj "djemve të detit" i ka karikuar në maksimum lojtarët verdheblu, të cilët kurrsesi nuk e mendojnë një tjetër dështim në kampionat. Pas humbjes me Partizanin dhe pas barazimit në transfertë me Apoloninë, ekipi kampion, i ndodhur në kuotën e 27 pikëve, rrezikon seriozisht të mbetet duarbosh këtë sezon futbollistik, nëse nuk do të arrijë të marrë tri pikët ndaj një kundërshtari direkt për zonën europiane. Eshtë pikërisht kjo arsyeja përse futbollistët elbasanas nuk e shohin Teutën thjesht si një ndeshje që vlen tri pikë. "Nëse do të më pyesnit, unë do të thosha që është një ndeshje që vlen jo tri, por në fakt gjashtë pikë, kur mendon se në rast fitoreje jo vetëm që ngjitemi tri pikë në klasifikim, por i mohojmë një tripikësh edhe njërit prej rivalëve në betejën e zonës europiane, siç është Teuta. Për fat të keq, kemi humbur shumë pikë në takimet e fundit, kështu që kalendari tashmë na detyron të sforcohemi shumë, për të mos lënë më pikë prapa në rrugën drejt realizimit të synimit tonë. Na vjen keq që tani duhet të përballemi me këtë situatë, duke menduar që mund t'i administronim më mirë takimet, nëse nuk do të kishte qenë për disa gabime që kemi kryer, sidomos ndaj Vllaznisë dhe Partizanit në fushën tonë dhe me Apoloninë në transfertë," citon për "Sportin shqiptar" futbollisti titullar i ekipit kampion Mardian Kacollja, i cili gjithsesi mundohet të karikojë shokët e skuadrës, duke theksuar se Elbasani i tij i ka të gjitha shanset të triumfojë ditën e mërkurë në "Ruzhdi Bizhuta" ndaj Teutës. "Jam i bindur se i kemi të gjitha shanset për të fituar në këtë sfidë. Në takimet e fundit, pavarësisht rezultateve, nuk është se jemi paraqitur keq, kështu që unë e them me bindje se me pak kujdes mund t'u dhurojmë sportdashësve tanë të zjarrtë fitoren e parë pas disa javëve jo të mira. Ne shpresojmë që edhe në këtë ndeshje të kemi përkrahjen e tyre, aq më tepër në një ndeshje me nerva të tendosura, si kjo ndaj durrsakëve," deklaron futbollisti që i bëri një nisje të shkëlqyer kampionatit, por që për fatin e tij të keq erdhi ai dëmtim që e la jashtë fushave të blerta disa javë. Gjithsesi, Kacollja e ka përmirësuar ndjeshëm lojën e tij në takimet e fundit falë edhe punës së kryer në stërvitje. Për këtë arsye, mbrojtësi në fjalë nuk fsheh asgjë, duke u shprehur se nuk i trembet aspak konkurrencës për një vend në formacion, aq më tepër tani kur organika e këtij reparti është shtuar me ardhjen e kosovarit Papuci. "Unë shoh punën time, duke u përkushtuar maksimalisht në stërvitje dhe duke dhënë maksimumin sa herë që më kërkohet një gjë e tillë në ndeshje nga ana e stafit teknik. Luaj apo nuk luaj, kjo është një zgjidhje që i takon trajnerit Gëzdari. Personalisht unë nuk i trembem aspak konkurrencës për një vend në formacion. E rëndësishme është që ndihem mirë dhe jam duke kapur formën time të fillim sezonit," shton Kacollja. Në fund të deklaratës së tij, Kacollja u përgjigjet me diplomaci edhe deklaratave të ditëve të fundit të dhëna për "Sporti shqiptar" nga ana e lojtarëve durrsakë, të cilët besojnë te suksesi në Elbasan. "Ju e dini që Teuta nuk e ka provuar ndonjëherë shijen e fitores gjatë sezoneve të fundit në fushën tonë. Besoj se historia do të përsëritet edhe kësaj radhe," e mbyll prononcimin e tij mbrojtësi i Elbasanit, Mardian Kacollja

[Noizy]

Për drejtuesit e klubit të futbollit të Apolonisë duket se nuk do të ketë asnjëherë qetësi. Pas përfundimit të halleve të fazës së parë dhe një pjese të mirë të ndeshjeve të fazës së dytë, ku pas bojkotit të disa futbollistëve skuadra humbi shumë pikë, u duk se pjesa e mbetur e ndeshjeve të superligës do të ishte normale. Por s'qe e thënë që çdo gjë të shkonte mirë. Brazilianët e dëbuar, të cilët kishin dorëzuar dokumentacionin e nevojshëm për t'u pajisur me lejet e qëndrimit, janë shfrytëzuar në këtë periudhë të nxehtë fushate nga drejtuesit e policisë së shtetit, të cilët pasi i kanë marrë me forcë brazilianët Rosha, Junior, Galvao dhe Renato nga fusha e stërvitjes i kanë nisur drejt aeroportit "Nënë Tereza", ku pas një vuajtjeje 48-orëshe, sikur të ishin njerëz ordinerë, janë deportuar drejt e në Brazil. Por fatin e mëtejshëm të tyre për momentin është e vështirë të japësh një përgjigje, pasi tmerri që ata kaluan në aeroportin shqiptar ndoshta ka lënë një shije jo të mirë për ta, të cilët ndoshta nuk do ta shkojnë kurrë në mend të rikthehen nga vendi i sambës në vendin e shqiponjave. "Brazilianët erdhën në një formë të mirë sportive dhe ishin mjaft të domosdoshëm në këto momente për skuadrën. Por nuk qe e thënë që kjo përgatitje e mirë e tyre të përdorej në dobi të skuadrës sonë. Megjithëse për ta ne kishim bërë kontrata afatgjata, duke parë se ata ishin të nevojshëm për skuadrën, nga drejtuesit e policisë së shtetit nuk u mor parasysh asnjë kërkesë, apo lutje për të mos i kthyer ata në Brazil, sepse kështu nuk dëmtohehin vetëm ata, por e gjithë skuadra, që duhet pohuar sapo ishte konfiguruar drejt një grupi tepër cilësor. Presidenti dhe drejtuesit më të lartë të skuadrës i kanë drejtuar organit më të lartë të FSHF-së, KE-së, që ndeshjet e skuadrës sonë të shtyhen derisa për fatin e këtyre futbollistëve brazilianë të kemi një ide më të saktë jo vetëm për rikthimin e tyre. Ne kemi kontaktuar me një pjesë të këtyre futbollistëve, të cilët kanë mbetur të traumatizuar nga ato që kam parë dhe kanë hequr në aeroportin e Rinasit, por deri në këto momente nuk mund të japim një vlerësim të saktë për ta. Një gjë është tashmë e sigurt. Nga kjo që ndodhi, e dëmtuar është skuadra jonë, së cilës i janë larguar 4 futbollistë tepër cilësorë, të cilët për fatin e tyre të keq u bënë pre e fushatës politike që po zhvillohej në Shqipëri. Unë mendoj, derisa te ne nuk ka një sindikatë futbolli, apo diçka tjetër për të mbrojtur jo vetëm futbollistët e huaj, por edhe ata vendës, gjërat do të mbeten në dorën e fatit," - shprehet sekretari i klubit fierak, Liu Bistika. E ndërsa sekretari Bistika është tepër i indinjuar nga ajo që ka ndodhur te skuadra e tij, sot e gjithë vëmendja e opinionit futbolldashës në Fier do të drejtohet te KE-ja.

[Noizy]

Ekipi kavajas do të kërkojë të paraqitet denjësisht, për t'i shërbyer edhe takimit të kthimit në kupë.


Në kampin kavajas mbizotëron një qetësi për t'u pasur zili. Pas asaj humbjeje ndaj Dinamos, diskutimet për të cilën vazhduan gjatë, në ambientet sportive tashmë flitet për takimin e radhës ndaj Tiranës. Të gjithë nxitojnë ta quajnë thjesht një rastësi takimin e parë për kupë. Justifikimet janë të gjithanshme, por ato nuk lënë jashtë përgjegjësisë as trajnerin Bici, ku pakënaqësitë adresohen te lënia në fushë e Elokanit dhe zëvendësimit të Binagolit. Kësaj i shtohet edhe arsyetimi i trajnerit Bici, i cili nuk pati në dispozicon të tij Dragushën, Krasniqin, si dhe dëmtimet e Mërtirit dhe portierit Mustafa gjatë takimit. I sollëm përsëri këto argumente për të saktësuar se tashmë ato në takimin e radhës nuk janë në plan të parë. Drejt kryeqytetit Besa do të udhëtojë më e plotë dhe me tjetër bindje për vazhdimësinë e rezultateve pozitive në kampionat. Një fytyrë kjo që u pasqyrua edhe në mungesën e forcës goditëse në kupë, krahasuar me atë në kampionat. Trajneri Bici duket se do të ketë në dispozicion qendërmbrojtësin Dragusha, por jo mesfushorin Krasniqi. Në këtë linjë mbetet edhe rikuperimi i portierit Mustafa. Një armë jo e pakonsiderueshme mbetet edhe taktika, që detyrimisht duhet të përdorë trajneri Bici. Nuk besojmë të ndodhë ashtu si ndaj Dinamos, kur Besa rreshtoi tre sulmues, por një luftë e fortë në mesfushë do të jetë arma kryesore e lojës së kavajasve. Njëri prej futbollistëve, pikërisht sulmuesi Parid Xhihani, e sheh kështu pragsfidën: "Ajo që vlerësoj si pozitiv në favorin tonë mbetet faktori psikologjik. Udhëtojmë drejt Tiranës pa pasur në mendje si detyrim një rezultat pozitiv. Kjo do të thotë se futbollistët do të jenë më të qetë dhe të japin maksimumin e tyre. Nuk kemi çfarë të humbasim në këtë takim, por të luash në kryeqytet pa frikën e humbjes, mendoj se nuk është pak." Nisur nga kalendari që ka Besa, e cila pret Shkumbinin në shtëpi e udhëton drejt Elbasanit, shihet qartë se një fitore ndaj peqinasve në shtëpi do të mjaftonte që Besa përfundimisht të mbaronte kampionatin për sa i përket rrezikut për ndonjë të papritur drejt rënies nga superliga. Kjo do të thoshte ndryshe se kavajasit i janë kushtuar vetëm takimit të kthimit në kupë. Nga ana tjetër, kujtojmë se brenda 10 ditëve asaj do t'i duhet të zhvillojë katër takime, tre në kampionat e një në kupë. Për të gjitha këta faktorë, takimi ndaj Tiranës shihet si një mundësi e mirë që Besa të pretendonte një rezultat pozitiv, që nënkupton para së gjithash barazimin. Një pikë ndaj Tiranës, më shumë se vlera e saj, do të jepte impulse pozitive për takimin e kupës. Në linjën tonë të gjykimit pajtohet edhe sulmuesi kavajas, por më parë me pishmanin që nuk mundi të shënonte ndaj Dinamos, teksa thotë: "Edhe tani mendjen e kam tek ai gol që nuk munda të shënoj ndaj Dinamos. Duke u kthyer te takimi i radhës, siç citova më lart, nuk kemi çfarë të humbasim, ndaj do të kërkojmë të bëjmë maksimumin. Përballë kemi një Tiranë që kryeson me meritë, por që, sipas meje, nuk cënohet aspak në kryesimin e tabelës edhe nëse Besa i rrëmben barazimin. Ky do të jetë synimi ynë i parë, por nëse na jepet mundësia, përse të mos shpresojmë edhe për tri pikë? Nuk do të jetë aspak i lehtë qoftë barazimi, aq më tepër fitorja, por jo të pamundura për t'u arritur." Kjo do të thotë se presidenti Bizhdili ua ka dhënë mesazhin e tij futbollistëve para këtij takimi. Ai u ka kujtuar futbollistëve se Tirana është një shans për të bindur tifozët se takimi ndaj Dinamos tashmë është harruar. Kjo mbetet në dorë të futbollistëve për të thënë fjalën e tyre. Tifozëria me siguri do ta mbështesë atë edhe në Tiranë.

[Noizy]

Trajneri i Teutës e vlerëson kundërshtarin e radhës dhe nuk niset nga gjendja në renditje e ekipeve.


"Takimi i radhës me ekipin e Elbasanit konsiderohet një provë e vështirë, pasi është ekipi që mban akoma titullin e kampionit." I këtij mendimi është trajneri i ekipit të Teutës, Sulejman Starova, sipas të cilit është shumë e rëndësishme që ekipi të marrë maksimumin në këtë transfertë, ku dhe kundërshtari do të ketë të njëjtin objektiv. Duke iu referuar këtij takimi, por edhe atmosferës në kampin e "djemve të detit", Starova e komenton kështu në intervistën e tij:
Si është gjendja e ekipit përpara takimit me Elbasanin?
Mendoj se gjendja e ekipit është optimale, duke pasur parasysh faktin se ndërprerja e kampionatit na shërbeu për të rimarrë forcat pas takimit të kupës me Tiranën.
A e ka kaluar ekipi problemin psikologjik pas dy ndeshjeve të dobëta në kampionat?
Nuk mendoj se ekipi ka zhvilluar dy ndeshje të dobëta në kampionat. Mund të them se kemi pasur dy rezultate të dobëta, por për sa i përket mënyrës së lojës nuk kemi qenë dobët.
Sa ka shërbyer fitorja me Tiranën në planin psikologjik për ekipin?
Sigurisht që ka shërbyer. Ekipit i duhej kjo fitore jo vetëm në drejtim të synimeve për kualifikim, por edhe në drejtim të anës psikologjike.
Sa janë shanset për të kaluar turin përballë një Tirane që do të kërkojë në fushën e saj kualifikimin?
Shanset janë, por ato duhen bërë realitet. Tani jemi të përqendruar në takimin e kampionatit me Elbasanin, ku do të kërkojmë që të marrim një rezultat pozitiv.
Si e vlerësoni kundërshtarin e radhës?
Kundërshtari i radhës mban akoma titullin e kampionit dhe mendoj se do të kemi përpara një ndeshje të vështirë. Duhet të dalim në lojën tonë të grupit për ta kaluar me sukses këtë ndeshje.
A keni probleme dëmtimesh, apo kartonësh?
Deri tani fatmirësisht nuk kemi probleme të kësaj natyre, me përjashtim të ndonjë dëmtimi.
Ju shqetëson fakti se në Elbasan do të keni kundër tifozërinë?
Ky mund të jetë një shans për Elbasanin, por jo disfavor për ne. Në Elbasan luhet futboll dhe tifozëria di të respektojë çdo kundërshtar.
Sa do të kenë vend në formacion futbollistët e rinj, që bënë një prezantim dinjitoz me Tiranën?
Në formacion do të jenë futbollistët që kanë gjendje më të mirë dhe që e meritojnë.

[Noizy]

Luftëtari, për javën e 20-të, do të ndeshet me Shkumbinin e vendit të fundit.


Në javën e 20 të për Luftëtarin, përveç rezultatit të tij me Shkumbinin, paraqet interes veçanërisht edhe rezultati i ndeshjes Kastrioti Apolonia, sepse pa dyshim tani e tutje llogaritë do të bëhen duke marrë parasysh edhe fqinjët në përpjekje që atyre që janë më poshtë në renditje sa më shumë t'u largohet dhe mundësisht ata që ka mbi vete t'i kapërcejë. Duke qenë se edhe ekipet e tjera kanë të njëjtat objektiva, atëherë kuptohet që lufta sportive (sa më mirë do të ishte të ishte vetëm ajo) gjithmonë e më shumë do të ndizet. Luftëtari në 19 javët në ndeshjet që ka luajtur jashtë fushe nuk ka mundur të realizojë fitore. A do jetë në gjendje ta realizojë pikërisht në Peqin, ku vetë Shkumbini kthehet në fushën e tij pasi ka munguar për 6 ndeshje që duhet të luante aty? Vështirë se e parashikon një gjë të tillë dikush, ndërkaq një ndeshje futbolli përfundon edhe në barazim. Luftëtarit, për të ruajtur distancën nga dy të fundit, do t'i pëlqente edhe barazimi i tij. Po si e shikon këtë ndeshje ndihmëstrajneri Mustafa Hysi? Ja si përgjigjet ai: "Shkumbini vërtet në renditje ndodhet në fund, por duhet kujtuar se ai fillimisht udhëhoqi kampionatin dhe filloi të zbresë shkallët e renditjes, pasi pas javës së 6 të nuk luajti asnjë ndeshje në fushën e tij dhe do t'i rifillojë ndeshjet aty pikërisht duke na pritur neve. Nga sa thashë, kuptohet sesa i uritur është ai për pikë në radhë të parë, por edhe për të kënaqur tifozët e tij me lojë. Ne nga ana jonë nuk shkojmë në Peqin për të kaluar radhën, për të plotësuar kalendarin, por, përkundrazi, për të luftuar me rigorozitet për pikë. Në krahasim me ndeshjen e fundit, do të kemi një formacion më të plotë, edhe pse ndonjëri do të jetë goditur nga gripi, por sidoqoftë ne do të bazohemi te forca e grupit. Ndeshja, sikundër kuptohet, do të jetë shumë e vështirë dhe e fortë, pa asnjë lloj kompromisi për vetë pozicionet e dy ekipeve në fjalë. Ne rezultatin e kërkojmë te loja e ekipit tonë, nga të tjerët kërkojmë lojë korrekte, qoftë dhe burrërore, si dhe gjykim profesional".

[Noizy]

Fierakët, edhe pse kanë kaluar në avantazh, nuk kanë arritur ta mbajnë, pasi krutanët kanë baraspeshuar.

Apolonia kënaqet me pikën në "kala"
Sporti Shqiptar

Kastrioti Apolonia 1-1
Shënues: Plaku 35', Osusi 80'

Kastrioti: Koçi, Ymeraj (Caca 59'), Grami, Gallo, Hasa (Osusi 46'), Deliu, Rustami, Pashja, Kalari, Asllani (Fjolla 68'). Trajner: P.Haxhiaj
Apolonia: Zendeli, Çarls, Shoshi (Rushani 46'), Auia, Dimovski, Deliovski, Ristevski, Gërço, Bajrami (Çuko 57'), Mema, Plaku. Trajner: A.Marko.
Gjyqtarë: A.Lulaj (Vlorë), D.Rexha, S.Zeka (Tiranë)
Kartonë të verdhë: Auia, Çarls
Karton i kuq: Auia

"Radiografia"
1' Hasa ka lëshuar një "predhë" në drejtim të portës, por topi ka kaluar vetëm pak centimetra mbi traun e sipërm.
12' Ziambo ka krosuar ngjitur me vijën fundore dhe Asllani i ndodhur 5 metra larg dhe vetëm me Zendelin gjuan lehtë me kokë, duke e dërguar në duart e portierit.
19' Gërço ka ekzekutuar mjeshtërisht një goditje dënimi nga 20 metra larg mbi murin e mbrojtjes, por topi vetëm sa përplaset në traversë.
27' Ziambo, i ndodhur ngjitur me vijën fundore, ka arritur të shmangë portierin, duke pasuar tek Asllani, që ndodhej fare pranë portës, por topi ka goditur shtyllën pingule, duke u kthyer sërish në lojë te Hasa, që 2 metra larg me portën e boshatisur ka gjuajtur me kokë disa centimetra mbi traun e sipërm.
29' Pashja ka pasuar për Ziambon, por Zendeli ka dalë më parë. Topi i shpëton nga duart dhe përfundon jashtë.
35' Plaku ka përfituar nga një hutim i mbrojtjes krutane dhe, pasi ka dalë vetëm me Koçin, ka gjuajtur, duke e kaluar topin poshtë trupit të portierit dhe në rrjetë. 0 1 për Apoloninë.
54' Pashja ka krosuar për Asllanin, por ky i fundit, edhe pse i vetëm fare pranë portës, ka shënjestruar gabim, duke e nxjerrë jashtë topin.
56' Plaku ka arritur të shmangë edhe mbrojtësin e fundit dhe, pasi ka dalë vetëm me Koçin në hyrje të zones, është ngatërruar me topin, duke shpërdoruar një rast ideal.
56' Pashja në një inkursion personal ka arritur të shmangë dy mbrojtës dhe tek tenton të shmangë të tretin brenda zonës, është ndërprerë në mënyrë të parregullt, por gjyqtari ka vazhduar lojën, duke mohuar një 11 metërsh.
74' Nga goditja e këndit topi ka përfunduar brenda zones, ku Grami ka gjuajtur me kokë mes dy mbrojtësve fierakë, duke e dërguar topin në shtyllën pingule dhe që andej në rrjetë. Por sërish gjyqtari Lulaj ka vërshëllyer, duke e anuluar atë.
80' Grami ka stopuar me gjoks një top të ardhur nga Deliu, duke ia lënë më pas Osusit, që nga 25 metra ka lëshuar një "bombë" në portën fierake, duke e dërguar topin në rrjetë. Rezultati barazohet në 1 1.
84' Ziambo në një pozicion të prirët rreth 10 metra larg Zendelit ka gjuajtur, por topi ka kaluar ngjitur me shtyllën pingule në rrjetën e jashtme të portës.
89' Kalari mes dy mbrojtësve ka gjuajtur, por topi kalon disa metra larg shtyllës së majtë pingule.

Komenti:
Eshtë e vërtetë ajo që tha trajneri Haxhiaj pas ndeshjes se fitorja e Kastriotit u mohua edhe nga fati. Do ta pranonte më pas edhe vetë Andrea Marko trysninë që ushtroi Kastrioti ndaj tyre gjatë gjithë ndeshjes. E megjithatë, vetëm një barazim dhe nga një pikë për secilën prej këtyre skuadrave, që në këtë fund faze më shumë sesa për spektaklin, po mendojnë për pikët. Ishte një ndeshje ku Kastrioti shpërdoroi një shans të madh për të shkuar disi më i qetë të shtunën në Durrës në takimin me Teutën. Ndërkohë, Apolonia ka realizuar objektivin me të cilin kishte udhëtuar për në Krujë. Ndoshta në ecurinë e ndeshjes për Kastriotin ndikoi edhe pësimi i golit shumë shpejt, ndërkohë që krutanët po e kërkonin atë prej minutash. Madje në minutën e 27 të Ziambo, i ndodhur ngjitur me vijën fundore, ka arritur të shmangë edhe portierin, duke pasuar tek Asllani, që ndodhej fare pranë portës, por topi i goditur prej tij është përplasur në shtyllën pingule, duke u kthyer sërish në lojë te Hasa, që 2 metra larg me portën e boshatisur ka gjuajtur me kokë, por topi ka përfunduar vetëm disa centimetra mbi traun e sipërm. Pas golit, futbollistët filluan të priren nga veprime individuale dhe në zona të ngushta. Pjesa e dytë ka filluar edhe më e bukur për Kastriotin, ku rastet për shënim kanë qenë edhe më të shumta, por Ziambo, Kalari e Pashja kanë shpërdoruar pafundësisht. I ndodhur në këtë situatë, Haxhiaj ka ndërhyrë, duke futur në fushën e lojës Osusin, që ka rezultuar me fat, pasi në minutën e 80 të më një gol mjaft të bukur ka arritur të kthejë qetësinë e munguar mes shokëve të tij. Niveli i gjykimit të kryesorit Lulja ka ndikuar ndjeshëm në rezultatin e takimit, për të cilën ka pretenduar edhe trajneri i Kastriotit, sidomos në anulimin e golit të realizuar nga Grami në minutën e 74 t. Disi i çuditshëm u duk edhe vazhdimi i lojës nga ky gjyqtar, kur Pashja në minutën e 61 të është ndërprerë në mënyrë të parregullt brenda zonës fierake. Dhe momente të tilla të dyshimta në Krujë gjatë këtij kampionati janë dukur jo rrallë, të cilat FSHF ja i ka kaluar në heshtje. Tashmë që kampionati po bëhet më i komplikuar, FSHF ja duhet të rrisë më tej vigjilencën e saj për t'i qëndruar mbi krye çdo veprimi të gjyqtarëve, që mund të ndikojnë në rezultatin e ndeshjeve. E sikur të mos mjaftonin këto, tifozët krutanë do të përballeshin edhe me një veprimim të pamoralshëm të Auisë, i cili pas ndëshkimit me kartonin e kuq do të fyente me një gjest të shëmtuar ata që dikur bënin tifo për të. FSHF ja do të dijë të ua kthejë dinjitetin tifozërisë së Kastriotit me masat që duhet të marrë ndaj tij. Ndryshe turpi do t'i mbetet në derë asaj. Sidoqoftë, loja e djeshme e Kastriotit ka bërë që të rikthehen sërish shpresat te tifozëria krutane pas largimit të disa futbollistëve me emër.

Deklarojnë:
Petrit Haxhiaj, trajner i Kastriotit: "Luajtëm vërtet bukur, duke e dominuar pothuajse gjithë takimin, por nganjëherë përveç meritës, duhet edhe pak fat. Kastrioti sot humbi shumë raste, ndaj të vjen keq që humbëm dy pikë të çmuara pikërisht tani kur çdo pikë është tepër e shenjtë. Por edhe gjykimi i Lulajt mendoj se ndikoi në rezultatin e ndeshjes. Një penallti dhe një gol i mohuar nuk janë pak në një ndeshje të tillë si kjo e sotmja. Megjithatë, unë gjej sërish rastin të përshëndes futbollistët e mi për lojën e bukur që zhvilluan."
Andrea Marko, trajner i Apolonisë: "Sot morëm atë që synonim. E kishim vlerësuar takimin si një ndeshjë rivalësh. Vërtet që Kastrioti luajti gjatë gjithë ndeshjes në sulm, por ne u treguam më racionalë, duke shfrytëzuar avantazhin që e arritëm të parët dhe shumë shpejt. Po të kishte qenë më i saktë Plaku mund të kishim shënuar edhe një gol tjetër, por megjithatë jemi të lumtur që nuk pësuam më shumë se një gol përballë rasteve të shumta të krutanëve. Sidoqoftë, një pikë në Krujë na lumturoi mjaft".

[Noizy]

Mbyllja e ndeshjes me rezultatin negativ është shoqëruar me thirrjet: "Gëzdari ik, Gëzdari ik!"



Elbasani Teuta 0-1
Shënues: D.Xhafaj 62'

Elbasani: Kotorri, Kacollja (Leci 55'), Osmani, Papuçi, Sina, Nallbani, Abdulla (Merxha 67'), Patushi (Koreshi 61'), Periç, Stojku, Kaçi. Trajner: E.Gëzdari.
Teuta: Kapllani, Vrapi, Lako, Kapaj, Vila, Buna (Kote 43'), Devolli, Gjondeda (Fagu 46'), Tetova, Kuli (Blloku 78'), Xhafaj. Trajner: S.Starova.
Gjyqtarë: L.Jemini (Tiranë), P.Pjetrushi (Lezhë)
Kartonë të verdhë: Papuçi, Sina, Merxha, Patushi, Buna, Devolli, Blloku, Fagu.

"Radiografia"
3' Miqtë janë futur mjaft të mobilizuar në fushë që në minutat e para. Pas një krosi nga goditja e këndit, D.Xhafaj godet fuqishëm me kokë, por mbi tra.
8' Kosovari Nallbani gjuan nga distanca, që devijohet me vështirësi nga Kapllani.
9' Abdulla kombinon me Stojkun, i cili bën një goditje spektakolare, por topi kalon ngjitur me trekëndëshin e majtë të portës së mbrojtur nga Kapllani.
11' Vendësit ekzekutojnë nëpërmjet Stojkut një goditje dënimi në distancë, por Kapllani e mbërthen topin me shumë siguri.
12' D.Xhafaj provon të gjuajë nga 40 metra, duke e kaluar topin ngjitur me traun e portës së Kotorrit.
15' Patushi kroson mjaft bukur për te Stojku, i cili godet me kokë, por pa rezultat.
20' Gjuan Stojku në ecje e sipër, topi kalon fare pranë portës.
24' D.Xhafaj vë në alarm mbrojtjen verdheblu dhe Kotorri shpëton ekipin e tij nga ndëshkimi.
26' Godtije dënimi në pozicion ballor, ekzekuton Stojku, por jashtë kuadratit.
28' Kuli gjuan në kuadratin e Kotorrit dhe ky në dy kohë arrin ta mbërthejë topin, pa e lejuar të përfundojë në rrjetë.
50' Stojku, i pavëmendshëm, nuk arrin të shfrytëzojë një mundësi shënimi përballë Kapllanit, edhe pse ndodhet i vetëm.
53' Kroson Vila, por Devolli nuk arrin të godasë në kuadrat.
60' D.Xhafaj ekzekuton mjaft bukur një goditje dënimi, por i pafat.
62' Miqtë nisin një aksion model nga mesfusha. Kuli kalon pa vështirësi kundërshtarët paralel me vijën anësore nga e djathta e sulmit të Teutës. Topi i përcjellë prej tij në zonë devijohet në rrjetë nga Xhafaj. 0 1 për Teutën.
69' Kuli pranë portës nuk arrin të dyfishojë rezultatin.
71' Leci, pas një krosi, gjuan ngjitur me shtyllën pingule.
77' Sërish Leci vë në pozitë të vështirë portierin Kapllani.
78' T.Osmani provon të gjuajë, por Kapllani tregon atësitë e tij, duke e larguar topin.
81' Sina gjuan nga një goditje dënimi në drejtim të trekëndeshit të majtë, por Kapllani ia ndryshon drejtimin topit.
90' Kroati Periç provon edhe një herë nga distanca, por topi kalon ngjitur me traun.

Komenti:
Elbasani ka humbur sërish dhe pesha e humbjes me Teutën në momentet më delikate, kur kampionët po i largoen kreut gjithnjë e më tepër, është shumë më e rëndë sesa ato të javëve të shkuara. Dje pasdite verdheblutë kanë dalë kokulur nga fusha e "Ruzhdi Bizhutës", pasi nuk kanë mundur të marrin të paktën një pikë për të kënaqur modestisht tifozët e tyre të zjarrtë, që edhe dje kanë mbushur shkallët e stadiumit. Askush nuk e mendonte që kampionët në fuqi do të dilnin duarbosh në ndeshjen me Teutën, por përsëri ka ndodhur më e keqja. Kampionët dështojnë si në arritjen e rezultatit, edhe në aspektet e tjera. Pavarësisht se Elbasani e ka nisur disi mirë lojën, nuk ka arritur të shënojë, gjë që po i kushton shtrenjtë këtij ekipi për një kohë të gjatë. As ndërrimi i trajnerit dhe përforcimet e shumta nuk po sjellin rezultatet e premtuara. Inkurajimi i madh dhe i vazhdueshëm që i është bërë Elbasanit nga fillimi deri në fund nuk ka mundur t'i bëjë agresivë futbollistët verdheblu përballë Teutës. Gabimet e elbasanasve në momentet vendimtare kanë qenë fatale. Shpërdorimi i shumë rasteve nga ana e tyre solli mungesën e rezultatit, humbjen e ndeshjes, pse jo edhe të kësaj tifozërie, që nuk e tradhtonte kurrë ekipin e saj të zemrës. Gjatë pjesës së parë kampionët u munduan të bënin diçka të mirë dhe kjo la shpresa se do të arrihej në pjesën e dytë. Mirëpo në vazhdim të ndeshjes u pa e kundërta, durrsakët luajtën shumë më të mobilizuar dhe krijuan raste të pastra shënimi. Rrjedhim i kësaj ishte goli i D.Xhafajt, i cili i shpëtoi shumë bukur mbulimit të mbrojtjes elbasanase. Disavantazhi e çorientoi lojën e kampionëve dhe reagimi i tyre qe mjaft i dobët. Vetëm në fundin e ndeshjes Elbasani krijoi dy tre raste, por pa mundur dot ta baraspeshojë lojën. Kështu që humbja e radhës e pësuar nga Teuta e bën edhe më të vështirë realizimin e objektivave të kampionëve. Nuk dihen masat që mund të merren. Tifozët verdheblu kanë qenë tepër të irrituar në fundin e ndeshjes. Dy humbje në shtëpi dhe me ekipe të drejtpërdrejta e zhysin Elbasanin në krizë totale dhe shumë larg objektivit për një vend në Kupën UEFA. E kundërta ndodhi me Teutën, e cila e kaloi minikrizën e rezultateve në kampionat shumë shpejt, madje me një rikthim të paparashikueshëm, që mund të themi surprizë. Kështu durrsakët vazhdojnë të luftojnë në të dy frontet, duke dashur patjetër të kapin një vend që të çon në Europë.

Deklarojnë:
Edmond Gëzdari, trajner i Elbasanit: Nuk u prononcua.
Sulejman Starova, trajner i Teutës: "Jam i kënaqur me këtë tripikësh që fituam në fushën e stadiumit "Ruzhdi Bizhuta". Pjesa e parë e këtij takimi nisi e tensionuar, sepse Elbasanit i duhej me çdo kusht fitorja. Jemi vënë në alarm në minutat e para dhe shfaqëm momente pasigurie, që fatmirësisht nuk na kushtuan. Në pjesën e dytë Teuta u shfaq shumë në formë nga ana fizike, derisa arritëm të shënojmë golin e epërsisë. Më pas u tërhoqëm, por Elbasani me një Stojk të shkëlqyer në fushë nuk mundi të na ndëshkonte. Ajo që kërkoj nga futbollistët e Teutës është që ata të jenë më pak të tensionuar, ndërsa për lojën e Elbasanit mendoj se ishte një lojë tipike kampionësh. Kemi fituar edhe pse nuk e mendonim që do të merrnim një tripikësh, por ka rëndësi që është plotësisht i merituar."

Të veçanta:
Ndeshja ka nisur 7 minuta me vonesë pa asnjë shkak.
Edhe pse në fillimin e ndeshjes Elbasani Tetuta nuk kishte më shumë se dy mijë spektatorë, numri i tyre është trefishuar pas 30 minutash.
Zëvendësimi i futbollistit Abdulla me Merxhën është kontestuar nga e gjithë tifozëria, ndërsa afrikani është duartrokitur prej tyre nxehtësisht për afro një minutëe
Mbyllja e ndeshjes me rezultatin negativ me Elbasanin është shoqëruar me thirrjet: "Gëzdar ik, Gëzdari ik!"

[Noizy]

Peqinasit i janë rikthyer fitores, e cila u hap oreksin për të shpresuar deri në fund për mbijetesën.


Shkumbini Luftëtari 1-0
Shënues: Rizvanolli 80'

Shkumbini: Llani, Muça, Xhyra, Ramazani, Bizhyti, Kuçi (Ndoni 46'), Beqiri, (Mustafaj 65'), Dervishi, Bubeqi (Gjata 72'), Rizvanolli, Bylykbashi. Trajner: F.Sejdini.
Luftëtari: Toçi, Novi, Dibra, Sinani, Hasalla (Cenko 57'), Simo, Shenaj, Dhima (Brahimi 70'), Bejollari, Hysa (Stoja 52'), Shalari. Trajner: I.Spahiu.
Gjyqtarë: K.Meta (Tiranë), D.Salaj, M.Dervishi (Shkodër)
Kartonë të verdhë: Bizhyti, Xhyra, Bejollari, Dhima, Simo
Karton i kuq: Bejollari

"Radiografia"
7' Dervishi shërben nga e djathta e sulmit për Bubeqin te shtylla e dytë, por sulmuesi i Shkumbinit tregohet i pavëmendshëm dhe nuk përfiton për të shënuar.
12' Beqiri ekzekuton bukur një goditje dënimi nga distanca, pret në pozicion Toçi.
17' Kundërpërgjigjet Luftëtari me një gjuajtje nga distanca të Shenajt, që përfundon larg portës.
30' Dalja e pastudiuar e portierit Toçi shfrytëzohet nga Beqiri, por harkimi i topit përfundon paksa mbi shtyllën e sipërme.
33' Novi kërkon të rrezikojë me një gjuajtje nga distanca, pa gjetur kuadratin.
37' Muça del fitues në dyluftimin me Bejollarin, duke i rrëmbyer topin e duke larguar rrezikun.
47' Hysa shërben saktë për Bejollarin, duke e nxjerrë të lirë në gjuajtje dhe është meritë e Llanit që grushton në goditje këndi.
48' Rizvanolli i vetëm përballë Toçit gjuan keq jashtë kuadratit.
65' Shenaj arrin t'i shpëtojë mbulimit të Xhyrës, por jo vëmendjes së Llanit, i cili shpëton portën, duke grushtuar gjuajtjen e tij tokazi.
75' Rizvanolli del i lirë brenda zonës dhe vetëm 4 5 metra larg portës shpërdoron, pasi topi gjen një mbrojtës.
80' Bizhyti shërben për Rizvanollin. Sulmuesi i Shkumbinit shmang një mbrojtës, më pas edhe daljen e Toçit, e harkon, duke e kaluar në rrjetë. 1 0 për Shkumbinin.
90' Rasti më i mirë për miqtë për të barazuar pas ekzektutimit të goditjes së këndit, por Llani nuk lejon, duke e pritur gjuajtjen me kokë të Shehajt.

Komenti:
Sportdashësit peqinas e pritën me interesim të madh takimin me Luftëtarin, duke u kënaqur në fund më shumë për tri pikët e marra, që e ngjisin më lart, duke barazuar me pikë me Apoloninë, për të qenë Shkumbini tani i parafundit. Rikthimi në fushën e vet pas shumë muajsh është shoqëruar me kënaqësinë e fitores, që për Sejdinin është e para që kur ka ardhur në krye të Shkumbinit. Ka qenë një fitore e vështirë, por e merituar, që e bën më interesante garën në fundin e tabelës, ku veç Shkumbinit dhe Apolonisë, kandidatë janë edhe disa ekipe të tjera, si Kastrioti dhe Luftëtari. Shkumbini e gjeti me vështirësi golin më 10 minutat e fundit, duke e ndërlikuar vetë situatën, pa qenë në gjendje të shfrytëzojë rastet e shumta që pati. Mungesa e golit i tensionoi edhe më shumë futbollistët vendës, që e patën të vështirë të çliroheshin, duke i dhënë mundësi kundërshtarit të orientohet më mirë në fushë. Fillimi ishte mjaft i mirë për Shkumbinin dhe në 20 minutat e para ai dikton në fushë. Këtë presion e ka më të lehtë ta ushtrojë Shkumbini, për më tepër kur përballë ka një ekip të tërhequr në zonën e vet, duke i kushtuar rëndësi vetëm mbrojtjes, pa menduar pothuaj fare të reagojë. Vetëm pas kësaj minute miqtë kujtohen të kundërsulmojnë, duke parë mirë mungesat e qartësisë së vendësve. Veprimet e Shkumbinit më tepër janë spontane, ku mesfushorët e sulmuesit vihen në garë kush të gabojë më shumë në pasime, apo para portës. Eshtë fakt që Shkumbini krijon volum më të madh loje dhe di të thyejë sulmet e kundërshtarit me lehtësi, por gabon në aksionet e veta, duke mos shfrytëzuar lojën nga krahët për ta përqendruar lojën në qendër, aty ku kundërshtari e pati më të lehtë. Futbollistët e Shkumbinit duhet pranuar se krijuan raste përpara portës kundërshtare dhe duhet ta kishin zhbllokuar më shpejt rezultatin, por nga dëshira për të shënuar gabonin, duke u vënë në garë me njëri tjetrin sulmuesit e mesfushorët. Do të duhej dalja me karton të kuq e Bejollarit që loja të bëhet më interesante dhe më e hapur. Në këto minuta Luftëtari arrin të organizohet më mirë dhe të kundërsulmojë edhe më shumë, duke kërkuar të përfitojë nga hapësirat e lëna bosh te Shkumbini. Në këto minuta miqtë janë më të rrezikshëm, duke qenë pranë golit me Shenajn apo Simën dhe është meritë e portierit Llani që rrjeta e Shkumbinit nuk u prek. Duhej të vinte minuta e 80 të, kur Bizhyti, një nga futbollistët më të dalluar dje, të japë atë pasim goli që sulmuesi Rizvanolli do ta shfrytëzojë, duke shmanguar një mbrojtës dhe daljen e portierit për të harkuar për në portë. Edhe pas golit Shkumbini ngulmon përsëri, por pa arritur ta gjejë rrugën e rrjetës edhe për meritë të kundërshtarit. Në fund të takimit janë miqtë që kanë mundësinë më të mirë për të barazuar, por Llani tregohet i saktë në veprimet e tij. Si përfundim, mund të themi se Shkumbini fitoi tri pikë përballë një kundërshtari të vështirë, por plotësisht të merituar, edhe pse ekipi nuk ishte në ditën e tij më të mirë, e pranuar edhe nga trajneri Sejdini, sepse luhej pas kaq kohësh në Peqin dhe futbollistët ishin të tensionuar dhe të ngarkuar shumë nga ana psikologjike.

Deklarojnë:
Faruk Sejdini, trajner i Shkumbinit: "E pata menduar të vështirë takimin me Luftëtarin dhe ashtu doli. Këtë u përpoqa t'ua transmetoja edhe futbollistëve. Ekipi kthehej në Peqin pas kaq kohësh dhe kjo nuk do të ishte e lehtë për ta. E rëndësishme është që morëm tri pikët dhe kjo na kënaq. Meritë pati edhe kundërshtari si një ekip i përgatitur dhe që meriton më shumë. Luftëtari na bëri rezistencë të madhe, duke qenë i organizuar si duhet dhe duke ditur të përdorë kundërsulmin."
Ilir Spahiu, trajner i Luftëtarit: "Ishte një ndeshje me trysni të madhe psikologjike për vetë pozicionin që kemi. Në pjesën e parë ekipi vendës pati një presion, por pati gabime nga të dy ekipet. Edhe fillimi i pjesës së dytë pati po këtë pamje. Diferencën e bëri dalja me karton të kuq e Bejollarit me dy kartonë të verdhë dhe kjo na e vështirësoi shumë arritjen e qëllimit, si për ndryshimet që do të bënim, ashtu edhe për mbarëvajtjen e ndeshjes. Nuk na lejohet të marrim kartonë në ndeshje të rëndësishme, kur peshën e kartonit e paguan e gjithë skuadra."

Të veçanta:
Shkumbini i rikthehet fitores pas rreth 6 muajsh që i mungonte këtij ekipi që nga 23 shtatori 2006, kur fitonte për herë të fundit me Vllazninë në Peqin 3 1.
Organizatorët kishin hapur portat për të respektuar sportdashësit për ndeshjen e parë dhe hyrja e tyre ishte pa bileta.

[Noizy]

Kuqeblutë kanë shënuar një gol me anë të K.Dalipit, por kjo u ka mjaftuar për të marrë 3 pikët.


Vllaznia Partizani 1 0
Nga Shkodra, Gjergj Kola
Shënues: K.Dalipi 25'
Vllaznia: Grima, Vukçeviç (Radusinoviç 64'), Dabulla, Lici, Hoti, Doçi, Ahi (Lika 69'), Osja, Dalipi, Gudjabi (Bejzade 64'), Sukaj. Trajner: M.Josa
Partizani: Shehi, Tafaj, Beqiri, Pinari, Muzaka, Babamusta, Dhëmbi, Hallaçi, Progri (Gjyla 69'), E.Bakaj, Malindi (Abilaliaj 61').
Trajner: H.Lika.
Gjyqtarë: S.Jareci, E.Doda (Tiranë), D.Koreshi (Lushnjë)
Karton i verdhë: Doçi

Minutat:
6'- Sukaj gjuan fort me të majtën, topi përplaset në shtyllë, futet në lojë dhe aty Gudjabi e dërgon në rrjetë, por është në pozicion jashtë loje, sipas anësorit.
8'- Sukaj futet bukur në zonë, pason te Gudjabi, që nuk e arrin topin për ta shtyrë në rrjetë.
21'- Ahi gjuan fort me të djathtën e tij, nga një pozicion diagonal me portën, por portieri Shehi, me një hedhje shumë të bukur, bën mrekullinë, duke e grushtuar topin mbi tranversë.
22'- Goditje këndi për Vllazninë, topi shkon te Sukaj, që 2 metra larg portës nuk arrin ta shtyjë për në rrjetë.
24'- Sukaj vepron bukur në zonë, gjuan fort, por Shehi e largon topin në korne.
25'- DoçI nga këndi nis një top në zonë, që nuk largohet nga mbrojtësit e Partizanit. Përfiton K.Dalipi, që e shtyn në rrjetë, 1 0
27'- K.Dalipi gjuan fort nga 17 metra, topi kalon ngjitur me shtyllën e majtë pigule.
30'- Aksion model i Vllaznisë, topi shkon tek Ahi, që gjuan fort, por sërish Shehi grushton.
34'- Dabulla nuk arrin të largojë një top siç duhet nga zona e tij, përfiton Bakaj, që gjithsesi gjuan jashtë.
45'- Pinari ekzekuton një goditje dënimi, topi kalon ngjitur me shtyllën e djathtë pingule të Grimës.
49'- Aksion i shkëlqyer i Vllaznisë. Ahi kroson bukur nga e djathta për Gudjabin, që me kokë shënjestron portën e kuqe, por sërish Shehi e shpëton atë, duke e nxjerrë topin jashtë.
51'- Sukaj gjuan fort nga jashtë zone, por jashtë.
57'- Goditje këndi për miqtë. Babamusta e godet topin me kokë, por ai kalon ngjitur me shtyllën.
62'- Lici pason te Gudjabi, që gjuan fort me të majtën, por mbi tranversë.
71'- Sukaj pason te Dalipi, që fare pranë portës nuk arrin të shënojë golin e dytë.
72'- Muzaka brenda zonës godet, por pret Grima.
89'- Partizani kërkon të barazojë rezultatin me disa sulme, por porta e Grimës mbetet e paprekur.

Komenti:
Vllaznia ka fituar me meritë pasditen e djeshme ndaj Partizanit në një takim që vërtet ishte ndryshe nga ai i një jave më parë për kupë. Një lojë e bukur, me shumë raste e ritëm, ndërkohë që nuk munguan as pritjet e shkëlqyera të portierit Shehi, që ka meritë për mbylljen e ndeshjes me rezultatin 1 0. Ndeshja ka nisur më mirë për vendasit, që ushtrojnë presion. Në skenë ka dalë dyshja Gudjabi Sukaj, e cila, ndonëse luan për herë të parë së bashku, premton për gjëra të mëdha për Vllazninë. Gjatë gjithë ndeshjes ata kanë qenë shumë problematikë për mbrojtjen e kuqe, madje merreshin vesh mjaft mirë me njëri tjetrin. Për rrjedhojë kanë dalë disa herë para portës së Shehit, duke provuar aftësitë e tyre, por nga ana tjetër edhe fati nuk ka qenë me ta. Goli i Dalipit, nga më të mirët në këtë ndeshje për Vllazninë, ka qenë vendimtari, sepse, pavarësisht përpjekjeve të dy skuadrave, nuk do shënoheshin të tjerë. Shkodranët e kanë dominuar lojën në të gjitha drejtimet deri rreth minutës së 35 të, por më pas kanë lëshuar terren, duke u dhënë mundësi futbollistëve të Partizanit të shohin përpara, por çuditërisht ata kërkojnë të përfitojnë vetëm prej goditjeve standarte. Në pjesën e dytë është e njëjta dukuri, Vllaznia që luan më mirë në minutat e para të saj dhe pastaj miqtë që hidhen të tërë në kërkim të golit të barazimit. Ndryshimi i vetëm me pjesën e parë ishte se këtë herë kuqeblutë nuk lëshuan vetëm në 10 minutat e fundit të saj, por për më tepër se gjysëm ore. Ata u ndikuan natyrisht edhe nga dëmtimet e dy lojtarëve të formacionit, teksa Ahi e Vukçeviç nuk mundën ta çonin ndeshjen deri në fund. Po ashtu, Josa ka larguar nga fusha e lojës edhe Gudjabin, që harxhoi shumë energji. Si rrjedhojë, miqtë kërkuan me ngulm barazimin, por shkodranët kanë luajtur shumë të ngjeshur prapa, duke pasur në krye një lider të vërtetë, siç është Suad Lici. Ai ka qenë gjithnjë i saktë në ndërhyrjet e tij, duke i dhënë garanci skuadrës. Si pasojë takimi është mbyllur me fitoren e Vllaznisë 1-0, e cila, pas kësaj jave ngjitet në vendin e tretë të renditjes, duke e lënë prapa Partizanin. Kjo fitore ishte jo vetëm autokritika e duhur e kuqebluve para sportdashësve të tyre, por edhe një lloj "hakmarrjeje" ndaj të kuqve, të cilën e "vodhën" barazimin në çerekfinalen e parë të kupës. Gjithsesi, ndeshja e djeshme ka treguar se Vllaznia ka ende probleme, edhe pse organika e saj ka lojtarë cilësorë. Tani "oreksi" i kuqebluve duket mjaft i hapur, pasi e shikojnë plotësisht të arritshëm vendin e dytë, ashtu sikurse edhe kupën, çka do t'i shpiente ata në Kupat e Europës, që është edhe objektivi kryesor i Vllaznisë në këtë edicion.

Thanë pas ndeshjes:
Mirel Josa, trajner i Vllaznisë: "Morëm një fitore të merituar në këtë takim. Sidomos në pjesën e parë loja ka qenë shumë pozitive, sepse kemi qenë shumë agresivë në sulm me Gudjabin e Sukajn, të cilët u mbështetën mirë nga Dalipi dhe krahët. Në pjesën e dytë i dhamë terren kundërshtarit. Kjo ndodhi jo se desha unë ta tërhiqja skuadrën, por ashtu u shfaqën rrethanat e lojës. Jam shumë i kënaqur me rigorizitetin e shfaqur në veprime nga lojtarët e mi dhe tashmë duhet të shohim drejt ndeshjeve të ardhshme, ku mbi të gjitha më intereson ndeshja e radhës me Apoloninë".
Hasan Lika, trajneri i Partizanit: "Ndeshjen nuk e filluam mirë, teksa Vllaznia na vuri në vështirësi. Si rrjedhojë e këssaj morëm edhe një gol, që më shumë ishte fryt i gabimit në mbrojtjen tonë. Ekipi im dha maksimumin në këtë takim dhe në pjesën e dytë u përpoqëm mjaft për të shënuar. Me pak kujdes mund t'ia kishim arritur, por nuk mundëm. Kemi zhvilluar një ndeshje më të mirë edhe se në kupë, pavarësisht se sot dolëm të humbur. Ndaj gjyqtarëve nuk kemi pretendime të mëdha, por ishin vetëm 2 3 vendime që mendojmë se nuk ishin të drejta."

Të veçanta:- Ndeshjen e djeshme e kanë ndjekur më tepër se 5 mijë tifozë kuqeblu. Ata në ndryshim nga shumë ndeshje të tjera të Vllaznisë, kanë qenë më të zjarrtë në mbështetje të skuadrës së tyre të zemrës.
- Në momentin e shënimit të golit të Dalipit, nga tribuna qëndrore janë lëshuar dy pëllumba, të cilët kishin të lidhur në këmbët e tyre nga një shall kuqeblu.
- Malazezi Radusinoviç rikthehet në fushë, duke u aktivizuar me Vllazninë pas gati tre muajsh mungese, si pasojë e një dëmtimi që ka pasur.

[Noizy]

Pas kësaj fitoreje vlonjatët i largohen disi zonës së ftohtë dhe shikojnë për më lart.


Flamurtari Dinamo 2 0
Shënues: Sakaj 40', 70'

Flamurtari: Dine, Driza, Delain, Bedini, Sakaj, Kuqi, Bokatola (Guna 88'), Begaj, Nenaj, Rustemi (Arifaj 63'), F.Xhafa. Trajner: V.Ruci
Dinamo: Lika, Diop, E.Xhafa, Ishka (Çaushaj 17') (Nuhiu 52'), Ahmataj, Deliallisi, Poçi, Jupi (Qorri 46'), Ferraj, Vinçetiç, Pejiç. Trajner: R.Jupi
Gjyqtarë: Sh.Guçe, A.Guçe (Lushnjë), E.Miho (Durrës)
Kartonë të verdhë: Begaj, Bokatola, Dine

"Radiografia"
3&4' Brenda dy minutash Xhafa dhe Nenaj kanë rrezikuar portën e Likës, por mbrojtësit Diop, E.Xhafa dhe Ahmataj gjuajtjet e vlonjatëve i kanë devijuar jashtë vijës fundore.
10' Bega gjuan nga 30 metra, pasi ka marrë shërbimin e Delainit, por gjuan mbi traversën e sipërme të portës së miqve.
16' Rustemi ka qenë shumë pranë golit kur ka gjuajtur fort brenda zonës pas një gabimi të Vinçetiçit, por Lika e zotëron topin me vështirësi në dy kohë.
20' Bokatola nga një goditje këndi kërcënon portën e Likës, por topi devijohet nga Diop në korne.
30' Rustemi përsëri përfiton nga një humbje ekuilibri të Ahmatajt, i rrëmben topin atij, depërton në zonë, por topi i gjuajtur prej tij përplaset në trupin e portierit Lika e devijohet prej andej.
33' Kuqi gjuan nga 25 metra, por topi përfundon pak mbi tranversën e sipërme e përfundon jashtë.
35' Gjuan Ahmataj fort, topi përplaset në këmbët e Kuqit dhe zotërohet nga portieri Dine.
40' Sakaj ka ndjekur me zgjuarësi një pasim gjysmë lartësie të dhënë nga Nenaj, duke përcjellë topin në rrjetë, pra 1 0 për Flamurtarin.
47' Qorri i porsafutur në lojë ndërmerr një aksion personal, gjuan nga 35 metra, por Dine e zotëron topin i sigurt.
57' Dy gjuajtje njëra pas tjetrës të Nenajt e F.Xhafës, të cilat përplasen në gjoksin e portierit Lika duke përfunduar në korne.
60' Gjuajtjen e fortë të Begajt nga distanca, portieri Lika e grushton me vështirësi duke shmangur rrezikun nga porta e tij.
65' Gjyqtari Guçe nuk akordon 11-metërsh për Flamurtarin kur Bega pengohet nga Diop e rrëzohet përtokë brenda zonës.
70' Në një aksion të organizuar mirë nga vendësit Bokatola del në ballë të zonës së kundërshtarit, gjuan saktë, por topi përplaset në duart e portierit Lika, kthehet në zonë, por Sakaj në ecje e sipër gjuan dhe tund rrjetën në 2 0 për vlonjatët.
74' Një asist i dhënë nga Sakaj për Bokatolën shpërdorohet nga ky i fundit teksa gjuan jashtë.
76' Ahmataj, pas një shërbimi të Pejiçit, gjuan fort, por topi përfundon mbi portën e Dines.
83' F.Xhafa triblon dy mbrojtës të Dinamos njëri pas tjetrit brenda zonës, gjuan fort, por topi përplaset në shtyllën pingule të portës së Likës dhe përfundon jashtë.
85' Ahmataj gjuan brenda zonës, por topi përfundon mbi portën e Dines dhe jashtë.
88' Xhafa pengohet brenda zonës së kundërshtarit nga mbrojtësit dinamovit, por gjyqtari Sh.Guçe nuk e ka vlerësuar të drejtë pretendimin e vendësve për 11-metërsh.

Komenti:
Flamurtari arrin një fitore të pastër në Vlorë ndaj Dinamos me rezultatin 2 0. Kësisoj kuqezinjtë vlonjatë marrin fitoren e parë për vitin 2007 dhe të dytën nën drejtimin e trajnerit Vasil Ruci. Flamurtari ishte përgatitur për një fitore ndaj Dinamos gjatë gjithë javës, pasi pozicioni në renditje i skuadrës ndikoi ndjeshëm në vlerësimin e kundërshtarit të radhës. Ndryshe nga tam tamet e dinamovitëve, të shoqëruara me deklarata euforike në gazetat sportive, Flamurtari zgjedh si taktikë heshtjen ndaj shtypit, duke mësuar edhe nga pësimi i rezultatit 3 0 ndaj Besës. Një mentalitet ky që ndikoi qysh në minutat e para të lojës, kur vlonjatët me anë të Xhafës e Nenajt mund të shënonin golin e parë. Vlonjatët janë shfaqur për 90 minuta si një ansambël unik, ku nuk mund të bëheshin dallime se cili repart po luante më mirë se tjetri. Në asnjë rast nuk kanë mundur të depërtojnë në zonën e vendësve sulmuesit dinamovitë, pasi Driza, Delain e Bedini ishin të sigurt e të saktë në ndërhyrjen ndaj Pejiçit, Jupit, Qorrit, Nuhiut etj. Sulmi dinamovit ndaj Flamurtarit është shfaqur pa fantazinë e duhur, pasi edhe sulmuesi kryesor Pejiç ka luajtur në distancë nga shokët e tij, duke mos rrezikuar në asnjë rast portën e Dines. Aq i vërtetë është fakti, sa që shokët e Redi Jupit kanë preferuar të gjuajnë vetëm nga distanca në 5 6 raste nëpërmjet Ahmatajt e Qorrit. Lojtari më i mirë për të dy skuadrat ishte mesfushori Artan Sakaj jo vetëm për arsyen e shënimit të dy golave, por edhe se ai shërbeu si një dispeçer i vërtetë për skuadrën së bashku me Nenajn. Skuadra e Rucit ka funksionuar majft mirë si në lojën nga krahët, por edhe në sulm. Sulmuesit e saj F.Xhafa e A. Rustemi kanë rrezikuar në shumë raste portën e Likës, por forma e mirë e këtij të fundit i ka frenuar gjuajtjet e tyre. Të dy golat e shënuar nga Sakaj nga një për çdo pjesë loje kanë qenë fryt i aksioneve të mirorganizuara nga Nenaj e Bokatola, të cilat i ka finalizuar me intuitë Sakaj. Fitorja e arritur dje ndaj Dinamos i ka shërbyer Flamurtarit për t'u ngjitur në vendin e 7 të të renditjes, duke përfituar edhe nga rezultatet negative të skuadrave, të cilat ishin në pozitat e vlonjatëve më parë. Pas tri ditësh skuadra e Vasil Rucit do të ndeshet me Tiranë në transfertë, ndaj së cilës në Vlorë gjatë fazës së parë ka fituar me rezultatin 3 2.

Deklaruan:
Vasil Ruci, trajner i Flamurtarit: "E kisha motivuar skuadrën gjatë javës me idenë se ndeshja ndaj Dinamos ka vlerën sa për gjithë kampionatin. Jam i kënaqur se arritëm atë që dëshironim. Loja e ekipit më kënaq e më ngroh se gradualisht po shkon në interpretimin e asaj loje të bukur të traditës sonë. Kam bindjen se kjo mënyurë loje do të interpretohet edhe në të ardhmen. Sot ekipi nuk ka gabuar ashtu si ndaj Besës. Ne do të vazhdojmë të marrim pikë, pse jo, edhe në kryeqytet ndaj Tiranës.
Redi Jupi, trajner i Dinamos: Nuk u paraqit me pretendimin se ishte i dëmtuar nga loja.

"Të veçanta"
Të pranishëm në tribunën "VIP" ishte kryetari i bashkisë së Vlorës, Shpëtim Gjika, por edhe presidenti i Dinamos Besnik Sulaj.
Takimin midis dy skuadrave e kanë ndjekur rreth 4 mijë sportdashës.
Sokol Ishka i Dinamos, i cili është dëmtuar nga mbrojtësi Bedini në kokë, është shoqëruar nga vlonjati edhe pas takimit.