Lajmet nga Superliga 2006/2007

[Noizy]

Java e 19-të: Të kuqtë në vendin e dytë, falë gabimeve të rivalëve, fundi i klasifikimit "thith" disa skuadra.


Tirana nuk njeh kundërshtarë dhe e shikon veten në "arrati", duke pasur të drejtë t'i gëzohet qysh tani titullit kampion, edhe pse ka ende javë për t'u zhvilluar dhe matematikisht asgjë nuk është zgjidhur. Sidoqoftë, fitorja e djeshme në Gjirokastër ka rikonfirmuar supremacinë bardheblu në kampionatin shqiptar. Duke veçuar Tiranën, që "ha bukë më vete", duhet thënë se java e 19-të ka rezultuar e mbarë për skuadrën e Partizanit. Kjo, jo vetëm nga meritat e të kuqve, që në fakt morën 3 pikë të vlefshme ndaj Kastriotit, falë një autogoli të Gallos me ndihmën e Dhëmbit, por edhe nga "dhuratat" e rivalëve të tjerë, që synojnë vendin e dytë. Kështu, barazimi i Teutës me Shkumbinin u ka dhënë "oksigjen" jo vetëm peqinasve të vendit të fundit, por edhe të kuqve kryeqytetas, që kanë përfituar, duke i parakaluar "djemtë e detit". Një "skenar" i tillë ka rezultuar edhe me dy ndjekëset e tjera të kreut, Vllaznia dhe Dinamo, të cilat kanë "ngrënë kokën" e njëra-tjetrës, duke ndarë nga një pikë, e cila nuk ka kënaqur asnjërën palë. Kështu kanë bërë edhe kampionët e Elbasanit në Fier, me Apoloninë, që synon mbijetesën, duke e parë veten në vendin e 6-të pas kësaj jave. Kësisoji, këto rezultate të skuadrave pretendente për vendin e dytë, që do të thotë pjesëmarrje në Kupat e Europës, kanë "çuar ujë në mullirin" e Partizanit, i cili, duhet pranuar, mezi ka "bluar" Kastriotin e Krujës. Duke parë renditjen e kategorisë superiore, pas kësaj jave, konstaton një ngjeshje të tri skuadrave, që mëtojnë vendin e dytë, Partizani, Teuta dhe Vllaznia, të cilat përshkallëzohen me nga një pikë diferencë nga njëra-tjetra, ndërsa në mesin e artë të klasifikimit gjenden Elbasani me Dinamon, që tentojnë për më lart. Pjesa tjetër, nga vendi i 8-të, që e mban Flamurtari, me pikë të barabarta me Luftëtarin pasues, deri te Shkumbini i fundit, përbën "aksin" e rrezikshëm, që të shpie në kategorinë e parë.
Shkumbini, pika e rikthimit në shtëpi
Nëse ka një rezultat të papritur në ndeshjet e javës së 19-të, ky është barazimi i Durrësit, mes Teutës ambicioze në këtë kampionat dhe Shkumbinit të fundit. Kur pritej "autokritika" e duhur e durrsakëve, pas asaj humbjeje shokuese 5-0 një javë më parë me Tiranën, të besuarit e Sejdinit i kanë bërë "postbllokun" e radhës Teutës. Një goditje tjetër psikologjike për skuadrën e Starovës, e cila mbyll dy javë për t'u harruar, duke lëshuar pas disa kohësh edhe vendin e dytë në klasifikim. Nga ana tjetër, Shkumbini merr një pikë shprese në Durrës, duke i dhënë fund edhe "shtegtimit"
6-javor nëpër fushat kundërshtare, si pasojë e dënimit të dhënë nga FSHF-ja. Rikthimi i skuadrës peqinase në fushën e saj mund të shikohet si një "dritare", nga ky duket pak dritë në fund të "tunelit", i cili të shpie një kategori më poshtë.
Fundi "thith" Flamurtarin dhe Luftëtarin
Fitorja e Tiranës në Gjirokastër dhe ajo e Besës në Kavajë e kanë intriguar, madje dramatizuar "luftën" për mbijetesë, aq sa në të e shikon veten edhe Flamurtari, që dukej se po ecte mirë në këtë rikthim mes më të mirëve. Vlonjatët e drejtuar nga Vasil Ruci e kanë nisur mjaft keq vitin 2007, teksa kanë marrë vetëm 1 pikë, në shtëpi me Vllazninë, duke e parë veten në "vallen" për mbijetesë, krahas Luftëtarit, Shkumbinit, Kastriotit dhe Apolonisë. Për sa u takon skuadrave të fundit të tabelës, java e ardhshme duket se do të jetë "jetë a vdekje", sepse do të ketë ballafaqime direkte mes tyre. Kështu, Shkumbini i fundit, do të rikthehet në shtëpi, ku do të presë Luftëtarin. Një fitore e peqinasve do t'u jepte më shumë shpresë atyre, ndërkohë që do të pëkeqësonte skajshëm pozitat e gjirokastritëve. Po kështu, në Krujë, sfida mes Kastriotit dhe Apolonisë do të jetë deri diku vendimtare, sepse, nëse ktrutanët fitojnë, kanë të drejtë ta bëjnë gjumin më të qetë, ndërsa fierakëve u ngatërrohen keq llogaritë, në të kundërt, po fitoi Apolonia, fundi i klasifikimit bëhet vërtet dramatik, duke "eklipsuar" deri diku edhe përpjekjet e të tjerëve për "zonën europiane", ndërkohë që Tirana ka të drejtën të dirigjojë e qetë në "kullën e regjisë" së kampionatit.

[Noizy]

Durrsakët kanë bërë një tjetër hap fals, çka mund t'i rrezikojë shumë vendin e dytë në klasifikim.


Teuta Shkumbini 1 1
Shënues: Xhafaj 4', G.Bylykbashi 40'

Teuta: Osmani, Vrapi, Tetova, Lako, Kovaç (Hodo 46'), Devolli, Shkëmbi, Kuli, Gjondeda, Xhafaj, Mancaku. Trajner: S.Starova.
Shkumbini: LLani, Salliu (Gjata 49'), Muça, Xhyra, Beqiri, Dervishi, Bizhyti, Ramazani, G.Bylykbashi (Taçi), Bubeqi (Çela), Rizvanolli. Trajner: F.Sejdini.
Gjyqtarë: A.Janku, A.Lamçe, A.Pregja (Tiranë)
Kartonë të verdhë: Bubeqi, Salliu.

"Radiografia"
4' Kovaç kroson për Xhafajn, që brenda zonës godet bukur me kokë, duke kaluar Teutën në avantazh. 1 0 për Teutën.
16' Kuli gjuan fort nga distanca dhe topi del jashtë kuadratit.
20' Bizhyti pason për Rizvanolin, që godet bukur në zonë, por njëri nga mbrojtësit largon rrezikun nga porta.
24' Xhafaj pason për Shkëmbin, që pasi shmang 2 mbrojtës, godet, por topi largohet nga njëri prej mbrojtësve miq.
25' Shkëmbi ekzekuton një goditje këndi, Devolli godet me kokë jashtë kuadratit.
27' G.Bylykbashi godet në ecje e sipër, topi devijohet nga mbrojtja, gjuan përsëri Bubeqi, por topi kalon jashtë kuadratit të portës.
30' Kuli kroson bukur për Mancakun, që gjuan ngjitur me shtyllën pingule.
31' Xhafaj shmang 2 mbrojtës të Shkumbinit, gjuan, por topi kalon jashtë kuadratit të portës.
40' G.Bylykbashi ekzekuton saktë një goditje dënimi, duke e kaluar topin në krahun e majtë të portierit Osmani. Shkumbini barazon në 1 1.
50' Kuli godet me kokë jashtë kuadratit të portës.
57' Rizvanolli, pasi shfrytëzon një kros nga e djathta, gjuan me kokë, por topi kalon ngjitur me shtyllën.
64' Kuli gjuan nga distanca dhe pret portieri.
68' Devolli gjuan në ecje e sipër nga 30 metra dhe topi kalon jashtë kuadratit të portës.
75' Durrsakët pretendojnë për një 11 metërsh pas një prekjeje të topit me dorë nga një prej mbrojtësve të Shkumbinit, por Janku vazhdon lojën.
89' Hodo futet bukur në zonë, por gabon në momentin e pasimit të topit për Xhafajn, që ishte krejtësisht i lirë.

Komenti
Teuta ka bërë hapin e dytë fals pas asaj humbjes së thellë me Tiranën, në një kohë që Shkumbini ka marrë një pikë të merituar në "Niko Dovana", ndërsa durrsakët lënë edhe vendin e dytë. Takimi ka nisur me një minutë heshtje për nder të ish futbollistit të Teutës në vitet '50 '60 Banush Pasha, që u nda nga jeta disa ditë më parë. Teuta që e ka gjetur shumë shpejt rrugën e golit me anë të Daniel Xhafajt, nuk ka ditur që të menaxhojë dhe kontrollojë lojën, duke i lënë terren Shkumbinit, që në minutën e 40 të do të barazonte me një goditje dënimit të realizuar në mënyrë perfekte nga Gentian Bylykbashi. Pjesa e parë ka qenë e ekuilibruar, me një Shkumbin që mbrohej mirë dhe kundërsulmonte rrezikshëm, por edhe me një Teutë që ka rrezikuar disa herë portën peqinase. Starova në pjesën e parë ka luajtur me dy "pyka", Xhafajn dhe Kulin, në një kohë që ka sulmuar me dy sulmues të tjerë nga krahët. Një lojë sulmuese e Starovës, por që dha rezultat vetëm me shënimin e golit të parë, sepse më pas ekipi humbi qetësinë dhe qartësinë para portës peqinase. Nga ana tjetër, Sejdini ka zbritur në fushën e lojës një ekip të kalibruar mirë, që jo vetëm mbrohej, por edhe kundërsulmonte rrezikshëm me Rizvanollin. Në pjesën e dytë Starova largon Mancakun dhe Kovaçin, duke hedhur në fushën e lojës Bunën dhe Kulin. Teuta rrit nivelin e lojës dhe e gjithë pjesa e dytë është zhvilluar me një portë, ndonëse rastin më të mirë për të shënuar e ka pasur Shkumbini me anë të Rizvanollit, që me një goditje me kokë për pak sa nuk ka shënuar në portën e Osmanit. Durrsakët kanë shpërdoruar disa raste të mira, në një kohë që Shkumbini është mbrojtur mirë dhe nuk ka lejuar të preket kuadrati i portës. Sejdini ka marrë një pikë përballë Starovës, që tashmë po përballet me problemet e para te Teuta, që ka bërë nisjen më të keqe në vitin 2007.

Deklarojnë:
Sulejman Starova, trajner i Teutës: "Mendoj se Shkumbini e meritoi barazimin, pasi tregoi shpirt gare, në një kohë që futbollistët tanë nuk ditën të shfrytëzojnë faktin që shënuan në fillim dhe nuk arritën të shënonin përsëri për të mbyllur takimin. Gjatë javës kishim punuar me futbollistët që ta vlerësonin këtë takim, por realiteti foli ndryshe. Po bëjmë gabime të rënda që po na kushtojnë, veçanërisht në drejtim të golave, që po pësojmë në goditje standarte. Çdo futbollist duhet të kuptojë se duhet të luajë si profesionist, pasi përpara do të kemi edhe takimin e kupës me Tiranës."
Faruk Sejdini, trajner i Shkumbinit: "Vlerësoj faktin që takimi u zhvillua në "fair play" dhe fusha e Durrësit është një model në këtë drejtim. Mendoj se pjesa e parë ishte e ekuilibruar, në një kohë që pjesa e dytë foli për Teutën, që u hodh në sulm për të shënuar. Kjo ishte e kuptueshme për vetë pozicionet e kundërta që kanë dy ekipet në tabelën e klasifikimit. Shkumbini nuk e meriton vendin që ka. Kontigjenti ekziston dhe po stërvitemi për të shkuar përpara."

Të veçanta:
Takimi ka nisur me 1 minutë heshtje për nder të ish futbollistit të Teutës në vitet '50 '60, Banush Pasha.
Vetëm 20 spektatorë e kanë ndjekur takimin Teuta Shkumbini.

[Noizy]

Fierakët vazhdojnë me moral të lartë, ndërsa Elbasani vazhdon të mos fitojë, edhe pse kalon me dy gola avantazh.

Apolonia Elbasani 2-2
Shënues: Abdulla 37', Periç 50', Delioski 55', D.Mema 87'

Apolonia: Zendeli, Rosha, Shosha, Dimovski, Da Silva, Gërço (Zheraldinjo 57'), Ristevski (Rrushani 68'), Auia, Delioski, Junior (Mema 46'), Plaku. Trajner: A.Marko.
Elbasani: Kotorri, Sina, Kacollja, Papuçi, Nallbani, Patushi, Periç (Memetaj 59'), Abdulla, Kaçi (Leci 70'), Merkoçi. Trajner: E.Gëzdari.
Gjyqtarë: M.Metohia (Lezhë), E.Doda (Tiranë), F.Lamaj (Durrës)
Kartonë të verdhë: Kacollja, Rushani

"Radiografia"
4' Merkoçi vonohet në goditje dhe ndërhyn mbrojtja.
10' Da Silva godet fort, por devijohet topi nga një mbrojtës.
12' Da Silva shërben mjaft bukur për Delioskin, që godet jashtë.
20' Junior pason tek Gërço, që godet jashtë.
25' Nallbani lëshon një "bombë" nga distanca, devijon Zendeli në korne.
27' Merkoçi tregon klas, tek godet nga distanca, topi prek shtyllën traversale dhe kthehet në lojë.
28' Plaku kundërpërgjigjet me goditje nga distanca, por tepër e gabuar.
37' Periç ekzekuton goditjen e dënimit prirët nga e majta, topi devijohet nga një mbrojtës vendas dhe Abdulla shënon për miqtë. 0-1 për Elbasanin.
44' Junior nuk tregohet i vëmendshëm, kur fare pranë vijës fatale humbet një top të artë për gol.
45' Plaku rrëshqet nga e djathta e dy "rojeve" të tij, por pret Kotorri.
50' Periç nuk fal gabimin e mbrojtjes vendëse dhe 0-2 për Elbasanin.
55' Shoshi lëshon një harkore nga e djathta, Mema me kokë shërben për Delioskin, që nuk fal dhe Apolonia ngushton në 1-2.
65' Mema për Ristoskin, që godet, por reagon Kotorri.
85' Aksion i gjatë i fierakëve, goditje nga distanca e Rushanit,
Papuçi prek topin me dorë, por nuk shikohet ky veprim nga gjyqtarët.
86' Auia gabon, Memetaj godet në afërsi të vijës fundore dhe topi kalon tërë pasqyrën e portës.
87 Rushani përsëri krosim nga e djathta, Mema tregohet tepër i zgjuar, tek e drejton topin në portën e Kotorrit dhe Apolonia barazon në 2 2.
88' Plaku godet me të majtën nga distanca, por jashtë.

Komenti:
Tifozët fierakë mezi prisnin ta shikonin skuadrën e tyre në "Loni Papuçiu", ndaj kishin mbushur shkallët e stadiumit në mbështetje të futbollistëve të tyre. Por kampionët në fuqi, edhe pse jo në pozita të mira në tabelën e klasifikimit, me përforcimet e kryera në merkaton e janarit, e kishin vlerësuar shumë këtë ballafaqim. Pas disa rasteve nga të dyja skuadrat, do të vijë goli i parë me autor Abdulla. Ishte një goditje dënimi në distancë për miqtë, të cilën e ekzekuton Periç dhe Abdulla nga një pozicion i dukshëm jashtë loje shënon golin për verdheblutë, që u quajt i rregullt nga gjyqtari. Më parë miqtë kishin shkundur shtyllën traversale me anë të futbollistit Merkoçi, por topi është futur në lojë, edhe pse futbollistët elbasanas kanë kundërshtuar gjyqtarin. Braziliani Junior ka shpërdoruar rastin më të pastër, ku vetëm para porte nuk ka mundur të çojë në rrjetë krosin e Gërços nga e majta. Me gjithë përpjekjet e golashënuesit Plaku për të rrezikuar te porta e Kotorrit, Apolonia është e pafuqishme përballë mbrojtjes tepër të ngjeshur mike, ku Kacollja, apo Sina e Stojku janë në një ditë të mirë. Kur pritej që fierakët të barazonin rezultatin, vendësit i kanë dhuruar një top futbollistit Periç, që befasisht ka gjetur anën e djathtë të Zendelit dhe Elbasani udhëheq 2 0. Edhe pse në disavantazh, vendësit nuk e lëshojnë iniciativën dhe zëvendësimi i Memës me Juniorit ka dhënë frytet e veta. Shoshi harkon nga e djathta, Mema me kokë brenda zonës për Delioskin, që fare pranë portës shënon golin e tij të parë me Apoloninë. Goli sikur ka ndezur sedrën fierake dhe Delioski ka përsëri një mundësi shënimi, por Kotorri i thotë "ndal" gjuajtjes së tij. Minutat e fundit janë tepër dramatike dhe Rushani ka lëshuar një top brenda zonës, ku shfaqet sërish Mema, por këtë radhë në rolin e një golashënuesi dhe kaq ka mjaftuar që stadiumi të ndizet. Ndodhi kjo në minutën e 87 të dhe nga ky moment Kotorri i vë "drynin" portës dhe vërshëllima e gjyqtarit i ka ndarë paqësisht të dy ekipet, ku asnjëri prej këtyre skuadrave nuk mbeti e kënaqur, pasi objektivat janë shumë larg për t'u realizuar, edhe pse diametralisht të kundërta.

Deklarojnë:
Andrea Marko, trajner i Apolonisë: "Duke iu referuar volumit të kryer nga skuadra jonë, e cila zotëroi 3/4 e fushës, por duke u ndëshkuar nga dy gola, natyrisht që jam i kënaqur me barazimin. Synimi ynë ishte marrja e tri pikëve, pasi për ne çdo takim fillon për plus tre, por duke pasur një skuadër kampione përballë, e patëm të vështirë për të fituar."
Edmond Gëzdari, trajner i Elbasanit: "Luajtëm përballë 14 futbollistëve, pasi patëm kundër tre gjyqtarët dhe 11 futbollistë fierakë. Sikur të shënonim edhe 4 gola, besoj se do të pësonim 4 gola. Ky është futbolli shqiptar, ku vendosin gjyqtarët."

Të veçanta:
Edhe pse skuadra fierake mban ende vendin e parafundit në superligë, kjo nuk i ka penguar 4000 sportdashësit fierakë të mbushin shkallët e stadiumit dhe të përkrahin pa rezerva skuadrën.
Dy presidentët, K.Kokëdhima dhe A.Laze, e kanë ndjekur të dy këtë takim nga tribuna VIP.
Parrulla e madhe "Tifozët ultras" e shpalosur nga ana e fierakëve në tribunën përballë është mbledhur pas pësimit të golit të dytë.

[Noizy]

Fantazisti shqiptar Ervin Skela i është rikthyer stërvitjes dhe ka lënë pas problemet e kohëve të fundit.


Mesfushori vlonjat i kombëtares shqiptare Ervin Skela kaloi gjatë periudhës së merkatos dimërore në Bundesligën gjermane, me skuadrën Energia Cotbus. Pas problemeve të shumta që pati, ai tashmë i është rikthyer stërvitjes dhe ndihet shumë mirë. Gjatë kësaj kohe fantazisti shqiptar ka qenë i pafat dhe iu deshën plot katër javë që të merrte veten. Skela u kurua në një klinikë të specializuar të qytetit të Esenit për vlerat e larta të gjakut që kishte në trup. Pas periudhës jo të mirë që kaloi tek Askoli në Serinë A, tani vlonjati i është rikthyer stërvitjes me skuadrën e tij të re, Energia Cotbus, dhe dëshiron që sa më shpejt të jetë në fushë. Në një prononcim për mediat gjermane, shqiptari shprehet se ndihet mirë dhe dëshiron të kthehet sa më shpejt në fushën e lojës. "Kam gjashtë ditë që kam filluar vrapimet e lehta dhe avash-avash po përmirësohem ndjeshëm. Mund të them se tani ndihem shumë mirë dhe jam i lumtur që iu riktheva stërvitjes, sepse kalova disa peripeci. Në këtë moment kryej vetëm një seancë stërvitore në ditë, ndërkohë punoj edhe në sallën e forcës, ku kam një program të veçantë, i cili më është rekomanduar nga trajneri i fitnesit, Dirk Keller. Në seancat stërvitore të ardhshme, ngarkesa do të rritet, ku natyrisht kërkoj që të arrij në një kohë të shpejtë formën fizike,"- tha Skela. Ndërkohë, vlonjati nuk ngurroi të jepte edhe një koment për ekipin e ri. Sipas tij, Energia Cotbus po tregon një formë të mirë dhe nga ndeshja në ndeshje po tregon rritje në lojë. "Shokët e ekipit po tregojnë një formë të mirë dhe besoj se do të vazhdojnë kështu edhe në takimet e ardhshme. Pavarësisht humbjes me Maincin, mendoj se skuadra i ka të gjitha mundësitë që të reflektojë në takimin e kësaj jave me Nurenbergun. Kam besim se me këtë kontigjent lojtarësh që ka ekipi nuk do të rezikohemi për rënien nga kategoria,"- pohoi mesfushori më i ri i Energia Cotbus. I pyetur se sa e madhe është dëshira e tij për t'u aktivizuar, Skela u përgjigj: "Dëshira për t'u rikthyer në fushën është mjaft e madhe. Situata që kalova ishte e paparë ndonjëherë për mua, sepse nuk isha mësuar të mos luaja kaq gjatë. Tani po humbas durimin dhe mezi pres të rikthehem, por së pari duhet të jem plotësisht i shëndetshëm dhe të arrij në një formë të mirë sportive,"- deklaroi mesfushori shqiptar 31-vjeçar, Ervin Skela. Një rikthim i shpejtë i Skelës në fushë normalisht do të ishte një lajm i mirë për kombëtaren shqiptare dhe trajnerin Oto Bariç, pasi dihen vlerat e një lojtari si Skela.

[Noizy]

Ekipi kavajas nuk gabon, duke shënuar sërish plot tre gola dhe duke iu larguar përfundimisht rrezikut.



Besa Flamurtari 3 0
Shënues: Grizha 42', Veliaj 43', 62'

Besa: Mustafa, Grizha, Hoxha, Belisha, Arapi, Babaj, Veliaj,
Ebanda (Elokan 55'), Binagol (Ahmeti 73'), Xhihani, Nuhiu (Mërtiri 82'). Trajner: V.Bici
Flamurtari: Kyçyku (Dine 46'), Driza, Behari, Begaj (Strati 46'), Bedini, Kuqi, Sakaj, Bokotola, Nenaj, Rustemi (Karriqi 73'), Xhafa. Trajner: V.Ruci.
Gjyqtarë: T.Latifi (Gjirokastër), E.Biçaku (Tiranë), D.Koreshi (Lushnjë)
Kartonë të verdhë: Bokotola, Kuqi, Hoxha, Ahmeti, Babaj

"Radiografia"
10' Nuhiu pason shkëlqyeshëm te Xhihani, ky i fundit godet brenda zonës, por një mbrojtës devijon në korne.
20' Xhihani godet prirtazi me portën dhe topi kalon ngjitur me shtyllën pingule.
25' Xhihani përsëri brenda zonës me kokë, por portieri mik devijon në korne.
27' Bokotola shfrytëzon pasimin e Nenajt, gjuan, por topi kalon ngjitur me shtyllën pingule.
30' Babaj lëshon një "predhë" të vërtetë nga distanca, por portieri Kyçyku pret në dy kohë.
32' Nenaj, pasi ka shmangur në zonë dy mbrojtës, gjuan, por dalja e portierit Mustafa i ngushton rrezen për të shënuar golin e parë të takimit.
35' Nuhiu ul me gjoks një top drejt portës dhe ndërhyrja e shpejtë e portierit eviton golin e sigurt.
41' Binagol godet nga distanca, duke dhënë sinjalin e golit.
42' Qendërmbrojtësi shtatlartë Robert Grizha brenda zonës shënon golin e tij të parë me fanellën e Besës. 1 0 për Besën.
43' Ende pa u shuar jehona e golit, Veliaj përfiton nga dalja e portierit Kyçyku dhe me të majtën e tij shënon. 2 0 për Besën.
53' Rustemi jep një goditje nga distanca, por Mustafa edhe këtë herë pret shkëlqyeshëm.
57' Nuhiu merr përsipër të ekzekutojë një goditje dënimi, por vetëm mbi traversë.
62' Veliaj bëhet sërish protagonist, tek shënon për të dytën herë personalisht. 3 0 për Besën.
72' Xhafa fare pranë golit. Në zonë ka shmangur një mbrojtës është vjedhur, duke eliminuar edhe Mustafën, por gjuajtjen e tij e ndaj Belisha mbi vijën fatale.
77' Xhihani provon përsëri nga distanca, por këtë herë Dine i thotë "jo" golit.
80' Dëmtohet Ardi Behari dhe pas kryerjes së tri ndërrimeve lë Flamurtarin me 10 vetë në fushën e lojës në 10 minutat e fundit.
85' Xhafa, më i miri për vlonjatët, godet përsëri përballë Mustafës, por ky i fundit ndal mjeshtërisht gjuajtjen e tij.
89' Bokotola provon për herë të fundit për vlonjatët, por vetëm jashtë.

Komenti:
Plot gjashtë gola të shënuar dhe vetëm një i pësuar është starti më i mirë i mundshëm që Besa i ka bërë fillimit të vitit 2007. Ashtu siç kishte premtuar presidenti Bizhdili, ashtu vërtet po ndodh me Besën. Ardhjet e reja në merkato, por edhe plotësimi i mangësive fizike të disa titullarëve po i japin frytet e tyre. Kështu ndodhi edhe ndaj Flamurtarit të Vlorës, një ekip që kishte ardhur me ambicie në Kavajë. Kjo ego e vlonjatëve u shfaq gjatë gjithë pjesës së parë, ku qarkullimi i topit ishte pothuaj i barabartë dhe Besa, me përjashtim të rastit të pastër të Nuhiut, nuk kishte rrezikuar seriozisht. Diferencën e vërtet kavajasit kërkuan ta bëjnë pas minutës së 35 të, ku edhe realizuan disa gjuajtje rresht drejt portës mike. Në të gjitha rastet portieri mik Kyçyku tregoi vlerat e tij. Atëherë kur edhe nuk pritej, ka qenë mbrojtësi shtatlartë Robert Grizha, i cili "fotokopjoi" shkodranin Kraja të larguar tashmë, kur me kokë realizoi golin e parë për Besën. Ky gol i çoroditi vlonjatët, që nuk e prisnin dhe Emiliano Veliaj ka treguar se është kthyer në top formën e tij, tek ka nxjerrë nga arkivi i tij ato goditje "vdekjeprurëse" tek shmang në gjuajtje edhe Kyçykun dhe shënon shpejt golin e dytë për Besën. Një gol që duket se i vuri vulën fatit të takimit. Trajneri vlonjat Vasil Ruci duket se ndëshkoi portierin Kyçyku për golat e pësuar, kur në pjesën e dytë aktivizoi portierin Dine dhe Stratin. Kjo manovër e Rucit nuk dha rezultatet që priteshin prej tij, kur gjatë gjithë 90-minutëshit vetëm Xhafa mund të thuhet se ishte kërcënim për mbrojtjen e Besës. Vlonjatët u goditën përsëri, por këtë herë ishte përsëri Veliaj, i cili me të majtën e tij gjeti trekëndëshin e portierit Dine, duke e shtangur atë. Ishte një Flamurtar që, përpos qarkullimit të topit dhe dëshirës, nuk tregoi klasin dhe vlerat që priteshin prej tij. Ishte shumë pak një Xhafë, apo dhe loja e Beharit për të frenuar, apo rrezikuar ekipin kavajas. Ndërkohë që te Besa loja e Nuhiut, edhe pse nuk shënoi, ishte nyja lidhëse e të gjitha aksioneve të Besës. Po ashtu, sulmuesi Parid Xhihani "i lodhi" mbrojtësit vlonjatë me përgatitjen e shkëlqyer fizike, por që nuk u konkretizua me gol, edhe pse u përpoq shumë. Pa dyshim që lojtari më i mirë i takimit ishte Amarildo Belisha, i cili edhe në takimin ndaj Luftëtarit u përdor si "dryni" i mbrojtjes së Besës. Falë eksperiencës së tij të madhe, nëse deri në rezultatin 2 0 organizonte e hidhte topa pas shpine për sulmuesit, në pjesën e dytë u vendos si takimin e parë, në qendër të mbrojtjes, duke zgjidhur momentet e pakta të vështira. Madje ishte ai, që siç përmendëm në kronikë, evitoi golin e sigurt që tentoi të shënonte Xhafa. Kjo fitore e Besës pa dyshim ka kontributin edhe të Grizhës, Hoxhës, Babajt, Arapit, Veliajt, Binagolit e të tjerëve. Kur përmendëm Binagolin, duhet theksuar fakti se ai zhvilloi një takim mjaft të mirë. Po ashtu, futja në lojë e Elokanit çuditi jo pak, kur ishte mësuar se ai ishte larguar drejt Francës. Debutimin me bluzën e Besës e bëri për pak minuta edhe korçari Mërtiri, duke treguar se do t'i vlejë jo pak Besës në arritjen e objektivit të saj. Pavarësisht të gjitha këtyre, fitorja e Besës ishte plotësisht e merituar dhe tregoi se tashmë ajo ka një fytyrë tjetër dhe ambicie për më lart. Rezultatet e dy takimeve të fundit jo vetëm në pikë, por edhe tregues të tjerë dëshmojnë më së miri kthesën pozitive të Besës. Nëse gjatë 18 javëve kishte mposhtur në shëpi vetëm Apoloninë me rezultatin 2 1, në dy javët e vitit 2007 ka shënuar plot gjshtë gola, duke pësuar vetëm 1. Tregues këto të qartë të rritjes së Besës. Me këtë fitore Besa përfundimisht e ka harruar zonën e ftohtë të tabelës dhe sheh drejt vendeve të kreut të saj. Kujtojmë se të mërkurën kavajasit do të kenë një tjetër takim të vështirë për kupë ndaj Dinamos.

Deklarojnë:
Vasil Bici, trajner i Besës: "Jemi në rrugën e duhur. Pavarësisht fitores plotësisht të merituar, ekipi shfaqi momente dobësie, ku vlonjatët na rrezikuan disa herë. Kaluam dy prova me sukses, por theksoj se duhet vazhdimësi. Vlerësoj mjaft konkurrencën, si kyçin e suksesit, pasi tashmë Besa ka një stol solid, çfarë ndikon jo pak në rendimentin e futbollistëve që hyjnë në fushë. Përpara kemi Dinamon për kupë, ndaj na duhet t'i kthehemi shpejt stërvitjes."
Vasil Ruci, trajner i Flamurtarit: "Pjesa e parë ishte e ekuilibruar dhe dhamë më të mirën tonë. U ndëshkuam në momentet e fundit të kësaj pjese që na kushtoi gjithë takimin. U munduam të korrigjonim diçka në pjesën e dytë, por nuk mundëm ta ndryshonim rezultatin. Ky është futbolli, këto ndodhin."

Të veçanta:
Besa luajti me fanellat e saj karakteristike verdhezi, kur ndaj Luftëtarit kishte luajtur me fanella të bardha.
Në këtë takim është aktivizuar edhe Elokan, që ishte larguar për tri ditë nga ekipi për arsye që nuk dihen.
Vlonjatët kanë zëvendësuar Kyqykun me Dinen në pjesën e dytë.
Flamurtari luajti 10 minutat e fundit me 10 futbollistë pas dëmtimit të Ardi Beharit dhe plotësimit të tri ndërrimeve nga trajneri Ruci më parë.

[Noizy]

Bardheblutë marrin një tjetër fitore të çmuar, duke e bërë gati pronë të tyre titullin që tani.


Luftëtari Tirana 0 2
Shënues: K.Duro 4', V.Sinani 80'

Luftëtari: Toçi, Simo, Bistri, B.Sinani, Novi, Dhima, Shenaj, Gaxhaj (Cenko 46'), Stafa (Braho 70'), Bejollari (Muço 61'), Roxher. Trajner: I.Spahiu.
Tirana: Hidi, Abraham, Dede, Pisha, Allmuça, Bulku, V.Sinani, Abazaj (Turdiu 85'), Pema (Bakalli 64'), K.Duro, Çapja (Sefa 82'). Trajner: Sh.Muça.
Gjyqtarë: Sh.Guçe (Lushnjë), F.Elezi (Durrës) E.Qirici (Tiranë)
Kartonë të verdhë: Novi, Muço, Pema, K.Duro

"Radiografia"
3' K.Duro ekzekuton një këndore dhe Çapja nuk arrin të gjuajë, sepse i ngec topi në baltë.
4' K.Duro nga krahu i majtë i sulmit afër vijës anësore ekzekuton një goditje dënimi dhe Toçi nuk arrin të grushtojë topin, i cili godet rrjetën fatalisht. 0 1 për Tiranën.
8' Vendësit protestojnë për 11 metërsh në favor të Roxherit, që u pengua brenda zonës nga Pisha.
11' Dhima gëzohet për realizimin e një goli, por kjo nuk zgjat shumë, sepse anësori e anulon dhe përsëri lojtarët vendës, si dhe publiku reagojnë.
16' K.Duro ekzekuton goditje dënimi dhe Toçi e përcjell topin mbi traversë.
17' Gaxhaj nuk arrin të finalizojë një aksion të bashkëlojtarëve të tij.
20' Roxher me të majtën kryen një goditje kalibri, por Hidi e përcjell topin në këndore, pas së cilës fitohet një tjetër rresht.
22' Bulku gjuan fort dhe Toçi e përcjell jashtë.
25' Stafa fiton goditje dënimi në pozicion ballor, gjuan Novi, por topi fluturon pakëz mbi traversë.
33' Goditje këndore për Luftëtarin, topi arrin tek Novi, që gjuan drejt portës dhe Hidi e përcjell sërish në këndore.
39' Gjuan Allmuça dhe Toçi pret në dy kohë.
41' Stafa gjuan me kokë pas një krosimi të Novit, por nuk arrin të barazojë.
42' Roxher jep një top milimetrik, por Shenaj nuk arrin ta përcjellë në rrjetë nga shumë afër.
50' Stafa ka një rast të mirë për të barazuar, tek gjuan, por Hidi është me fat, tek e përcjell me majë të këmbës topin jashtë.
59' Gjuan Abazaj me kokë dhe grushton Toçi.
60' Bejollari humbet rast nga afër, Hidi grushton dhe gjuan Novi, por nuk shënon.
66' Cenko ekzekuton goditje këndore dhe rifiton përsëri një të tillë, ku pas ekzekutimit të saj Novi rëzohet brenda, por 11 metërshi nuk akordohet përsëri në favor të Luftëtarit.
76' Hidi neutralizon një goditje të Shenajt.
80' Kroson Bakalli nga krahu i majtë i sulmit dhe V.Sinani me kokë realizon. 0 2 për Tiranën.
90' Novi ekzekuton këndore dhe Bakalli spastron zonën e tij.

Komenti:
Një gol episodik dhe një gol akademik i kanë dhënë fitoren Tiranës në një ndeshje që u zhvillua në një terren mjaft të rënduar. Magjinë e futbollit ia japin kryesisht golat, shkaktojnë emocione të forta edhe goditjet e shtyllave të portave dhe reagimet e natyrave të ndryshme, që realizojnë portierët, si dhe manovrimet e bukura që bëjnë lojtarët e tjerë, por vendin e golit nuk e zë askush, sepse ky është ai që çon në fitore, të cilën e arriti Tirana. Për shkak të motit të keq dhe si rrjedhojë e terrenit të stadiumit, ndeshja Luftëtari Tirana pati një bukuri "të egër", pasi nga dy palët kërkohej të luanin ndryshe, sepse shirat bënë punën e tyre dhe forca e mendimit këtë radhë duhej shoqëruar me më shumë forcë fizike. Golat shënohen edhe nga goditje standarde dhe kështu ndodhi me Klodian Duron, që realizoi shumë shpejt, duke e kaluar ekipin e tij në avantazh. Pas golit Luftëtari u zgjua dhe u hodh në sulm në kërkim të barazimit, por ndonjëherë gjyqtarët ndikojnë më shumë seç lejohet në rezultat, në një kohë që vendimet e tyre janë të pakthyeshme. Kështu për opinionin gjirokastrit, si dhe vetë lojtarët e Luftëtarit, nuk u akordua një 11 metërsh në favor të Roxherit dhe pak më vonë një gol i Dhimës, që gjithsesi, siç përmendëm, janë gjyqtarët ata që vendosin për to. Kështu pjesa e parë u mbyll 0 1. Duhet thënë se Luftëtari, edhe pse nuk kishte Shametin, Dibrën, Lamajn, Norën, Hasallën dhe ndonjë tjetër, arriti të zhvillojë një lojë mjaft të mirë, ku Roxheri tërhoqi vëmendjen me ato që bëri në sulm. Ndërsa kamerunasi tjetër, Simo, këtë radhë luftonte në mbrojtje. Luftëtari në fillimet e pjesës së dytë iu afrua golit dhe u mendua se dikush prej lojtarëve të tij do të nxirrte "karrocën nga balta", por rastet mbesin si të tilla dhe Tirana, nëse pjesën e parë realizoi një gol "jobindës", në golin e dytë tregoi vlerat e saj, pasi ai erdhi si rezultat i një aksioni me logjikë dhe kësisoj ajo kryeson në mënyrë të merituar dhe të padiskutueshme kampionatin, ndërsa Luftëtari që u përpoq kaq shumë me një përbërje të re, nuk arriti të gjejë rrugën e rrjetës, edhe pse krijoi disa raste. Në këtë mënyrë, mbeti në po atë kuotë pikësh edhe pas javës së 19 të, ndoshta duke shpresuar dhe realizuar në ndeshjet e mbetura të fazës së dytë diçka më të mirë.

Deklarojnë:
Ilir Spahiu, trajner i Luftëtarit: "Përgëzoj futbollistët e mi, sepse zhvilluan një ndeshje shumë të mirë në planin fizik, edhe pse në formacion na mungonin 6 lojtarë për shkak kartonësh dhe dëmtimesh. Po ashtu, i këshilloj të kenë kurajon të vazhdojnë me këtë lojë dhe të mos dekurajohen, për arsye se jemi brenda objektivit. Natyrisht, nuk mund të them plotësisht nga këndvështrimi im nëse duhej akorduar 11 metërshi në favor të Roxherit dhe Novit, si dhe golin e anuluar të Dhimës. Besoj se këto do të duken më mirë nga sekuencat televizive. Luajtëm ndaj një kundërshtari, siç është Tirana, me përvojë dhe që ka lojtarë si Duro e Sinani. Kemi përpara një garë të gjatë dhe të vështirë, por jam i bindur në realizimin e objektivit tonë."
Shkëlqim Muça, trajner i Tiranës: "Terreni ishte mjaft i vështirë dhe u zhvilluan dyluftime të forta, gjë që e kishim parashikuar. Ky terren nuk lejoi që loja të zhvillohej brenda skemave tona, por sidoqoftë, falë eksperiencës sonë, arritëm të fitojmë ndeshjen. Ekipi pas realizimit të golit të parë u çlirua, por uli edhe ritmin. Në pjesën e dytë luajtëm me kundërsulme dhe vetëm terreni nuk na lejoi që të mos shënojmë më shumë gola, por duhet pranuar që edhe Luftëtari në disa raste na vuri në vështirësi. Për gjykimin nuk mund të flas, por them se ishte korrekt. Për sa u përket pretendimeve të vendësve, këto mund të shikohen në përsëritjet televizive. Dua të them se gjyqtarët lejuan lojën burrërore dhe u treguan në gjendje për të shmangur lojën brutale."

[Noizy]

Të kuqtë kanë fituar pa shkëlqim me krutanët dhe e shohin veten në vendin e dytë në klasifikim.


Partizani - Kastrioti 1-0
Shënues: Dhëmbi 12'
Partizani: Shehi, Beqiri, Pinari, Tafaj, Muzaka, Hallaçi (Gjyla 73'), Babamusta, Dhëmbi (Bulku 67'), Bakaj, Abilaliaj (Malindi 57'), Progri Trajner: Hasan Lika
Kastrioti: Koçi, Ymeraj, Osusi (Çeliku 90'), Deliu (Hoxha 67'), Caca, Gallo, Pashja, Kalari, Asllani (Ahmeti 81'), Ziambo, Hasa Trajner: Petrit Haxhia

Kartonë të verdhë: Abilaliaj
Gjyqtarë: L.Jemini, R.Zhuli, P.Goxhaj

"Radiografia"
4'- Partizani ka mundësi të kalojë në avantazh me anë të Muzakës, i cili gjuan me kokë, ngjitur me trekëndëshin e portës së Koçit, pas krosimit të Hallaçit nga e majta.
11'- Dhëmbi avancon në mesfushën kundërshtare dhe gjuan fort nga distanca, pa e rrezikuar seriozisht portën mike.
12'- Përsëri Dhëmbi ngulmon mga e majta, pason saktë në zonë për Abilaliajn, i cili paraprihet nga një mbrojtës.
13'- Këtë radhë korçari lëviz bukur në zonë dhe del në pozicion gjuajtjeje. Goditja e tij devijohet nga mbrojtja krutane dhe për fatin e keq të Koçit përfundon në rrjetë, 1-0.
21'- Abilaliaj, pasi asistohet nga Bakaj, lëviz bukur në zonë, por goditja e tij me të majtën pritet nga Koçi.
23'- Miqtë, pas shumë minutash, rrezikojnë me Osusin, gjuajtja e të cilit përfundon jashtë, shumë pranë shtyllës.
29'- Më pas është Ziambo që gjuan bukur dhe fort, duke e detyruar Shehin të presë në dy kohë.
30'- Kalari gjuan prirët me portën, jashtë kuadratit.
36'- Bakaj kroson nga këndi për Dhëmbin, që i lirë në zonë gjuan fort me kokë, por topi ndalet në vijën fatale nga Pashja, i cili spastron menjëherë zonën.
47'- Abilaliaj kontrollon bukur një top të ardhur nga mesfusha, del në pozicion gjuajtjeje, shkarkon fort të djathtën, por Koçi pret në pozicion.
48'- Elis Bakaj shmang një mbrojtës, por gjuan keq në hyrje të zonës, kur kishte mundësi të asistonte Progrin, të pambuluar nga mbrojtja.
55'- Progri nuk koordinohet si duhet në zonë, duke humbur një rast të pastër për shënim.
56'- Krutanët kundërpërgjigjen me Hasën, që gjuan fort, ngjitur me shtyllën.
63'- Muzaka provon nga distanca, por Koçi nuk e ka të vështirë ta ndalë topin në qendër të portës.
81'- Caca provon nga distanca, por pa mundur ta surprizojë Shehin.
85'- Këtë radhë është Kalari që gjuan nga distanca, duke e detyruar Pinarin ta devijojë topin me kokë.
86'- Malindi kundërsulmon rrezikshëm, por finalizimi i aksionit është i dobët.
88'- Progri në zonën kundërshtare pason për Malindin, që çuditërisht nuk arrin ta godasë topin.

"Komenti"
Partizanit i ka mjaftuar një gol karambolesk që në minutat e para të lojës, për të dalë i fituar me Kastriotin në një ndeshje që konsiderohej e lehtë. Ky gol, i vetmi në këtë takim, ka mjaftuar për ta ngjitur Partizanin në vendin e dytë në tabelë, por pa e ngushtuar dot diferencën me Tiranën kryesuese, që nga ana e saj nuk ka falur as në transfertë. Djemtë e Likës vinin me moral të lartë në këtë ndeshje, pas fitores së pastër të një jave më parë me Elbasanin në transfertë, duke i "zhgënjyer" tifozët skeptikë, të cilët nuk e prisnin këtë rezultat. Ndryshe nga sa pritej, Partizani nuk ka shkëlqyer me Kastriotin, madje ka qenë gjatë gjithë lojës nën presionin e kundërshtarit, që me të drejtë ka pretenduar për më shumë në "Qemal Stafa". Atmosfera në shkallët e stadiumit ka qenë shumë e ftohtë, e ndikuar edhe nga moti i lagësht dhe me shi. Vetëm tribuna kryesore ka pasur vizitorë të mjaftueshëm, ndërsa përballë saj tifozët numëroheshin me gishta. Mbështetësit e Kastriotit, ndonëse në numër të kufizuar, i kanë dhënë kurajo skuadrës së zemrës, që ndoshta meritonte më shumë në këtë takim. Loja ka nisur e qetë, me futbollistët e Partizanit që kërkojnë menjëherë zhbllokimin e rezultatit, që do të vinte në minutën e 13-të. Megjithëse në një aksion pa shumë pretendime, Partizani ka arritur të shënojë shpejt, çka la të nënkuptohej se mund të kishte një goleadë. Mirëpo djemtë krutanë nuk janë befasuar, pëkrundrazi, nga minuta në minutë kanë përfituar terren, duke e vënë nën presion të vazhdueshëm formacionin e brishtë të Likës. Megjithatë, rastet në portën e Shehit numërohen me gishta dhe vijnë vetëm nga goditjet nga distanca. Ndërsa Partizani, me më shumë kualitete në përbërje, krijon raste të pastra, që nuk shfrytëzohen si duhet nga lojtarët e sulmit. Progri, Abilaliaj e së fundi Malindi kanë pasur mundësi për ta mbyllur ndeshjen me rezultat edhe më te thellë, por nuk janë treguar të qartë përballë Koçit. Kastrioti, me të gjitha mundësitë që kishte, është shfaqur i organizuar në lojë, por mungesa e lojtarëve cilësorë ka bërë që rrezikshmëria të kufizohet vetëm në presionin në mesfushën e Partizanit. Fundi i pjesës së dytë ka sjellë më shumë emocione, pasi Partizani, pas largimit të Dhëmbit, organizatorit dhe trajnerit të skuadrës në fushë, është shfaqur i frikësuar dhe konfuz. Në këto momente armiku i Partizanit ka qenë vetvetja, pasi kundërshtari nuk kishte forcë për të shkuar deri tek goli. Edhe pse djemtë e Haxhisë, që ishin hedhur në sulm në kërkim të barazimit, kanë lënë shumë hapësira prapa, sulmi i Partizanit nuk ka ditur t'i shfrytëzojë, duke rrezikuar deri në vërshëllimin e fundit të Jeminit fitoren, që pritej të ishte më e thellë. Ndërkaq, rivalët e Partizanit, përveç Tiranës, kanë marrë nga një pikë, duke e ndihmuar skuadrën e kuqe të shkëputet prej tyre. Partizani është shkëputur nga Vllaznia, Dimamo dhe Elbasani dhe ka kaluar Teutën në renditje. Partizani është ndjekësi më i afërt i Tiranës, por do ta ketë shumë të vështirë ta ruajë këtë pozicion, pasi në tri ndeshjet e ardhshme do të përballet me Vllazninë, Dinamon dhe Flamurtarin, ku vetëm me blutë do të luajnë brenda.

"Deklarojnë"
Hasan Lika, trajner i Partizanit: "Ashtu siç e kishim parashikuar, rezultoi një takim i vështirë, pavarësisht se luajtëm në fushën tonë. Futbolli është i tillë që përfiton nga gabimet e kundërshtarit dhe këtë Partizani e arriti që në pjesën e parë. Kishim mundësi të shënonim përsëri, për të mos e çuar ndeshjen në atë pikë sa të kishim frikë fitoren. Me zëvendësimin e Dhëmbit, që sot na dha fitoren, loja jonë pati zbehje në organizim, çka i dha mundësi kundërshtarit të ushtronte presion."
Petrit Haxhia, trajner i Kastriotit: "Dua të them se gara e kampionati sa vjen e vështirësohet. Jam i kënaqur me lojën që zhvilloi skuadra ime gjatë 90 minutave. Jemi ndëshkuar nga një gabim në mbrojtje, por ushtruam presion gjatë gjithë lojës. Pjesa e dytë qe shumë e mirë për ne, duke dominuar në fushë. Bëmë që situata të ishte dramatike deri në vërshëllimën e fundit të gjyqtarit. Përshëndes publikun e zjarrtë krutan që kishte ardhur për të na mbështetur në Tiranë dhe dua t'i siguroj tifozët se Kastrioti nuk do të lërë më pikë brenda. Hapa falsë nuk mund të ndodhin më, sidomos në shtëpinë tonë."

"Të veçanta"
Para fillimit të ndeshjes u mbajt një minutë heshtje në nderim të aktorit të madh Kadri Roshi, i cili ka qenë anëtar i kryesisë së klubit të kuq.
Malindi është aktivizuar në pjesën e dytë, edhe pse nuk ishte stërvitur në asnjë seancë stërvitore të javës
Gjatë pushimit të ndeshjes, presidenti Zhilli u është bashkuar tifozëve krutanë në tribunën A.

[Noizy]

Blutë e kryeqytetit dhe kuqeblutë shkodranë dje nuk arritën më shumë se një barazim pa gol.


Dinamo - Vllaznia 0-0
Nga Tirana, Ilir CARA
Dinamo: Lika, Ishka, Xhafa, Diop, Ahmataj, Qorri (Deliallisi 71'), Jupi (Ferraj 46), Poçi, Mile, Pejiç, Nuhiu (Arbri 56') Trajner: R. Jupi
Vllaznia: Grima, Hoti, Dabulla, Teli, Osja, Lici, Miroçi (Gudjabi 57'), Sukaj, Cani, Ahi (Doçi 46') Trajner: M. Josa
Gjyqtarë: K. Meta, G. Maloku, D. Rexha (Tiranë)
Kartonë të verdhë: Diop, Xhafa, Ahmataj, Teli, Sukaj, Ahi

"Radiografia"
6'- Ahmataj gjuan një goditje dënimi nga 25 metra, por topi devijohet nga mbrojtja mike dhe nuk paraqet rrezik për Grimën.
15'- Ilir Qorri nga një goditje standarde kroson një top në zonën shkodrane për Ishkën, i cilin gjuan lehtë dhe pret portieri Grima.
20'- Është radha e shkodranit Suad Lici që të godasë një goditje standarde nga 20 metra, por pret pa vështirësi Ilion Lika.
26'- Në hyrje të zonës së Vllaznisë dinamoviti Mile godet fort, por topi përfundon në duart e Grimës.
36'- Rast i bukur për shkodranët. Eshtë Sukaj që përfiton nga një rreshtim i gabuar i mbrojtjes blu dhe i vetëm marshon drejt portës së Likës dhe vetëm e vetëm me portierin dinamovit shkodrani gjuan dobët dhe pret pa vështirësi "gardiani" Lika.
39'- Ahmataj mundohet të spastrojë një top në kufijtë e zonës së Dinamos, por topi shkon gabimisht tek Cani, i cili i lirë brenda zonës gjuan, por përsëri Lika në krye të detyrës.
42'- Dinamovitët përshkallëzojnë bukur një sulm të tyre, i cili vjen me vertikalizime topash, ku Nuhiu pason për Pejiçin, që jep një pasim në zonën mike për Ahmatajn, i cili gjuan, por nuk e mposht dot portierin mik, Armir Grima.
44'- Mile në në hyrje të zonës disi i zhvendosur nga krahu i djathtë gjuan bukur, por devijon Grima.
54'- Goditje këndi për Vllaznisë, topi krosohet nga Lici dhe përfundon tek Dabulla që brenda zonës blu gjuan fort, por devijon Lika.
56'- Ardian Nuhiu në hyrje të zonës shkodrane godet në drejtim të portës, por grushton Grima.
65'- Ferraj nga e majta e sulmit dinamovit kroson një top për Pejiç, por mbrojtja shkodrane është më e shpejtë se sulmuesi kroat.
67'- Erion Xhafa nga mesfusha nis një top të gjatë për Milen, i cili ndodhej në zonën mike, por beratasi në rënie e sipër gjuan dobët dhe pa rrezik për portën shkodrane.
73'- Goditje dënimi për Dinamon, gjuan Ahmataj, por topi përfundon mbi traversën e portës së mbrojtur nga Grima.
83'- Sulmuesi kroat Pero Pejiç provan të godasë portën e Vllaznisë nga 30 metra, por topi përfundon mbi traun e portës mike.
85'- Suat Lici godet një goditje këndi në favor të Vllaznisë, por krosi i tij përfundon në kokën e Diop që largon rrezikun nga porta e tij.
87'- Dinamovitët në hyrje të zonës shkodrane kryejnë disa pasime të njëpasnjëshme midis tyre dhe në fund Arbri fut një pasim në zonën e vogël të portës së Grimës, por çuditërisht topi parakalon gjithë pasqyrën e portës dhe asnjë lojtar i Dinamos nuk e ndryshon rrugën e gjuajtjes.

Komenti
Përpara sfidës së djeshme midis Dinamos dhe Vllaznisë mendohej se të pranishmit në stadiumin "Selman Stërmasi" do të shikonin një ndeshje të vërtetë që do ta justifikonte edhe historinë e përballjeve midis këtyre dy skuadrave. Përfundimi i takimit dha një imazh tjetër dhe të gjithë të pranishmit mbetën të pakënaqur nga barazimi 0-0 që blutë dhe kuqeblutë arritën midis tyre. Të dy trajnerët u munduan që të hidhnin në fushën e lojës formacionin më të mirë të mundshëm, pasi të dy kampet kishin mungesa në lojtarë, të cilët rezultonin të pezulluar dhe të dëmtuar. Në pamje të parë dinamovitët shikoheshin si më superiorë, pasi vinin pas tri fitoreve rresht si dhe luanin në fushën e tyre. Ndërsa shkodranët kishin ardhur në kryeqytet që të bënin autokritikën e transfertës së Vlorës dhe të merrnin tri pikët e fitores. Në përfundim të takimit, si optimizmi i Dinamos dhe ai Vllaznisë nuk shkoi më larg sesa një barazim pa gola. Nëse shikon rrjedhën e rezultateve të takimeve të javës së 19-të, del që si Dinamo dhe Vllaznia nuk përfituan gjë nga ky barazim që arritën midis tyre. Çështja e titullit është një kapitull i mbyllur për të dy skuadrat dhe objektivi i vetëm i tyre është arritja e vendit të dytë. Por me atë që dhanë dje si blutë e kryeqytetit dhe kuqeblutë shkodranë e kanë të vështirë ta kapin këtë objektiv, pasi nëse vazhdojnë paraqitjen e djeshme të "Selman Stërmasit", u bie që të luftojnë për një vend në "Intertoto". 90-minutëshi i ndeshjes së djeshme e vërtetoi se të dy skuadrat ia kishin frikën njëra-tjetrës dhe nuk dëshironin që të merrnin aventura të kota, por prisnin të përfitonin nga pasiguritë e palëve. Ndeshja e djeshme u zhvillua nën reshjet e imta të shiut, të cilat e bënë disi të rrëshqitshme fushën e "Selman Stërmasit" dhe shpeshherë lojtarët çekulibroheshin e dilnin jashtë rrjedhës së aksioneve. Në pjesën e parë shkodranët vendosën një epërsi të lehtë, por sulmuesit e Vllaznisë u treguan shumë të nxituar përpara portës së Likës. Ndërsa dinamovitët nuk ditën të shpreheshin lirshëm në veprimet e tyre dhe shikohej një paqartësi në veprimet midis tyre. Pjesën e dytë të dy skuadrat e nisën me nga një zëvendësim, ku për Dinamon trajneri Jupi ia lë vendin të riut Ferraj, ndërsa vendin e Ahit tek Vllaznia e zë Doçi. Këto zëvendësime bënë që të ndryshojë edhe rreshtimi i lojtarëve në fushë, kryesisht tek Dinamo, pasi Ferraj pozicionohet si mbrojtës i majtë dhe Ahmataj zhvendoset nga e majta e mbrojtjes në qendër të mesfushës. Në këtë pjesë dinamovitët krijuan një supremaci më të lehtë ndaj kundërshtarit, pasi u rrit forca goditëse në drejtim të portës mike, por përsëri rezultati nuk ndryshoi. Trajneri Mirel Josa provon edhe kartën Gudjabi në vend të kosovarit Miroçi, por senegalezi nuk shkoi më larg sesa nga paraqitja që kishte bërë në 17 javët e para kur aktivizohej me Dinamon. Barazimi 0-0 nuk kënaqi asnjërën palë, madje ai i largoi disi më shumë nga vendi i dytë që e ëndërrojnë. Megjithatë, po të shikosh ecurinë e Dinamos në fazën e parë, i bie që blutë nuk kanë ato oshilacionet e mëparshme dhe prej katër javësh qëndrojnë të pamundur dhe kanë lënë vetëm dy pikët e djeshme me Vllazninë. Por ndoshta Dinamo dhe Vllaznia nuk kanë dashur që të shpenzojnë shumë energji, pasi dihet se në mesjavë kanë ndeshjet e kupës dhe, nëse e fitojnë këtë trofe, kapin objektivin zonë "UEFA".

Deklaruan pas ndeshjes
Redi Jupi, trajner i Dinamos: "Mendoj se barazimi ishte rezultati më i drejtë në këtë takim, them se në këtë rast nuk kemi të bëjmë as me një pikë të fituar apo dy të humbura, pasi mënyra sesi u zhvillua takimi e përligj finalen 0-0. Në pjesën e parë patëm probleme, pasi nuk i shfrytëzuam krahët, sepse rreshtimi i ekipeve na jepte më shumë përparësi. Në pjesën e dytë reaguam më ndryshe dhe rastet për shënim nuk na munguan. E mbuluam më mirë fushën dhe ishim më superiorë, por nuk arritëm të shënonim. Për sa i përket vendit të dytë, besoj se nuk është momenti që të thuhet se me këtë barazim u larguam, pasi ne akoma nuk ishim afruar. Prandaj ne i shikojmë gjërat ndeshje pas ndeshjeje."

Mirel Josa, trajner i Vllaznisë: "Jam i kënaqur me lojën që zhvilloi ekipi, por jo nga pika. Nëse në Vlorë u kënaqa me pikën, pasi nuk luajtëm mirë, ndaj Dinamos problemi është ndryshe, sepse ne krijuam raste, por nuk konkluduam. Kishim ardhur për ta marrë ndeshjen, skuadra e interpretoi mirë takimin, por kur luan ndaj Dinamos duhet të ruhesh deri në fund. Duhet t'i shfrytëzonim më mirë rastet që na u krijuan në pjesën e parë. Por në fund edhe mund të humbisnim, nëse Grima nuk do ta devijonte topin. Objektivi kryesor i Vllaznisë është arritja e vendit të dytë dhe në javët në vijim kemi shumë për të bërë."

"Të veçanta"
- Dje disa lojtarë kanë bërë debutimin për këtë sezon me uniformat e reja të skuadrave respektive. Tek Dinamo ishte Ardian Nuhiu dhe Vangjel Mile, ndërsa te Vllaznia ishte El Haxhi Gudjabi.
- Pak minuta përpara takimit mbrojtësi Rezart Dabulla është parë në një lokal poshtë stadiumit dhe ka porositur një kafe për të mbledhur veten.
- Gudjabit i është dashur që dje të përballet ndaj ish-shokëve dhe tifozëve dinamovitë. Në drejtim të senegalezit ka pasur edhe fërshëllima të lehta nga ana e sportdashësve blu.
- Dje në barazim ka përfunduar edhe beteja e kartonëve të verdhë, pasi të dy skuadrat janë ndëshkuar me nga tre të tillë.

[Noizy]

Të mërkurën, dinamovitët do të jenë mysafirë në Kavajë, pasi i pret takimi i parë çerekfinal i Kupës së 55-të të Shqipërisë. Të dy skuadrat si Besa dhe Dinamo kanë bërë një merkato numerike gjatë muajit janar dhe veprimtarinë e kupës e shikojnë si një mundësi për shlyer investimet e bëra. Pas përfundimit të fazës së parë blutë e kryeqytetit shpallën si objektiv parësor fitimin e Kupës, pasi e shikojnë si trampolinë nga ku mund të kapin Europën. Pas përfundimit të javës së 19-të të kampionatit, skuadrat nuk kanë kohë të marrin frymë, sepse e mërkura po troket. Ndeshjet e kupës shikohen si një rast nga ku mund të përfitojnë edhe ata që kanë pasur hapësira të pakta, por trajneri Jupi nuk shprehet qartë për rotacionin në skuadër. Megjithatë, deri tani, nuk kemi parë që blutë e kryeqytetit të hedhin të njëjtin formacion në dy takime radhazi. Kjo nuk është strategji, por kanë qenë të kushtëzuar nga gatishmëria e lojtarëve. Sipas trajnerit Jupi, ka akoma kohë që të mendohet për skuadrën anti-Besa dhe shpreson që grupi të kompletohet me rikthimin e të dëmtuarëve dhe të pezulluarve. Megjithatë, timonieri blu la të kuptojë se të mërkurën do të ketë vend edhe për disa që nuk e nisën apo nuk luajtën të shtunën ndaj Vllaznisë.

[Noizy]

Pas ndeshjes me Vllazninë trajneri ka mbetur i pakënaqur nga mënyra se si luajti ekipi.


Një fjalë e urtë popullore thotë: Shtriji këmbët sa të kesh jorganin. Me këtë lajtmotiv po punon aktualisht Dinamo e trajnerit Redi Jupi. Blutë e kryeqytetit po vuajnë akoma paraqitjen e fazës së parë, pasi tashmë e ndiejnë se për të zënë një vend në zonën "UEFA", duhet që humbja të mos bëjë pjesë në repertorin e tyre. Megjithatë, pas ardhjes së Jupit në krye të pankinës, asnjëherë nuk është folur për objektiva të përcaktuar, pasi paraqitja e javëve të para nuk u lejojnë që të bëjnë llogari të sakta. Drejtuesit blu i kanë vënë syrin trofeut të kupës, por "periskopi" i timonierit të "Nëndetëses", Redi Jupi, pas çdo takimi nuk shikon më larg se ndeshja e radhës. Sipas trajnerit-lojtar, Dinamo duhet t'i bëjë llogaritë e saj ndeshje pas ndeshjeje, pasi fillimi i mbrapshtë nuk e lejon që të jetë largpamëse. Edhe pas barazimit të së shtunës Jupi i qëndron besnik filozofisë së tij dhe tashmë vëmendja e skuadrës është e përqendruar te ndeshja e kupës me Besën e Kavajës. "Ndeshja me Vllazninë paraqiti disa probleme për Dinamon. Në këtë takim më shumë më mërziti mënyra se si luajtëm, sesa pika që morëm. Në pjesën e parë ekipi nuk ishte mirë dhe nuk e interpretoi drejt takimin, pra patëm paqartësi në realizimin e detyrave tona. Pra, barazimi erdhi si rezultat i asaj që skuadrat dhanë në fushë. Unë nuk jam partizan i mendimit se terreni ndikon tek një ekip, pasi ai është i njëjtë për të dy kampet, kështu që nuk mund të shfajësohemi për kushtet e fushës. Tashmë Vllazninë duhet ta konsiderojmë të mbyllur dhe përqendrimi ynë është te ndeshja e radhës, e cila është ndaj Besës dhe është e vlefshme për veprimtarinë e Kupës së Shqipërisë. Asnjëherë nuk kemi bërë llogari afatgjata, sepse pas çdo takimi mendojmë vetëm për ndeshjen e radhës dhe pa kaluar atë nuk llogarisim tjetrën. Vërtet që synimet tradicionale të Dinamos janë që të marrë pjesë në kompeticionet europiane, por jemi të detyruar të punojmë me objektiva javorë dhe në përfundim do të shikohet se deri ku kemi arritur dhe sa kemi punuar. Që përpara nisjes së pjesës së dytë të sezonit u pata thënë lojtarëve se kemi katër sfida të vështira, ku duhet luftuar për "jetë a vdekje" , prandaj nuk mund të përqendrohemi tek dy transfertat e kampionatit, pa kaluar atë të kupës. Duke ditur që kupa është një mundësi e mirë për të realizuar një pjesë të objektivave tona, na del për detyrë që ndeshjen me Besën ta vlerësojmë, sepse në fund të jemi ne ata që do ta kalojmë turin,"- u shpreh për gazetën "Sporti shqiptar" trajneri i bluve të kryeqytetit, Redi Jupi. 32-vjeçari me përgjegjësi të dyfishtë si trajner dhe lojtar, nuk pranon të marrë përgjegjësi për merkaton e Dinamos, pasi, sipas tij, është presidenca ajo që investon dhe e shikon të arsyeshme se kë do të afrojë dhe do të largojë. Përpara fillimit të merkatos së janarit stafi trajnues u shpreh se nuk dëshironin të largonin lojtarë, por të afronin të tjerë pa prekur strukturën e vjetër. Prandaj edhe të larguarit, Kastel, Gudjabi, Taçi si dhe disa të tjerë që erdhën e ikën brenda merkatos, kanë qenë rezultat i politikave të presidencës dinamovite dhe jo kërkesë e trajnuesve të skuadrës. Pas përfundimit të ndeshjes me Vllazninë, kur Jupi u pyet rreth largimit të Gudjabit, trajneri u shpreh se detyra e tij tek Dinamo është të përgatisë lojtarët për ndeshjet e radhës dhe nuk kishte të bënte me lëvizjet që kanë ndodhur te blutë gjatë merkatos së janarit.