Lajmet nga Superliga 2006/2007

[OO7]

Ky eshte lajmi per te cilin ju lajmerova dje i botuar ne gazeten e sotme.

Sulmuesi: Dinamo nuk arriti të m'i plotësonte kushtet financiare 22-08-2006

Pema, goditja "in-extremis" e Tiranës

Tirana godet sërish në merkato. Që nga dita e djeshme, Eleandro Pema është veshur bardheblu, duke lënë me gisht në gojë drejtuesit e Dinamos, të cilët e prisnin për të firmosur kontratën e re. Atëhere kur nuk pritej, donatorët bardheblu e kanë bërë të tyre sulmuesin 21-vjeçar, i cili shkëlqeu kampionatin e fundit me fanellën tjetër të kryeqytetasve, kur shënoi plot 9 gola. E ardhmja e Pemës kishte kohë që ndodhej në udhëkryq, duke parë që te Dinamo ana financiare shkoi në nivele minimale, ndërkohë që nga jashtë atij i kishin mbërritur disa sinjale. I ndodhur në këtë situatë, sulmuesi këmbëshpejtë nuk nguroi aspak të firmoste kontratën e re që iu propozua dje nga donatorët dhe tashmë u është shtuar blerjeve të reja, si Allmuça, Sinani, Dede, Abraham, Fish dhe Penja. I kontaktuar nga "Sporti shqiptar", Eleandro Pema, me të shkelur fushën stërvitore të "Skënder Halilit", dha intervistën e parë si bardheblu, teksa tregon edhe shkaqet e divorcit me Dinamon.
Eleandro, një kalim i befasishëm ky juaji nga Dinamo te rivalët e Tiranës. Cili është komenti juaj?
- Një fenomen i tillë nuk është se po më ndodh mua të parin në futbollin e sotëm profesionist. Në fillim as vetë s'e kisha menduar një lëvizje të tillë, duke qenë se për një vit te Dinamo ia kalova shumë mirë, por ja që ishte e thënë të ndodhte kështu.
Drejtuesit dinamovitë ju prisnin që të firmosnit dje me ta, ndërkohë që ju dolët menjëherë në stërvitje me fanellën bardheblu...
- Është e vërtetë. Unë kisha folur me administratorin Ismet Saliu, i cili më kishte parashtruar ofertën e tij në kontratën e re, që sigurisht nuk i plotësonte ambiciet e mia. E kisha lënë çdo gjë të hapur me të, ndërkohë që në çastin kur fola me donatorët e Tiranës, diferenca në anën financiare ishte e madhe. I ndodhur në këto kushte, kurrsesi nuk mund të refuzoja, pa harruar që bëhet fjalë për një skuadër të madhe, siç është Tirana.
Çfarë do të thoshit tani për Dinamon, skuadër me të cilën shënuat 9 gola sezonin e fundit?
- Më vjen keq që u ndava në këtë mënyrë, por të gjithë në atë skuadër duhet të më kuptojnë arsyet pse vendosa të bëja një lëvizje të tillë. Për një vit qëndrimi te Dinamo kalova shumë mirë dhe u përpoqa të jepja maksimumin në fushë. Nuk më mbetet gjë tjetër veçse t'u uroj shokëve dhe drejtuesve suksese në edicionin e ri.
Tirana për ju është një njohje e vjetër, po të kujtojmë këtu një vit më parë, kur luajtët 6 muaj dhe më pas u larguat fillimisht te Shkumbini dhe në fund përfunduat te Dinamo. Si e shihni të ardhmen këtu?
- Personalisht, shpresoj që këtë herë të mos zhgënjej askënd. Jam rikthyer në ekip me shumë ambicie, krahasuar me një vit e gjysmë më parë. Tani mendoj se jam më i pjekur për të kontribuar te Tirana, ku dihet që ka një rivalitet të madh.
Meqenëse dolët te rivaliteti, nuk mendoni se do ta keni të vështirë të çani përballë emrash si Sinani, Salihi dhe Merkoçi?
- Jo, aspak. Unë e dija situatën te Tirana dhe një fakt i tillë nuk më tremb, po të kemi parasysh se në fund do të jetë trajneri ai që do të vendosë në bazë të formës të gjithsecilit. Megjithatë, në një sezon të gjatë, do të ketë vend për të gjithë.
Në fund, cilat janë synimet tuaja personale?
- Nisur nga fakti që jam sulmues, shpresoj të shënoj sa më shumë gola. Më pas, mbetet që së bashku me shokët të pretendojmë edhe fitimin e titullit kampion dhe të Kupës së Shqipërisë.

Nënkampionët, ja plani për në Turqi
Dita e djeshme ka qenë shumë e ngjeshur për drejtuesit bardheblu dhe veçanërisht për administratorin dhe përgatitësin atletik, Eduard Gjini. Ai është marrë me mbledhjen e gjithë pasaportave të lojtarëve, por edhe me prerjen e biletave të udhëtimit për në Turqi. Nisja drejt Bosforit është menduar të bëhet mëngjesin e së mërkurës, në orën 09:00, me linjën e avionëve Albanian Airlines. Udhëtimi për nënkampionët do të ketë edhe një ndërprerje, ku pasi të nisen nga Tirana, do të zbresin në Stamboll dhe pikërisht këtu do të marrin një tjetër avion për në qytetin e Kajserit, ku do të luhet edhe ndeshja. Mendohet që mbërritja të realizohet rreth orës 15:00 të pasdites dhe menjëherë delegacioni bardheblu do të sistemohet në një hotel me 4 yje. Në orën 19:00 lokale do të zhvillohet stërvitja e fundit, e cila korrespondon me orarin e ndeshjes të së enjtes. Sipas Gjinit, mëngjesin e së enjtes është planifikuar që Tirana të zhvillojë analizën e fundit anti-Kajserispor.

Merkoçi në pritje të rezonancës magnetike
Prej disa ditësh, sulmuesi Eldorado Merkoçi po vuan një dëmtim në gjurin e majtë. Një goditje e marrë gjatë seancës stërvitore ka bërë që të dyshohet se 27-vjeçari mund të ketë probleme me meniskun. Sot ose nesër, Merkoçi do të kryejë një rezonancë magnetike, e cila do të nxjerrë të qartë shkallën e dëmtimit. Në stërvitjen e djeshme, ai ishte vetëm spektator anës fushës, ndërkohë që e shprehu qartë shqetësimin në lidhje me këtë problem që po kalon.

Një kuksian në provë te bardheblutë
Pasditen e djeshme, në stërvitjen e bardhebluve u vu re prezenca e një lojtari të ri. Bëhej fjalë për Fatjon Dafkun, me origjinë nga Kukësi, por që disa vjet kishte luajtur në kategoritë e dyta angleze. 22-vjecari kishte ardhur në ekip me sugjerimin e një prej drejtuesve të lartë, ku do të qëndrojë për disa ditë në provë dhe më pas do të vendoset nëse do të qëndrojë ose jo. Për gazetën, Dafku do të shprehej: "Shpresoj të qëndroj te Tirana. Kam ardhur që nga Anglia dhe dua të tregoj vlerat e mia në një skuadër me emër në kampionatin shqiptar. Luaj si mesfushor qendre, por që për nevoja të ekipit mund të spostohem edhe në krahun e djathtë."

Aurel Celibashi
Sporti Shqiptar

[OO7]

Presidenti Edmond Hasanbelliu pret që investimet e tij të bëhen realitet këtë sezon 22-08-2006

Hasanbelliu: Kërkoj më shumë nga Teuta

Presidenti i Teutës, Edmond Hasanbelliu, këtë sezon pret më shumë nga ekipi që financon prej vitesh. Ai thotë se ekipi duhet të tregojë në fushën e lojës më shumë cilësi, për të treguar vlerat e vërteta që kërkohen për të arritur objektivat në këtë sezon futbollistik. Në një intervistë për "Sportin shqiptar", Hasanbelliu komenton objektivat që ka Teuta në këtë sezon, gjendjen reale të ekipit, merkaton dhe prezantimin që ka bërë ekipi në takimet miqësore.
A jeni i kënaqur me prezantimin që bëri ekipi në takimet miqësore para kampionatit?
- Ekipi bëri një prezantim pozitiv, por unë kërkoj më shumë nga kjo Teutë. Duhet një nivel më i lartë loje për të arritur objektivat që kemi në kampionat.
Cilat janë objektivat që ka Teuta në këtë sezon?
- Do të synojmë të paktën një prej trofeve. Kemi investuar për të ndërtuar një ekip fitues dhe besoj se do t'ia arrijmë kësaj.
A ju ka shqetësuar humbja e fundit me Vllazninë në miqësore?
- Në takimet miqësore, më shumë se rezultati, shikohet mënyra se si luan ekipi. Mendoj se ekipi ka më shumë mundësi dhe forca për të shprehur në fushën e lojës. Unë kam besim te kjo Teutë dhe te trajneri Starova.
Sa besoni se investimi që keni kryer do të shpërblehet nga futbollistët?
- Eshtë e vërtetë që në këtë sezon kemi investuar shumë për këtë ekip dhe besoj se ky investim do të justifikohet. Kemi sjellë në ekip disa prej futbollistëve më cilësore, si dhe kemi ndërtuar një ekip që mund të përballojë një sezon të gjatë.
Cila ka qenë strategjia e merkatos së Teutës?
- Kemi ruajtur bërthamën e grupit ekzistues dhe kemi afruar futbollistë cilësorë në ato reparte ku kemi pasur më shumë boshllëqe. Kemi studiuar çdo gjë me kujdes dhe kemi marrë parasysh kërkesat e trajnerit.
A mendoni se keni një Teutë të blinduar në mbrojtje dhe sulm, por me probleme në mesfushë?
- Jo, u kemi kushtuar rëndësi të tri reparteve dhe mendoj se edhe mesfusha është një repart i konsoliduar. Kampionati do të jetë prova e vërtetë për këtë ekip, prej të cilit presim shumë.
Sa problem ka qenë për ju dëmtimi i Brahjes?
- Kuptohet që dëmtimi i çdo futbollisti cilësor që bën diferencën është shqetësues, por pavarësisht nga kjo, ne kemi marrë masa që kjo mungesë të mos ndihet deri në rikuperimin e Brahjes.
A kanë përfunduar kontratat me të gjithë futbollistët dhe a ka ndonjë të re nga ky proces?
- Jemi në përfundim të këtij procesi dhe para të mërkurës do të dërgojmë listat e federimit të futbollistëve, ku përfshihet edhe një blerje e re në merkato, siç është ajo e kosovarit Haliti.
Besoni që tifozëria durrsake do të rikthehet në "Niko Dovana"?
- Do të jetë paraqitja e ekipit që do të kondicionojë rikthimin e tifozërisë në stadium. Shpresoj që të bëjmë një nisje të mirë që në takimet me Dinamon dhe Partizanin.

Haliti nis stërvitjen me Teutën
Ish-mbrojtësi i Tiranës, kosovari Adnan Haliti, ka filluar rregullisht stërvitjen me ekipin e Teutës. Ky shikohet si një zëvendësues ideal për mbrojtësin e dëmtuar Brahja. Haliti është vënë nën urdhrat e trajnerit Starova, i cili tashmë do të ketë edhe një alternativë më tepër në repartin mbrojtjes. Haliti mund të quhet edhe blerja më e fundit në merkaton e Teutës, e cila në këtë sezon ka qenë ndër më të spikaturat me emra të tillë, si Daniel Xhafa, Vrapi, Brahja, Devolli, Idrizoviç, Tetova etj.

Brahja, operacioni mund të kryhet në Austri
Mbrojtësi i ekipit të Teutës, Julian Brahja, mund të operohet në Austri pas dëmtimit të ligamentit që pësoi në takimin miqësor që ekipi zhvilloi me Kastriotin. Po bëhen tratativa për dërgimin e Brahjes në një klinikë të specializuar për raste të tilla në Austri, klinikë në të cilën janë operuar edhe futbollistë të tjerë të njohur. Një operacion në një klinikë të tillë do të bënte të mundur rikuperimin sa më të shpejtë të futbollistit dhe bashkimin e tij sa më të shpejtë me ekipin.

Llambi Kallço
Sporti Shqiptar

[OO7]

Drejtuesit e kuq theksojnë se kanë bërë më të mirën për forcimin e skuadrës 22-08-2006

Partizani, tani radhën e kanë tifozët

Rreth 100 tifozë e kanë ndjekur dje nga afër stërvitjen e të kuqve në fushat e klubit. Mbështetja e tyre për skuadrën e zemrës ka qenë gjithmonë për t'u marrë shembull, por kur skuadra është e aftë të rivalizojë për titull, interesimi i tyre është më i madh. Ardhja e Dorian Bylykbashit i ka ngrohur më shumë mbështetësit e Partizanit, për të cilët formacioni bazë nuk do të kishte kuptim pa kapitenin. Natyrisht, pranë skuadrës kanë qenë të gjithë drejtuesit e kuq pa përjashtim, për ta parë nga afër kontigjentin dhe gjendjen e ekipit. Presidenti Xhani, si gjithmonë prezent, është shprehur entuziast për skuadrën që ka ndërtuar, por, për t'ia dalë mbanë deri në fund, kërkon mbështetjen e tifozëve. "Askush nuk mund ta mohojë sakrificën që kemi bërë për ndërtimin e kësaj skuadre. Kemi ruajtur thuajse të gjithë kontigjentin e vitit të kaluar, pa harruar përforcimin me elementë cilësorë. Delain, Leandro, Bylykbashi e shumë lojtarë të tjerë mendoj se janë dhuratë e çmuar që po u bëjmë tifozëve. Tani kërkojmë të bëjnë ata detyrën që u takon. Futbolli luhet për tifozët, mbështetja e të cilëve është shumë e nevojshme. Kjo nuk ka të bëjë aspak me përfitimin financiar që mund të ketë klubi, por për të arritur objektivat na duhet patjetër mbështetja e tyre,"- është shprehur presidenti Xhani.

Kapiteni Bylykbashi, firmën mbi kontratë
Dje, siç pritej, ka dalë në stërvitje Dorian Bylykbashi, elbasanasi që kërkonte aventurën jashtë Shqipërisë. Ai ka nënshkruar kontratë me Partizanin. Në lidhje me këtë, presidenti Xhani ka pohuar: "Nuk do ta lija kurrsesi Bylykbashin të firmoste me skuadrat e tjera. Firmat e shumë futbollistëve të tjerë nuk do të kishin vlerë pa Bylykbashin. Ai është ikona e skuadrës. Për sa i përket kontratës së tij, ajo ishte e bardhë, mjafton që Bylykbashi të vendoste vetë shifrën dhe të hidhte firmën." Në stërvitjen e djeshme ra në sy menjëherë prania e kapitenit të kuq, i cili, me lëvizjet dhe talentin e tij, bën që mesfusha e kuqe të ketë tjetër cilësi. Tani tifozët janë më të qetë, pasi e panë me sytë e tyre idhullin në stërvitje.

Sasha Delain, rikthimi i titullarit
Përveç Dorian Bylykbashit, dje pritej të dilte në stërvitje edhe Sasha Delain, por ai ka mbërritur në Tiranë në orët e vona të mbrëmjes, kështu që tifozët do të kenë mundësi ta shohin sot në stërvitje. Delaini është goditja tjetër cilësore e Xhanit. Pas përfundimit të sezonit të kaluar, kongolezo-gjermani u largua nga Partizani, duke deklaruar se nuk kishte ndër mend të rikthehej në kampionatin shqiptar, por oferta e presidentit Xhani e ka joshur përsëri qendërmbrojtësin shtatlartë, për të cilin ky do të jetë sezoni i tretë radhazi me të kuqtë. "Delaini mbërrin sonte (mbrëmë) në orën 22:00, dhe ne do të dërgojmë njerëzit tanë ta presin. Që nesër ai do të stërvitet me skuadrën, për të qenë sa më shpejt i gatshëm për trajnerin,"- shprehet Genci Tomorri, drejtori i Akademisë "Partizani".

Fabiano ose Xhunior, njëri i kuq
"Pengu" i drejtuesve të kuq ka mbetur vetëm përforcimi i sulmit. Në skenë tani ka dalë Serafin Xhunior, futbollist i aktivizuar me të kuqtë dy sezone më parë. Presidenti Xhani ka sqaruar se kontaktet me Xhuniorin kanë nisur për shkak të pasigurisë për ardhjen e Fabianos, që të paktën edhe për 10 ditë nuk mund të jetë në Tiranë. "Qëllimi ynë është Fabiano, por kemi kontaktuar edhe Xhuniorin, pasi nuk jemi të sigurt për ardhjen e tij. Nuk duam të nënshkruajmë me të dy, pasi në këtë mënyrë do të nxirrnim jashtë loje shumë futbollistë të rinj. Mirëpo qëllimi ynë është t'u japim krahë të rinjve e jo t'i pengojmë të afirmohen te Partizani,"- është shprehur Albert Xhani, president i Partizanit.

Çështja "Leandro", drejt zgjidhjes
Leandro të jetë pjesë e Partizanit për sezonin e ri. Sipas lojtarit në fjalë, problemin me klubin shkodran e ka marrë përsipër ta zgjidhë vetë presidenti Xhani: "Po, do të luaj me Partizanin. Tani e ka në dorë presidenti Xhani, i cili më ka premtuar zgjidhjen e këtij problemi." Të njëjtën gjë ka deklaruar edhe presidenti i të kuqve, sipas të cilit nuk ka më lajme për mediat rreth çështjes "Leandro". Ashtu siç ndodh shpesh në Shqipëri, zgjidhja me sa duket është bërë prej "xhentëlmenësh", pa dashur që marrëdhëniet mes dy klubeve të krisen kot.

Me Apoloninë, të dielën në "Selman Stërmasi"
Takimin e parë të kampionatit të kuqtë do ta luajnë në "Selman Stërmasi". Pas bisedimeve për zgjidhjen e kësaj çështjeje, është vendosur që ky takim të luhet një ditë më vonë, pra të dielën, në stadiumin ku i zhvillon ndeshjet Tirana. "Selman Stërmasi" është parë si zgjidhje vetëm për javën e parë, pasi takimet e tjera brenda Partizani do t'i luajë në stadiumin kombëtar "Qemal Stafa".

Adi Metaliu
Sporti Shqiptar

[OO7]

Sulmuesi shkodran i verdhebluve, Albert Kaçi, beson se do të fitojë sërish me ekipin verdheblu 22-08-2006

Albert Kaçi: Me Elbasanin, sërish kampion

Elbasani ka siguruar edhe për këtë sezon shërbimet e sulmuesit shtatshkurtër shkodran Albert Kaçi, i cili ka firmosur një kontratë njëvjeçare me ekipin e Elbasanit. Për Kaçin, ky është një rikthim në shtëpi, pasi është shpallur kampion sezonin e kaluar. Në një intervistë për "Sportin shqiptar", Kaçi tregon pse firmosi sërish me Elbasanin dhe çfarë mendon ai për sezonin e ri.
Pas një shkëputjeje, jeni rikthyer sërish tek Elbasani...
- Po, është e vërtetë, kam firmosur përsëri edhe për sezonin e ardhshëm për ekipin që më shpalli kampion. Mund të them se nuk e kam pasur aspak të vështirë që të hidhja firmën, pasi e njoh këtë klub dhe tifozërinë e zjarrtë të këtij qyteti. Jam kthyer të shpallem sërish kampion.
Kur keni pasur ofertë nga Vllaznia, përse zgjodhët Elbasanin?
- Unë e vlerësoj Vllazninë, por nuk arritëm në një marrëveshje. Mund të them se për mua Elbasani tashmë është shtëpia ime e dytë pas Shkodrës. Vllaznia do të mbetet gjithmonë në zemrën time dhe një ditë karrierën time do ta mbyll aty. Mendoj se Elbasani më ka dhënë gjithçka në këto dy sezone dhe projekti është tepër ambicioz.
Rikthimi juaj është pritur me entuziazëm nga tifozëria verdheblu. Cili është komenti juaj për ta?
- Kur u ktheva nga Zvicra, falë mbështetjes së presidentit Laze, me atë gol kundër Tiranës, ku i dhashë një fitore të rëndësishme ekipit tim, për një çast isha në qiellin e shtatë dhe kjo falë entuziazmit të tifozërisë. Atmosfera që të jep kjo tifozëri është e paimagjinueshme. Tifozët e Elbasanit në këto dy sezone më kanë ndihmuar shumë dhe u premtoj se do të luaj akoma më fort këtë sezon.
Gjithsesi, Elbasani ka zhgënjyer në superkupë...
- Luajtëm mirë, por të mos harrojmë se ishim me një ekip që është grumbulluar në momentet e fundit. Mund të them se për javën e parë të kampionatit do të shikoni një tjetër Elbasan në fushë kundër Tiranës dhe atëherë do të bindeni se objektivi i vërtetë i Elbasanit do të jetë fitimi i titullit kampion. Për momentin me këtë konmtigjent askush nuk na beson, por kam besim se surprizat e Lazes nuk kanë përfunduar me kaq.
Pas largimit të Bejzades, Dalipit, Norës, Qorrit, jeni lider i sulmit, apo jo?
- Nuk mund ta them këtë. Unë gjithmonë jam përpjekur të bëj më të mirën për ekipin tim. Të gjithë këta futbollistë që përmendët janë liderë të vërtetë në fushë dhe e kanë treguar veten me Elbasanin. Kaçi nuk zëvendëson askënd. Unë do të jem gjithmonë në shërbim të Elbasanit dhe detyra ime është të shënoj sa më shumë, për t'i dhënë fitore ekipit dhe jo kënaqësi vetes.

Muja, talenti kosovar që premton shumë
Elbasani ka humbur në superkupë, por mund të themi se verdheblutë në këtë ndeshje kanë fituar një futbollist cilësor, kosovarin 21-vjeçar të Gjilanit në kampionatin kosovar të futbollit, sulmuesin Premton Muja. Ky i fundit ka spikatur në minutat që është aktivizuar kundër bardhebluve, duke bërë një debutim pozitiv, që në fund ka marrë vlerësime të mira nga ana e drejtuesve të ekipit kampion.

Fatmir Popja
Sporti Shqiptar

[OO7]

Trajneri i portierëve kavajas, Haki Arkaxhiu, është optimist për ekipin që drejton 22-08-2006

Arkaxhiu: Besa, pretendente e denjë

Një ndër figurat më të shquara të futbollit kavajas mbetet edhe trajneri aktual i portierëve, ish-trajneri i Besës, ndihmës i trajnerit Daiu sezonin e kaluar dhe një ndër portierët më të mirë shqiptarë, Haki Arkaxhiu. Sa herë Besa ka mbetur "në hall", ai së bashku me Përparim Daiun janë thirrur për ta shpëtuar. Që 16 vjeç ai nuk u shkëput nga Besa, në fillim si futbollist dhe më pas si trajner dhe ndihmëstrajner i saj. Në prag të sezonit të ri që starton këtë javë, ja se si e vlerëson ai ekipin kavajas:
Si e vlerësoni portën kavajase këtë sezon?
- Kemi zhvilluar një fazë përgatitore mjaft të suksesshme, ku edhe portierët Mustafa e Guma, por edhe Mehmeti, kanë djersitur mjaft. Besoj që përvoja, por edhe përgatitja e një portieri, si Arjon Mustafa, do të jetë një garanci e madhe për portën e Besës. Jo më me pak vlera e të ardhme janë edhe dy portierët e tjerë, Guma e Mehmeti. Besoj se problemi i portës kavajase është zgjidhur më së miri.
Po për ekipin në tërësi çfarë mendimi keni, kur këtë javë starton kampionati?
- Eshtë meritë e presidentit Bizhdili që ka ruajtur thuajse të gjithë kontigjentin e sezonit të kaluar. Në gjirin e ekipit ka mjaft kualitete dhe janë të gjitha mundësitë dhe shanset që Besa të zhvillojë një ndër kampionatet e saj më të mira. Gjithçka është në dispozicion të futbollistëve, financat, baza marteriale, kushtet e akomodimit, një suport ky mjaft komod për objektivin e vënë nga Bizhdili. Në tërë këtë kohë kam konstatuar një angazhim maksimal jo vetëm të portierëve që stërvis vetë, por të të gjithë grupit të futbollistëve. Jemi plotësisht të gatshëm për ta nisur mbarë sezonin të ri.
Në miqësoret e zhvilluara keni arritur vetëm një fitore. Ju tremb ky fakt?
- Qëllimi i takimeve miqësore nuk është thjesht rezultati teknik. Ju e dini që Besa aktualisht ka në përbërje 25 futbollistë dhe trajnerit Lika më shumë i ka interesuar të vlerësojë gjendjen dhe formën e secilit sesa rezultatin. Përpos kontigjentit të vjetshëm, në ekip janë afruar disa futbollistë dhe natyrshëm që këto miqësore na kanë shërbyer për të përcaktuar 22 futbollistët bazë që do të përballojnë kampionatin. Ju e patë që ndaj Dinamos humbëm në minutën e 91-të, kur në fushë ishte formacioni i dytë komplet. Nga kjo javë fillojnë e "shtrëngohen rripat" për të gjithë.
Zëra jashtë ekipit shprehen me rezerva për sulmin e Besës. Ju pajtoheni me ta?
- Eshtë mjaft herët për të dhënë një konkluzion përfundimtar. Pastaj kjo është e drejtë e trajnerit Lika. Eshtë ai që vlerëson vlerat e këtij, apo atij sulmuesi. Tifozët i krahasojnë me Furtunatin sulmuesit e huaj, por jam i mendimit se Erbi ishte një sulmues mjaft i kompletuar edhe në fillimet e tij kështu u paragjykua. Jepini kohë t'i shohim vërtet se sa vlejnë.
Ndeshja e parë ndaj debutuesit Kastrioti. Si e shihni këtë takim?
- Gjithnjë, pavarësisht nga kategoria dhe rëndësia e takimit, fusha e Krujës ka qenë e vështirë. Këtë fat e kanë provuar të gjithë, që nga Tirana, Flamurtari dhe të gjitha ekipet e tjera. Kastrioti kthehet pas 10 vitesh në superligë dhe, me sa di, ka zhvilluar përgatitje mjaft të mirë në prag të sezonit. Nga ana tjetër, Besa me investimet disa qindra milionëshe të presidentit do të udhëtojë në Krujë për të treguar vlerat e saj. Shpresojmë në një nisje të mbarë të sezonit.

Feriz Ferizaj
Sporti Shqiptar

[OO7]

Mesfushori i bluve është i bindur te forca e skuadrës në luftën për trofe 22-08-2006

Ahmataj: Dinamo mbetet sërish "nëndetëse"

Në skuadrën dinamovite gjithnjë e më shumë po shikohet një përqendrim i madh në stërvitje. Kjo për vetë faktin se sezoni do edhe 4 ditë që të hapet. Te blutë gjithashtu është shtuar ndjeshëm "etja" për një trofe, të cilën vjet nuk mundën ta shijonin. Në një deklarim për "Sportin shqiptar", mesfushori i Dinamos, Julian Ahmataj, e shpreh një gjë të tillë. Po ashtu, shton edhe se në skuadër të gjitha gjërat shkojnë shumë mirë dhe se për ndeshjen e parë me Teutën kërkon që të marrë tri pikët. "Deri më tani gjërat në skuadër janë duke shkuar mirë. Në sezonin e kaluar nuk mundëm të merrnim asnjë trofe. Një fakt i tillë bën që i gjithë ekipi të ketë etje të paktën për një trofe, kampionatin ose Kupën e Shqipërisë. Duke parë që jemi gjithmonë në ngritje mund të them se jam i bindur që njërën nga ato do ta fitojmë. Objektivi ynë për çdo ndeshje do të jetë që të fitojmë, se vetëm në këtë mënyrë do t'i arrimë ato detyra që i kemi vënë vetes. Tani që kemi edhe ndeshjen e parë me skuadrën e Teutës, do të bëjmë gjithçka për të marrë atë tripikësh, gjithashtu për të bërë një paraqitje sa më të mirë. E them këtë se është një nga gjërat më të rëndësishme të një skuadre në një fillim kampionati."
Ahmataj pohon se që nga ardhja e Sejdinit, gjërat kanë marrë për mirë në skuadër. "Marrëdhëniet tona me trajnerin janë nga më të mirat, nisur nga fakti që me Sejdinin kemi arritur të shpallemi kampion. Me sa shikoj, e njëjta gjë është e vlefshme edhe për shokët e ekipit. Ai bën detyrën e tij dhe ne tonën."
I pyetur për shokët e skuadrës, lojtari thotë që janë në një formë të mirë sportive dhe se gjendja e tyre është gjithnjë në ngritje. Me një gjë të tillë synimi i tij duket se është për të treguar se me këtë ekip, Dinamo do të arrijë qëllimet e saj. "Skuadra është mirë dhe gjendja e saj është gjithnjë në ngritje. Kjo rritje është si në anën fizike dhe në atë taktike. Deri më tani kemi bërë disa ndeshje miqësore dhe besoj se e kemi treguar një gjë të tillë. Nga fillimi i kampionatit nuk kanë mbetur edhe shumë, kështu që këtë kohë duhet ta shfrytëzojmë në maksimum. Për sa u përket lojtarëve që kanë ardhur këtë vit, mund të them se premtojnë shumë."
Në lidhje me largimin e Pemës drejt skuadrës së Tiranës, i cili dje nuk u paraqit në klub për stërvitjen e radhës. Ahmataj tha që nuk dinte gjë nëse ai ishte larguar. "Nuk e di nëse ai ka ikur nga skuadra. Por nëse e ka bërë një gjë të tillë, mund të them se secili e di vetë se çfarë bën me të ardhmen e tij. Nëse e shikon veten më mirë te Tirana, kjo mbetet një zgjedhje personale e Pemës."
Ku u pyet se nëse kishte në mendje të largohej nga skuadra në një të ardhme të afërt, mesfushori shtoi se nuk i shkon ndër mend hëpërhë. "Siç thashë më parë, unë jam një futbollist profesionist, që do të thotë se do të shkuaj të luaj aty ku më vlerësojnë. Dinamo tani është kthyer në shtëpinë time të dytë dhe shpresoj që këtu të qëndroj sa më gjatë,"- përfundon Julian Ahmataj, mesfushori i dalluar i kampionatit shqiptar.

Pema dhe Stafa, lamtumirë bluve
Në orët e fundit përpara mbylljes së merkatos, Dinamos i largohen nga gjiri i vet dy nga sulmuesit më premtues. Bëhet fjalë për Eleandro Pemën dhe Olgert Stafën, të cilët që nga dita e djeshme nuk janë më nën urdhrat e trajnerit Faruk Sejdini. Pema është bashkuar me rivalët e Tiranës, duke i lënë me gisht në gojë drejtuesit blu, të cilët e prisnin dje të firmoste kontratën e re. Ndërkohë për Stafën mësohet se sezonin e ardhshëm do të luajë në radhët e Luftëtarit, ku pas një sezoni të shkëlqyer me Shkumbinin, tani i ka sërish mundësitë të jetë një sulmues me peshë. Për këtë kalim të tij në radhët e ekipit gjirokastrit mund të ketë ndikuar edhe prezenca e donatorit Mihal Delijorgji, i cili e njeh që nga koha kur ka qenë president i skuadrës kryeqytetase. Tashmë, në repartin ofensiv të Dinamos mbeten vetëm dy sulmues, Gudjabi dhe Qorri.

Alikaj, duke çaluar në stërvitje
Mesfushori Enkel Alikaj u pa në stërvitjen e djeshme të Dinamos duke çaluar. 24-vjeçari u dëmtua në këmbë, pikërisht në miqësoren e së shtunës përballë Besës, duke dalë nga loja që në minutat e para të pjesës së dytë. Ky dëmtim i pësuar në këmbë, mendohet që ta mbajë për disa javë larg fushës mesfushorin e talentuar, i cili në këtë sezon pritet të ketë një rol protagonist ite Dinamo. Në ditët në vazhdim, Alikaj pritet të bëjë edhe një grafi të këmbës së majtë, për të parë më mirë shkallën e dëmtimit.

Arbër Hoxha
Sporti Shqiptar

[OO7]

Drejtuesit e kampionëve ranë dakord për marrjen e Sinës, por presin edhe Patushin 29-08-2006

Elbasani "grabit" bardheblutë e Tiranës

Ishte ora 11:05 e ditës së djeshme, kur nga një Mercedez i zi kanë zbritur përpara stadiumit "Selman Stërmasi" dy drejtuesit kryesorë të ekipit të Elbasanit, Artin Kovaçi dhe Ilir Bejtja. Pas tyre menjëherë është afruar edhe mesfushori Elvis Sina, i cili ishte në dijeni të faktit se të dy krerët e klubit kampion kishin ardhur zyrtarisht për të kërkuar atë, por edhe Saimir Patushin. Fill që të tre janë ngjitur në zyrat e sekretarit të klubit, Shkëlqim Muça, ndërkohë që ky i fundit nuk ndodhej aty. Pas një kafeje të pirë në lokalin ngjitur me stadiumin, të shoqëruar edhe nga koordinatori bardheblu, Alban Tafaj, pas dy orësh është realizuar takimi i shumëpritur midis drejtuesve të dy klubeve. Drejtori teknik i Elbasanit, Artin Kovaçi, duke parë dëshirën e Sinës për t'u veshur me fanellën verdheblu, ka diskutuar me Muçën mbi mundësinë e kalimit të tij në kampin tjetër. Në fakt, u bënë disa ditë që vet Elvis Sina ka shprehur dëshirën për t'u larguar nga Tirana, duke u bërë një shkresë donatorëve dhe kryesisë së klubit që ta lejojnë të largohet. Akordi midis të dyja palëve është gjetur përfundimisht, ku si fillim mesfushori i krahut të djathtë do të paguajë një shumë prej 10 milionësh lekë të vjetra dhe më pas mund të tërheqë dokumentacionin e plotë për t'u federuar me Elbasanin. Një procedurë e tillë do të kryhet ditët në vazhdim, ndërkohë që Sina dje kreu stërvitjen e parë me elbasanasit. Por krerët e kampionëve në fuqi nuk duan të qëndrojnë me kaq te Tirana, sepse dje kërkuan zyrtarisht të rrëmbenin edhe Patushin. Me matjanin është rënë dakord për anën financiare, ndërkohë që mbetet për t'u zgjidhur mënyra se si do të veprohet që ai të lihet i lirë, për vetë faktin se të dielën u aktivizua me bardheblutë. Me largimin e Sinës dhe Patushit, bardheblutë humbasin kështu dy lojtarë titullarë, por që sipas donatorëve kurrsesi nuk mund të mbahen me zor në ekip nëse kërkojnë një tjetër strehëz.

Aurel Celibashi
Sporti Shqiptar

Ne lajmin e dites se sotme thuhet se Patushi dhe Sina kane firmosur per Elbasanin, por sapo mora vesh se Patushi nuk ka pranuar edhe eshte kthyer perseri tek Tirana. Lajm me te detajuar do te keni neser.

[OO7]

Ky eshte lajmi per te cilin ju kam njoftuar edhe dje i botuar ne gazeten e sotme.

Mesfushori bardheblu, pas ballafaqimit të djeshëm, i la duarbosh drejtuesit e kampionëve 30-08-2006

Patushi: Elbasani? Jam mirë në kryeqytet

Pas një ballafaqimi midis drejtuesve të Tiranës dhe atyre të Elbasanit, mesfushori Sajmir Patushi i ka mbyllur një herë e mirë fjalët e përhapura për t'u larguar nga bardheblutë. Në të vërtetë, ka qenë drejtori teknik i kampionëve, Artin Kovaçi, i cili ditët e fundit e ka bërë fakt të kryer për mediat kalimin e matjanit në Elbasan. Paraditen e djeshme, në ambientet e vilës "Goldi", vetë mesfushori bardheblu është përballur me donatorin Refik Halili, por edhe me atë elbasanas, Ilir Bejtjen. Me dëshirën e madhe të këtij të fundit për ta pasur në skuadër, Patushi ka deklaruar në sy të donatorit Halili që nuk ka ndër mend të lëvizë nga Tirana. Sipas matjanit, kontrata e nënshkruar në muajin qershor është e vlefshme deri vitin e ardhshëm. Duke parë këtë situatë, krerët e Elbasanit janë larguar duarbosh, ndryshe nga sa ndodhi me rastin e Sinës, kur ata arritën ta "gllabëronin". Pas gjithë kësaj meseleje të merkatos, Sajmir Patushi konfirmon për "Sportin shqiptar" se nuk ka ndër mend të lërë një fanellë kaq të rëndë, siç është ajo e Tiranës. "Dua të sqaroj sot dhe përfundimisht se unë jam lojtar i Tiranës të paktën edhe për një sezon, në bazë të kontratës së firmosur dy muaj më parë. Fjalët e përhapura së fundmi, se mund të shkoj në Elbasan, nuk kanë asnjë bazë të vërtetë, sepse unë nuk kam folur me asnjë drejtues të këtij klubi. Nëse këta të fundit më pëlqejnë mua, s'do të thotë se mund t'ia arrijnë qëllimit të më prishin mendjen, kur dihet shumë mirë që unë luaj në një ekip me shumë emër, siç është Tirana. Mua nesër mund të më kërkojë edhe Reali i Madridit, por derisa kam një kontratë me një ekip tjetër, nuk bëhet fjalë që të lëviz. Gjithsesi, i falënderoj drejtuesit e Elbasanit për dëshirën e tyre për të më pasur në skuadër, por ndihem mirë në kryeqytet,"- bën të ditur mesfushori shkatërrues.
Nuk është hera e parë që emri i Sajmir Patushit lakohet në merkato, thuajse sa herë te Tirana gjërat nuk shkojnë mirë. Në njëfarë mënyre, vëmendja e të gjithëve përqendrohet tek ai, a thua se është "macja e zezë" e 22 herë kampionëve. Pavarësisht momenteve të vështira që mund të kalojë çdo futbollist, duhet thënë se matjani mbetet një prej lojtarëve kryesorë të formacionit bardheblu. Ky që ka nisur është sezoni i tij i pestë me Tiranën, çka tregon rëndësinë që Patushi ka në ekip. "Klubi "Tirana" është kthyer në një shtëpi të dytë për mua. U bënë pesë vite që luaj në kryeqytet dhe e kam të vështirë të ndahem që këtu për të shkuar në një ekip rrethesh. Kjo u pa edhe sezonin e kaluar te Vllaznia, kur nuk mund ta përballoja çdo ditë udhëtimin me makinë drejt Shkodrës dhe më pas kërkova largimin,"- përfundon Sajmir Patushi, mesfushori që dallohet për sedrën që shfaq në fushën e lojës.

Aurel Celibashi
Sporti Shqiptar

[CERIKSI-CHICAGO]

Ne kategorin e Pare marin pjese 14 skuadrat te cilat jane :



ADA (VELIPOJ)


BESLIDHJA (LEZHE)


BILISHT SPORT


BURRELI


ERZENI (SHIJAKU)


GRAMSHI


POGRADECI


LACI


LUSHNJA


SKENDERBEU (KORCE)


SOPOTI (LIBRAZHDE)


TEPELENA


TURBINA (CERRIK)


TOMORRI (BERAT)

[goldian]

forca adaaaaaaaaaaaaaaaaaaaaaa