Lajmet nga Superliga 2006/2007

[Noizy]

Vetëm ditën e sotme Tirana do të bëjë gjithçka zyrtare për sa u takon federimeve të lojtarëve që janë afruar së fundmi në skuadër. Sot është dita e fundit kur të gjitha skuadrat duhet të paraqiten në federatë, për të depozituar kontratat dhe lejet e kalimeve të lojtarëve që kanë afruar në skuadër gjatë muajit janar. Tirana është skuadra që ka lëvizur më shumë në këtë aspekt, teksa ka blerë mbrojtësin Albert Duro nga Teuta, Hetlem Çapjen nga Elbasani, Oriand Abazajn dhe Erald Turdiun nga Kastrioti, por edhe Florenc Rrapin nga Erzeni. Kësaj liste mund t'i shtohen edhe emrat e disa lojtarëve të rinj, që kanë dalë nga ekipet zinxhir, si vëllezërit Sharra, Glendi Tafaj apo Leandro Vladi.

[Noizy]

Pasditen e djeshme, bardheblutë preferuan ta zhvillonin stërvitjen në kompleksin e ekipeve kombëtare në Kamëz. Në dispozicion të trajnerit Muça ishin të gjithë futbollistët, përfshi këtu Vioresin Sinanin, i cili kreu vetëm disa vrapime, por edhe Isli Hidin, i cili u kthye nga Turqia një ditë me vonesë, pasi ishte i grumbulluar me ekipin kombëtar. Mungesa e vetme është ajo e kamerunasit Abada Fish, i cili edhe dje ka qenë në rolin e spektatorit. Deri ditën e enjte stërvitja do të kryhet në Kamëz, ndërkohë që të premten do të bëhet në stadiumin "Selman Stërmasi", ku do t'u jepet dora e fundit përgatitjeve anti-Teuta.

[Noizy]

Drejtori teknik i bardhebluve s'ka dyshime se është një sezon i mbarë në luftën për të dy trofetë.


Për drejtorin teknik të Tiranës, Alban Tafaj, suksesi në 17 javët e para të kampionatit është meritë e kolektivitetit që ekziston brenda skuadrës. Pas lënies së futbollit, ish-mesfushori i krahut ka marrë përsipër një detyrë të re, për të qenë pjesë e stafit drejtues, duke dhënë një kontribut të rëndësishëm në rezultatet e Tiranës. Ai është kthyer në njeriun që qëndron në krahun e majtë të trajnerit Shkëlqim Muça dhe së bashku me përgatitësin atletik, Rauf Dimrajn, kanë formuar një treshe me shumë personalitet përpara lojtarëve. Duke folur për "Sportin shqiptar", Alban Tafaj nuk ka dyshime se ky do të jetë një sezon i mbarë në luftën për të dy trofetë kombëtarë. "Derisa kemi derdhur shumë djersë në stërvitje, shpresojmë që sa më shpejt të shpërblehemi me rezultate në fushën e lojës. Jemi bërë vërtet një grup i fortë, si në lojtarë, ashtu edhe në staf drejtues dhe tani i vetmi detyrim është të fitojmë të dy trofetë e mundshme. Pa dyshim që forca e kësaj Tirane qëndron te kolektiviteti, ku të gjithë sakrifikojmë vetëm për një qëllim,"- shprehet drejtori teknik i bardhebluve.
Nisur nga ditët stërvitore në Turqi, Alban Tafaj është i mendimit se skuadra ka rritje të ndjeshme në aspektin fizik, rezultatet e së cilës mund të duken që këtë të shtunë përballë Teutës. "Faza përgatitore që zhvilluam në Kemer ishte në të gjitha drejtimet profesionale, sepse lojtarëve nuk u mungoi asgjë si brenda dhe jashtë fushës. Theksi iu vu në drejtim të anës fizike, pasi tashmë pjesë e stafit tonë është bërë edhe përgatitësi atletik Rauf Dimraj. Një punë të mirë kanë bërë edhe lojtarët e ardhur rishtaz në ekip, të cilët kanë filluar të ingranohen me grupi dhe besoj se do të jenë një armë më shumë gjatë pjesës së mbetur të sezonit. Në krahasim me javët e shkuara, tani është rritur ndjeshëm edhe konkurrenca brenda lojtarëve që luajnë në të njëjtin rol,"- shton më tej Tafaj.
Të shtunën, bardheblutë do të zbresin zyrtarisht në fushë, teksa do të përballen me Teutën në stadiumin "Qemal Stafa". Kjo ndeshje është planifikuar për t'u luajtur me drita, çka pritet ta shtojë edhe më shumë interesin nga ana e të dy tifozerive. Sipas drejtorit teknik Alban Tafaj, rezultati i vetëm që do të kërkohet, është fitorja. "Jemi të ndërgjegjshëm se përballë kemi rivalin më të afërt, që na hapi shumë probleme në ndeshjen e parë të luajtur në Durrës. Teuta ka pasur rezultate konstante në javët e para dhe mund të themi se ka një mbrojtje të organizuar, por edhe një golashënues të rrezikshëm si Xhafaj. Megjithatë, ne e presim me qetësinë e duhur këtë 90-minutësh, sepse kemi forca për ta kaluar, ku normalisht tri pikët janë një detyrim. Fakti që do të luajmë me drita, do t'ia shtojë edhe më shumë bukurinë sfidës. Shpresoj që edhe tifozët të vijnë dhe të na mbështetin, pasi është ndeshja e parë për këtë vit 2007 dhe na nevojitet një inkurajim nga ana e tyre,"- përfundon Alban Tafaj, drejtori teknik i bardhebluve.

[Noizy]

Trajneri i Riedit në Austri, Helmut Kraft, e ka ngritur në "qiell" goleadorin shkodran.


Hamdi Salihi duket se i ka bërë shumë shpejt për vete drejtuesit e skuadrës austriake, SV Ried, ku kaloi në janar. Jo vetëm tifozët, por edhe drejtuesit e klubit flasin me superlativa për të. Skuadra austriake e Salihit është në mes të përgatitjeve për rinisjen e sezonit futbollistik. Fazën e parë përgatitore e zhvilloi në Belek të Turqisë, ndërsa fazën e dytë po e vijon në shtëpi. Trajneri Helmut Kraft, duke folur për objektivat e skuadrës në kampionat, nuk ka lënë pa përmendur edhe punën e shkëlqyer të shkodranit 22 vjeçar, Hamdi Saliht, i cili ka shënuar 4 gola në ndeshjet miqësore. I pyetur se si arriti ta bindte Salihin, që ishte edhe në bisedime me Rapidin, që të nënshkruante me Riedin, Kraft është përgjigjur: "Vepruam në kohë dhe me shumë zgjuarsi. Patëm edhe ndihmën e një tjetër lojtari shqiptar, që quhet Merkoçi. Hamdi Salihi do të na sjellë shumë kënaqësi në klub. Ne nuk na lejohet më të bëjmë gabime dhe duhet të përgatisim golat që ne presim nga ai. Ai ka treguar gjatë përgatitjeve dimërore se në lojë është shumë i mirë dhe i përshtatshëm për ekipin tonë. Edhe për sa i takon kondicionit fizik, ai ndodhet në top formë. Ekipi e ka pritur shumë mirë atë. Përgjithësisht Salihi mua ka bindur dhe ai është i sigurt do të shënojë shumë gola për ne." Më tej, duke folur më në detaje për lojën e shkodranit, trajneri i Riedit, Kraft, ka pohuar: "Salihi është një njeri-gol. Ai ka nuhatje të jashtëzakonshme para portës, gjendet në vendin e duhur, në momentin e duhur. Pra, ai ka cilësi të veçanta, si rrallëkush, në zonën e rreptësisë. Sidoqoftë, ai ka veti të tilla, që mund të shënojë gol nga çdo pozicion. Për një futbollist të tillë nuk ka problem nëse topi do të vijë i lartë apo tokazi. Ai ka aftësi të pabesueshme për të parashikuar atë që do të ndodhë më pas, mund të jetë më i shpejtë se lojtarët e tjerë, për të patur topin në kontroll. Nga ana tjetër ai është shumë i fortë në ndërtimin e lojës dhe mund të marrë edhe vetë topa në mbrojtje dhe mesfushë. Pra, ai është mjaft energjik dhe i kompletuar në të gjitha anët. Salihi ka aftësi që edhe shokët e skuadrës t'i nxjerrë në pozicione ideale shënimi. Pra, nuk shënon vetëm vetë, por edhe shërben mjaft mirë për të tjerët. Edhe në lëvizshmërinë në fushë ai është shumë mirë. Shkurt, ai mund të luajë me një rritëm shumë të lartë loje."

[Noizy]

Në prag të takimit miqësor midis kombëtares sonë Shpresa dhe asaj të Greqisë, dje trajneri i 21-vjeçarëve shqiptarë, Artan Bushati, shpalli listën e 19 lojtarëve që do të grumbullohen për këtë takim. Miqësorja do të luhet në Athinë më datën 6 shkurt, në orën 15:00 (ora lokale e Greqisë). Ndërkohë, nga lista e shpallur dje bie në sy mungesa e futbollistëve Jetmir Hyka, Xhevahir Sukaj dhe Elis Bakaj. Në qoftë se për Hykën dhe Sukajn dihet arsyeja, për 19-vjeçarin e Partizanit nuk është ende e qartë përse nuk është thirrur nga Bushati. Gjithsesi, Hyka dhe Sukaj nuk do të grumbullohen me Shpresën, sepse trajneri i kombëtares shqiptare, Oto Bariç, u ka bërë ftesë lojtarëve për takimin miqësor të 7 shkurtit, Shqipëri-Maqedoni. E veçanta e kësaj liste qëndron në faktin se i është bërë përsëri ftesë talentit shqiptar që aktivizohet në Greqi me Panathinaikasin, Sotir Nini. Me 16-vjeçarin Nini pritet të bisedojë vetë trajneri Artan Bushati, ndërkohë që dje në shtypin grek thuhej se lojtari dëshiron të luajë për Greqinë dhe federata e këtij shteti ka filluar menjëherë procedurat për ta pajisur shqiptarin me pasaportë greke. Vlen të theksohet se goli i Ninit në takimin e fundit të Panathinaikosit u cilësua nga FIFA goli më i bukur në botë për javën që lamë pas. Çështja "Nini" tashmë duket se do të zgjidhet si gjithnjë në favor të të tjerëve, sepse shpresat për të mbrojtur ngjyrat kuqezi janë fare të pakta.
Lista e kombëtare Shpresa
Enea Koliqi (Iraklis), Olsi Bishani (Vllaznia), Alban Hoxha (Turbina), Andi Lila, Renato Arapi (Besa), Sadush Danaj (Besëlidhja), Emiliano Vila (Teuta), Daniel Ramazani (SHkumbini), Bledion Guga (Flamurtari), Nertil Ferraj, Ilirjan Çaushaj (Dinamo), Nevian Cani, Gilman Lika, Alsid Tafili (Vllaznia), Jetmir Sefa (Tirana), Erando Karabeci, Gerhard Progri, Enzo Malindi (Partizani), Sotir Nini (Panathinaikos)

[Noizy]

- DJE u bë analiza e fazës së parë të kampionatit kombëtar të minifutbollit. Merrte pjesë presidenti i shoqatës së minifutbollit, Alfred Zijai, sekretari i ligës Bujar Pregja dhe përfaqësuesit e shumicës së skuadrave që marrin pjesë në kampionat. Faza e dytë fillon nesër, ndërkohë që sipas informacioneve Durrësi është tërhequr nga kampionati për arsye financiare.
- DUKE filluar që nga kjo javë, shorti i gjyqtarëve shqiptarë të futbollit nuk do të hidhet më ditën e enjte. Shorti do të hidhet çdo të mërkurë, ndërkohë që procedura e tij do të vazhdojë të bëhet në televizionin "Alsat".

[Noizy]

Sektori i garave në FSHF publikoi dje federimet e para zyrtare për tri skuadra të kategorisë superiore.

Federimet zyrtare
VLLAZNIA: Xhelal Miroçi, Nevian Cani, Ndriçim Shtupina
DINAMO: Vangjel Mile, Goran Graniç, Ardian Nuhiu
TEUTA: Blendi Shkëmbi

Pas gati një muaj, që nga hapja e merkatos dimërore, më në fund ditën e djeshme u zyrtarizuan lëvizjet e para të transferimit të lojtarëve në këtë periudhë. Sektori i garave në FSHF publikoi dje shtatë federimet e para, të cilat u përkasin tri skuadrave të kategorisë superiore. Fatin e këtyre zyrtarizimeve duket se e kanë pasur Vllaznia, Dinamo dhe Teuta, sepse kanë qenë të rregullta me dokumentacionin e lojtarëve. Kështu, që nga dita e djeshme, Xhelal Miroçi, Nevian Cani dhe Ndriçim Shtupina mund të quhen lojtarë të Vllaznisë. Sulmuesi kosovar Miroçi vjen te Vllaznia pas aktivizimit në oberligën gjermane, me skuadrën SG Dornheim. Ndërkohë, sulmuesi tjetër, Cani, rikthehet te shkodranët pas huazimit 6-mujor tek Shkumbini, ndërsa i riu Shtupina vjen nga Ada dhe ka firmosur një kontratë trevjeçare me Vllazninë. Për sa i përket sulmuesit senegalez të Dinamos, Gudjabi, i cili është përfolur në shtyp për kalimin tek Vllaznia, çdo gjë do të varet nga vendimi i komisionit të disiplinës. Vetë senegalezi ka bërë një kërkesë, që problemi i zgjidhjes së kontratës që ka me klubin dinamovit të kalojë për t'u shqyrtuar në komisionin e disiplinës, i cili do të mblidhet sot. Gjithashtu, tre lojtarë të rinj federoi edhe Dinamo. Bie në sy ardhja e dy sulmuesve Mile dhe Nuhiu, ndërsa reparti i mbrojtjes përforcohet me kroatin Graniç. Sulmuesi beratas Vangjel Mile rikthehet tek Dinamo pas aktivizimit në ligën e dytë norvegjeze me skuadrën Konsvinger, ndërkohë që sulmuesi tjetër Nuhiu vjen nga kampionati maqedonas, ku militonte për ekipin Rabotniçki. Goran Graniç është lojtari i tretë i federuar për dinamovitët, të cilët presin të federohen edhe lojtarë të tjerë, pas kërkesave që janë bërë në FSHF. Në fund, për Teutën u federua vetëm një futbollist, i cili është mesfushori Blendi Shkëmbi, që vjen pas aktivizimit në kampionatin ukrainas. Gjithsesi, këto ishin vetëm shtatë federimet e para, sepse sot pritet të ketë zyrtarizime të tjera nga sektori i garave. Sipas shefit të këtij sektori, Hito Hitaj, edhe pse dje ishte dita e parafundit e kërkesave për federim, nuk erdhi asnjë drejtues klubi për ta bërë një gjë të tillë. Duhet thënë se sot do jetë një ditë e vërtetë pune për këtë sektor, pasi fluksi i kërkesave do të jetë vërtet i madh. Drejtuesit e klubeve shqiptare nuk e kanë harruar zakonin e vjetër, që çdo gjë e lënë për ditën e fundit. Vlen të theksohet se shumica e kërkesave të klubeve janë me probleme në plotësimin e dokumentacionit të lojtarëve, por çdo gjë rëndon mbi këta të fundit, pasi nuk do kenë mundësi aktivizimi deri sa çështja e tyre të zgjidhet. Megjithatë, deri më tani vihet re se Dinamo dhe Vllaznia kanë lëvizur më shumë gjatë kësaj periudhe, por duhet të presim se çfarë do të bëhet sot, ku flitet se do të ketë shumë surpriza.

[Noizy]

Presidenti i Partizanit deklaron se skuadra e tij do ta synojë deri në fund titullin kampion.


Një ditë pas bisedës së gjatë me një grup tifozësh të Partizanit, të cilët kanë kërkuar shpjegime për trofetë e munguara gjatë viteve të drejtimit të tij, Albert Xhani, presidenti i Partizanit, është shprehur se nuk do të dorëzohet kurrë përballë presioneve në media, por do të luftojë me mish e me shpirt për skuadrën e kuqe, natyrisht duke marrë përgjegjësitë që i takojnë për trofetë e munguara. "Unë tifozët e vërtetë të Partizanit i kam pritur dhe do t'i pres gjithmonë, i kam respektuar dhe do t'i respektoj, pasi ata gjithmonë kanë të drejtë për atë që kërkojnë. Edhe mua më vjen shumë keq për titujt e munguar dhe për këtë marr përgjegjësitë e mia, por dua të theksoj se kam punuar me përkushtim për aq kohë sa jam president i skuadrës. Unë u jap të drejtë tifozëve po u kërkoj gjithashtu që gjatë 90 minutave të lojës ta përkrahin skuadrën dhe jo ta demoralizojnë,"- është shprehur presidenti i Partizanit, që ka mbetur shumë i zhgënjyer, sipas tij, nga keqinterpretimet e shtypit, mbi bisedën që ai ka zhvilluar me përfaqësinë e tifozëve të Partizanit. Sipas njëshit të të kuqve, ai nuk është dorëzuar, madje as e çon nëpër mend një gjë të tillë. "Nuk kam ndër mend të largohem nga Partizani dhe as jam dorëzuar siç është thënë në shtyp. Garantoj mbështetjen e plotë financiare, derisa të jem president i Partizanit. Nuk do të jetë e largët dita kur do ta shihni Partizanin me trofe në duar, siç i ka hije,"- ka vijuar më tej Xhani. Edhe pse përforcimet me lojtarë cilësorë kanë munguar, numri "një" i klubit të kuq beson se skuadra e tij do ta synojë deri në fund titullin, pasi lojtarët që ka premtuar do të vijnë. "Vërtet kanë ikur disa lojtarë, por kjo nuk do të thotë se kemi hequr dorë nga trofetë. Përveçse kemi lojtarë të mjaftueshëm për t'i zëvendësuar, ne presim përforcimet që kemi synuar që në hapjen e merkatos. Ne e kemi përgatitur prej kohësh dokumentacionin e tyre, por për arsye objektive këta futbollistë nuk kanë mundur të mbërrijnë më parë. Në këtë rast nuk bëhet fjalë për lojtarë që duhet të provohen, por për futbollistë cilësorë, që do të jenë të gatshëm të kontribuojnë menjëherë sapo të mbërrijnë. Mund t'ju them se njëri prej tyre është lojtar i AEK-ut, të cilin Gerardi e njeh shumë mirë. Partizani do të bëjë një paraqitje shumë të mirë gjatë ndeshjeve të ardhshme, madje do të synojë deri në fund titullin kampion,"- ka përfunduar presidenti i të kuqve.

[Noizy]

"Futbolli nuk është si shkolla e natës dikur, që një ditë vjen dhe të nesërmen e bën pushim." Këto janë fjalët që mësohet t'i ketë thënë trajneri Sejdini futbollistit afrikan Akamba, që për disa ditë ishte në provë te Shkumbini. Gjuha ironike e "Xhaxhit" ishte një përgjigje për kamerunasin, i cili mungonte herë pas here në stërvitje pa asnjë arsye. Mesfushori Akamba erdhi përpara dy javësh për provë te Shkumbini nga ekipi kampion i Elbasanit, duke u konsideruar i vlefshëm për përforcimin e ekipit dhe duke zhvilluar nën drejtimin e Sejdinit një pjesë të fazës përgatitore. Por me kalimin e ditëve afrikani filloi të mungojë në stërvitje pa asnjë arsye dhe kjo e mërziti jo pak trajnerin, i cili nuk kishte si ta pranonte këtë gjë, duke shpejtuar në këtë rast edhe dhënien e mendimit përfundimtar për ta larguar.

[Noizy]

Zhvillohen vetëm dy takime

Dje filloi faza e dytë e kampionatit të minifutbollit, ku nga katër takime që ishin për t'u zhvilluar, u luajtën vetëm dy prej tyre. Përfundimisht, Durrësi është tërhequr nga gara për arsye financiare, ndërkohë me vendim të shoqatës së minifutbollit, skuadrat që sipas kalendarit duhet të luajnë me Durrësin, e fitojnë takimin në tavolinë, 2-0. Ndërkaq, sipas kalendarit dje u zhvilluan takimet 1 Maji-Flamurtari dhe Antena Nord-Albetrol, ndërkohë takimet Vllaznia-Ali Demi dhe Pogradeci-Tirana nuk u zhvilluan për arsye që ende nuk dihen. Nga takimet e luajtura, ekipi i Flamurtarit arriti një fitore në transfertë me 1 Majin. Vlonjatët fituan me rezultatin 6-4 dhe vazhdojnë të ndjekin hap pas hapi kryesuesen e Grupit B, Flabinën. Ndërkohë, takimi tjetër i zhvilluar në Shkodër, midis Antena Nord dhe Albpetrolit, përfundoi me fitoren e thellë të vendësve, me rezultatin 10-3. Skuadrat e tjera nuk luajtën, pasi nga kampionati janë tërhequr tashmë katër skuadra, Vizion+, Besa, Erzeni dhe Durrësi. Deri tani Grupin A e kryeson Tirana me 21 pikë, ndërsa grupin B, Flabina me 22 pikë.