Lajmet nga Superliga 2006/2007

[Noizy]

Drejtuesit e Federatës Shqiptare të Futbollit janë hakmarrë sapo u ka ardhur rasti me të riun e Partizanit, Elis Bakaj, i cili shkëlqeu në miqësoren e Shpresës sonë me Turqinë. Ky veprim ka ardhur për shkak të mosparaqitjes së futbollistit të Partizanit në grumbullimin e kombëtares së Bariçit vetëm dy ditë pas miqësores. Në fakt, ka qenë presidenti Xhani ai që nuk e lejoi futbollistin e tij të grumbullohej nga Bariçi, pasi Lika e donte në Ulqin. FSHF-ja nuk mbajti asnjë qëndrim zyrtar ndaj klubit të kuq në atë moment, edhe pse u tha se do të zhvillohej një mbledhje e posaçme për këtë problem, por gjeti rastin për t'u hakmarrë me lojtarin në grumbullimin pasardhës. Në listën e lojtarëve që do të luajnë në miqësoren e gjashtë shkurtit ndaj Greqisë nuk figuron emri i Bakajt. Emri i tij është shënuar në listë nga Artan Bushati, por është fshirë nga zyrtarët e tjerë të FSHF-së, të cilët nuk morën masa ndaj klubit, por ndëshkuan lojtarin, që në ditën kur është thirrur nga Bariçi ndoshta ka qenë njeriu më i lumtur në botë.

[Noizy]

Skuadra e Partizanit ka zhvilluar dje dy seanca stërvitore. Paradite kanë qenë të pranishëm vetëm lojtarët e rinj, të cilët nuk e kanë marrë të plotë ngarkesën fizike të fazës përgatitore. Titullarët janë stërvitur vetëm në seancën e pasdites, pasi nuk mund të marrin ngarkesë të lartë fizike katër ditë para takimit të radhës në kampionat. Partizani do të udhëtojë të shtunën në Elbasan, për të përballuar një sfidë mjaft delikate me ekipin vendës.

[Noizy]

Trajneri i Partizanit konfirmon bisedimet me Enkel Alikajn, që deri dje është stërvitur te Dinamo.


Shpresat për një Partizan pretendent për trofetë e sezonit po veniten dita-ditës. Afati zyrtar për federimin e lojtarëve skadon nesër, duke e bërë thuajse të pamundur realizimin e një merkatoje cilësore. Megjithatë, trajnerin Lika ka besim se në këto dy ditë të mbetura do të vijnë lojtarët që do ta kompletojnë grupin e Partizanit. "Nuk mund të them se kemi dështuar në merkato, pasi kanë mbetur edhe pak ditë deri në mbylljen zyrtare të federimeve. Ne do të shpresojmë deri në çastet e fundit, pasi jemi në kontakte të vazhdueshme me lojtarë të ndryshëm,"- është shprehur trajneri i Partizanit. Shpresa gjithmonë vdes e fundit, por tek Partizani duket se shpresa ka vdekur me kohë. Deklaratat e drejtuesve të kuq janë vetëm fjalë që i merr era, pasi ata thonë të njëjtën gjë në çdo prononcim të tyre. Rikthimi në skuadër i Kelmendit, i huazuar gjatë fazës së parë te Skrapari, dhe i Dokut, që deri dy ditë më parë luante në radhët e Erzenit, tregon qartë se presidenti Xhani nuk ka ndër mend të sjellë në skuadër futbollistë të tjerë. Ndërkohë, me gjithë diplomacinë që e karakterizon, Hasan Lika, trajneri i të kuqve nuk mund ta fshehë shqetësimin për repartin e pasmë, që ka nevojë për lojtarë me potenciale. "Gjatë këtij muaji kemi punuar shumë në të gjitha drejtimet, por kjo arritje nuk mund ta kompensojë kollaj mungesën e lojtarëve titullarë, sidomos në mbrojtje. Për këtë fakt jam i shqetësuar dhe shpresoj ta zgjidhim këtë problem në ditët e fundit të merkatos. Ne kemi thirrur në skuadër dy futbollistë të rinj si Kelmendin dhe Dokun, që kanë qenë të Partizanit që në fillim të sezonit,"- ka shtuar më tej Lika. Përveç lojtarëve afrikanë, që duhet të vinin gjatë fazës përgatitore të Ulqinit, Lika ka konfirmuar interesimin për Alikajn, lojtarin e Dinamos që vjen sapo është riaftësuar pas një dëmtimi të gjatë. "Afrikanët i presim deri në çastin e fundit, ndërkohë që jemi në bisedime edhe me Alikajn e Dinamos. Shpresoj t'i mbyllim me sukses tratativat, që pas merkatos së janarit grupi i lojtarëve të jetë i kompletuar,"- ka vijuar njëshi i stolit të kuq. Sipas burimeve pranë klubit të kuq, Alikaj pritet të dalë që sot në stërvitje, për të vijuar përgatitjet nën urdhrat e Likës.

[Noizy]

Komisioni i Apelit, pas një mbledhje të gjatë, hedh poshtë vendimet e disiplinës për futbollistët fierakë.


Mbrëmë, Komisioni i Apelit, ka rrëzuar vendimin e Disiplinës, të marrë para pak ditësh rreth futbollistëve të përjashtuar nga Apolonia, për bojkotim të ndeshjes me Flamurtarin. Disiplinori kishte dhënë "liri" për këta futbollistë, duke dalë mbi rregulloret e klubit fierak, ndërkohë që drejtuesit e Apolonisë i janë drejtuar Apelit për këtë problem. Pas një mbledhjeje të gjatë, anëtarët e Komisionit të Apelit kanë gjykuar si jo të drejtë vendimet e Komisionit të Disiplinës, duke lënë në fuqi kërkesat e klubit fierak. Kështu, komisioni në fjalë, në mbledhjen e tij të mbrëmshme, ka vendosur që Sebino Plaku, Rezart Hyso dhe Gerti Kote mbesin futbollistë të Apolonisë dhe nuk kanë të drejtë për të kaluar në ndonjë ekip tjetër. Ndërkohë, Komisioni i Apelit ka marrë gjithashtu vendimin, që futbollistët e Apolonisë, Kule, Demiri, Mërtiri dhe Miço, të konsiderohen lojtarë të lirë.
Rreth këtyre vendimeve të orës së vonë, redaksia ka kontaktuar me sekretarin e klubit Apolonia, Liu Bistika, i cili i komenton kështu vendimet e Komisionit të Apelit:
- Zoti Bistika, duke qenë se komisioni i apelit ka lënë përfundimisht në fuqi kërkesat e klubit tuaj, cili është komenti juaj?
- Në emër të Apolonisë, falenderoj presidentin e FSHF-së, sekretarin e përgjithshëm, komisionin e apelit, sektorin e garave dhe drejtuesit e tjerë të FSHF-së, të cilët në unitet me opinionin sportiv shqiptar dhe me seriozitet të lartë, mbështetën qëndrimet e drejta të klubit tonë në ndëshkim të futbollistëve që shkelin rregullat dhe dokumentet e institucioneve të futbollit dhe të klubit tonë. Klubi ynë nuk do të harrojë kurrë se ne i sfiduam presionet vulgare që u ushtruan nga brenda dhe jashtë klubit tonë, duke mos qenë vetëm por duke pasur mbështetjen parimore e institucionale të federatës shqiptare të futbollit dhe të presidentit të saj, zotit Armand Duka.
- Atëhere çdo të bëhet me futbollistët që bojkotuan më 25 nëntor, të cilët, komisioni i apelit i ka lënë në dispozicion të klubit?
- 4 futbollistëve ju kemi dhënë shansin të reflektojnë, duke qëndruar në radhët e Apolonisë, 11 futbollistë të tjerë i kemi larguar nga skuadra dhe i kemi lejuar të shkojnë në klube të tjera. ndërsa 4 futbollistët e fundit, konkretisht Kule, Mërtiri, Demiri e Miço, ne i kemi fshirë qysh dy muaj më parë nga lista e futbollistëve tanë dhe i kemi lënë në dispozicion të federatës.
- Po me Koten çfarë do të bëhet?
- Kote është në kontratë deri në vitin 2008. Ai vazhdon të mbetet i pezulluar deri në fund të këtij sezoni nga ndeshjet zyrtare të Apolonisë. Ne mund ta huazojmë në ndonjë skuadër tjetër për këtë sezon, në qoftë se do të ketë ndonjë klub të interesuar për të.

[Noizy]

Rikthimi i sulmuesit Daniel Xhafaj ka rritur moralin në kampin durrsak dhe pretendimet.

Rikthimi te Teuta i sulmuesit Daniel Xhafaj ka rritur moralin në kampin durrsak dhe pretendimet në luftën për titull. Një Teutë me një portier si Kapllani në portë, me një futbollist të ekipit përfaqësues si Vrapi në mbrojtje, një mesfushë ku spikat Bledi Shkëmbi dhe me një sulm të blinduar me Daniel Xhafajn, Mancakun dhe Kulin, për më tepër me një trajner si Starova, do t'u shtinte frikën të gjitha ekipeve që pretendojnë kreun. Në fakt, edhe mesfushori i ekipit përfaqësues Bledi Shkëmbi e shikon rikthimin e Daniel Xhafajt si një shans më shumë në luftën për titull. Sipas Shkëmbit, ekipi kishte nevojë për një lider në vijën sulmuese dhe më mirë se Danieli askush nuk mund ta bënte këtë. "Tashmë edhe një nga repartet e diskutueshme është forcuar dhe ekipit nuk i mungon asgjë për të pretenduar titullin," - shprehet Shkëmbi. Duke iu referuar takimit të radhës me ekipin e Tiranës, Shkëmbi do të deklaronte se në një sfidë të tillë të tri rezultatet janë të hapura. Fakti që në këtë takim ekipi nuk do të ketë mungesa, apo probleme të tjera, do të thotë për Shkëmbin një shans më shumë për të shpresuar maksimumin në përballjen me Tiranën. Pas një faze përgatitore të lodhshme, Shkëmbi mendon se ekipi tashmë po e merr gradualisht formën dhe fuqitë e duhura për të përballuar një ndeshje të vështirë. Ndonëse nuk ka qenë në grupin e Teutës në pjesën e parë të kampionatit, Shkëmbi deklaron se një fillim si ai me Dinamon në ristartin e kampionatit do të ishte shumë i rëndësishëm për ekipin. Në lidhje me repartin e mesfushës, ku Starova i ka dhënë rolin e "trurit" në skuadër, mesfushori korçar deklaron se është një grup shumë i mirë, me futbollistë të tillë që ke garanci në çdo ndeshje. Si shembull për këtë Shkëmbi evidenton takimin miqësor me ekipin e Dinamos, ku ky repart funksionoi siç duhet. Në takimin e parë me Teutën, pas një kohe të gjatë shkëputjeje, korçari Bledi Shkëmbi nuk e fsheh dëshirën e tij për të fituar. "Një fillim i mbarë është gjysma e punës. Do të doja të fitonim në këtë ndeshje, më shumë për ekipin sesa për vete. Kjo do të na jepte më shumë krahë dhe besim, pa harruar se edhe tifozëria do të na kthehej më shumë në përkrahje," përfundon mesfushori i Teutës, Bledi Shkëmbi.

[Noizy]

Në kampin shkodran nuk duken shumë të shqetësuar në lidhje me çështjen e futbollistit senegalez El Haxhi Gudjabi. Ata duke menduar se kanë të drejtë në kërkesën e tyre për ta federuar, e kanë çuar këtë çështje në Komisionin e Disiplinës. Për rrjedhojë, në mbledhjen e sotme të këtij komisioni pritet të jetë një ballafaqim mes lojtarit dhe drejtuesve të Dinamos që pretendojnë se kanë ende kontratë me lojtarin. Ky i fundit mendon ndryshe, prandaj dhe ka firmosur për një vit e gjysëm me Vllazninë. Drejtuesit e kësaj të fundit duken të qetë në këtë çështje, duke shpresuar se Disiplina do t'ua njohë kontratën që ata kanë firmosur me afrikanin. Menjëherë pas vendimit të këtij komisioni, kuqeblutë pritet të bëjnë federimin e Gudjabit me ta për vazhdimin e sezonit.

[Noizy]

Nga sa bëhet e ditur në kampin shkodran, përpara ndeshjes me Flamurtarin futbollistët nuk do të jenë shumë të autorizuar për të dhënë deklarata për shtyp. Kjo sipas një kërkese të trajnerit Josa për ta përgatitur sfidën e radhës në qetësi dhe pa shumë bujë, sepse është sfida e parë për këtë vit dhe për rrjedhojë më tepër se në media futbollistët duhet ta tregojnë këtë në fushën e blertë. Pavarësisht nga ky fakt, te Vllaznia marrëdhëniet me median asnjëherë nuk janë vënë në pikëpyetje dhe kështu duket se do të ndodhë edhe tani, sepse më tepër se me gazetarët, kuqeblutë kërkojnë qetësinë për veten e tyre. Një praktikë e tillë ndiqet shpesh nga skuadra të ndryshme në prag të ndeshjeve të rëndësishme dhe Josa të tillë e konsideron edhe ndeshjen me Flamurtarin.

[Noizy]

Sulmuesi shkodran Xhevahir Sukaj thotë se ëndërra po realizohet më parë nga se e kishte menduar.


Brenda pak muajsh është shndërruar në një nga lojtarët e momentit për kampionatin shqiptar. Një evidentim i shpejtë si titullar dhe golashënues me Vllazninë, një ftesë dhe protagonist në lojërat e ekipit kombëtar Shpresa dhe së fundi protagonist edhe në grumbullimin e Kombëtares B në Turqi, çka mund t"i hapë rrugën atij edhe për një ftesë në miqësoren e pas pak ditëve kundër Maqedonisë. Bëhet fjalë për Xhevahir Sukajn, shkodranin që vetëm 3 muaj më parë mbushi 19 vjeç. Pas kthimit të tij nga grumbullimi me kombëtaren, ai duket mjaft entuziast, por premton se do të vazhdojë të djersijë në stërvitje për ta bërë edhe më mirë punën e tij tashmë me Vllazninë. Ja si shprehet ai për "Sporti Shqiptar":
Xhevahir, brenda pak kohësh jeni shndërruar në një lojtar të rëndësishëm. Si po i përjetoni këto momente?
Të them të drejtën edhe vetë në fillim të sezonit nuk e kisha menduar se gjërat do të shkonin kaq mirë. Por falë aktivizimit të rregullt me Vllazninë erdhi edhe ajo me ekipin Shpresa, njëkohësisht u ftova nga trajneri Bariç edhe me Kombëtaren B së fundi në Turqi.
Pikërisht për këtë të fundit, mendoni se erdhi ngaqë luajtët mirë në miqësoren që Shpresa jonë fitoi 2 0 ndaj turqve, ku shënuat edhe ju?
Ndoshta është kjo arsyeja kryesore, por mendimi im është se mund të kem qenë në listë që më përpara. Për këtë arsye pas ndeshjes me ekipin Shpresa unë nuk u ktheva në Shqipëri, por për tre ditë u stërvita me Tiranën në Turqi derisa erdhi ekipi kombëtar.
Ndërkohë është bërë i ditur fakti se gjatë këtyre ditëve keni qenë në qendër të vëmendjes së disa menaxherëve të huaj. Sa i vërtetë është ky lajm?
Ai është plotësisht i vërtet, madje mund të them se kanë qenë disa skuadra që kanë kërkuar të bisedojnë me mua, madje jo vetëm skuadra të huaja, por edhe të kampionatit shqiptar, por unë i kam kthyer mbrapsht.
Pse?
Sepse pikësëpari jam ende në moshë të re dhe dua ta mbyll të paktën këtë sezon në Shqipëri. Së dyti, nëse vendos të largohem, kjo i përket vetëm sezonit tjetër dhe atëherë, duke marrë pëlqimin e presidentit të Vllaznisë, Valter Fushaj, me të cilin kam të nënshkruar një kontratë deri në fund të sezonit 2007 08.
Jeni kthyer në Shkodër tashmë dhe menjëherë në stërvitje me Vllazninë. Ndërkohë ka ardhur Gudjabi, po ashtu Cani është duke u paraqitur shumë mirë. Mendoni se pozicioni juaj si titullar është lëkundur tashmë?
E rëndësishme është që të gjithë të bëjmë më të mirën për Vllazninë. Sa më shumë lojtarë cilësorë të jenë në skuadër, aq më mirë është. Se kush do të luajë pastaj e di trajneri, ndërkohë që secili prej nesh do të përpiqet të bëjë më të mirën për të qenë titullar. Unë për vete do të vazhdoj të punoj shumë, madje më shumë se deri tani.
Së fundi, mediat e bëjnë fakt të kryer grumbullimin tuaj nga ana e trajnerit Bariç për miqësoren me Maqedoninë. Nëse ndodh kështu, cili do të ishte reagimi juaj?
Për momentin nuk e di nëse do të ftohem apo jo, megjithëse kam dëgjuar për një gjë të tillë. Kuptohet, që do të ishte një ëndërr e realizuar për mua, madje më shpejt se e kisha menduar, sepse jam vetëm 19 vjeç.

[Noizy]

Pas kthimit nga Turqia, për Tiranën është kohë bilancesh. Nuk bëhet fjalë vetëm në aspektin e mënyrës së përgatitjes dhe problemeve që u hasën, por edhe në aspektin financiar. Nga burime zyrtare mësohet se faza përgatitore e kryer në Kemer, për 14 ditë, u ka kushtuar plot 30 mijë euro buxhetit të klubit. Në këtë shifër përfshihen 10 mijë euro biletat e avionëve për 30 persona dhe më pas 20 mijë euro, ushqimi, fjetja dhe stërvitja në hotelin me pesë yje, "Limak Limra". Pavarësisht kësaj shifre, relativisht të konsiderueshme për futbollin shqiptar, drejtuesit bardheblu shprehen se kanë mbetur të kënaqur për gjithçka që provuan në Turqi. Madje, edhe në vitet në vazhdim Kemeri do të synohet sërish si një vend për të kryer një fazë përgatitore të nivelit të lartë.

[Noizy]

Mund të quhet zyrtare. Sfida më e rëndësishme e javës së 18-të të superligës, midis Tiranës dhe Teutës, do të luhet nën projektorët e stadiumit kombëtar "Qemal Stafa". Ashtu siç është bërë zakon për ndeshje të një rëndësie të veçantë, drejtuesit bardheblu kanë vendosur që kjo sfidë të luhet në orën 17:30. Sekretari dhe gjithashtu trajneri Shkëlqim Muça e konfirmon këtë vendim kur thotë: "Ndeshja midis Tiranës dhe Teutës, do të luhet në orën 17:30, në stadiumin kombëtar "Qemal Stafa". Duke parë rëndësinë e kësaj përballjeje, por gjithashtu për të ftuar sa më shumë tifozë në shkallët e stadiumit, ia vlen një shpenzim i tillë."