Lajmet nga Superliga 2006/2007

[Noizy]

Kuqeblutë mendojnë si fillim të kalojnë Teutën, pastaj të shohin ndeshje pas ndeshje.

Objektivi primar për skuadrën shkodrane ky duket se do të jetë. Pa lënë megjithatë mënjanë edhe ndonjë gjë më tepër që mund të dalë rrugës. Vendi i dytë në kampionat është maksimali për një Vllazni, e cila i nisi përgatitjet për këtë sezon më vonë se skuadrat e tjera pretendente dhe për rrjedhojë nuk mundi të grumbullojë në radhët e saj atë kontigjent lojtarësh që dëshironte. Sakaq, rruga e përshkuar në 17 javët e deritanishme ka pasur oshilacionet e veta, megjithatë ardhja e Mirel Josës në krye të skuadrës i ka normalizuar gjërat. Shkodranët nga vendi i pestë, apo gjashtë, ku notonim me gjermanin Shulze, javë pas jave rikuperuan shumë gjëra dhe aktualisht renditen të tretët. Motoja e tyre është të shohin vetëm ndeshjen e radhës dhe të mundohen për të kapur atë skuadër që është më lart se ata në renditje, që do të thotë se tani e tutje Vllaznia do t'i shpallë "luftë të hapur" ekipit të Teutës, që është një vend më lart në renditje. Të gjithë në Shkodër e pranojnë se kuqeblutë kanë mundësi dhe e meritojnë të jenë në vend të dytë, duke aluduar hapur se Tirana është e pakapshme nga asnjë skuadër, nisur nga përbërja që ka dhe shkëputja aktuale me pikë nga skuadrat e tjera. Këtë e thonë të gjithë, por gara mbetet garë. Asnjëherë nuk mund të bëhen planet në letër dhe prandaj drejtuesit më të lartë të kësaj skuadre nuk duan të nxitohen në deklaratat e tyre. Trajneri Josa dhe të gjithë lojtarët kanë djersitur shumë në stërvitje gjatë kësaj periudhe dhe prandaj këtë punë ata kanë dëshirë ta konkretizojnë që nga kjo e premte në fushat e lojës me rezultate të mira. Vëmendja për ta është maksimale për çdo ndeshje që do të luajnë në të ardhmen, duke nisur nga kjo e kësaj të premte me Flamurtarin në Vlorë. Aq më tepër kur një nisje e mbarë në këtë takim të parë të këtij viti, do t'u hapte rrugën atyre për suksese të tjera në sfidat që do të pasojnë. Aktualisht Vllaznia e ka mendjen te katër ndeshjet e radhës në kampionat, në të cilat objektivi është që në përfundim të tyre distanca aktuale me Teutën ose të jetë rikuperuar plotësisht, ose maksimumi të jetë 2 ose 3 pikë, në mënyrë që në ndeshjen e fundit të kësaj faze skuadrat të ndërronin vend. Durrsakët e Starovës aktualisht janë 2 pikë më tepër në renditje se shkodranët dhe do të kërkojnë që ta ruajnë, ose ta thellojnë më tepër. Me këtë gjë vështirë se do të jenë dakord kuqeblutë, të cilët kanë në mendje tjetër gjë. Vendi i dytë për ta u takon atyre dhe kësisoj një gjë e tillë mbetet për t'u parë në 16 ndeshjet që kanë mbetur deri në fund. Kohë për ta vërtetuar ka mjaft në dispozicion dhe problemi është se cila skuadër do të gabojë më pak dhe do të tregohet më e kujdesshme.

[Noizy]

Ashtu siç janë shprehur edhe më parë, edhe dje drejtuesit e Vllaznisë e kanë bërë të qartë pozicionin e tyre në lidhje me lojtarin e sapomarrë nga Dinamo, Gudjabin. Pretendimi i klubit blu për të paguar në arkën e tyre disa para për prishjen e kontratës shtetërore që ata kanë me lojtarin, nuk është marrë për bazë nga shkodranët. Këta të fundit mësohet të kenë depozituar në federatë kontratën që ata kanë firmosur me senegalezin dhe presin që ky instituticion t'u japë atyre të drejtë për federimin e tij, meqë kontrata e Gudjabit me presidentin e Dinamos ka përfunduar që në dhjetor. Në këtë mënyrë, kur pritet vendimi i federatës, të dy klubet i japin të drejtë vetes edhe nga fakti se në Shqipëri vazhdon të jetë një problem tepër i madh akti i firmosjes së një kontrate. Ata shpeshherë kanë sjellë polemika e sherr mes klubeve dhe kështu pritet të ndodhë edhe tani.

[Noizy]

Lojtari malazez Ivanisheviç, që mendohet të vijë te Vllaznia në prag të mbylljes së merkatos së dimrit, dje nuk ka mbërritur në Shkodër, ashtu siç pritej. E gjitha kjo ka ardhur ngaqë presidenti i klubit shkodran vazhdon të jetë jashtë vendit dhe për rrjedhojë ai është i vetmi person që mund të vendosë në lidhje me këtë çështje. Duke qenë kështu, edhe lojtari nga Mali i Zi nuk ka marrë mundimin të kalojë kufirin, por një gjë e tillë mund të ndodhë sot, ose nesër. Gjithnjë nëse shkodranët vendosin të marrin edhe këtë lojtar, megjithëse një blerje e tillë nuk do të ishte aspak serioze, sepse lojtari do të vinte pa u parë asnjë ditë në stërvitje. E njëjta gjë pati ndodhur edhe në fillim të sezonit me malazezin tjetër, Miliç, i cili megjithëse erdhi me shumë bujë te Vllaznia, asnjëherë nuk arriti të bindë me vlerat e tij. Në këtë logjikë, edhe marrja e mundshme e Ivanisheviçit do të ishte një bast më vete për shkodranët

[Noizy]

Skuadra e fillimit të vitit 2007 të krijon përshtypjen se do të jetë më e mirë se ajo e 17 javëve të para.


Vetëm me tri përforcime në merkaton e janarit Flamurtari pretendon të rreshtohet në katër skuadrat më të mira të superligës. Pas afrimit të portierit Flamur Kyçyku të Besës së Pejës, Burim Hashanit, sulmuesit të Besjanës të Podujevës, ditën e diel ka mbërritur te Flamurtari edhe mbrojtësi i Çelikut të Podgoricës, Gavril Petroviç. Mesfushori vlonjat Artan Sakaj shprehet se skuadra edhe të dielën seancën e pasdites nuk e ka zhvilluar, siç ishte parashikuar në fushën e aneksit, por përgjatë bregdetit. Petroviçi ka zhvilluar të dy seancat e para me Flamurtarin në sallën e forcës dhe mbasdite në bregdet. Ndryshe nga Kyçyku, i cili është testuar me Flamurtarin edhe në përgatitoret e verës, Hashani e Petroviç nuk njihen nga sportdashësit vlonjatë, por edhe nga skuadra. Stafi teknik është i mirinformuar për aktivitetin e tyre. Tani ata janë pjesëtarë të skuadrës dhe do të jenë të gatshëm që nga ndeshja e 2 shkurtit ndaj Vllaznisë. Skuadra e fillimit të vitit 2007 të krijon përshtypjen se do të jetë më e mirë se ajo e 17 javëve të para. Së bashku me afrikanët Delain e Bokatola, numri i të ardhurve te Flamurtari shkon në pesë. Me ardhjen e Petroviçit, reparti i mbrojtjes, i përbërë nga Driza, Behari, Delain, Guga, Bedini, konsolidohet së tepërmi. Pas largimit të dy sulmuesve afrikanë Sisoko e Riçard reparti i ofensivës kishte në përbërje vetëm F.Xhafën, por tani situata ka ndryshuar. Në krah të Fjodor Xhafës është kthyer përsëri sulmuesi 21 vjeçar Arlindo Rustemi, i cili në dy ndeshjet e fundit miqësore ka shënuar 3 gola. Pas Rustemit afrohet sulmuesi kosovar Hashani, por edhe të rinjtë e talentuar vlonjatë Dhrami, Serjani, që kanë dhënë prova tek U 19 si golashënues. Veç Bokatolës, reparti i mesfushës përbëhet tërësisht nga vlonjatë, si Nenaj, Kuqi, Strati, Begaj, Guna etj. Me një përbërje të tillë cilësore, sipas mesfushorit Sakaj, skuadra e Flamurtarit do të ngjitet gradualisht mes 4 më të mirave të superligës. Ky është dhe objektivi që aktualisht është bërë i ditur edhe nga drejtuesit e Flamurtarit.

[Noizy]

Ikin Kraja e Lila tek Iraklis, vijnë Nuhiu, Mërtiri e Grizha. Pritet edhe ndonjë tjetër në orët e fundit.


Takimi i fundit ndaj Teutës ishte sinjali më i qartë se kontigjenti i Besës më e shumta që mundet të bënte ishte një ekip që garantonte vetëm rezultate të barabarta, ndërsa për fitore të gjithë shtruan pyetjen: Kush do të shënojë për Besën? Kjo situatë, e cila ftohu jo pak besimin e qindra të pranishmëve në stadium, më së shumti ishte sinjal i qartë për presidentin Bizhdili. Këtë mesazh të tifozërisë, por edhe kërkesat e vazhdueshme të trajnerit Vasil Bici, presidenti kavajas jo vetëm e ka "lexuar" më së miri, por ajo që vlen është reagimi i tij i shpejtë. Menjëherë sot në ambientet e rezidencës së Besës kanë mbërritur sulmuesi Arben Nuhiu nga Maqedonia, një sulmues që ishte premtuar të merrej që në fillimin e kampionatit. Dihet CV ja e tij e pasur, e cila bën ardhjen e tij mëse të mirëpritur. Sulmuesi shqiptar nga Maqedonia ka luajtur për disa klube si Beveren (Belgjikë), Istanbulspor (Turqi), Slloga dhe Vardari i Shkupit (Maqedoni), Hajduku i Splitit (Kroaci) dhe klube të tjera. Ai pritet që së bashku me Xhihanin të jenë maja e sulmit kavajas, nga të cilët pritet të vijë edhe gjetja e rrugës së golit. Ardhja tjetër e merkatos është mbrojtësi korçar Mërtiri, i cili gjatë fazës së parë ishte aktivizuar me ekipin e Apolonisë. Pas tij ka mbërritur edhe ish mbrojtësi i Partizanit, lezhjani Robert Grizha. Mbrojtësi i të kuqve duket se do të jetë zëvendësuesi ideal i Ervis Krajës. Në numrin e djeshëm të gazetës ju njoftuam për prezencën e presidentit të Iraklisit në stadiumin "Besa" dhe mundësinë e kalimit të dy futbollistëve të Besës dhe konkretisht qendërmbrojtësit shkodran Ervis krja dhe mesfushorit kavajas të ekipit Shpresa, Andi Lila, tek ekipi grek i Iraklisit. Dje kjo lëvizje është bërë një fakt i kryer, kur të dy presidentët, në prani edhe të dy futbollistëve, kanë nënëshkruar kontratat me futbollistët në fjalë. Largimi i këtyre dy futbollistëve natyrshëm që lë një vend bosh mjaft të rëndësishëm në boshtin e lojës së Besës. Por nisur nga vlerat e tyre, mendojmë e besojmë se kontratat e tyre natyrshëm duhet të kenë sjellë jo pak përfitime edhe për presidentin e Besës, Nexhat Bizhdilin, i cili duhet pranuar se për herë të parë arrin vërtet të punojë ashtu si gjithë homologët e tij në Europë. Të tre futbollistët e ardhur në merkato janë përfshirë sot menjëherë në stërvitjen e pasdites, e cila u zhvillua në fushën e fshatit Qerret. Që në kontaktin e parë, natyrshëm që nuk mundet të mos binte në sy klasi dhe përvoja e një sulmuesi si Arben Nuhiu. Me marrjen e tij duket se Besa do të kthejë atë forcë sulmuese dhe atë tmerr për mbrojtësit kundërshtarë, ashtu sikur sezonin e kaluar. Edhe mbrojtësi Grizha dëshmoi një përgatitje të kënaqshme fizike. Ndërkohë që në radhët e ekipit kavajas dje është kthyer edhe mefushori kosovar Driton Krasniqi, i cili ishte në provë në Antalia te një ekip ukrainas. Ndërsa nga taborri me kosovarë të ardhur në merkaton dimërore dhe të larguar, konstatohet se mbrojtësi Liridon Ahmeti, që vinte nga Flamurtari i Prishtinës,nuk është larguar dhe pjesën e mbetur të sezonit do të luajë për ngjyrat e Besës. Në stërvitjen e djeshme në përbërje të Besës ishin edhe dy futbollistë të rinj, të cilët po testoheshin për vlerat e tyre. Në këtë mënyrë, presidenti Bizhdili edhe këtë merkato nuk ndryshoi "oraret e tij të punës", duke punuar vetëm në momentet e fundit të merkatos. Kjo megjithatë është zgjidhja e kërkuar dhe fakti se Besa po plotësohet ashtu siç ai kishte premtuar. Nuk do të jetë ky ndoshta fundi i merkatos, pasi si një njeri i gjetjeve të orëve të fundit, Bizhdili ndoshta deri nesër në drekë nuk dihet se kujt futbollisti "ia hedh lakun" dhe duhet pritur deri sot pasdite për ta quajtur përfundimisht merkaton e Besës të përfunduar.

[Noizy]

Tifo-grupi "Tigrat Verdheblu", të cilët i përkasin ultrasve elbasanas, do të organizohen në perfeksion për ndeshjen e datës 3 shkurt, kundër Partizanit, në stadiumin "Ruzhdi Bizhuta". Ky tifo grup është organizuar dhe herë të tjera me anë të sajtit të tyre (kfelbasani.com) dhe gjithashtu kanë krijuar disa banderola me të ardhurat e tyre. Por niveli i organizimit të tyre ka arritur dhe majat, kur ata kanë organizuar si ansjëhere tjetër në Shqipëri çmimin "Best Player", ku u shpall si fitues sulmuesi veteran Gentjan Stojku dhe me anë të bashkëpunimit me drejtuesit e klubit verdheblu i kanë dorëzuar çmimin lojtarit në fjalë. Ky tifo-grup i pavarur është themeluar në datë 6 maj 2006 në ndeshjen Tirana Elbasani 2 3, një datë e shenjtë kjo për ta, pasi në atë ditë jo vetëm që janë themeluar, por dhe Elbasani është shpalluar kampion i Shqipërisë, për edicionin futbollistik 2005 2006. Në rekuizitën e tyre ata kanë disa banderola si, "Tigrat Verdheblu", "Elbasani Ultras", "Forca çuna verdheblu", "Tigrat janë gjithmonë me ju", flamurin gjigant me përmasa 10 x 50 m, gjithashtu dhe disa flamuj të vegjël dore. Së fundmi ky tifo-grup është organizuar dhe për ndeshjen e datës 3 shkurt ndaj Partizanit, ku do të mbulojnë hekurat e stadiumit me banderolat e tyre dhe do të ndezin disa fishekzjarre dhe tymuese. Gjithashtu do të kenë një banderolë enkas për këtë ndeshje, ku shkruhet "Të gjithë për të njëjtin qëllim", e cila është e përmasave 1.5 me 10 m. Pra, ndeshja me Partizanin pritet me interes të madh nga ana e tifozërisë elbasanase, jo vetëm për "inatin" që kanë nga edicioni i kaluar, ku nuk arritën t'i mposhtin asnjëherë të kuqtë, por dhe për të parë nga afër blerjet e reja të presindetit Laze. Le të shpresojmë që tifo-grupe të tjera shqiptare të rivalizojnë me "Tigrat" dhe në këtë mënyrë do të kemi progres për sa u përket tribunave të stadiumeve në Shqipëri.

[Noizy]

Mesfushori afrikan Abdulla Ishaka Salhiu, pranon se ka pasur oferta, por deri në fund të sezonit do të jetë verdheblu.


Në një prononcim për "Sportin shqiptar", futbollisti afrikan i Elbasanit Abdulla Ishaka Salhiu, është shprehur se do ta mbyllë sezonin me ekipin kampion të Elbasanit. Abdulla kohët e fundit ka qenë tepër i lakuar në media për largimin e tij nga Shqipëria, pasi duhet theksuar se ka pasur oferta nga Greqia, por mesa duket pengesa e vetme e mos kalimit të tij në Greqi ka qenë padyshim leje kalimi dhe kontrata që ka me Elbasanin deri në fund të sezonit. "Do ta respektoj kontratën që kam me Elbasanin deri në fund të sezonit. Eshtë e vërtet që kam pasur oferta, por nuk mund të them se Elbasani është bërë pengesë, përkundrazi marrëdhëniet e mia me klubin janë shumë të mira," është shprehur afrikani i verdhebluve. Ndërkohë Abdulla shprehet se është ambientur tashmë me Shqipërinë dhe e ka të vështirë të largohet nga vendi ynë, teksa thotë: "Bashkëshortja ime studion në Shqipëri dhe unë ndihem mirë, kështu që për momentin kjo është edhe një nga arsyet e moslargimit tim nga kategoria superiore. Por afrikani nuk e fsheh dëshirën e tij për të luajtur në një kqampionat tjetër, kur shpjegon: "Sigurisht që si çdo futbollist edhe unë kam ëndërrat e mia. Shpresoj që në një të ardhme të afërt të luaj në një kampionat të njohur si Anglia. Më pëlqen shumë kampionati anglez." Numri 16 i kampionëve të Shqipërisë flet edhe për objektivat e Elbasanit këtë sezon: "Kur jam kthyer nga pushimet, u çudita se si në një kohë kaq të shkurtër ekipi kishte bërë kaq shumë përforcime, por në të njëjtën kohë edhe jam gëzuar, pasi tani shanset tona janë shtuar se tepërmi që të fitojmë titullin, apo një vend në kupën UEFA." Në ekipin verdheblu këtë javë kanë nisur përgatijet për takimin me Partizanin, ku pritet që sfida e së shtunës të jetë një përballje tepër e fortë në "Ruzhdi Bizhuta". Abdulla, që ka luajtur dy takime me Partizanin sezonin e kaluar në kupën UEFA, shton se e njeh pak ekipin e kuq dhe ka besim se Elbasani do të dalë i fituar nga kjo përballje. "Mesa di unë, te Partizani janë larguar disa futbollistë dhe ne jemi forcuar, kështu që edhe në letër shanset më të mëdha për ta fituar këtë ndeshje e ka Elbasani," shton mesfushori Abdulla. Në fund të prononcimit të tij, Abdulla shprehet se për herë të parë në karrierën e tij sportive kërkon që të fitojë një titull kampion në Shqipëri, pasi tashmë ka mbi tre vite që aktivizohet në kategorinë superiore. "Kam edhe diçka tjetër që më mbetet peng nga Shqipëria. Dua të fitoj një titull këtu dhe shanset janë për ta bërë një gjë të tillë. Do të jap maksimumin tim që në përfundim të jemi sërish kampionë," përfundon mesfushori afrikan i Elbasanit, Abdulla Ishaka Salhiu.

[Noizy]

Atmosfera që rrethon ekipin e Dinamos është e paqartë, pasi gjërat nuk po sqarohen.


Qetësia dhe puna e fazës përgatitore që dinamovitët ngritën në këto kohët e fundit me fillimin e javës është njollosur. Kur mendohej se amullia blu kishte marrë zgjidhje, menjëherë Dinamo ndryshon kursin, pasi situata një ditë përpara mbylljes së merkatos është bërë më komplekse. Presidenca blu kishte bërë një merkato të fuqishme gjatë tri javëve të para të janarit, por me sa duket, ata ndryshuan mendim, sepse pjesa më e madhe e tyre që nga fillimi i kësaj jave nuk bëjnë pjesë në planet e skuadrës. Rasti më tipik është ai i ish-sulmuesit të Tiranës, Eldorado Merkoçi, i cili sapo u largua nga bardheblutë nisi përgatitjen me Dinamon. Pas disa javësh përgatitje me blutë, Merkoçi u pa në Elbasan përkrah presidentit të verdhebluve, por 24 orë më vonë sulmuesi u prezantua si përforcim i bluve të kryeqytetit. Në atë kohë u fol si nga lojtari dhe drejtuesit se bashkëpunimi midis tyre do të vazhdojë deri në fund të sezonit. Por nuk ishte e thënë që pingpongu Merkoçi-Dinamo të merrte fund, pasi ditën e hënë u publikua divorci midis tyre, dhe sipas dinamovitëve kjo ndarje është marrë si një vendim midis xhentëlmenësh. Me sa duket, Dinamo po mendon për "operacionin fshesa", megjithëse më parë u fol se do të ketë më shumë përforcime se largime, por realiteti po del ndryshe. Edhe ata që deri më sot janë publikuar si përforcime të bluve, me afrimin e mbylljes së merkatos po dalin të pavlefshëm. Tashmë numri i të larguarve është i madh, pasi kjo listë përbëhet nga Zoran Kastel, El Haxhi Gudjabi, Indrit Taçi, plus Zdravko Sushak, Eldorado Merkoçi si dhe Zoran Novakoviç. Po të pyesësh tek Dinamo për sa i përket politikës që po ndjek skuadra dhe planeve të së ardhmes, asnjeri nuk të jep një përgjigje të saktë. Momentalisht tek Dinamo të gjithë ngrenë supet dhe asnjëri nuk e mban "topin" në fushën e tij, por ia përcjell shokut në krah. Gjatë gjithë fazës përgatitore trajnerët kanë luajtur me skemat dhe pjesë e kësaj strategjie ka qenë edhe sulmuesi Merkoçi, i cili herë përdorej në vijën e parë dhe herë si mesfushor. Largimi i tij nuk përbën ndonjë çudi, por habia qëndron se përse e mbajtën kaq gjatë, pasi pesë ditë përpara nisjes së kampionatit e largojnë nga skuadra. Me sa duket, blutë po ndjekin strategjinë fillimsezonit, pasi e njëjta rrugë u ndoq edhe me sulmuesin Eleandro Pema.
Edhe Novakoviçi nuk është i Dinamos
Prej një jave është folur që sulmuesi boshnjak Zoran Novakoviç është pjesë e Dinamos dhe largimi i tij drejt Bosnjës u motivua me pretekstin që lojtari po shkon për të tërhequr dokumentacionin dhe do të kthehej të premten. Dinamovitët po mundoheshin që të ushqenin publikun me lugë bosh dhe pas ikjes së Novakoviçit fshihej "larja" e duarve midis palëve. Por dje më së fundi blutë e pranuan që sulmuesi boshnjak Zoran Novakoviç nuk bën pjesë në planet e Dinamos dhe nga treshja ballkanase i sigurt është vetëm qëndrimi i mbrojtësit Goran Graniç.
Te blutë shfaqet një sulmues kroat
Gjatë ditës së djeshme Dinamo ishte e përfshirë nga ethet e zhurmës së largimeve, pasi përveç të sapolarguarve Zdravko Sushak, Zoran Novakoviç dhe Eldorado Merkoçi pritet që sot të ketë spastrime të mëtejshme, megjithëse nuk janë të konfirmuara. Por të papriturat tek blutë nuk kanë të sosur, pasi në përgatitjen e pasditës së djeshme është parë të dalë edhe një futbollist i panjohur. Rreh emrit të tij asnjeri nuk të jepte përgjigje dhe në këtë rast ngritja e supeve nuk mungoi. Por do të ishte mesfushori Goran Vinçetiç që do të sqaronte se lojtari në fjalë është kroat dhe luan si sulmues dhe po, sipas Vinçetiçit, emri bashkatdhetarit të tij është Pero Periç. Akoma nuk dihet se çfarë fati do të ketë sulmuesi, megjithatë sot është dita e fundit e federimeve dhe do të kemi mundësi të shikohet edhe destinacioni i tij.
A do të vijë sot Redi Jupi tek Dinamo?
Në përgatitjen e djeshme të skuadrës së Dinamos binte në sy mungesa e trajnerit Redi Jupi. Sipas informacioneve që morëm nga një drejtues i bluve të kryeqytetit, u mësua që trajneri-lojtar ka munguar për disa arsye personale dhe në këtë rast bëhej fjalë për një impenjim të "timonierit" në jetën studentore. Deri këtu nuk ka asgjë që nuk shkon, por dyshimi lind me praktikën që po ndodh aktualisht te dinamovitët, pasi edhe në rastin e Merkoçit u dha shpjegimi se sulmuesi ka mungesë me leje. Por disa orë më vonë u mësua se ai nuk bën pjesë në planet e Dinamos. Prandaj hipotezat rreth ekzistencës së mëtejshme të Redi Jupit me Dinamon janë më se të justifikueshme. Prandaj natyrshëm lind pyetja nëse do të jetë sot Jupi përsëri me blutë e kryeqytetit apo jo.

[Noizy]

- Dje dinamovitët kanë kryer dy seanca stërvitore dhe të dyja në ambientet e kompleksit të klubit. Përgatitjet e djeshme janë drejtuar vetëm nga trajneri Artan Mergjyshi, pasi Redi Jupi ishte me provimet e universitetit. Përgatitja e djeshme është realizuar si në planin fizik, por edhe në atë tekniko-taktik.
- Tre pjesëtarët e grumbullimit të fundit të ekipit kombëtar, Ilion Lika, Erion Xhafa dhe Julian Ahmataj, janë bashkuar dje me Dinamon dhe kanë nisur planin stërvitor. Tre kuqezinjtë kanë munguar në përgatitjet e bluve prej gati dhjetë ditësh dhe njëkohësisht nuk kanë pasur mundësi që të njohin edhe disa lojtarë që erdhën dhe u larguan shumë shpejt nga radhët e skuadrës, si për shembull, Zdravko Sushak apo Zoran Novakoviç. Bashkë me të tre lojtarët ka ardhur edhe mjeku Asllan Kasa.
- Ilir Bozhiqi, trajneri i portierëve të Dinamos, dje e ka pasur personelin e plotë, pasi ndryshe nga dita e hënë, i ka pasur nën urdhrat e tij të tre portierët kryesorë të bluve, Ilion Likën, Llazi Gjikën dhe Alban Hoxhën.
- Merkatoja e Dinamos sot do të shënojë mbylljen e saj dhe pritet që blutë të bëjnë ndonjë surprizë, pasi, sipas drejtuesve blu, ekipi ka akoma nevojë për përforcime. Deri tani, në FSHF, dinamovitët kanë federuar vetëm tre lojtarë dhe bëhet fjalë për dy sulmuesit Vangjel Mile dhe Ardian Nuhiu si dhe mbrojtësin kroat Goran Graniç.
- Në listën e ekipit kombëtar U-21, që do të marrë pjesë në ndeshjen miqësore të 6 shkurtit me Greqi, bëjnë pjesë edhe tre lojtarë të rinj të Dinamos. Trajneri i ekipit Shpresa, Artan Bushati, ka menduar që në skuadrën e tij të bëjnë pjesë edhe dinamovitët Alban Hoxha, portier, si dhe dy mesfushorët e krahëve, Nertil Ferraj dhe Ilirian Çaushaj. Pas ndeshjes me Kastriotin, të tre dinamovitët do të shkëputen për disa ditë nga ekipi për t'u bashkuar me kombëtaren U-21.

[Noizy]

Presidenti i Partizanit prej shumë kohësh nuk e ndjek nga afër stërvitjen e Partizanit, megjithatë ai ka qenë dje i pranishëm në klub bashkë me dy të huaj, pa pasur si qëllim këqyrjen e stërvitjes. Njëshi i të kuqve ka inspektuar fushat e klubit dhe ka biseduar për probleme personale me dy shoqëruesit e tij, të cilët nuk është se janë interesuar për ndonjë futbollist apo për kushtet e stërvitjes. Më pas, Xhani është larguar nga klubi, për të mos u kthyer në seancën e pasdites.