Himni Akathist

[Albo]

STANCA E KATËRT

Kështjellë e virgjëreshave je, o Hyjlindëse Virgjëreshë, dhe e gjithë atyre që përikin tek Ti; se Ai që bëri qiellin dhe tokën të bëri, o e Kulluar, duke banuar në mitrën tënde dhe duke i mësuar të gjithë të të thërrasin:

Gëzohu, o shtyllë e virgjërisë; gëzohu, o portë e shpëtimit.

Gëzohu, o kryetare e rigatimit mendor; gëzohu, o dhënëse e mirësisë hyjnore.

Gëzohu, se Ti rilinde ata që u ngjizën turpërisht; gëzohu, se Ti urtësove të plaçkiturit në mendjen.

Gëzohu Ti, që shfuqizove prishësin e mendjeve; gëzohu Ti, që linde mbjellësin e dëlirësisë.

Gëzohu, o thalam nusërimi të pafarshëm; gëzohu Ti, që lidh besimtarët me Zotin.

Gëzohu, o rritëse e mirë e virgjëreshave; gëzohu, o nusestolisëse e shpirtrave të shenjta.

Gëzohu, o Nuse e panusëruar.

Çdo himn mposhtet kur përpiqet të zgjerohet sipas shumicës së mëshirave të tua të shumta; se, edhe në të blatofshim këngë aq sa rërë, o Mbret i shenjtë, nuk bëjmë asgjë të barazvlefshme për sa na ke dhënë neve që të thërrasim:

Aliluia.

Llambadhe dritëpritëse, që u shfaq për ata që ndodhen në errësirë, e shohim Virgjëreshën e shenjtë; se, duke ndezur dritën e palëndshme, i udhëheq të gjithë në dijen hyjnore, duke ndriçuar mendjen me agim dhe duke u nderuar me thirrje si këto:

Gëzohu, o rreze e Diellit mendor; gëzohu, o shigjetë e dritës së paperëndueshme.

Gëzohu, o vetëtimë që shkëlqen shpirtrat; gëzohu Ti, që çudit armiqtë si gjëmim.

Gëzohu, se lind ndriçimin e shumëdritshëm; gëzohu, se buron lumin e shumëvalshëm.

Gëzohu Ti, që pikturon tipin e kolivithrës; gëzohu Ti, që heq njollën e mëkatit.

Gëzohu, vaskë që shplan ndërgjegjen; gëzohu, o krater që qeras ngazëllim.

Gëzohu, o aromë e erës së mirë të Krishtit; gëzohu, o jetë dëfrimi mistik.

Gëzohu, o Nuse e panusëruar.

Detyrimet e vjetra duke dashur të falë, borxh-shlyesi i gjithë njerëzve, erdhi me anën e vetes së tij tek ata që u larguan nga hiri i tij; dhe duke grisur dorëshkrimin, dëgjon prej të gjithëve kështu:

Aliluia.

Duke kënduar lindjen tënde, të përhimnojmë të gjithë si tempull i shpirtshëm, o Hyjlindëse; se duke banuar në barkun tënd Zoti që i mban të gjitha në dorë, shenjtëroi, lavdëroi, dhe i mësoi të gjithë të të thërrasin:

Gëzohu, o tendë e Perëndisë dhe e Fjalës; gëzohu, o e Shenjtë, më e madhe se shenjtorët.

Gëzohu, o arkë e larë me ar prej Shpirtit; gëzohu, o thesar i pashpenzuar i jetës.

Gëzohu, o kurorë e çmueshme e mbretërve shpresëtarë; gëzohu, o mburrje e nderuar e priftërinjve të devotshëm.

Gëzohu, o fortesë e patundur e Kishës; gëzohu, o kështjellë e papushtueshme e mbretërisë.

Gëzohu Ti, me anën e së cilës ngrihen trofera; gëzohu Ti, me anën e së cilës rrëzohen armiqtë.

Gëzohu, o shërim i lëkurës sime; gëzohu, o shpëtim i shpirtit tim.

Gëzohu, o Nuse e panusëruar.

O Nënë e tërëhimnuar, që linde Fjalën, më të shenjtë se gjithë shenjtorët (3 herë); duke pritur blatën e tanishme, shpëtoi të gjithë nga çdo fatkeqësi dhe shpërblei prej Skëterrës së ardhshme ata që thërrasin bashkë:

Aliluia.

[Albo]

Tingull. T..IV.

Ti Ipermaho Stratigo.

Përlufteshës gjenerale këngët mundëse, si përhirim që e shpëtove prej tmerreve, qyteti yt po të përshkruan, o Virgjëreshë. Po sikurse ke fuqi të paluftuarshme, prej çfarëdo rreziku shpëtomë, se po të thërres:

Gëzohu, o Nuse e panusëruar.

[Albo]

Lexuesi: Shenjt Perëndi, Shenjt i fuqishëm, Shenjt i pavdekshëm, mëshirona. (3 herë)

Lavdi Atit e Birit edhe Shpirtit të Shenjtë, tani e përherë e në jetë të jetëve. Amin.

Trini e Tërëshenjtë, mëshirona; o Zot, falna mëkatet tona; o Zot i madh, ndjei paudhësitë tona; o i Shenjtë, vështro dhe shëro sëmundjet tona, për emrin tënd.

Mëshiro, o Zot (3 herë).

Lavdi Atit e Birit edhe Shpirtit të Shenjtë, tani e përherë e në jetë të jetëve. Amin.

Ati ynë që je në qiejt, u shenjtëroftë emri yt, ardhtë mbretëria jote, u bëftë dëshira jote si në qiell ashtu edhe mbi dhe. Bukën tonë të përditëshme jepna neve sot; dhe falna fajet tona, sikurse edhe ne ua falim fajtorëve tanë; dhe mos na shtjer në ngasje, po shpëtona nga i ligu.

Prifti: Se jotja është mbretëria dhe fuqia dhe lavdia, e Atit, e Birit dhe e Shpirtit të Shenjtë, tani e përherë e në jetë të jetëve.

Lexuesi: Amin.

Pastaj kontaqi i ditës ose:

Përlufteshës gjenerale këngët mundëse, si përhirim që e shpëtove prej tmerreve, qyteti yt po të përshkruan, o Virgjëreshë. Po sikurse ke fuqi të paluftuarshme, prej çfarëdo rreziku shpëtomë, se po të thërres: Gëzohu, o Nuse e panusëruar.

Mëshiro, o Zot. (40 herë)

O Krisht, Perëndi që adhurohesh e lavdërohesh në çdo kohë e në çdo orë në qiell e mbi dhe, zemërgjerë, zemërdhembshur, mëshirëplotë, që do të drejtët dhe mëshiron mëkatarët, që i thërret të gjithë në shpëtim me zotimin e të mirave të pritme, ti o Zot, prit lutjet tona në këtë orë dhe drejto jetesën tonë sipas porosive të tua. Shenjtërona shpirtrat, pastrona trupat, ndreqna mendimet, pastrona mendjet dhe shpëtona prej çdo hidhërimi, të keqeje dhe helmi. Mbrona me engjëjt e tu të shenjtë që duke u ruajtur dhe duke u udhëhequr prej ushtrisë së tyre të arrijmë të baresim tek bashkimi i besës dhe tek njohja e lavdisë sate të paafruar, se i bekuar je në jetë të jetëve. Amin.

Mëshiro, o Zot. (3 herë)

Lavdi Atit e Birit edhe Shpirtit të Shenjtë, tani e përherë e në jetë të jetëve. Amin.

Më të nderuarën se Keruvimet dhe më të lavdëruarën pa krahasim se Serafimet, që pa u cënuar linde fjalën Perëndi, me të vërtetë Hyjlindëse, ty të madhërojmë.

Lexuesi: Mëshiro, o Zot. (3 herë). Beko, o Atë me emrin e Zotit.

Prifti: Perëndia na mëshiroftë dhe na bekoftë, na tregoftë dritën e fytyrës së vetë dhe na shpëtoftë.

Lexuesi: Amin. Mëshiro, o Zot. (3 herë)

[Albo]

Urata e të Tërëshenjtës

Prej Pavlit, murgut të Manastirit të Evergjetit.

[b]E papikëlluar, e papërlyer, e pacënuar, e panjollshme, Virgjëreshë e pastër, Zonjë Nuse e Perëndisë, që bashkove Fjalën Perëndi me njerëzit me lindjen tënde të çuditshme dhe mbështete natyrën e hedhur të gjinisë sonë me qielloret; e vetmja shpresë e të dëshpëruarve dhe ndihma e të luftuarve; përkrahja e gatshme e atyre që rendin tek ti dhe strehë e gjithë të krishterëve; mos të ardhtë ndot nga unë mëkatari, i mallkuari, që prisha tërë veten time me mendime, fjalë dhe vepra të turpshme dhe që u bëra rob me dashje nga plogështia mendore e dëfrimeve të jetës; por si Nënë e Perëndisë njeridashës, me dashamirësi le të të vijë keq për mua mëkatarin dhe plangprishësin, dhe prit lutjen që të blatohet prej buzësh të ndotura; dhe lutju Birit tënd dhe mbretit e Zotit tonë, duke përdorur guximin tënd prej nëne që të ma hapë dhe mua zemrën njeridashëse të mirësisë së tij; dhe, duke mos vënë re fajet e mia të panumërta, të më kthejë në pendim dhe të më bëjë punëtor të sprovuar të porosive të tij. Dhe ji pranë meje gjithnjë, si mëshirëplotë, simpatike, dhe mirë-dashëse; në këtë jetë mbrojtëse dhe ndihmëse e nxehtë, duke thyer sulmet e kundërshtarëve dhe duke më udhëhequr drejt shpëtimit; dhe në kohë të ikjes sime, duke u kujdesur për shpirtin tim të mjerë dhe duke dëbuar larg faqet e errëta të demonëve të ligj; dhe në ditën e frikshme të gjyqit shpëtomë nga Ferri i amëshuar dhe tregomë trashëgimtar të lavdisë së patregueshme të Birit tënd dhe Perëndisë tonë; të Cilin e paça, o Zonja ime, Hyjlindëse e Përmbishenjtë, me ndërmjetimin dhe përkrahjen tënde me hirin dhe njeridashjen e Birit tënd të vetëmlindur, Zotit dhe Perëndisë dhe Shpëtimtarit tonë Jisu Krishtit; të Cilit i përket çdo lavdi, nder e adhurim, bashkë me Atin e tij të pafillim dhe Shpirtin e tij të Tërëshenjtë, të mirë e jetëbërës, tani e përherë e në jetë të jetëve. Amin.

[Albo]

Urata e Krishtit

Prej Antiokut, murgut të Pandektit.

Dhe jepna, o Zot, neve që shkojmë për gjumë, prehje trupi dhe shpirti: dhe ruajna nga gjumi i errët i mëkatit dhe prej çdo dëshire të errët e të natshme. Pusho hovet e pasioneve, shuaji shigjetat e zjarrta të të ligut që lëvizin kundër nesh dinakërisht; thyeji kryengritjet e trupit tonë dhe vër në gjumë çdo mendim tokësor e lëndor. Dhe dhurona, o Perëndi, mendje vigjëluese, mendim të urtë, zemër esëll, gjumë të lehtë dhe pa ndonjë fantazi satanike. Dhe zgjona në kohë të faljes, të mbështetur në porositë e tua duke pasur me veten tonë kujtimin e pathyer të gjykimeve të tua. Falna lavdërimin tënd tërë natën, që të himnojmë, të bekojmë e të lavdërojmë emrin tënd të gjithënderuar e madhështor, të Atit e të Birit dhe të Shpirtit të Shenjtë, tani e përherë e në jetë të jetëve. Amin.

[Albo]

E përmbilavdëruar, gjithmonëvirgjër, e bekuar Hyjlindëse, dërgoja faljen tonë Birit tënd dhe Perëndisë tonë dhe lypi që të shpëtojë me anën tënde shpirtrat tanë.

Shpresa ime është Ati; streha ime është Biri; mbrojtja ime është Shpirt i Shenjtë; Trini e Shenjtë, lavdi më Ty.

Gjithë shpresën time e vë tek ti o nënë e Perëndisë; ruajmë nën mbrojtjen tënde.

Prifti: Lavdi më Ty, o Krisht Perëndi, shpresa jonë, lavdi më Ty.

Lexuesi: Lavdi Atit e Birit edhe Shpirtit të Shenjtë, tani e përherë e në jetë të jetëve. Amin. Mëshiro, o Zot. (3 herë) Beko, o Atë i shenjtë.

Prifti: Krishti Perëndia ynë i vërtetë, me ndërmjetimet e Nënës së Tij të pacënuar dhe krejt të papërlyer, të nderuarit, të lavdëruarit Profet, Pararendësit dhe Pagëzorit Joan; të Apostujve të shenjtë, të lavdëruar e të dëgjuar; të Martirëve të shenjtë, të lavdëruar dhe mundës të shkëlqyer; të Etërve tanë oshënarë dhe hyjprurës; (të shenjtit të Kishës) të Hyjprindërve të shenjtë e të drejtë Joakim dhe Ana, të shenjtit (të ditës) që lusim sot dhe të gjithë shenjtorëve, na mëshiroftë dhe na shpëtoftë si Perëndi i mirë, njeridashës dhe mëshirues.

Prifti: Le të lutemi për paqen e botës.

Lexuesi: Mëshiro, o Zot.

Prifti: Për të krishterët besëmirë dhe orthodhoksë.

Prifti: Për Kryepiskopin tonë (aksh) dhe për tërë vëllazërinë tonë më Krishtin.

Lexuesi: Mëshiro, o Zot.

Prifti: Për etërit dhe vëllezërit tanë të jetëndërruar.

Lexuesi: Mëshiro, o Zot.

Prifti: Për ata që na shërbejnë dhe për ata që na kanë shërbyer.

Lexuesi: Mëshiro, o Zot.

Prifti: Për ata që na urrejnë dhe për ata që na duan.

Lexuesi: Mëshiro, o Zot.

Prifti: Për ata që na porositën ne të pavyerit të lutemi për ta.

Lexuesi: Mëshiro, o Zot.

Prifti: Për çlirimin e robërve.

Lexuesi: Mëshiro, o Zot.

Prifti: Për mirëlundronjësit e deteve.

Lexuesi: Mëshiro, o Zot.

Prifti: Për të dergjurit në sëmundje.

Lexuesi: Mëshiro, o Zot.

Prifti: Për plotësinë e pemëve të dheut.

Lexuesi: Mëshiro, o Zot.

Prifti: Për të gjithë të krishterët orthodhoksë, që prehen me shpresë këtu e kudo.

Lexuesi: I përjetshëm qoftë kujtimi i tyre.

Prifti: Le të themi dhe për veten tonë.

Lexuesi: Mëshiro, o Zot. (3 herë)

[Albo]

Tingull. III. Tin Oreotita.

O bukuri me nam, o virgjëri pa cen, o drit' e diellit, o hën' e qiellit. Shën Gavrili kur të pa, çuditej dhe të thërriste: Si të të lavdëroj, o Mari Hyjlindëse. Ç'këngë të këndoj për Ty, nuk e di dhe kërkoj më kot. Pra them sikundër jam porositur: Gëzohu, Virgjëreshë Hirplotë.

Prifti: Me uratat e Etërve tanë të shenjtë, o Zot Jisu Krisht Perëndi, mëshirona dhe shpëtona.

Psaltët: Amin.




Shtypur në shtypshkronjën "Ngjallja"

[Matrix]

Përlufteshës gjenerale këngët mundëse, si përhirim që e shpëtove prej tmerreve, qyteti yt po të përshkruan, o Virgjëreshë. Po sikurse ke fuqi të paluftuarshme, prej çfarëdo rreziku shpëtomë, se po të thërres:

Gëzohu, o Nuse e panusëruar.

Sonte eshte nata e fundit per kete vit e ketij Himni.
Perluftesha Gjenerale, Mbrojtesja e Kishes dhe Ikona me e bukur e Saj, le te ndermjetoje para Fronit te Birit te Saj per bashkimin e te krishtereve, ne nje Kishe te Vetme, te Shenjte, te Pergjitheshme dhe Apostolike, me ane te Hirit te Birit te Saj Perendinjerezor.

Ajo qe ndjeu zemren t'i pershkruhej nga thika e hidherimit kur e pa Birin e Saj te varur ne Kryq, e ndjen perseri kete thike sa here qe sheh mjerimin e Trupit Mistik te Krishtit ne toke, te copetuar nga egoizmi njerezor.

[Matrix]

Cdo te premte pasdite gjate Kreshmes se Madhe, Kisha Orthodhokse kryen sherbesen e Himnit Akathist. Fjalet e ketij Himni mund t'i gjeni me lart!

[Archon]

Per 5 te premte me rradhe,qe prej dates 29 mars deri ne daten 19 prill,ne kishat ortodokse ne mbare vendin celebrohet sherbesa e Himnit Akathist.
Me poshte disa foto nga kjo sherbese ne Korce.