Ku po shkon basketbolli shqiptar!?

[Davius]

Ku po shkon basketbolli shqiptar!?

Dihet tashmë niveli i sportit shqiptar, i cili në krahasim me sportin nëpër vendet e tjera europiane apo botërore, është në një vivel shumë herë më të ulët. Gjithsesi, ka pasur dhe vazhdon të ketë shumë raste të disiplinave të ndryshme sportive që kanë arritur deri në majat e kompeticioneve ndërkombëtare, duke i dhënë një lloj kënaqësie sportdashësve shqiptarë. Edhe futbolli me ekipin kombëtar ka arritur që në shumë raste të dhurojë rezultate surprizë dhe fitore të mëdha, por një gjë të tillë nuk e ka bërë ende basketbolli i viteve të fundit.Sporti i koshit, megjithëse është i dytë më i ndjekur pas futbollit, gjatë këtyre viteve të fundit e ka humbur shkëlqimin e tij duke rënë në nivele shumë të ulta. Më mirë se kushdo, këtë e tregojnë fare qartë faktet. Ekipi ynë kombëtar në basketboll për meshkuj, ditën e mërkurë zhvilloi takimin e fundit për eliminatoret e Kampionatit Europian 2009, duke pësuar humbjen e tetë në po kaq takime të luajtura në këtë edicion eliminatoresh. Një turp për basketbollin kuqezi që në vitet e arta të tij, jo vetëm arrinte fitore ndaj ekipeve të ndryshme europiane, por zhvillonte edhe një lojë të bukur dhe spektakolare. Por, sporti i koshit gjatë viteve të fundit, e ka humbur plotësisht shkëlqimin e tij. Në tetë takimet eliminatore që zhvilloi ekipi ynë kombëtar, pësoi po kaq humbje duke treguar se është shumë larg arritjes sadopak të nivelit të skuadrave europiane. Këmbanat kanë rënë tashmë, dhe vetëm “shurdhët” nuk mund t’i kenë dëgjuar, ato paralajmëronë dhe thonë se basketbolli shqiptar duhet rikonstruktuar plotësisht, pasi kështu nuk mund të ecet më tej. Përqëndrimin e vëmendjes, dhe mënyrën e organizimin të ri të basketbollit në vendin tonë, e ka shprehur edhe vetë trajneri i kuqezinjve, Arben Fagu. Pas përfundimit të takimit të fundit të kombëtares shqiptare, atë kundër Holandës, tekniku i kuqezinjve u shpreh: “Duam nuk duam, ky është rezultati përfundimtar për të cilin dua të them se nuk është as rastësi dhe as ndonjë çudi. Ne duam të bëjmë ekip me vetëm 1 muaj e gjysëm përgatitje, ndërkohë që të tjerët mendojnë përgjatë të gjithë vitit për këto ndeshje. Nuk dua të them se kaq janë limitet tona, por dua të them se urgjentisht duhet menduar për mënyrën e organizimit të basketbollit, sepse kështu si po veprohet, ne shumë shpejt nuk do të kemi edhe një ekip si ky që dua të them bëri përpjekjet maksimale, por kaq qenë mundësitë.” Në të njëjtin mendim me trajnerin e kombëtares së basketbollit, është edhe kapiteni kuqezi dhe njëkohësisht një prej lojtarëve më të mirë në vendin tonë, Afrim Bilali. “Këto ndeshje janë fytyra e vërtetë e kampionatit tonë të basketbollit ku zakonisht luajnë dy skuadra rivalizuese për titullin kampion, Tirana dhe Valbona. Ndryshe ndodh në vendet e tjera, ku të 12 skuadrat rivalizojnë me njëra tjetrën dhe nxjerrin ndeshje të forta duke forcuar në këtë mënyrë edhe lojtarët e kombëtares. Nuk mendoj se ky është limiti i mundësive tona, por po e përsëris, derisa të luftojnë dy skuadra të vetme për një titull, ne në këto rezultate do të ngelemi.” Rezultatet flasin, trajneri vetë, gjithashtu edhe kapiteni shprehen se duhen bërë të gjitha përpjekjet për të ngritur një ekip kombëtar të denjë për të fituar të paktën një ndeshje në kompeticionet europiane, dhe jo që kuqezinjtë të largohen nga ky edicion eliminatoresh në këtë mënyrë. Nëse nuk do të merren masat e nevojshme, atëherë lind pyetja, se ku më poshtë do të shkojë basketbolli shqiptar?

GAZETA SOT

[DYDRINAS]

Nuk eshte e thene qe te gjitha sportet te kene nje nivel te larte, sepse ketu ndikojne shume faktore e nje nder to eshte dhe tradita.
Shqiperia nuk ka nje tradite ne basketboll dhe se po te shikosh rezultatet e ekipit kombetar do te veresh se thuajse asnjehere nuk ka patur rezultate.
Perjashtim ben vetem ekipi i Partizanit, i cili ishte i vetmi perfaqesues i denje ne parket brenda dhe jashte vendit.
Vec kesaj, historikisht moshat e reja jane dhene pas futbollit sepse ai luhej kudo, ndersa pak eshte luajtur basketbolli sepse nuk ka patur dhe vazhdon te mos kete kushte per zhvillimin e tij.
Ne vend mungon infrastruktura normale (nuk po themi moderne) dhe ata qe duan te luajne duhet te kerkojne neper ndonje oborr shkolle qe te gjejne nje vend per ushtruar.

Nese vertete do te duhej zhvilluar ky sport fantastik, atehere duhet nisur gjithcka nga fillimi.
Pika me e dobet eshte administrimi i federates dhe se ne te qarkullojne vazhdimisht te njejtit emra.
Nuk kam idene se a ka ekipe te moshave neper qytete, a praktikohet neper shkolla?
A ndiqet ky sport nga shikuesit si perpara apo tashme as qe behet fjale per kete?
Ne tv kam pare ndonje ndeshje, por ndonese ndesheshin Valbona dhe Tirana, ne pallat shiheshin shume pak tifoze!?
Valbona te pakten ka sponsor te forte dhe ka arritur te jete kampione qe disa vite rresht, ndersa ekipet e tjera (me pak perjashtime)vetem sa marrin pjese ne kampionat per force zakoni.
Dhe ajo qe vlen eshte qe te afrohen trajnere te huaj, vecanerisht ata nga ish-shkolla jugosllave e basketbollit, nje shkolle me nje tradite shume te njohur dhe te mos mbeten perhere te njejtet emra.