Martiret e Kishes Katolike

[NoName]

Po ju paraqesim shkurtimisht biografitë e secilit prej këtyre martirëve:



At Thomas Richard Heath, Domenikan, i lindur në SH.B.A, 85 vjeç, që prej 13 vjetësh në Kenya pasi që kishte kaluar 10 të tjera në Afrikën e Jugut dhe Lesotho, vdiq me 13 janar 2005 pas vuajtjesh të mëdha që i sollën plagët e marrura nga plagosja që iu bë në një tentativë vjedhjeje në shtëpinë e tij në Kisumu me 4 janar. Predikatar dhe mësues shumë i vlefshëm, duke formuar brezni të tëra meshtarësh në Kenya. Në bashkësinë e tij ishte i vlerësuar si shembull i besnikërisë ndaj jetës rregulltare, gjithmonë i kujdesshëm ndaj nevojave të të tjerëve.
Dom Thomas Harsidiyono, indonezian, i gjetur i vrarë mëngjesin e 14 janarit 2005 në Purworejo (Java Qendrore), nga të panjohur të cilët kishin hyrë në banesën e tij ndoshta thjesht me qëllimin për të vjedhur. Nga dëshmitë e mbledhura nuk rezulton të ketë pasur ndonjë armik të paralajmëruar.
Dom Jan Hermanovsky, 70 vjeç, i vrarë me 20 janar nga dy të rinj në famullinë e Brjansk (Rusi). Dom Jan është dalluar gjithmonë për angazhimin e tij në favor të bashkimit të të krishterëve si dhe për kujdesin ndaj të varfërve dhe emigrantëve. U shpërndante vetë ushqimin të varfërve përgjatë rrugëve, dhe gjithçka kishte ua jepte atyre që kishin nevojë. Kishte studiuar në Itali, ku dhe u shugurua dhe zhvilloi punën e tij baritore deri në 1995, kur edhe u kthye në atdhe. Në 1998 u transferua ne Federatën Ruse, pasi bashkësitë katolike atje po rindërtoheshin dhe kishte një nevojë të madhe për meshtarë.
At Manuel Delgado, OFM, 42 vjeç, u gjet i vdekur me 6 shkurt 2005, pas sinjalit të dhënë nga disa të panjohur në qytetin e Bufalo, në Ciudad Jiménez në shtetin meksikan të Chihuahua. I zhdukur që një ditë më parë. Trupi i tij ishte plot me plagë, duke lënë kështu të kuptohen torturat e mëdha që i janë bërë. Ishte vikar i Tempullit të Santo Cristos në Burgos.
Motër Dorothy Stang, 73 vjeçe, e lindur në SH.B.A dhe e natyralizuar Brasiliane, e Kongregatës së Notre Dame, u vra mëngjesin e 12 shkurtit me gjashtë plumba në shtetin Parà (Brazil). Që prej njëzet vitesh ajo ishte e angazhuar në Komisionin Baritor për tokën (CPT) duke shoqëruar me pasion dhe vullnet jetën e punëtorëve të tokave. Për shkak të denoncimeve të bëra nga ana e saj kundër “fazendeiros e grileiros”, motër Dorothy që prej vitit 1999 kishte qenë kërcënuar me vdekje. Edhe një javë para se të vritej, më 9 shkurt, kishte paraqitur një denoncim publik për kërcënimet që i ishin bërë. Si mirënjohje për punën e bërë në mbrojtje të të varfërve, në vitin 2004 i kishin dhënë titullin “qytetare e Parà”, dhe po në 2004 i kishin dhënë titullin “José Carlos Castro” të Urdhërit të Avokatëve të Brazilit”, për angazhimin e saj në mbrojtje të të drejtave njerëzore.
Dom Mathew Uzhuthal, Vikar i Arqidioqezës në Patna, në shtetin indian të Bihar, vdiq me 1 maj 2005 nga pasojat që pësoi në sulmin ndaj tij më 11 prill. At Mathew u ther me thika me 11 prill në zyrën e tij famullitare, duke marrur plagë të rënda në kraharor dhe fyt nga një i ri keqbërës. Pas 19 ditësh shtrimi në spitalin “Nazareth” të qytetit Patna, shëndeti i tij u keqësua dhe zemra i pushoi së rrahuri. At Mathew Uzhuthal kujtohet si një misionar i vyer. I lindur në Kerala, ishte vendosur në dioqezën e Patna në 1953 dhe u shugurua meshtar nga Papa Pali i VI-të gjatë Kongresit Eukaristik të mbajtur në Mumbai në 1964. Gjatë 40 viteve të shërbesës baritore ka shërbyer në shumë famulli, ka ndihmuar shumë familje në nevojë si dhe ka dhënë Katekizëm pranë Qendrës Katekistike Dioqezane.
At René de Haes, 72 vjeç, jezuit belg, është vrarë në mbrëmje vonë më 7 maj 2005 me armë zjarri nga dy njerëz, në lagjen e Kimwnza, në zonën në veri të Kinshasa (Republika Demokratike e Kongos), ndërsa po hynte në shtëpinë e tij. Në Afrikë që prej vitit 1959, rregulltari ishte shumë i njohur për aktivitetin e tij si mësues si dhe për shkrimet e shumta teologjike, në mënyrë të veçantë mbi religjionin në Afrikë dhe sektet. Ishte shumë aktiv edhe në fushën sociale.
Dom Robert De Leener, 54 vjeç, lindur në Ixeles-Belgjikë, është vrarë në natën mes 4 dhe 5 qershorit 2005 nga një emigrant në pritje të lejes së qëndrimit, të cilin meshtari e mbante në shtëpinë e tij. Meshtari ishte famullitar i famullisë së “Santa Croce” në Ëatermael-Boitsfort (Bruxel). Emigranti ishte larguar nga shtëpia e tij një ditë më parë për sjelljen e tij agresive, por fatkeqësisht atë natë u kthye dhe një herë të fundit duke e therur me thikë meshtarin para syve të nënës së tij plakë. Sipas banorëve të famullisë, meshtari ka qenë viktimë e mirësisë së tij: në fakt kushdo që trokiste në derën e tij ishte i sigurt së do të mirëpritej dhe ndihmohej. Shkëlqesia e Tij Imzot Luigi Locati, Vikar Apostolik i Isolo, në veri perëndim të Kenya, është vrarë mbrëmjen e 14 korrikut 205 përpara një Qëndre baritore të Vikariatit. Imzot Locatti, 77 vjeç, kishte lindur në Dioqezën e Vercelli-t në Itali dhe që prej 40 vjetësh shërbente në Kenya, ku kishte shkuar si prift “fidei donum” dhe po përgatitej të linte detyrën e tij për arsye të moshës. Jetonte në një ambient shumë të varfër dhe të thjeshtë, edhe kur u bë ipeshkëv ai e ruajti këtë stili jetese. Ishte i njohur si një person i drejtë dhe i ndershëm dhe gjithmonë ka mbrojtur drejtësinë, dhe në mënyrë të vazhdueshme kishte marrur kërcënime për jetën. Imzot Luis Enrique Rojas, 76 vjeç, i lindur në Andes (Antioquia-Colombia) dhe famullitar i katedrales së Shën Martës (Barranquilla-Kolombi) ka vdekur me 21 korrik 2005 pas tre javësh vuajtjeje si pasojë e plagëve të marrura nga një sulm të cilin ia bënë tre të rinj të cilët hynë në banesën e ti duke kryer aktin e dhunshëm dhe duke mos marrur asgjë me vlerë nga shtëpia e tij. Në 25 vitet e shërbimit të tij në atë Katedrale, Imzot Rojas ishte dalluar për mbështetjen e tij ndaj personave më të përçmuar të shoqërisë së atjeshme, si dhe kishte pësuar edhe një sulm tjetër me 8 dhjetor 2004, kuptohet me pasoja më pak të dhimbshme.
Dom Paulo Henrique Machado, 36 vjeç, brazilian, është vrarë me 25 korrik 2005 nga një komando e armatosur. Trupi i tij u gjet në makinën e tij në periferi të Rio de Janeiro, pa orën e tij të dorë, pa celular dhe portofol. Ai ishte bërë i padurueshëm për bandat lokale si pasojë e aktivitetit të tij të madh në mbrojtje të të drejtave njerëzore. Meshtari kujtohet si një njeri i qeshur, i gëzueshëm, karakteristika këto që i shprehte në zonën ku ai punonte. Në mënyrë të veçantë ai ndihmonte familjet e viktimave të masakrës së ndodhur në lagjen Nova Iguacu, një nga lagjet më të dhunshme të periferisë.
Dom Godwin Okwesili, 42 vjeç, nigerian, është vrarë me 2 gusht 2005 në St. Dominic Catholik Chruch të Yaba, në Lago-Nigeri. Në pasdite tre djem të rinj janë paraqitur në banesën e tij, dhe gjoja donin të dorëzonin një pako njërit prej meshtarëve që banonin aty. Ndërsa po bisedonin me derëtarin kanë ngritur shumë zërin. Ndërkohë meshtari ka dëgjuar zërat e lartë dhe ka dalur tek dera, dhe në çast është qëlluar me armë duke mbetur i vdekur ne vend.
Dom Jesus Adrian Sanchez, 32 vjeç, meshtar kolumbian i dioqezës së Espinal (Tolima), Famullitar El Limon, u vra me 18 gusht 2005 ndërsa po kthehej nga mësimdhënia e besimit fetar në Institutin Camacho Angarita, në zonën rurale të Chaparral të Tolima-s. Rreth orës 10 të mëngjesit, një njeri i armatosur ka hyrë në klasë dhe e ka detyruar meshtarin të dalë jashtë, dhe menjëherë e ka vrarë. Meshtari ishte i angazhuar në mënyrë aktive në kujdesin ndaj të rinjve, duke kërkuar që ti bindte që të mos linin mësimin për tu bashkuar me luftëtarët e bandave. Presidenti i Konferencës Ipeshkvnore Kolumbiane në një komunikatë të tijën e ka dënuar aktin të “dhunshëm dhe sakrilegj”, duke u lutur për kthimin e autorëve të këtij krimi të shëmtuar dhe duke qortuar popullin kolumbian që ti kërkojë Zotit ndihmën e nevojshme “për ta tejkaluar këtë kulturë dhune dhe vdekjeje që nuk respekton as jetën e atyre që janë ndërtues të Paqes dhe dëshmitarë të së vërtetës dhe jetës”.


[vazhdon]

[NoName]

Dom Vicente Rozo Bayona, 50 vjeç, e Dom Jesus Emilio Mora, 65 vjeç, meshtarë kolumbian të dioqezës së Ocaña, famullitarë të dy famullive të vetme të Convencion, janë vrarë mëngjesin e 15 gushtit 2005 ndërsa po shkonin për kremtimin e Meshës Shejte. Luftëtarët e kanë sulmuar automjetin mbi të cilin udhëtonin meshtarët përgjatë rrugës Teorema-Convencion, në lokalitetin El Diviso të Kolumbisë, dhe me breshëri automatiku kanë vrarë dy meshtarët si dhe dy bashkëpunëtorë të tyre. Më pas luftëtarët janë shprehur se bëhej fjalë thjesht për një vrasje pa dashje, pasi në zonë ka shumë konflikte në akt. Konferenca Ipeshkvnore Kolumbiane në një komunikatë e ka përcaktuar ngjarjen “një krim barbar”, duke dënuar autorët moral dhe material për këtë “akt të dhunshëm dhe sakrilegj”, që “minos dëshirat për pajtim dhe paqe që vetë Kisha predikon”.
Dom Francois Djikulo, meshtar kongolez i dioqezës së Manono (Republika Demokratike e Kongos), në muajin gusht kishte shkuar me iniciativë personale në një mision paqeje tek një rebel i frikshëm Kyungu Kyungu, tip Gedeonit, për ta bindur që ti jepte fund terrorit që po shkaktonte në ato zona. Pas disa muajsh është marrur vesh me siguri të plotë se meshtari ishte coptuar në pjesë të ndryshme të trupit barbarisht së bashku me bashkëpunëtorin e tij laik Simon Kayimbi, dhe më pas janë djegur të gjallë në Matundele, territori i Pweto, në dioqezën e Kaliwa Kasenga.
Dom Mathew Nellickal, 65 vjeç, Vikar gjeneral i dioqezës së Tzepur – Indi, u gjet i vrarë në banesën e tij Dioqezane në Tzepur. Vrasja e tij ndodhi në mbrëmjen e 2 shtatorit 2005 dhe u gjet i vrarë të nesërmen, me dhjetë goditje kmese në kokë dhe pjesë të tjera të trupit. Ai ishte me origjinë nga Palai-Kerala. Në fillim, pasi hyn tek Salezianët, bën kushtimin e përjetshëm si Fratel laik, dhe më vonë kërkon të shugurohet dhe inkardinohet në dioqezën Tzepur, ku në shkurt 205 bëhet dhe Vikar gjeneral. Sipas burimeve të Kishës lokale, meshtari nuk kishte ngatërresa apo mosmarrëveshje, pasi ishte një njeri paqësor dhe i dashur nga njerëzit.
Dom Giuseppe Bessone, meshtar fidei donum i dioqezës së Pinerolo – Itali është vrarë në shtëpinë e tij famullitare Sh.Ndou në Blumenau - Brazil, ku ishte dhe famullitar në natën e 2 shtatorit 2005. Autori i krimit ishte një djalë 16 vjeç, i cili jetonte në shtëpinë e meshtarit dhe atë natë kreu krimin duke e vrarë me thikë. Dom Giuseppe gjendej që prej 1975 në Brazil, duke pasur si qëllim të misionit të tij vetëm punën baritore nëpër famulli të ndryshme.
At Angelo Redaelli, 40 vjeç, i Provincës së Fretërve Minorë të Lombardisë, është vrarë nga turma e egërsuar me 12 shtator 2005, pas një aksidenti fatkeq të ndodhur në një rrugë të Kongos. Ai punonte që prej dy vitesh në Kongo Brazaville, dhe merrej kryesisht me fëmijët e rrugës, shëndetësi dhe katekizëm. U vra ndërsa po shkonte në shkollën e katekizmit.
Dom Ignazio Bara, 48 vjeç, është vrarë me 12 shtator 2005 në shtetin Jharkhand, në dioqezën Simdega të Indisë Verilindore, ndërsa po kërkonte të shmangtë përplasjen me një fisi dhe një grupi fondamentalist indù. Meshtari ishte edhe Drejtor i Shkollës së mesme Banabira në Simdega, dhe atë ditë po kërkonte të qetësonte turmat e irrituara dhe të shpërndante në mënyrë paqësore manifestuesit. Pasdite atij i janë afruar disa burra me motoçikleta dhe e kanë therur me thika deri në vdekje.
Dom Luis Velasquez Romero, 51 vjeç, meshtar meksikan i dioqezës së Tijuana, u vra me pistoletë: trupi i tij u gjet në një automobil afër një qendre tregtare, mëngjesin e 25 tetorit 2005. Meshtari, i cili ushtronte shërbesën e tij baritore në lagjen Colinas të Agua Caliente të Tajuana dhe ishte Gjykatës i Gjyqit kishtar dioqezan, i kishte duart e lidhura. Ishte një person shumë i dashur dhe i afrueshëm me njerëzit. Qyteti Tijuana, në kufi më SHBA është shpesh qendër fenomenesh të dhunës mes bandash narkotrafikantësh.
Suresh Barwa, 31 vjeç, e Marco Candelario Lasbuna, 22 vjeç, anëtarë të një kongregate rregulltare me të drejtë Dioqezane Missionaries of the Poor (MOP) që ju kushtohet ndihmës ndaj të të varfërve në Gjamaika, Indi, Uganda dhe Filipine, u vranë në Kingston të Gjamaikës mbrëmjen e 27 tetorit. Ata ishin së bashku në shtëpi ndërsa po lanin pjatat pas një festë dhe u vranë me të njëjtin plumb në kokë. Marco, me origjinë nga Filipinet jetonte që prej 5 muajsh në atë vend, ndërsa Suresh me kombësi indiane ishte aty që prej dy vitesh.
Motër Margarita Vásquez Sandino, 87 vjeç, është vrarë në Medellin (Kolumbi) ndërsa kuronte një të sëmurë më 11 nëntor 2005. Vrasja u bë nga një i ri i cili punonte në shtëpinë e motrave dhe kërkonte që ti vidhte, pasi motra në fjalë po përgatiste dhurata e Krishtlindjes për fëmijët e plagosur nga minat antinjeri.
Dom Philip Valayam, 46 vjeç, meshtar Salezian, i vrarë në natën mes 24 dhe 25 dhjetorit, menjëherë pasi kremtoi Meshën e Mesnatës kur po kthehej në bashkësinë e tij “Dom Bosko Youth Educational Services” të Nairobit në Kenya. Dom Philip ishte meshtar shumë i njohur. Ai lindi në Koodaranhi-Calicut të Indisë, u shugurua meshtar në 1988. Pasi arriti në Afrikën Perëndimore në 1995 si misionar, u dërgua që ta zhvillonte misionin e tij në Tanzani. Në 2001 u transferua në Nairobi. Vdekja mendohet të jetë pasojë e një sulmi të papritur në rrugë për ta vjedhur.