Kalon rezoluta për ndalimin e konflikt në Liban

[[A-SHKODRANI]]

Data e Publikimit: 12/08/2006

Autori i Lajmit:
BBC
Këshilli i Sigurimit të OKB-së ka miratuar unanimisht një rezolutë për t'i dhënë fund konfliktit në Liban.
Rezoluta bën thirrje për ndalim të plotë të armiqësive dhe dislokimin e ushtrisë libaneze dhe një force të zgjeruar të OKB-së prej 15 mijë trupash në Libanin e jugut.

Forcat izraelite do të tërhiqen me futjen e forcave ndërkombëtare dhe milicisë Hezbollah do t'i kërkohet të kalojë në veri të lumit Litani.

Sekretari i Përgjithshëm i OKB-së, Kofi Annan, tha se ai ishte shumë i zhgënjyer që Këshillit të Sigurimit iu desh kaq shumë kohë për të kërkuar që t'i jepet fund dhunës.

Ai tha se mosveprimi më shpejt kishte tronditur besimin e njerëzve në autoritetin e OKB-së.

Sekretarja amerikane e Shtetit, Condoleezza Rice, tha se rezoluta do të ndihmonte për të hapur rrugën për një paqe të qëndrueshme dhe për një Liban të ri dhe më të fortë.

Izraeli e Libani në favor


Izraeli është i gatshëm të reagojë ndaj thirrjeve të këtij këshilli dhe t'i japë një mundësi tjetër qeverisë në Liban dhe bashkësisë ndërkombëtare për të krijuar një realitet të ri në terren.


Dan Gillerman, ambasadori izraelit në OKB

Zoti Annan pritet që këtë fundjavë të kontaktojë me qeveritë libaneze dhe izraelite për të mundësuar ndërprerjen e luftimeve.

Si Izraeli ashtu edhe Libani kanë lënë të kuptohet se do ta pranojnë rezolutën.

Por zyrtarët izraelitë thanë se ofensiva ushtarake në Liban do të vazhdojë deri kur të paktën kjo marrëveshje të jetë aprovuar nga kabineti izraelit të dielën.

Ambasadori izraelit në OKB, Dan Gillerman, tha se Izraeli do ta pranonte kushtet e rezolutës.

"Izraeli është i gatshëm të reagojë ndaj thirrjeve të këtij këshilli dhe t'i japë një mundësi tjetër qeverisë në Liban dhe bashkësisë ndërkombëtare për të krijuar një realitet të ri në terren," tha përfaqësuesi izraelit në OKB.

Por ai paralajmëroi se moszbatimi me vendosmëri i rezolutës do t'i trimërojë më shumë guerrilasit e Hezbollahut dhe ata mund të vijnë përsëri "në këtë tryezë nëse jo brenda një jave, brenda një muaji apo një viti, të përballur me një tragjedi edhe më të madhe."


Asnjë më shumë se Libani nuk dëshiron të garantojë që ne të mos kthehemi këtu përsëri në gjashtë javë, gjashtë muaj apo gjashtë vjet.


Tarek Mitri, përfaqësuesi libanez

"Sepse atëhere, terroristët, pa dyshim të furnizuar me më shumë armë vrasëse nga Irani, do të bëhen më trima nga një demonstrim tjetër i mungesës sonë të angazhimit dhe vullnetit."

I ngarkuari me detyrën e ministrit të jashtëm libanez, Tarek Mitri, tha se shpresonte që rezoluta të sillte një fund të përhershëm të konfliktit.

"Libani ka kërkuar me urgjencë një armëpushim që ka mundësi të zbatohet që të gjitha armiqësitë të ndalojnë menjëherë dhe përgjithnjë," tha zoti mitri.

"Asnjë më shumë se Libani nuk dëshiron të garantojë që ne të mos kthehemi këtu përsëri në gjashtë javë, gjashtë muaj apo gjashtë vjet," tha përfaqësuesi libanez.

Ofensiva vazhdon

Ushtria izraelite ka filluar të zgjerojë ofensivën tokësore në Libanin e jugut, megjithë miratimin e rezolutës që kërkon ndalimin e armiqësive.

Njoftimet nga veriu i Izraelit thonë se kolona të gjata tankesh dhe trupash kaluan kufirin nën mbulesën e errësirës.

Në të gjithë Libanin ka pasur gjithashtu sulme të tjera ajrore, përfshirë disa sulme mbi qytetin-port jugor të Sidonit.

Zyrtarë izraelitë thonë se përparësi ushtarake tani është goditja e Hezbollahut së më shumë që të jetë e mundur para se në Libanin e jugut të dislokohet një forcë paqeruajtëse ndërkombëtare.