Mr. Mary Ward 1585-1645

[NoName]

Duhet të jesh ashtu siç shfaqesh dhe të shfaqesh ashtu siç je


Mr. Mary Ward 1585-1645



Mary Ward lindi me 23 janar 1585. Ajo ka lindur në Mulwith të Yorkshire, në Anglinë e Veriut. Ishte koha kur Reformat në Angli ishin të furishme. Prindërit e saj ishin besimtarë praktikantë katolikë. Ajo e kaloi fëmijërinë e saj në një kohë të vështirë për Kishën e besimtarët në Angli. Vitet e para të rinisë i kaloi tek gjyshi i saj në Holderness dhe pastaj shkoi tek prindërit e saj në Baltharpe në Osgodby. Në këtë periudhë, ajo ndjen se do të ishte murgeshë katolike. Babai nuk ishte i lumtur me zgjedhjen e së bijës. Ai mendonte se Mary nuk do të mund të ishte murgeshë në këtë periudhë kaq të vështirë reformash. Kështu, ajo shkon në St.Omer në Francë dhe ra në kontakt me motrat Klarisa. Këtu e kuptoi më mirë se Zoti e thërret të themelojë një Kongregatë të Motrave në vendin e saj duke kuptuar se prirja e saj nuk ishte rregulli i Motrave Klarisa.
Në Londër, në vitin 1617, Mary ra në kontakt me njerëzit e varfër dhe me ato që ishin nëpër burgje. Ajo ndihmon, ndërkohë, në fshehtësi edhe priftërinjtë. Ndjehet e lumtur që plotëson kështu vullnetin e Zotit. Këtu sigurohet edhe një herë se vullneti i Hyjit për të, është të themelojë Kongregatën e re për gruan, pranë Jezuitëve. Ishte kjo, në kohë, kur Kisha po përjetonte një kohë shumë të zymtë mbylljeje. Ajo ndjente se kishte një nevojë shumë të madhe për edukimin e vajzave, por në të njëjtën kohë nuk gjen edhe një përgjigje konkrete ne Kishë. Megjithatë, vullneti i saj dhe këmbëngulja në Hyjin e bëjnë që të mos pushojë së kërkuari nga Papa miratimin e Kongregatës, pasi dëshira e saj ishte që të hapte dyert e shkollave për vajzat.
Pas shumë përpjekjesh arriti edhe aprovimi i aktivitetit të saj nga ana e Papës, dhe më pas vdiq e lumtur pasi pa ëndrrën e saj të përmbushur.
Ajo ka thënë e na thotë gjithmonë: “Dashuria Hyjnore është një zjarr që nuk mund të shuhet, prandaj dhe është e pamundur ta duash Zotin dhe të mos duash të punosh për lavdinë e tij”.
Sot, Kongregata e Motrave të Loretos – IBVM- ecën në rrugën e saj, dhe aktualisht në këtë urdhër janë 5 mijë gra, të cilat punojnë në të gjithë Europën, dhe që prej një viti edhe në Shqipëri, si dhe në veri e jug të Amerikës e në shumë vende të Afrikës etj. Motrat, aktivitetin e tyre e kanë të përqendruar nëpër shkolla, punë baritore e përkujdesje shpirtërore, në mesin e njerëzve më të varfër, me refugjatët, emigrantët, nëpër burgje e spitale, pra, aty ku edhe nevojat janë më të mëdha.
Motoja e Motër Mary Ward lënë motrave të saj është “LIRI, DREJTËSI dhe VËRTETËSI”.
Jezusi është frymëzuesi dhe shoqëruesi në çdo hap të jetës së tyre. Ajo vazhdon të na thotë: “Duhet të jesh ashtu siç shfaqesh dhe të shfaqesh ashtu siç je”.