koncerti i madones ne Rome
KONCERTI SKANDAL I MADONES
70 mijë fansa mbushin stadiumin në një shfaqe të shfrenuar
Mirë se erdhët në cirkun blasfemik të Madonës së Pop-it, nepërkën e shndritshme, divën e papërmbajtur dhe kapriçoze! Mirë se erdhët në arenën e jashtëzakonshme të mallkimeve erotike të frymëzuara shpirtërisht nga një këngëtare, e cila guxon të kryqëzohet mes qytetit që ruan trashëgiminë e Krishtit! Djallja e kultit profan të muzikës dance ka mbërritur në qytetin e papëve dhe të martirëve të parë kristianë, duke e ndezur stadiumin olimpik me pasqyrat prozaike të diskotekave, tymin e duhanit dhe pantomima kalorësiakësh. Për të bota është një sallë e pafundme vallëzimi. Megjithatë, metafora është tërësisht elementare, sepse midis një koreografie dhe tjetrës qëndron mirë edhe një kryqëzim, sigurisht skandaloz, por që e lejon të shfaqet e ekzagjeruar, befasuese dhe blasfemike, mbi të gjitha sepse vjen me një pjesë të famshme që titullohet “Live to tell” (E gjallë për të treguar) dhe e kryqëzuar me një litar me gjemba, Madona shfaqet e veshur “Jean Paul Gaultier”. Një palë pantallona të vogla të holla dhe një bluzë portokalli, vetëm kaq. Kryqi i përbërë nga qindra pasqyra ngrihet nga toka, duke mbajtur të shtrënguar pas vetes në mënyrë imponuese lajmëtaren e pafytyrë. Duket se është një nga ato amerikanet evangjeliste me predikues të shfrenuar dhe efekte teatrale. Ajo nuk bërtet, këndon, por stili është i njëjti dhe numri përfundon mes organeve dhe kambanave. E bukura qëndron në faktin që për të ka qenë thjesht një kontribut, edhe pse provokimi nuk mund të kalojë pa u vënë re dhe në fund duket thjesht si një homazh ndaj të shenjtës femërore, për të cilën flitet në “Kodin e da Vinçit”. Ndoshta dëshiron të tregojë se në kryq qëndron Maria Maddalena? Sigurisht, kënga flet për një sekret të ruajtur gjatë. Me të zemërohen të gjithë, katolikë, ortodoksë, myslimanë dhe hebrenj. Por a është e drejtë të merret kaq seriozisht? Le të nisim nga fillimi. Një triumf i dyfishtë kalorësiak: ajo që kalëron dhe kalërohet nga balerinët e saj. Njerëzit ekzaltohen, personat e shumtë gei që janë të pranishëm duartrokasin të lumtur, adoleshentet vazhdojnë të shohin tek ajo modelin e “çliruar”, që me pasionin e saj imponon një ide të fortë të shthurjes femërore. Kuajt janë pasioni i saj i jashtëzakonshëm, gati obsesiv dhe duke evituar banalitetet psikoanalitike, mund t’i japim një pjesë irracionale kafshërore që bie në kontrast me eficencën djallëzore të spektakleve të saj dhe më pas, me këto fantazi të shfrenuara vazhdon me këngë si “Get together” dhe “Like a virgin”, një prej atyre këngëve që 20 vjet më parë krijuan mitin Madona me veshjet e saj të mërzitshme dhe pamjen e pafytyrë të një Lolite të specializuar dhe të konsumuar. Vallëzon thuajse gjatë gjithë kohës, por aroma e muzikës së saj shpërndahet nga një ndarje e koncerteve në pjesë të ndryshme: ajo e kuajve, pjesa politiko-spirituale që nis me kryqëzimin e “Live to tell” dhe mbërrin deri në “Sorry”, ku në ekrane shfaqen fytyra politike dhe religjioze, një paraqitje e lavdishme që shkon nga Musolini tek Berluskoni, duke kaluar tek Bush, Hitler dhe Papa Ratzinger, i cili nëse në mënyrë absurde do të kishte pranuar ftesën e këngëtares, do të duhej të përballej përveç kryqëzimit edhe me imazhin e tij, të renditur mes njerëzve të këqij të tokës. Spektakli vazhdon me një pjesë, le të themi rok, ku Madona zbret nga piedestali, heq maskën e një shfaqjeje të vrullshme dhe këndon disa pjesë me kitarë “Substitute for love” dhe “Paradise (not for me)”. Një moment zhgënjyes për fansat që prisnin emocione të forta. E megjithatë këto emocione do të mbërrijnë kur shpërthen megadiskoteka e krijuar fillimisht nga shfaqja e saj brenda një topi gjigand pasqyre, e cila kishte kushtuar pak a shumë sa një kishëz e nivelit të mesëm, që hapet si një portokall, nga i cili del Venera e patinuar. Në fund është rezervuar vërtet një “disko e ferrit” në një spektakël që rreshket nga e shenjta tek blasfemia me lëkundje impresionuese dhe që nga “Music” e deri tek “Hung up” ekziston e gjithë koha për të kërcyer brenda stadiumit, për të imituar lëvizjet e Toni Maneros. Balerinë, akrobatë, gjimnastë, kërcimtarë fantastiko-shkencorë. Aq të aftë, sa që mund të mbulojnë lëvizjet më pak të shkathëta të vetë Madonës, që mes tyre duket veç të tjerave e mrekullueshme, por nuk është e tillë, sepse pas pak ditësh do të mbushë 48 vjeçe, që me gjithë respektin gjithmonë është një moshë e konsiderueshme për të qëndruar dy orë në nivele të tilla. Nëse arrin të mos ndjehet e fyer, është vërtet argëtuese. Me kushtin që të mos e marrë seriozisht, me kushtin që të pranojë lojën e tejkalimit të të gjitha ndjesive më të shndritshme të nxjerra në skenë nga kultura pop e këtyre viteve. Me kushtin që të argëtohet, nga ideja se në skenë është ngjitur një Madonë, por prej letre.
Entuziazmi
Tepër të entuziazmuar fansat e ardhur nga e gjithë Italia, që valëvisin posterat. Më i veçanti ishte: “Madona, shenjtore”
Akrobacitë Rreth yllit të pop-it një trupë përrallore baleti: balerinë dhe akrobatë, të cilët bëjnë të duket e mrekullueshme 48-vjeçarja
VIPATËshtë e gjatë lista e VIP-ave që kanë marrë pjesë në të vetmen shfaqje në Itali të Madge: që nga Francesco Totti dhe Ilary Blasi tek Piero Chiambretti, që nga Baglioni tek Pino Daniele, që nga Stefano Acorsi tek Alex Del Piero, e deri tek Irene Grandi, Elisa, Francesco Renga me Ambra Angiolinin. Mes të huajve kanë qenë të pranishëm Pedro Almodovar, Penelope Cruz dhe Lenny Kravitz.
Papa
Si do t’iu përgjigjet Maria Luisa Ciccone drejtuesve të Kishës Katolike, që në vigjilje të koncertit të saj të shumëpritur në stadiumin olimpik të Romës denoncojnë sakrilegjin e saj të ri në këtë turne botëror? “Madona ka ftuar Papën në koncert, që të shohë me sytë e tij elokuencën dhe bukurinë të shprehura përmes humanizmit të Madonës gjatë turneut ‘Live to tell’”, replikën në gazetën nju jorkeze “Daily News” thotë zëdhënësja e saj Liz Rosenberg.
Në koncert shumë të rinj, por edhe 40-vjeçarë
“Shenjtore”, ulërima e fansave
“Për të ardhur tek ti nuk kemi shkruar në meshë”, kjo është një prej shumë parullave provokuese që spikasnin mes publikut. Të ardhur nga e gjithë Italia. dhe të frymëzuar kanë vallëzuar pandërprerë në skenë për më tepër se tre orë, duke filluar që në orën tetë të mbrëmjes. Madona ka thënë se dëshironte ta transformonte botën në një pistë vallëzimi, pra në një diskotekë dhe e ka mbajtur premtimin. Shiu? Fatmirësisht ka zgjatur vetëm 30 minuta. Në orën 21:00 stadiumi është plotësisht i mbushur. Massimo Scaneo, 28 vjeç, ka një fashë me shkrimin “Madona” midis flokëve dhe ka ardhur nga Palermo me një grup miqsh. “Kemi marrë një shtëpi me qira këtu posaçërisht për koncertin. Madona më ka pëlqyer gjithmonë dhe nuk do të hiqja dorë nga ky eveniment për asgjë në botë”. Pranë tij është një tjetër grup fansash. Janë të gjithë të ngjyrosur me xhel nëpër flokë dhe këmishat me fytyrën e yllit të pop-it. “Kam ardhur nga Bari, - tregon Sara Scordari, 32 vjeçe. - Madona më pëlqen për natyrën e saj karizmatike dhe për aftësinë që ka për t’i çuditur të tjerët. Nuk është e thjeshtë”. Pikërisht në orën 21:00, një moment qetësie, thuajse irreale. Dj ndal miksimin dhe në qetësi presin Madonën. Fillojnë thirrjet në kor “ola”. Madona, pas gjysmë ore ngjitet në skenë. Një tjetër shpërthim dritash për dy orë rresht. “I pëlqen shumë nënës sime, që nuk mundi të vinte”, tregon Caterina Rossi, 20 vjeçe nga Milano. “Erdha në koncert për të kuptuar pasionin e saj dhe zbulova që Madona është një këngëtare fantastike. Një koncert shumë i bukur”.
Panorama
Përgjigju Duke Cituar
Postuar më parë nga xfiles
Krijoni Kontakt